1. Ke ka baka la’ng re swanetše go kwa Jehofa?

RE SWANETŠE go kwa * Jehofa ka gobane ke Mmopi wa rena. Ka ge e le Mmopi wa rena, o na le tshwanelo ya go re beela melao. (Kut. 4:11) Eupša lebaka le lengwe le legolo la gore re kwe Modimo ke gore tsela yeo a bušago ka yona e di phala ka moka. Ke kgale batho ba buša batho ba bangwe. Eupša ge re bapetša tsela ya bona ya go buša le ya Jehofa, re kgona go bona gore Jehofa ke Mmuši yo bohlale, yo a nago le lerato, yo a gaugelago batho le yo a nago le kwelobohloko go feta babuši bao.—Ek. 34:6; Baroma 16:27; 1 Joh. 4:8.

2. Go ya ka Baheberu 12:9-11, re na le mabaka afe a go kwa Jehofa?

² Jehofa o nyaka gore re mo kwe ka gobane re mo rata e bile re mo tšea e le Tatago rena yo a re ratago, e sego ka gobane re no tšhaba go mo kgopiša. Lengwalong leo Paulo a le ngwaletšego Baheberu, o hlalosa gore re swanetše ‘go ikokobeletša Tatago rena’ ka gobane o re nea tlwaetšo ‘e le gore re holege.’—Bala Baheberu 12:9-11.

3. (a) Re bontšha bjang gore re kwa Jehofa? (b) Re tlo araba dipotšišo dife sehlogong se?

³ Re kwa Jehofa ge re dira sohle seo re ka se kgonago go latela melao ya gagwe dilong ka moka, le ka go lwantšha kganyogo ya go nyaka go ithekga ka tlhaologanyo ya rena. (Die. 3:5) Go bonolo gore re kwe Jehofa ge e ba re tseba dika tša gagwe tše dibotse. Ke ka baka la’ng re re’alo? Ka gobane dika tšeo di bonagala  dilong ka moka tšeo a di dirago. (Ps. 145:9) Ge re dutše re ithuta ka Jehofa, re tla mo rata kutšwanyana. Le gona ge re mo rata, ga go hlokagale gore re newe melao ya seo re swanetšego go se dira le seo re sa swanelago go se dira. Re leka go ithuta go nagana ka tsela yeo Jehofa a naganago ka yona le tsela yeo a ikwago ka yona, gotee le go phema go dira dilo tše mpe. (Ps. 97:10) Eupša ka dinako tše dingwe ga go bonolo go kwa Jehofa. Ka baka la’ng? Ke’ng seo bagolo ba ka ithutago sona go Mmuši Nehemia? Ke’ng seo botate ba ka ithutago sona go Kgoši Dafida? Le gona bomma ba ka ithuta’ng go Maria mmago Jesu? Re tlo hwetša dikarabo tša dipotšišo tše sehlogong se.

4-5. Go ya ka Baroma 7:21-23, ke ka baka la’ng re ka thatafalelwa ke go kwa Jehofa?

⁴ Lebaka le lengwe leo le ka dirago gore re thatafalelwe ke go kwa Jehofa ke gore re na le sebe e bile ga se ra phethagala. Ka gona ga se ka mehla go lego bonolo go kwa Modimo. Ka morago ga gore Adama le Efa ba se kwe Modimo ka go ja seenywa seo a bego a ba ileditše gore ba se se je, ba ile ba kgetha go ipeela melao ya se se nepagetšego le se se fošagetšego. (Gen. 3:22) Lehono, batho ba bantši ga ba kwe Jehofa, gomme go swana le Adama le Efa ba ipeela melao ya se se nepagetšego le se se fošagetšego.

