1. Go ya ka Mateo 11:28-30, Jesu o ile a holofetša lešaba leo le bego le mo theeditše eng?

JESU o ile a laletša lešaba leo le bego le mo theeditše gore: “Tlang go nna,” gomme a le holofetša gore: “Ke tla le lapološa.” (Bala Mateo 11:28-30.) Seo Jesu a se boletšego e be e se mantšu feela ao a sa rego selo. Ka mohlala, nagana ka seo a ilego a se direla mosadi yo a bego a babja o šoro.

2. Jesu o ile a dira’ng mosadi yo a bego a babja o šoro?

² Nagana ka boemo bjo: Mosadi šo o tloga a hloka thušo. O ile a ya dingakeng tše dintši a nagana gore di tla mo thuša. Eupša gaešita le ka morago ga mengwaga e 12, go be go se na ngaka yeo e kgonnego go mo fodiša. Go ya ka molao wa Moshe, o be a se a hlweka. (Lef. 15:25) Ke moka o ile a kwa gore Jesu o kgona go fodiša batho bao ba babjago, gomme a ya go mo nyaka. Ka morago ga gore a mo hwetše, o ile a kgwatha morumo wa seaparo sa gagwe sa ka ntle, gomme gateetee a fola! Jesu ga se a no fodiša mosadi yoo. Eupša tsela yeo a ilego a mo swara ka yona, e ile ya dira gore mosadi yoo a ikwe a ratwa e bile a hlompšha. Ka mohlala, ge a be a bolela le yena o ile a bontšha gore o be a mo rata le go mo hlompha ka go diriša lentšu “morwedi.” Ruri mosadi yoo o swanetše go ba a ile a ikwa a lapologile e bile a matlafetše!—Luka 8:43-48.

3. Re tlo araba dipotšišo dife sehlogong se?

³ Ela hloko gore mosadi yo o ile a ya go Jesu. O ile a dira maiteko a gore a ye go yena. Le lehono go sa le bjalo, re swanetše go dira maiteko a gore re ye go Jesu. Ke therešo gore mehleng ye re  phelago go yona, Jesu a ka se fodiše ka mohlolo batho bao ba babjago bao ba dirago maiteko a go ya go yena. Eupša o sa dutše a re laletša gore: ‘Tlang go nna gomme ke tla le lapološa.’ Sehlogong se re tlo araba dipotšišo tše tše hlano: (1) Re swanetše go dira’ng gore re ye go Jesu? (2) Jesu o be a era go re’ng ge a be a re: “Rwalang joko ya ka”? (3) Re ka ithuta’ng go Jesu? (4) Ke ka baka la’ng mošomo wo a re neilego wona o lapološa? (5) Gona re ka dira’ng gore re tšwele pele re lapološwa ke joko ya Jesu?

4-5. Ke ditsela dife tšeo ka tšona re ka yago go Jesu?

⁴ Tsela e nngwe yeo re ka yago go Jesu ke ka go leka ka gohle go ithuta dilo tše dintši tšeo a ilego di bolela le tšeo a ilego a di dira. (Luka 1:1-4) Ke boikarabelo bja rena go ithuta dipego tša Jesu. Le gona re ya go Jesu ka go dira phetho ya gore re kolobetšwe gomme re be barutiwa ba gagwe.

⁵ Tsela e nngwe ya go ya go Jesu ke ka go ya go bagolo ba phuthego ge re hloka thušo. Jesu o diriša “dimpho tšeo e lego banna” gore di hlokomele dinku tša gagwe. (Baef. 4:7, 8, 11; Joh. 21:16; 1 Pet. 5:1-3) Re swanetše go dira maiteko gore bagolo ba re thuše. Re ka se letele gore ba re naganele gore re hloka eng le gore re naganne eng. Ela hloko seo ngwanabo rena Julian a se boletšego, o re: “Ke ile ka swanelwa ke go tlogela kabelo ya ka ya Bethele ka baka la bolwetši. Ka gona yo mongwe wa bagwera ba ka o ile a nkgothaletša gore ke yo kgopela bagolo gore ba tle ba nkgothatše. Mathomong ke be ke nagana gore ga ke hloke go kgothatšwa. Eupša ka morago ke ile ka kgopela thušo go bagolo, gomme ketelo ya bona e ile ya ba mpho yeo e di phalago ka moka.” Bagolo ba botegago ba bjalo ka bao ba babedi ba ilego ba etela Julian, ba ka re thuša go tseba “monagano wa Kriste,” ke gore, go kwešiša le go ekiša monagano le ditiro tša Jesu. (1 Bakor. 2:16; 1 Pet. 2:21) Ge ba re thuša ka tsela ye, ruri ba re nea mpho yeo e di phalago ka moka.

