1. Jesu o ile a mema barei ba dihlapi ba bane gore ba tlo dira’ng, gona ba ile ba arabela bjang?

BARUTIWA ba Jesu e lego Petro, Andrea, Jakobo le Johane ba be ba šoma go rea dihlapi. Nagana gore ba ile ba makala bjang ge Jesu a be a re go bona: “Ntšhaleng morago, ke tla le dira barei ba batho.” * Banna bao ba ile ba arabela bjang? Beibele e re: “Gateetee ba [ile ba] tlogela malokwa a bona ba mo latela.” (Mat. 4:18-22) Phetho yeo e ile ya fetoša maphelo a bona. Ba be ba tlo tlogela go rea dihlapi gomme ba rea goba ba “swara batho ba phela.” (Luka 5:10) Le lehono Jesu o mema batho bao ba ratago therešo gore ba dire wona modiro woo. (Mat. 28:19, 20) Na o šetše o amogetše taletšo ya Jesu ya gore o be morei wa batho?

2. Ke bomang ba swanetšego go dira phetho ya go ba barei ba batho, gona ba tla thušwa ke’ng?

² Mohlomongwe ke kgalenyana o ithuta Beibele e bile o dirile le diphetogo bophelong bja gago. Gona bjale o swanetše go dira phetho ya ge e ba o nyaka go ba mogoeledi wa ditaba tše dibotse. Ge e ba o dikadika go amogela taletšo yeo ya Jesu, o se ke wa fela matla. Mohlomongwe o dikadika ka gobane o tseba gore phetho yeo e bohlokwa kudu. Ke nnete gore Beibele e re Petro le bao a bego a šoma le bona ba ile ba tlogela malokwa a bona “gateetee.” Eupša Petro le ngwanabo ga se ba dira phetho yeo ba se ba naganišiša ka yona pele. Ba be ba na le dikgwedi tša ka godimo ga tše tshela ba ithutile ka Jesu le go mo amogela e le Mesia. (Joh. 1:35-42) Le wena o šetše o ithutile mo gontši ka Jehofa le Jesu, e bile o nyaka  go tšwela pele o eba le segwera se sebotse le Jehofa. Eupša pele o ka dira phetho ya go ba mogoeledi, o swanetše go naganišiša ka taba ye. Ke’ng seo se thušitšego Petro, Andrea le ba bangwe go dira phetho ya go ba balatedi ba Jesu?

3. Ke dika dife tšeo di tlago go go thuša gore o dire phetho ya go amogela taletšo ya Jesu?

³ Barutiwa ba Jesu ba mathomo ba be ba na le mafolofolo, ba tseba mošomo wa bona gabotse, ba na le sebete e bile ba na le boikgafo. Ruri dika tšeo di ba thušitše gore ba kgone go botša batho ditaba tše dibotse. Sehlogo se se tlo go thuša go bona kamoo o ka bago le dika tšeo tše dibotse e le gore o kgone go bolela ditaba tše dibotse le go ruta ba bangwe.

4. Ke ka baka la’ng Petro e be e le morei wa dihlapi?

⁴ Petro o be a šoma go rea dihlapi gore a hlokomele lapa la gagwe, eupša o be a sa no dira mošomo wo feela ka gobane go se na se sengwe seo a ka se dirago. Petro o be a tloga a rata go rea dihlapi. (Joh. 21:3, 9-15) O ile a ithuta gape le go rata go ba morei wa batho. Jehofa o ile a thuša Petro gore a be le bokgoni bja go ba morei wa batho.—Dit. 2:14, 41.

5. Go ya ka Luka 5:8-11, ke ka baka la’ng Petro a ile a boifa, gona ke’ng seo se ka re thušago le rena gore re se ke ra boifa?

