1. Ke neng moo go ka bago thata go hlankela Jehofa?

KE NENG moo go ka bago thata kudu go hlankela Jehofa? Na ke ge o na le mathata a mantši bophelong goba na ke ge o se na mathata a mantši? Go bonolo gore re bote Jehofa ge e ba re na le mathata. Eupša re dira’ng ge e ba re se na mathata? Na ge re se na mathata re a lebala gore go bohlokwa gakaakang go hlankela Modimo? Jehofa o ile a lemoša Baisiraele gore se se be se ka ba diragalela.—Doit. 6:10-12.

2. Ke mohlala ofe woo Kgoši Asa a re beetšego wona?

² Kgoši Asa o beile mohlala o mobotse kudu wa go dira dilo ka bohlale ka go bota Jehofa ka mo go feletšego. O be a sa hlankele Jehofa feela ge dilo di be di sa mo sepelele gabotse, eupša o be a dira seo le ge go be go na le khutšo. Go tloga ge Asa e sa le yo monyenyane, ‘pelo ya gagwe e ile ya dula e botegela Jehofa.’ (1 Dikg. 15:14) Asa o ile a bontšha gore o be a hlankela Jehofa ka pelo ka moka ge a be a fediša borapedi bja maaka kua Juda. Beibele e re “o ile a tloša dialetare dišele le mafelo a phagamego, a pšhatla dikokwane tše kgethwa le go rema dikota tše kgethwa.” (2 Dikor. 14:3, 5) O ile a tloša le Maaka makgolo’agwe gore e se sa ba mohumagadi mmušong wa gagwe. Ke ka baka la’ng a ile a mo tloša? Ke ka gobane o be a kgothaletša batho gore ba rapele medimo ya diswantšho.—1 Dikg. 15:11-13.

3. Re tlo ithuta ka’ng sehlogong se?

³ Na Asa o ile a no fediša feela borapedi bja maaka? Aowa, o ile a thuša le batho ba Juda gore ba boele ba hlankele Jehofa. Jehofa o ile a šegofatša Asa le Baisiraele ka go dira gore go be  le khutšo mo nageng. * Nakong ya ge Asa a be a buša, go ile gwa feta mengwaga e lesome ‘naga e letše’ goba go be go se na ntwa mo nageng. (2 Dikor. 14:1, 4, 6) Sehlogong se re tlo ithuta gore Asa o ile a diriša bjang nako yeo ya khutšo. Le gona re tlo ithuta ka mohlala wa Bakriste ba pele, bao ka go swana le Asa ba ilego ba diriša gabotse nako ya ge go be go na le khutšo. Ke moka re tlo araba potšišo yeo e rego: Ge e ba o dula nageng yeo mmušo o re dumelelago go hlankela Jehofa ka bolokologi, o ka diriša bjang ka bohlale nako ye ya ge go na le khutšo?

4. Go ya ka Dikoronika tša Bobedi 14:2, 6, 7, Asa o dirišitše bjang nako ya ge go be go na le khutšo?

⁴ Bala 2 Dikoronika 14:2, 6, 7. Asa o ile a botša Baisiraele gore ke Jehofa a bego a ba “neile khutšo” mo nageng ka moka. Eupša Asa ga se a ka a nagana gore nako ye ya go ba le khutšo ke ya go no iketla. Go e na le moo, o ile a thoma a aga metse, maboto, ditora le dikgoro. O ile a botša Bajuda gore: “Re sa na le naga.” Asa o be a era go re’ng? O be a era gore ga go na manaba mo nageng ao a bego a tla ba thibela go aga le go dira dilo tše dingwe ba lokologile. O ile a kgothaletša setšhaba gore se diriše nako ye ya go ba le khutšo ka bohlale.

5. Ke ka ba baka la’ng Asa a ile a tlwaetša madira a gagwe?

⁵ Le gona Asa o ile a diriša nako ya ge go be go na le khutšo go tlwaetša madira a gagwe. (2 Dikor. 14:8) Na se se ra gore o be a sa bote Jehofa? Aowa. Ka ge Asa e be e le kgoši, o be a tseba gore o swanetše go thuša setšhaba sa gagwe go itokišeletša mathata ao a bego a ka tla. Asa o be a tseba gore go ka se dule go na  le khutšo mo nageng ya Juda, gomme ka nnete nako yeo ya khutšo e ile ya fela.

