Temana ye yeo e dirago gore motho a naganišiše e re: “Ge o bona modiidi a gatelelwa ka tsela le ge e le efe gomme kahlolo e botse le toko di senywa o šoro nageng, o se ke wa makalela taba yeo, ka gobane yo mogolo go feta yo mongwe yo le yena e lego yo mogolo o lebeletše, gomme ba na le bao ba ba fetago ka bogolo.”—Mmo. 5:8.

Ge re sa nagane ka tsela yeo Jehofa a bonago dilo ka yona, re ka nagana gore temana ye e bolela feela ka batho bao ba neilwego matla a go buša goba a go laola ba bangwe. Eupša ge re naganišiša ka yona, e re ruta therešo e itšego ka Jehofa yeo e swanetšego go re kgothatša le go re homotša.

Lengwalo le la Mmoledi 5:8 le bolela ka mmuši yo a gatelelago badiidi le go se ba ahlole gabotse. Mmuši yoo o swanetše go tseba gore o lebeletšwe ke yo a mo fetago ka matla goba ke motho yo mongwe wa maemo a godimo go mo feta mmušong. E bile go ka direga gore go na le ba bangwe bao ba neilwego matla a go mo feta. Sa go nyamiša ke gore babuši ka moka ba buša ka go hloka toka, ka baka leo batho ba a tlaišega.

Eupša le ge go ka bonagala eka go ka se tsoge gwa loka, re ka kgothatšwa ke go tseba gore Jehofa ‘o lebeletše le ba bagolo’ mebušong. Re ka mo kgopela gore a re thuše e bile ra lahlela maima a rena go yena. (Ps. 55:22; Bafil. 4:6, 7) Re a tseba gore “mahlo a [Jehofa] a lebeletše gohle lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.”—2 Dikor. 16:9.

Ka gona lengwalo le la Mmoledi 5:8 le re botša ka lefase leo re phelago go lona le gore ka mehla go tla dula go na le yo a nago le matla a magolo go feta yo mongwe. Eupša sa bohlokwa le go feta, temana ye e re thuša go naganišiša ka taba ya gore ga go na yo a fetago Jehofa ka bogolo, yena Mmuši Ramatlaohle. Gona bjale o buša a diriša Morwa wa gagwe e lego Jesu Kriste. Modimo Ramatlaohle yo a bonago dilo ka moka le batho ka moka, o na le toka e bile le Morwa wa gagwe o na le toka.