⁵ Gaešita le ge rena re tseba Jehofa e bile re mo rata, ka dinako tše dingwe re ka thatafalelwa ke go mo kwa. Moapostola Paulo o ile a lebeletšana le bothata bjo. (Bala Baroma 7:21-23.) Go swana le Paulo, le rena re nyaka go kgahliša Jehofa. Eupša ka mehla re swanelwa ke go lwantšha kganyogo ya go dira dilo tše di fošagetšego.

6-7. Lebaka le lengwe leo le ka dirago gore re thatafalelwe ke go kwa Jehofa ke lefe? Nea mohlala.

⁶ Lebaka le lengwe gape leo le ka dirago gore re thatafalelwe ke go kwa Jehofa ke gore re tutuetšwa ke setšo sa moo re goletšego gona. Dikgopolo tše dintši tša batho ga di dumelelane le dikgopolo tša Jehofa, ka gona re swanetše go leka ka thata gore re se ke ra nagana go swana le bona. A re lebeleleng mohlala o tee feela.  

⁷ Dinageng tše dingwe go tlwaelegile gore bafsa ba gapeletšwe go fetša nako e ntši ba dira tšhelete e ntši. Kgaetšedi yo a bitšwago Mary * o ile a gapeletšwa go dira sona seo. Pele a ka ithuta ka Jehofa, o be a tsena se sengwe sa dikolo tša maemo a godimo nageng ya gabo. Lapa la gabo Mary le ile la mo gapeletša gore a hwetše mošomo woo o tlago go mo patela tšhelete e ntši gomme a be le maemo a godimo kudu setšhabeng. Le yena o be a nyaka gore go be bjalo. Eupša ka morago ga gore a ithute ka Jehofa le go mo rata, o ile a fetoša seo a bego a nyaka go se dira ka bophelo bja gagwe. Lega go le bjalo, go dira seo ga go bonolo ka gobane o re: “Ka dinako tše dingwe ke hwetša dibaka tša go šoma mešomo yeo e ka mpatelago tšhelete e ntši, eupša ke a tseba gore e tla ntšhitiša go hlankela Jehofa ka tsela yeo ke mo hlankelago ka yona gona bjale. Ka baka la tsela yeo ke godišitšwego ka yona, ke sa thatafalelwa ke go gana mešomo yeo. Ke swanelwa ke go lopa Jehofa gore a nthuše gore ke se ke ka lekega gomme ka amogela mešomo yeo e tlago go ntšhitiša go mo hlankela.”—Mat. 6:24.

8. Ga bjale re tlo bolela ka’ng?

⁸ Ge re ekwa Jehofa, go holega rena. Eupša bao ba neilwego matla a itšego a bolaodi, bjalo ka bagolo, botate le bomma ba na le lebaka le lengwe la gore ba kwe Modimo ka gobane ge ba dira seo ba tla hola ba bangwe. Ga bjale anke re boleleng ka mehlala ya ka Beibeleng yeo e tlago go re ruta kamoo re ka dirišago matla a bolaodi ka tsela yeo e kgahlišago Jehofa.

9. Nehemia o ile a lebeletšana le mathata afe?

⁹ Jehofa o neile bagolo boikarabelo bjo bohlokwa kudu bja go hlokomela batho ba gagwe. (1 Pet. 5:2) Bagolo ba ka ithuta dilo tše dintši tseleng yeo ka yona Nehemia a ilego a swara batho ba Modimo. Ka ge Nehemia e be e le mmuši wa Juda, o be a na le boikarabelo bjo bogolo kudu. (Neh. 1:11; 2:7, 8; 5:14) Nagana ka a mangwe a mathata ao Nehemia a ilego a lebeletšana le ona. O ile a kwa gore setšhaba se be se šilafaditše tempele e bile se sa thekge Balefi ka meneelo, go etša ge Molao wa Moshe o be o laetše gore se dire bjalo. Bajuda ba be ba sa latele molao wa Sabatha, e bile ba bangwe ba bona ba be ba nyetše basadi bao ba bego ba sa hlankele Jehofa. Mmuši Nehemia o be a tlo swanelwa ke go rarolla bothata bjo bjo bogolo.—Neh. 13:4-30.