6. Bakriste ba pele ba ile ba diriša bjang nako ya ge go be go na le khutšo?

⁶ Le ge Bakriste ba pele ka dinako tše dingwe ba be ba tlaišwa, eupša ba ile ba ba le nako ya khutšo. Ba ile ba dira’ng ka nako yeo ya go ba le khutšo? Banna ba le basadi bao ba botegago ba ile ba bolela ditaba tše dibotse ka mafolofolo. Puku ya Ditiro e re ba ile ba “sepela ka go boifa Jehofa.” Ba ile ba swarega ka go bolela ditaba tše dibotse, gomme seo sa dira gore ‘ba tšwele pele ba ata.’ Se se bontšha gore Jehofa o ile a šegofatša maiteko a bona a go bolela ditaba tše dibotse ge ba be ba le nakong ya khutšo.—Dit. 9:26-31.

7-8. Paulo le ba bangwe ba ile ba dira’ng nakong ya ge ba be ba na le khutšo? Hlalosa.

⁷ Bakriste ba pele ba be ba bolela ditaba tše dibotse neng le neng ge ba hwetša sebaka sa go dira bjalo. Ka mohlala, ge moapostola Paulo a be a bona gore o be a ka botša batho ba bantši ditaba tše dibotse kua Efeso, o ile a dula motseng woo gomme a bolela ditaba tše dibotse.—1 Bakor. 16:8, 9.

⁸ Paulo le Bakriste ba bangwe ba ile ba bolela ditaba tše dibotse go batho ba bantši ka ngwaga wa 49 C.E., ge baapostola le bagolo ba kua Jerusalema ba be ba dirile phetho ka taba ya lebollo. (Dit. 15:23-29) Ka morago ga gore Paulo le ba bangwe ba botše diphuthego ka phetho yeo e bego e dirilwe ka taba ya lebollo, ka moka ga bona ba ile ba šoma ka thata go bolela “ditaba tše dibotse tša lentšu la Jehofa.” (Dit. 15:30-35) Mafelelo a seo e bile afe? Beibele e re “diphuthego di ile tša tšwela pele di matlafatšwa tumelong le go oketšega ka palo letšatši le letšatši.”—Dit. 16:4, 5.

9. Maemo ke afe dinageng tše dintši lehono, gona re ka ipotšiša eng?

⁹ Lehono dinageng tše dintši re bolela ditaba tše dibotse ka bolokologi. Na o dula nageng yeo mmušo o re dumelelago go hlankela Jehofa re lokologile? Ge e ba go le bjalo, ipotšiše gore: ‘Ke diriša bjang tokologo yeo?’ Mehla ye ke e kgahlišago go batho ba Jehofa, ka gobane ba swaregile ka modiro o mogolo kudu wa go bolela ditaba tše dibotse wo o sa kago wa dirwa mo lefaseng. (Mar. 13:10) Go na le dilo tše dintši tšeo re ka di dirago go thekga modiro wo.

10. Timotheo wa Bobedi 4:2 e re kgothaletša go dira’ng?

¹⁰ O ka diriša bjang ka bohlale nako ya ge go na le khutšo? (Bala 2 Timotheo 4:2.) Ke ka baka la’ng o sa hlahlobe maemo a gago gomme wa bona ge e ba wena goba yo mongwe ka lapeng a ka oketša nako yeo a e fetšago a bolela ditaba tše dibotse, mohlomongwe ka go tšea bobulamadibogo? Gona bjale ga se nako ya go ikgobokeletša mahumo le dilo tše dintši, ka gobane dilo tšeo re ka se phologe le tšona nakong ya masetlapelo a magolo.—Die. 11:4; Mat. 6:31-33; 1 Joh. 2:15-17.