6. Jesu o be a era go re’ng ge a be a re: “Rwalang joko ya ka”?

⁶ Ge Jesu a be a re: “Rwalang joko ya ka,” o swanetše go ba a be a e ra gore, “Amogelang bolaodi bja ka.” Le gona mohlomongwe a ka be a be a e ra gore, “Tsenang ka jokong le nna, gomme re šomeleng Jehofa re le gotee.” Go sa šetšwe gore o be a era go reng, joko e bolela gore re swanetše go šomela mong wa rena.

7. Go ya ka Mateo 28:18-20, ke mošomo ofe wo re o neilwego, gona re ka kgodišega ka eng?

⁷ Re amogela taletšo ya Jesu ge re ineela go Jehofa le go kolobetšwa. Jesu o laletša motho yo mongwe le yo mongwe gore a tle go yena, le gona a ka se tsoge a ganne motho yo a nyakago go hlankela Jehofa ka pelo ya gagwe ka moka. (Joh. 6:37, 38) Balatedi ba Kriste ka moka ba neilwe tokelo ya go dira mošomo wo Jehofa a bego a laetše Jesu gore a o dire. Re ka kgodišega gore Jesu o tla dula a na le rena go re thuša go phetha mošomo wo.—Bala Mateo 28:18-20.

8-9. Ke ka baka la’ng batho ba bego ba ikokobeditše ba be ba nyaka go ba kgauswi le Jesu, gona re swanetše go ipotšiša dipotšišo dife?

⁸ Batho bao ba bego ba ikokobeditše ba be ba nyaka go ba kgauswi le Jesu. (Mat. 19:13, 14; Luka 7:37, 38) Ke ka baka la’ng ba be ba nyaka go ba kgauswi le yena? Nagana ka tsela yeo Jesu a bego a fapana le Bafarisei ka yona. Bafarisei ba be ba sa iše felo ka batho e bile ba ikgantšha. (Mat. 12:9-14) Eupša Jesu o be a na le lerato e bile a ikokobeditše. Bafarisei ba be ba ikgantšha ka maemo a phagamego ao ba bego ba na le ona setšhabeng, eupša Jesu yena a be a sa ikgantšhe. O ile a ruta barutiwa ba gagwe gore ba be ba swanetše go ikokobetša le go hlankela ba bangwe. (Mat. 23:2, 6-11) Bafarisei ba be ba bontšha batho  gore ba ba phagametše ka gobane batho ba be ba boifa seo Bafarisei ba ka ba dirago sona ge e ba ba be ba ka se ba kwe. (Joh. 9:13, 22) Eupša Jesu o be a lapološa ba bangwe ka go ba bontšha lerato le go ba botša mantšu a botho.

⁹ Na o ithutile go bontšha lerato le go botša batho mantšu a botho go swana le Jesu? Ka gona ipotšiše gore: ‘Na batho ba bangwe ba mpona ke le motho yo boleta e bile ke ikokobeditše? Na ke ikemišeditše go hlankela ba bangwe ka go ba direla mešomo yeo ba bangwe ba e bonago e sa re selo? Na ke bontšha ba bangwe botho?’

12-14. Ke ka baka la’ng mošomo wo Jesu a re filego wona o lapološa?

¹² Ke ka baka la’ng go dira mošomo wo Jesu a re filego wona go lapološa? Go na le mabaka a mantši, eupša ela hloko a sego kae.

¹³ Re na le baetapele ba ba kaonekaone. Jehofa, e lego Moetapele wa rena yo a Phagamego, ga a sehlogo e bile o leboga bahlanka ba gagwe ka dilo tšeo ba mo direlago tšona. O tšeela godimo mošomo wo re o dirago. (Baheb. 6:10) Le gona o re nea matla ao re a hlokago e le gore re kgone go phetha mošomo wo a re neilego wona. (2 Bakor. 4:7; Bagal. 6:5) Jesu, e lego Kgoši ya rena, o re rutile ka mohlala wa gagwe kamoo re swanetšego go swara ba bangwe ka gona. (Joh. 13:15) Le gona bagolo bao ba re hlokomelago ba leka go ekiša Jesu ka ge e le “modiši yo mogolo.” (Baheb. 13:20; 1 Pet. 5:2) Ba leka go ba botho, go re kgothatša gotee le go ba le sebete ge ba dutše ba re ruta le go re šireletša.