⁵ Lebaka la bohlokwa la gore re bolele ditaba tše dibotse ke gore re rata Jehofa. Go rata ga rena Jehofa go re thuša gore re botše ba bangwe ditaba tše dibotse le ge re ikwa re sa swanelege. Ge Jesu a be a bitša Petro gore e tlo ba morei wa batho, o ile a re go yena: “Tlogela go boifa.” (Bala Luka 5:8-11.) Petro o be a sa boifišwe ke seo se bego se ka direga ge e be e ka ba morutiwa wa Jesu. Eupša o be a makaditšwe ke dihlapi tše dintši tšeo Jesu a bego a ba thušitše gore ba di sware. O be a tseba gore Jesu o be a ba thušitše ka mohlolo, ka gona o be a ikwa a sa swanelege go šoma le Jesu. Ka go swana le Petro,  mohlomongwe le wena o ka ikwa o boifa ge o nagana ka dilo ka moka tšeo o tlo swanelwago ke go di dira gore o tle o be morutiwa wa Jesu Kriste. Ge e ba go le bjalo, ithute go rata Jehofa kutšwanyana, Jesu le baagišani ba gago. Seo se tla go thuša gore o kgone go amogela taletšo ya Jesu ya gore o be morei wa batho.—Mat. 22:37, 39; Joh. 14:15.

6. Ke mabaka afe a mangwe ao a dirago gore re nyake go botša ba bangwe ditaba tše dibotse?

⁶ Nagana ka mabaka a mangwe ao a dirago gore re nyake go botša ba bangwe ditaba tše dibotse. Re nyaka go latela taelo ya Jesu yeo e rego: “Eyang le dire batho . . . barutiwa.” (Mat. 28:19, 20) Le gona re botša batho ditaba tše dibotse ka gobane ba a ‘šokiša gomme ba gašane,’ e bile ba tloga ba hloka go rutwa therešo ka Mmušo wa Modimo. (Mat. 9:36) Jehofa o nyaka gore batho ba mehuta ka moka ba hwetše tsebo e nepagetšego ya therešo gomme ba tle ba phološwe.—1 Tim. 2:4.

7. Baroma 10:13-15 e bontšha bjang gore modiro wa go bolela ditaba tše dibotse o bohlokwa?

⁷ Ge re nagana kamoo modiro wa go bolela ditaba tše dibotse o ka phološago maphelo, seo se tla dira gore re nyake go o dira. Rena ga re swane le morei wa dihlapi yo a reago dihlapi gore a di rekiše goba a di je. Re rea batho goba re ba ruta ditaba tše dibotse e le gore ba tle ba phologe.—Bala Baroma 10:13-15; 1 Tim. 4:16.

8-9. Ke’ng seo morei wa dihlapi a swanetšego go se tseba, gona ka baka la’ng?

⁸ Mehleng ya Jesu, morei wa dihlapi o be a swanetše go tseba gore ke mohuta ofe wa dihlapi wo a bego a ka o rea. (Lef. 11:9-12) E bile o be a swanetše go tseba gore dihlapi tšeo di hwetšwa kae. Dihlapi gantši di dula moo go nago le meetse ao di a ratago le moo go nago le dijo tše dintši. E bile go bohlokwa gore a tsebe le nako yeo a swanetšego go yo rea dihlapi ka yona. Moromiwa yo mongwe yo a dulago sehlakahlakeng sa Pacific o ithutile gore go na le nako e itšego yeo e lego kaone ya go rea dihlapi. Ngwanabo rena yo mongwe wa moo o ile a mo mema gore ba yo rea dihlapi. Moromiwa yoo o ile a re: “Re tla kopana gosasa ka iri ya senyane mesong.” Ke moka ngwanabo rena a re go yena: “Wena ga o kwešiše. Ga re ye go rea dihlapi ka nako yeo re nyakago, eupša re ya ka nako yeo tšona di hwetšagalago.”