10. Nehemia o ile a dira’ng ge a be a lebeletšane le mathata?

¹⁰ Nehemia ga se a ka a diriša matla a gagwe gampe ka go gapeletša batho ba Modimo gore ba latele melao yeo a ipeetšego yona. Go e na le moo, o ile a rapela Jehofa ka go tšwa pelong gomme a mo kgopela gore a mo thuše, ke moka a ruta setšhaba Molao wa Jehofa. (Neh. 1:4-10; 13:1-3) Le gona, Nehemia o ile a šoma gotee le batho ba gabo, a ba thuša le go aga lefsa maboto a Jerusalema.—Neh. 4:15.

11. Go ya ka Bathesalonika ba Pele 2:7, 8, bagolo bja swanetše go swara phuthego bjang?

¹¹ Bagolo ba ka no se lebeletšane le mathata ao a swanago le a Nehemia, eupša ba ka mo ekiša ka ditsela tše mmalwa. Ka mohlala, ba ka šoma ka thata go thuša bana babo bona le dikgaetšedi. Le gona ga ba ikwe ba phagametše bana babo bona ka baka la matla a bolaodi ao Jehofa a ba neilego ona. Go e na le moo, ba swara phuthego ka botho. (Bala 1 Bathesalonika 2:7, 8.) Ka ge ba ikokobeditše e bile ba rata batho, ba boledišana le bona gabotse. Andrew, yoo a nago le mengwaga e mentši e le mogolo o re: “Ke lemogile gore gantši bana babo rena  le dikgaetšedi ba arabela gabotse ge mogolo a bolela le bona ka botho. Se se dira gore phuthego e dirišane gabotse le bagolo.” Tony yoo le yena a nago le nako e telele e le mogolo o re: “Ke leka go diriša keletšo yeo e lego go Bafilipi 2:3 gomme ka mehla ke dira sohle seo nka se kgonago gore ke lebelele batho ba bangwe ba mpheta ka bogolo. Se se nthuša gore ke se ke ka gapeletša batho ba bangwe gore ba nkwe.”

12. Ke ka baka la’ng bagolo ba swanetše go ba le boikokobetšo?

¹² Bagolo ba swanetše go ba le boikokobetšo, go swana le ge Jehofa a ikokobeditše. Gaešita le ge Jehofa e le Mmuši Ramatlaohle, “o a inama” gore a tsoše “mmotlana leroleng.” (Ps. 18:35; 113:6, 7) Ge e le gabotse, Jehofa o hloile bao ba ikgantšhago le go ikgogomoša.—Die. 16:5.

13. Ke ka baka la’ng mogolo a swanetše go ‘laola leleme la gagwe’?

¹³ Tsela e nngwe yeo mogolo a swanetšego go bontšha ka yona gore o kwa Jehofa ke ka go ‘laola leleme la gagwe.’ Ge e ba a sa dire bjalo, a ka bolela gampe le motho yo a kwago eka ga a mo hlomphe. (Jak. 1:26; Bagal. 5:14, 15) Andrew yoo re boletšego ka yena pejana o re: “Ka dinako tše dingwe ke be ke ikwa eka nka ja ka meno ngwanabo rena goba kgaetšedi yoo ke bego ke ekwa eka ga a ntlhomphe. Eupša ke ile ka naganišiša ka mehlala ya banna ba botegago ba ka Beibeleng, gomme seo se nthušitše gore ke bone bohlokwa bja go dula ke ikokobeditše le go dula ke išitše maswafo fase.” Bagolo ba bontšha gore ba kwa Jehofa ge ba boledišana le ba bana babo bona le dikgaetšedi ka botho le ka lerato, go akaretša le bagologotee le bona.—Bakol. 4:6.