¹⁴ Re na le bagwera ba kgonthe. Ga go na batho bao ba ratanago go swana le Dihlatse tša Jehofa. E bile ga go na batho bao ba dirago mošomo o bohlokwa wa go swana le wo re o dirago. Nagana feela ka taba ye: Re šoma le bana babo rena le dikgaetšedi bao ba nago le mekgwa e mebotse eupša ba sa nagane gore ba kaone go feta ba bangwe. Ba na le ditalente tša go fapafapana eupša ba ikokobeditše, le gona ba lebelela ba bangwe ba ba feta ka bogolo. Ga ba no re tšea re le bašomigotee le bona, eupša gape ba re tšea re le bagwera ba bona. Le gona ba re rata kudu moo e lego gore ba ikemišeditše le go re hwela.

15. Re swanetše go ikwa bjang ka mošomo wo re o dirago?

¹⁵ Re na le mošomo o phalago mešomo ka moka. Re ruta batho therešo ka Jehofa, e bile re pepentšha maaka ka moka ao Diabolo a a boletšego ka Jehofa. (Joh. 8:44) Sathane o imetša batho ka maaka ao a ba dirago gore ba ikwe ba se na kholofelo. Ka mohlala, o nyaka gore re  dumele gore Jehofa a ka se tsoge a re lebaletše dibe tša rena le gore ga a re rate. Ruri maaka a a dira gore batho ba ikwe ba nyamile kudu! Ge re eya go Kriste, dibe tša rena di a lebalelwa. Le gona therešo ke gore ka moka ga rena Jehofa o re rata kudu. (Baroma 8:32, 38, 39) Ruri go thabiša kudu go thuša batho gore ba ithute ka Jehofa le go bona ba fetoša maphelo a bona!

16. Morwalo wo Jesu a re kgopelago gore re o rwale, o fapane bjang le merwalo e mengwe yeo re tlamegilego go e rwala?

¹⁶ Morwalo wo Jesu a re kgopelago gore re o rwale, o fapane le merwalo e mengwe yeo re tlamegilego go e rwala. Ka mohlala, ba bantši ba rena ge re etšwa mešomong, re ikwa re lapile e bile re se ra thaba. Eupša ka morago ga gore re fetše nako re šomela Jehofa le Kriste, re ikwa re kgotsofetše e bile re thabile. Re ka ba re lapile ge re tšhaiša mešomong, gomme ra swanelwa ke go gapeletša go ya dibokeng wona mantšiboeng ao. Eupša gantši ge re boa dibokeng, re boa re lapologile e bile re boetšwe ke matla. Re ikwa bjalo le ge re etšwa tšhemong le ge re bala Beibele. Ge re dira maiteko a go bala Beibele, re ikwa re lapologile e bile re matlafetše.

17. Ke nnete efe yeo re sego ra swanela go e tšhabela?

¹⁷ Ga se ra swanela go tšhabela nnete ye: Ka moka ga rena go na le mo matla a rena a felelago gona. Ka gona re swanetše go ba šedi ge re dira dilo. Ka mohlala, re ka senya matla a rena re leka go kgoboketša mahumo a lefase le. Ela hloko seo Jesu a ilego a se botša lesogana leo le bego le mmotšišitše gore: “Ke swanetše go dira’ng gore ke je bohwa bja bophelo bjo bo sa felego?” Lesogana leo le be le šetše le tseba Molao wa Moshe. Le swanetše go ba e be e le monna wa go loka ka gobane pego ya Ebangedi ya Mareka e bolela gore Jesu o ile ‘a kwa a le rata.’ Jesu o ile a re go lesogana leo: “Sepela o yo rekiša dilo tše o nago le tšona.” Ke moka a le laletša gore: ‘Eba molatedi wa ka.’ Lesogana leo le be le nyaka go latela Jesu, eupša le sa nyake go tlogela mahumo a lona goba “dilo tše dintši” tšeo le bego le na le tšona. (Mar. 10:17-22) Ka go re’alo, le ile la gana joko yeo Jesu a bego a nyaka go le rwadiša yona gomme la tšwela pele le e ba lekgoba la “Mahumo.” (Mat. 6:24) Wena nkabe o ile wa dira’ng?