⁹ Ka mo go swanago, barutiwa ba Jesu bao e bego e le barei ba batho, le bona ba be ba eya go batho ka nako yeo ba bego ba tla hwetšagala ka yona. Ka mohlala, barutiwa ba Jesu ba be ba ruta batho tempeleng, disinagogeng, ka ntlo le ntlo le mmarakeng. (Dit. 5:42; 17:17; 18:4) Le rena re swanetše go tseba gore tšhemong ya gabo rena ke neng moo re ka hwetšago batho ka magaeng a bona. Re swanetše go fetofetoga le maemo gore re kgone go ruta batho ka nako yeo ba hwetšagalago ka yona, le moo ba hwetšagalago gona.—1 Bakor. 9:19-23.

10. Mokgatlo wa Jehofa o re neile dilo dife go re thuša go bolela ditaba tše dibotse?

¹⁰ Morei wa dihlapi o swanetše go ba le dithulusi tša maleba e bile a tsebe go di diriša. Le rena re swanetše go ba le dilo tša maleba tšeo re tlago go di diriša ge re botša batho ditaba tše dibotse. Go swana le morei wa dihlapi, re swanetše go tseba go diriša dilo tšeo. Jesu o ile a ruta barutiwa ba gagwe gore ba swanetše go bolela bjang ditaba tše dibotse. O ile a ba botša gore ba sware eng, ba yo bolela ditaba tše dibotse kae le gore ba bolele eng. (Mat. 10:5-7; Luka 10:1-11) Lehono mokgatlo wa Jehofa o re diretše Teaching Toolbox yeo e nago le dilo tšeo di šomago gabotse ge re le tšhemong. * Le gona mokgatlo o re ruta gore re diriše bjang dilo tšeo. Seo se re thuša gore re se ke ra tšhoga kudu ge re bolela ditaba tše dibotse e bile se re thuša gore re be le bokgoni bja go ruta.—2 Tim. 2:15.

11. Ke ka baka la’ng barei ba batho ba swanetše go ba le sebete?

¹¹ Barekiši ba dihlapi ba swanetše go ba le sebete. Ka dinako tše dingwe ba kopana le maemo a sa letelwago lewatleng. Gantši ba rea dihlapi bošego gomme go ka no tšwelela ledimo ba sa letela. Barei ba batho le bona ba swanetše go ba le sebete. Ge re thoma go ruta batho ditaba tše dibotse, re ba botša gore re Dihlatse tša Jehofa, re ka welwa ke mathata ao a swanago le madimo a bjalo ka kganetšo ya ka lapeng, go kwerwa ke bagwera e bile ba bangwe ba ka gana go theetša molaetša wa rena. Eupša seo ga se re makatše. Ke ka baka la’ng? Ka gobane Jesu o ile a bolela gore o be a tla roma balatedi ba gagwe go yo bolela ditaba tše dibotse bathong bao ba bego ba tla ba ganetša.—Mat. 10:16.

12. Go ya ka Joshua 1:7-9, ke’ng seo se ka re thušago gore re be le sebete?

¹² O ka dira eng gore o be le sebete? Sa pele, o swanetše go kgodišega gore Jesu o eteletše pele modiro wo wa go bolela ditaba tše dibotse a le legodimong. (Joh. 16:33; Kut. 14:14-16) Sa bobedi, o se ke wa belaela gore Jehofa o tla phethagatša tshepišo ya gagwe ya gore o tla go hlokomela. (Mat. 6:32-34) Ge e ba tumelo ya gago e tiile, o tlo kgona go ba le sebete. Petro le bao a bego a šoma le bona ba ile ba bontšha gore ba na le tumelo ge ba be ba tlogela mošomo wa bona wa go rea dihlapi gomme e e ba balatedi ba Jesu. Le wena o bontšhitše gore o na le tumelo ge o be o botša batho bao o ba tsebago le ba geno gore o thomile go ithuta Beibele le Dihlatse tša Jehofa e bile o ya dibokeng tša tšona. Ga go pelaelo gore o dirile diphetogo tše dintši bophelong e le gore  o tle o kgone go phela ka go dumelelana le melao ya Jehofa. Ka go dira bjalo, o bontšhitše gore o na le tumelo le sebete. Ge o dutše o tšwela pele o ithuta go ba le sebete, kgodišega gore “Jehofa Modimo wa gago o na le wena gohle moo o yago gona.”—Bala Joshua 1:7-9.