14. Jehofa o neile botate boikarabelo bofe, gona o nyaka gore ba dire’ng?

¹⁴ Jehofa o neile botate boikarabelo bja go ba dihlogo tša malapa gomme o nyaka gore ba rute bana ba bona le go ba nea tayo. (1 Bakor. 11:3; Baef. 6:4) Eupša seo ga se re gore botate ba swanetše go diriša matla a bona ka tsela yeo ba ratago. Ba ikarabela go Jehofa tseleng yeo ba swarago malapa a bona ka yona ka ge e le yena a thomilego lapa. (Baef. 3:14, 15) Botate ba bontšha gore ba kwa Jehofa ka go diriša matla a bona a bolaodi ka tsela yeo e kgahlišago Jehofa. Ba ka ithuta dilo tše dintši ka go bala ka bophelo bja Kgoši Dafida.

15. Kgoši Dafida o beetše botate mohlala ofe o mobotse?

¹⁵ Jehofa o be a kgethile Dafida gore e be hlogo ya lapa la gagwe gotee le ya setšhaba ka moka sa Isiraele. Ka ge Dafida e be e le kgoši, o be a neilwe matla a magolo kudu a bolaodi. Eupša ka dinako tše dingwe o ile a diriša matla ao gampe gomme a dira diphošo tše dikgolo.  (2 Sam. 11:14, 15) Lega go le bjalo, o ile a bontšha gore o kwa Jehofa ka go amogela tayo. O ile a tšhollela pelo ya gagwe go Jehofa ge a be a mo rapela. Le gona o ile a dira sohle seo a ka se kgonago gore a kwe keletšo yeo e tšwago go Jehofa. (Ps. 51:1-4) Go oketša moo, o be a na le boikokobetšo ka gobane ga se a ka a amogela feela keletšo yeo e bego e etšwa go banna, eupša o ile a amogela le yeo e bego e etšwa go basadi. (1 Sam. 19:11, 12; 25:32, 33) Dafida o ile a ithuta diphošong tša gagwe gomme a dira gore go hlankela Jehofa go tle pele bophelong bja gagwe.

16. Botate ba ka ithuta’ng go Dafida?

¹⁶ Ke dilo dife tšeo botate ba ka ithutago tšona go Kgoši Dafida? Ba ka ithuta gore ga se ba swanela go diriša gampe matla ao Jehofa a ba neilego ona. Ba swanetše go amogela diphošo tša bona, gomme ba latele keletšo yeo e tšwago Mangwalong yeo ba e newago ke ba bangwe. Ge ba ka dira seo, malapa a bona a tla ba hlompha ka ge ba na le boikokobetšo. Ge tate a rapela le lapa la gagwe, o swanetše go ntšhetša Jehofa sa mafahleng, gomme a dire gore ba lapa la gagwe ba kwe kamoo a mmotilego ka gona. Le gona sa bohlokwa le go feta, tate o swanetše go etiša pele go hlankela Jehofa. (Doit. 6:6-9) Mohlala wa gagwe o mobotse ke mpho e kgolokgolo yeo a ka e neago lapa la gagwe.

17. Jehofa o neile bomma boikarabelo bofe?

¹⁷ Jehofa o neile mma boikarabelo bjo bohlokwa ka lapeng, le gona o mo neile boikarabelo bjo itšego bja go laola bana ba gagwe. (Die. 6:20) Dilo tšeo mma a di dirago le go di bolela, di ka kgoma bana ba gagwe bophelo bja bona ka moka. (Die. 22:6) Ela hloko dilo tšeo bomma ba ka ithutago tšona go Maria mmago Jesu.

18-19. Bomma ba ka ithuta’ng go Maria?

¹⁸ Maria o be a tseba Mangwalo gabotse. O be a hlompha Jehofa kudu e bile a na le tswalano e botse kudu le yena. O be a ikemišeditše go latela tlhahlo ya Jehofa gaešita le ge go dira seo go be go tla fetoša bophelo bja gagwe.—Luka 1:35-38, 46-55.