11. Ke’ng seo ba bangwe ba se dirilego gore ba botše batho ba bantši kamoo ba ka kgonago ditaba tše dibotse?

¹¹ Bagoeledi ba bantši ba ithutile leleme le lengwe gore ba kgone go thuša batho ba bangwe go ithuta ka Jehofa. Mokgatlo wa Jehofa o re file dilo tše dintši tšeo re ka di dirišago go ruta batho ditaba tše dibotse ka maleme a mantši. Ka mohlala, ka 2010 dikgatišo tša rena di be di hwetšagala feela ka maleme a e ka bago a 500. Lehono di hwetšagala ka maleme a ka godimo ga a 1 000!

12. Batho ba holega bjang ge ba ekwa ditaba tše dibotse ka segagabo bona? Nea mohlala.

¹² Batho ba ikwa bjang ge ba rutwa ka Jehofa ka segagabo bona? Nagana ka mohlala wa  kgaetšedi yo a ilego a holwa ke kopano ya selete yeo e bego e swaretšwe kua Memphis, Tennessee, U.S.A. Kopano yeo e be e swerwe ka Sekinyarwanda, e lego leleme leo le bolelwago kudu kua Rwanda, Congo (Kinshasa) le Uganda. Ka morago ga kopano yeo, kgaetšedi yo yoo a bolelago Sekinyarwanda o itše: “Ga e sa le ke hudugetše mo United States mengwaga e 17 e fetilego, ke la mathomo ke kgona go kwešiša kopano ka moka.” Ga go pelaelo gore kgaetšedi yo o ile a kgomega kudu ge a be a ekwa kopano ka segagabo. Ge e ba maemo a go dumelela, o ka ithuta leleme le lengwe gore o kgone go thuša batho ba bangwe tšhemong ya geno. Na go na le motho yo a ka thabelago go go theetša kutšwanyana tšhemong ya geno ka ge o bolela segagabo? O ka se itshole ge o ka ithuta leleme le lengwe.

13. Bana babo rena ba Russia ba dirišitše bjang nako ya ge ba be ba na le khutšo?

¹³ Ga se bana babo rena ka moka bao ba nago le tokologo ya go bolela ditaba tše dibotse. Dinageng tše dingwe bana babo rena ga ba kgone go bolela ditaba tše dibotse ka bolokologi ka gobane mmušo o thibetše modiro wa rena. Ka mohlala, nagana ka bana babo rena ba kua Russia. Ba ile ba fetša mengwaga e mentši ba tlaišwa, eupša ka March 1991, mmušo o ile wa ba dumelela go hlankela Jehofa ka bolokologi. Ka nako yeo go be go na le Dihlatse tša Jehofa tše e ka bago tše 16 000 kua Russia. Ka morago ga mengwaga e 20, Dihlatse tša Jehofa di be di oketšegile e le tša ka godimo ga tše 160 000! Se se bontšha gore bana babo rena ba ile ba diriša nako ka bohlale ge ba be ba lokologile go bolela ditaba tše dibotse. Nako yeo ya go ba le khutšo e ile ya fela. Le ge maemo a fetogile nageng yeo, bana babo rena ba sa hlankela Jehofa ka mafolofolo. Ba tšwela pele ba dira se sengwe le se sengwe seo ba ka se kgonago go hlankela Jehofa.

14-15. Jehofa o ile a diriša bjang matla a gagwe go thuša Asa?

¹⁴ Mehleng ya Asa, mafelelong nako ya khutšo e ile ya fela. Madira a matla kudu a ka godimo ga a milione a ile a tla a etšwa Ethiopia go tlo hlasela naga ya Juda. Molaodi wa madira ao e lego Tsera, o be a kgodišegile gore yena le madira a gagwe ba tlo fenya naga ya Juda. Kgoši Asa o be a se a tshepa madira a mantši, eupša o be a tshepile Jehofa Modimo wa gagwe. Asa o ile a rapela ka gore: “Hle Jehofa Modimo wa rena, re thuše, ka gobane re ithekgile ka wena, gomme re tlile go lwa le lešaba le ka leina la gago.”—2 Dikor. 14:11.

¹⁵ Madira a Baethiopia a be a feta gabedi ka palo madira a Asa, eupša Asa o be a tseba gore Jehofa o na le matla a go thuša batho ba gagwe. Jehofa o ile a thuša batho ba gagwe gomme ba kgona go fenya Baethiopia.—2 Dikor. 14:8-13.