13. Go naganišiša le go rapela go ka go thuša bjang gore o be le sebete?

¹³ Ke eng se sengwe gape seo o ka se dirago gore o be le sebete? Rapela Jehofa gore a go fe sebete. (Dit. 4:29, 31) Jehofa o tla araba thapelo yeo ya gago e bile a ka se tsoge a go lahla. O tla dula a go thekga. E bile o ka naganišiša kamoo Jehofa a ilego a thuša ba bangwe nakong e fetilego. Nagana gape kamoo a ilego a go thuša ka gona ge o be o na le mathata, e bile a go nea matla a gore o fetoše tsela yeo o bego o phela ka yona. Ga go pelaelo gore Modimo yo a ilego a thuša batho ba gagwe go feta Lewatleng le Lehwibidu, a ka go thuša gore o be molatedi wa Kriste. (Ek. 14:13) Le wena o ka ba le tumelo go swana le mopsalme yo a ilego a re: “Jehofa o ka lehlakoreng la ka; nka se boife. Motho wa lefaseng a ka ntira’ng?”—Ps. 118:6.

14. O ithuta’ng phihlelong ya Masae le ya Tomoyo?

¹⁴ Selo se sengwe seo se ka go thušago gore o be le sebete, ke go ithuta ka mehlala ya batho bao ba nago le dihlong ka tlhago bao Jehofa a ba thušitšego gore ba be le sebete. Nagana ka mohlala wa kgaetšedi yo a bitšwago Masae. O be a na le dihlong e bile a nagana gore a ka se tsoge a kgona go botša batho ditaba tše dibotse. O be a thatafalelwa kudu ke go bolela le batho bao a sa ba tsebego moo a bego a nagana gore seo ke thaba e telele kudu yeo a ka se tsogego a kgonne go e namela. Ka gona o ile a dira sohle seo a ka se kgonago gore a rate Modimo kudu gotee le baagišani ba gagwe. O ile a naganišiša ka taba ya gore go bohlokwa gakaakang gore re botše ba bangwe ditaba tše dibotse gona bjale, ke moka a rapela Modimo gore a mo thuše gore a nyake go bolela ditaba tše dibotse. O ile a kgona go ba le sebete sa go bolela ditaba tše dibotse, e bile a ba a kgona le go tšea bobulamadibogo bja ka mehla. Jehofa a ka kgona go thuša le bao e sa tšwago go ba bagoeledi gore ba be “le sebete.” Nagana ka mohlala wa kgaetšedi yo a bitšwago Tomoyo. Ge a be a thoma go ya tšhemong ka ntlo le ntlo, mong wa ntlo wa pele yo a ilego a kopana le yena o ile a bolela le yena ka go mo kgadimotša a re: “Ga ke nyake go kwa selo ka lena Dihlatse tša Jehofa!” ke moka a tswalela mojako ka go o lahlela ka matla. Tomoyo o be a se a tšhoga, e bile o ile a re go motho yo a bego a sepela le yena tšhemong: “Na o kwele gore o rile’ng? Ga se ka bolela selo, eupša o be a šetše a tseba gore re Dihlatse tša Jehofa. Ke thabile kudu!” Gona bjale Tomoyo ke mmulamadibogo wa ka mehla.

15. Go ba le boikgafo ke’ng, gona ke ka baka la’ng go le bohlokwa gore Mokriste a be le boikgafo?

¹⁵ Gore barei ba dihlapi ba atlege, ba swanetše go ba le boikgafo. Go ba le boikgafo ke “go kgona go dira dilo tšeo o swanetšego go di dira o sa gapeletšwe ke motho.” Barei ba dihlapi ba bontšha boikgafo ge ba tsoga mesong e bile ba tšwela pele ba šoma le ge boemo bja leratadima bo sa kgahliše. Le rena lehono re swanetše go bontšha boikgafo e le gore re tle re kgotlelele go fihlela re fetša modiro wa rena wa go bolela ditaba tše dibotse.—Mat. 10:22.