18. Re swanetše go fela re dira’ng, gona ka baka la’ng?

¹⁸ Ka mehla re swanetše go ba šedi gore ke dilo dife tšeo re di etišago pele. Ka baka la’ng? E le gore re kgone go kgonthišetša gore re diriša matla a rena gabotse. Ela hloko seo lesogana le lengwe leo le bitšwago Mark le se bolelago. O re: “Ke feditše mengwaga e mentši ke nagana gore ke phela bophelo bjo bonolo. Ke be ke bula madibogo eupša ka mehla ke be ke dula ke nagana ka tšhelete le gore nka dira eng gore ke iphsine ka bophelo. Le ge ke be ke bula madibogo, ke be ke ipotšiša gore ke ka baka la eng ke be ke imelwa ke bophelo. Ka gona ke ile ka lemoga gore ke be ke inyakela dilo tše di kgahlago nna pele, gomme Jehofa ke mo nea nako ya ka le matla a ka ao a bego a šetše.” Mark o ile a thoma go fetoša tsela yeo a bego a nagana ka yona, ke moka a diriša nako ya gagwe e ntši go hlankela Jehofa. Mark o re: “Ka dinako tše dingwe ke fela ke tshwenyega ka tša ditšhelete, eupša Jehofa le Jesu ba nthuša go fenya bothata bjo, gomme ke kgona go hlankela Jehofa gabotse.”

19. Ke ka baka la’ng go ba le pono e botse go le bohlokwa kudu?

¹⁹ Re tlo tšwela pele re lapološwa ke joko ya Jesu ge e ba re dira dilo tše tše tharo. Sa pele, eba le pono e botse. Re dira mošomo wa Jehofa, ka gona re swanetše go o dira ka tsela ya gagwe. Rena re bašomi, gomme Jehofa ke Mong wa rena. (Luka 17:10) Ge e ba re nyaka go dira dilo ka tsela ya rena, re tlo ikimetša. Gaešita le poo yeo e nago le matla e ka ikgobatša e bile ya itapiša ge e ba e leka go sepela ka tsela ya yona gomme e sa latele mong wa yona. Eupša ge e ba re  dira mošomo wa Jehofa ka tsela ya gagwe, re tlo kgona go dira dilo tšeo re bego re nagana gore re ka se kgone go di dira, gomme ra fenya mathata ao re bego re nagana gore re ka se kgone go a fenya. Gopola gore ga go na motho yo a ka dirago gore thato ya Modimo e se phethege.—Baroma 8:31; 1 Joh. 4:4.

20. Maikemišetšo a rena e swanetše go ba afe ge re rwala joko ya Jesu?

²⁰ Sa bobedi, dira dilo ka maikemišetšo a mabotse. Morero wa rena ke go dira gore Modimo wa rena yo a re ratago e lego Jehofa a retwe. Batho bao ba bego ba phela mehleng ya Jesu bao ba bego ba na le megabaru e bile ba sa naganele ba bangwe, ba ile ba se thabe gomme ba rola joko ya Jesu kapejana. (Joh. 6:25-27, 51, 60, 66; Bafil. 3:18, 19) Go fapana le bona, batho bao ba bego ba rata Modimo le baagišani ba bona ka lerato leo le se nago boikaketši, ba ile ba thabela go rwala joko ya Jesu maphelo a bona ka moka, ba na le kholofelo ya go tlo buša legodimong gotee le Kriste. Go swana le bona, re tla dula re thabela go rwala joko ya Jesu ge e ba re na le maikemišetšo a mabotse.

21. Go ya ka Mateo 6:31-33, re swanetše go tshepa gore Jehofa o tlo re direla’ng?

²¹ Sa boraro, tshepa gore Jehofa o tla dula a na le wena. Re ikgethetše go phelela Jehofa le go mo šomela ka thata. Jesu o ile a re lemoša gore re tlo tlaišwa. Eupša re ka tshepa gore Jehofa o tlo re fa matla e le gore re kgotlelele bothata le ge e le bofe. Ge re kgotlelela dilo tše dintši, re tlo ba le matla kudu. (Jak. 1:2-4) Le gona re ka tshepa gore Jehofa o tlo re nea dilo tšeo re di hlokago, le gore Jesu o tla re diša gomme bana babo rena le dikgaetšedi ba re kgothatša. (Bala Mateo 6:31-33; Joh. 10:14; 1 Bathes. 5:11) Ruri re sa hloka’ng?

22. Ke’ng seo re swanetšego go se leboga?

²² Mosadi yo Jesu a ilego a mo fodiša, o ile a lapologa lona letšatši leo a ilego a fola ka lona. Eupša o be a tla dula a lapologile ge feela a be a ka kgetha go ba morutiwa yo a botegago wa Kriste. O nagana gore o ile a dira’ng? Ge e ba a ile a kgetha go rwala joko ya Jesu, gona go ra gore o be a tla buša le Jesu legodimong. O be a tlo hwetša moputso o mogolo kudu go feta selo le ge e le sefe seo a ka bago a ile a se gafa e le gore a latele Kriste. Go sa šetšwe gore re na le kholofelo ya go yo phela legodimong goba ya go tlo phela mo lefaseng, ruri re leboga gore re amogetše taletšo ya Jesu yeo e rego: “Tlang go nna!”