16. Re tseba bjang gore nako ya khutšo e tlo fela?

¹⁶ Ke nnete gore ga re tsebe gore yo mongwe le yo mongwe wa rena o tlo diragalelwa ke eng, eupša re a tseba gore nako ya khutšo yeo batho ba Jehofa ba e thabelago e tlo fela. Jesu o boletše e sa le pele gore mehleng ya bofelo balatedi ba gagwe ba be ba tla “[hloiwa] ke ditšhaba tšohle.” (Mat. 24:9) Moapostola Paulo le yena o boletše gore “bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Tim. 3:12) Sathane o “galefile kudu” e bile ga go kgonege gore re tšhabele kgalefo yeo ya gagwe.—Kut. 12:12.

17. Tumelo ya rena e ka lekwa ka ditsela dife?

¹⁷ Kgauswinyane, ka moka ga rena re tlo lekwa tumelo. Lefase le tlo welwa ke “masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale.” (Mat. 24:21) Nakong yeo batho ba gabo rena ba ka re hlanogela gomme modiro wa rena wa thibelwa. (Mat. 10:35, 36) Na ka moka ga rena re tla ekiša Asa gomme ra bota gore Jehofa o tla re thuša le go re šireletša?

18. Go ya ka Baheberu 10:38, 39, ke’ng seo se re thušago go itokišeletša nako ya ge go tla be go se sa na khutšo?

¹⁸ Gona bjale Jehofa o a re thuša gore re itokiše gore tumelo ya rena e dule e tiile. O diriša  “mohlanka yo a botegago le wa temogo” go re nea ‘dijo ka nako e swanetšego’ go re thuša go tiiša tumelo ya rena. (Mat. 24:45) Eupša yo mongwe le yo mongwe wa rena o swanetše go šoma ka thata gore a dule a na le tumelo e tiilego go Jehofa.—Bala Baheberu 10:38, 39.

19-20. Ka morago ga go bala Dikoronika tša Pele 28:9, re swanetše go ipotšiša dipotšišo dife, gona ke ka baka la’ng re swanetše go ipotšiša tšona?

¹⁹ Go swana le Kgoši Asa, re swanetše go ‘tsoma Jehofa.’ (2 Dikor. 14:4; 15:1, 2) Re thoma go tsoma Jehofa ka go ithuta ka yena gomme mafelelong ra kolobetšwa. Re dira sohle seo re ka se kgonago go tiiša segwera sa rena le Jehofa. E le go bona gore re šoma bjang tabeng ye, re swanetše go ipotšiša gore: ‘Na ke ya dibokeng ka mehla?’ Ge re eya dibokeng re hwetša matla a gore re tšwele pele re hlankela Jehofa, e bile bana babo rena le dikgaetšedi ba a re kgothatša. (Mat. 11:28) Le gona re swanetše go ipotšiša gore: ‘Na ke ithuta Beibele ka mehla?’ Ge e ba o dula le lapa la gago goba la geno, na beke e nngwe le e nngwe le swara borapedi bja lapa? Na ge e ba o dula o nnoši o ithuta go swana le ge o be o tla dira ge o be o na le lapa? Le gona, na o dira sohle se o ka se kgonago go bolela ditaba tše dibotse le go ruta batho Beibele?

²⁰ Ke ka baka la’ng re swanetše go ipotšiša dipotšišo tše? Beibele e re botša gore Jehofa o hlahloba menagano ya rena le dipelo tša rena, ka gona le rena re swanetše go itlhahloba. (Bala 1 Dikoronika 28:9.) Ge e ba re bona gore re swanetše go dira diphetogo dilong tšeo re nyakago go di dira le tseleng yeo re naganago ka yona, re swanetše go kgopela Jehofa gore a re thuše go dira diphetogo tšeo. Gona bjale ke nako ya go itokišeletša diteko tšeo di tlogo re wela. O se ke wa dumelela selo se go šitiša go diriša ka bohlale nako ya ge go sa na le khutšo!