¹⁹ Bomma ba ka ekiša Maria ka ditsela tše mmalwa. Ba ka mo ekiša bjang? Sa pele, ba swanetše go tiiša tswalano ya bona le Jehofa ka go ithuta Beibele ba nnoši, gotee le go rapela ka mehla. Sa bobedi, ba swanetše go ikemišetša go dira diphetogo maphelong a bona e le gore ba kgahliše Jehofa. Ka mohlala, mma a ka ba a godišitšwe ke batswadi bao ba bego ba fela pelo kapejana e bile ba sa bolele le yena gabotse. Ka gona mma yoo a ka nagana gore go lokile gore le yena a godiše bana ba gagwe ka tsela e swanago. Gaešita le ka morago ga gore o ithute kamoo Jehofa a nyakago o swara bana ba gago ka gona, o ka hwetša go le thata gore  o dule o išitše maswafo fase le go se ba felele pelo, kudukudu ge o lapile e bile ba sa go kwe. (Baef. 4:31) Ge o ikwa ka tsela yeo, go bohlokwa kudu gore o kgopele Jehofa gore a go thuše. Mma yo a bitšwago Lydia o re: “Ka dinako tše dingwe, ke be ke swanelwa ke go rapela Jehofa ka mo go tseneletšego e le gore ke se ke ka galefela morwa wa ka ge a sa nkwe. Le gona ke be ke re mola ke bolela le yena, ke homole ganyenyane gomme ke rapele Jehofa ka setu gore a nthuše. Thapelo e nthuša gore ke dule ke išitše maswafo fase.”—Ps. 37:5.

20. Ke bothata bofe bjoo bomma ba bangwe ba lebeletšanago le bjona, gona ba ka bo fenya bjang?

²⁰ Bothata bjo bongwe bjo bomma ba bangwe ba ka lebeletšanago le bjona ke gore ba ka hwetša go le thata go bontšha bana ba bona gore ba a ba rata. (Tito 2:3, 4) Bomma ba bangwe ba godišeditšwe malapeng ao batswadi ba bona ba bego ba sa ba bontšhe lerato. Ge e ba le wena o godišitšwe ka tsela yeo, ga se wa swanela go bušeletša phošo yeo batswadi ba gago ba e dirilego. Mma yo a kwago Jehofa a ka swanelwa ke go ithuta go bontšha bana ba gagwe lerato. Go ka ba thata gore a fetoše kamoo a naganago ka gona, kamoo a ikwago ka gona, le kamoo a dirago dilo ka gona. Eupša a ka kgona go dira diphetogo tšeo gomme di tla hola yena le lapa la gagwe.

21-22. Go ya ka Jesaya 65:13, 14, ke mehola efe yeo re e hwetšago ge re ekwa Jehofa?

²¹ Kgoši Dafida o be a tseba mehola ya go kwa Jehofa. O ngwadile gore: “Ditayo tše di tšwago go Jehofa di lokile, di thabiša pelo; taelo ya Jehofa e hlwekile, e phadimiša mahlo. Le gona mohlanka wa gago di mo lemošitše; go di lota go na le moputso o mogolo.” (Ps. 19:8, 11) Lehono, re kgona go bona phapano magareng ga bao ba kwago Jehofa le bao ba ganago keletšo ya gagwe e lerato. Bao ba kwago Jehofa ba “goeletša ka lethabo ka baka la boemo bjo bobotse bja pelo.”—Bala Jesaya 65:13, 14.

²² Ge bagolo, botate le bomma ba ekwa Jehofa, maphelo a bona a ba kaone, malapa a bona a a thaba gomme phuthego ka moka e ba le botee. Sa bohlokwa le go feta, ba thabiša pelo ya Jehofa. (Die. 27:11) Ruri ga go na selo seo se thabišago go feta se!