16. Ke’ng seo se ka re thušago gore re be le boikgafo?

¹⁶ Ga re belegwe re na le boikgafo. Go e na le moo, ka tlhago re rata go dira dilo tšeo go lego bonolo go di dira. Ka ge gantši go se bonolo go dira dilo tšeo di lego bohlokwa, re swanetše go ithuta go ba le boitshwaro goba boikgafo. Ka gona re hloka thušo gore re kgone go dira dilo tšeo re ka bago re thatafalelwa ke go di dira. Jehofa o re nea thušo yeo a diriša moya wa gagwe o mokgethwa.—Bagal. 5:22, 23.

17. Go Bakorinthe ba Pele 9:25-27, Paulo o boletše gore ke’ng seo a bego a se dira gore a be le boikgafo?

¹⁷ Moapostola Paulo o be a na le boikgafo.  Eupša o boletše gore o be a swanetše go “tula” goba go itia mmele wa gagwe e le gore a kgone go dira se se lokilego. (Bala 1 Bakorinthe 9:25-27.) O ile a botša ba bangwe gore ba be le boitshwaro le gore ba dire dilo ka moka “ka bothakga le ka thulaganyo.” (1 Bakor. 14:40) Re swanetše go šoma ka thata gore re dule re hlankela Jehofa, seo se akaretša go botša batho ditaba tše dibotse ka mehla.—Dit. 2:46.

18. Go ya ka Jehofa, re tla be re atlegile ge re ka dira’ng?

¹⁸ Morei wa dihlapi o a tseba gore o atlegile ge e ba a reile dihlapi tše dintši. Eupša go atlega ga rena modirong wa go bolela ditaba tše dibotse ga se gwa ithekga ka gore re thušitše batho ba bantši gakaakang gore e be Dihlatse tša Jehofa. (Luka 8:11-15) Go ya ka Jehofa, re tla be re atlegile ge re ka dira’ng? Re tla be re atlegile ge feela re ka dula re kgotleletše modirong wo wa go bolela ditaba tše dibotse. Ke ka baka la’ng re re’alo? Ke ka gobane re tla be re dira seo Jehofa le Morwa wa gagwe ba nyakago re se dira.—Mar. 13:10; Dit. 5:28, 29.

19-20. Ke lebaka lefe le lengwe leo le dirago gore re botše batho ditaba tše dibotse gona bjale?

¹⁹ Dinageng tše dingwe, go rea dihlapi go dumeletšwe feela ka dikgwedi tše itšego. Dinageng tšeo, morei wa dihlapi o bona go le bohlokwa kudu gore a šome ka thata ge dikgwedi tšeo di le kgauswi le go fela. Le rena ka ge re le barei ba batho, re na le lebaka le lengwe la gore re botše batho ditaba tše dibotse gona bjale. Lebaka leo ke lefe? Ke gore bofelo bja lefase bo kgauswiuswi! Nako yeo e šetšego ya go botša batho ditaba tše dibotse ke e nyenyane kudu. O se ke wa emela gore dilo ka moka bophelong di go sepelele gabotse pele o ka thoma go dira modiro wo o bohlokwa.—Mmo. 11:4.

²⁰ Thoma gona bjale go ba mafolofolo modirong wa go botša ba bangwe ditaba tše dibotse, ithute Beibele ka mo go oketšegilego, eba le sebete e bile o be le boikgafo. Le wena e ba karolo ya batho ba ka godimo ga dimilione tše seswai bao ba rutago batho ditaba tše dibotse lefaseng ka moka, ke moka o tla hwetša lethabo leo Jehofa a re neago lona. (Neh. 8:10) Ikemišetše go dira sohle seo o ka se kgonago modirong wo wa go bolela ditaba tše dibotse go fihlela Jehofa a re go lekane. Sehlogong se se latelago re tlo ithuta ditsela tše tharo tšeo di tlago go re thuša gore re tšwele pele re bolela ditaba tše dibotse re le barei ba batho.