1-2. Lengwalo la Mmoledi 11:6 le tswalana bjang le modiro wa go bolela ditaba tše dibotse?

DINAGENG tše dingwe batho ba bantši ba thabela go ithuta ka mo go oketšegilego ge ba ekwa ditaba tše dibotse. E tloga e le seo ba bego ba letetše go se kwa! Eupša dinageng tše dingwe, batho ga ba thabele go ithuta ka Modimo goba ka Beibele. Na wena moo o dulago batho ba arabela bjang ge le ba botša ka ditaba tše dibotse? Go sa šetšwe gore batho ba arabela bjang, Jehofa o nyaka gore re tšwele pele re bolela ditaba tše dibotse go ba go fihlela yena a re go lekane.

² Jehofa o šetše a beile nako ya gore modiro wa go bolela ditaba tše dibotse o tlo fela neng, “ke moka bofelo bo tla tla.” (Mat. 24:14, 36) Pele bofelo bo ka tla, re ka bontšha bjang gore re kwa mantšu ao a rego “o se ke wa khutšiša seatla sa gago”? *—Bala Mmoledi 11:6.

3. Re tlo ithuta eng sehlogong se?

³ Sehlogong se se fetilego re ithutile ka dilo tše nne tšeo re swanetšego go di dira gore re kgone go ba “barei ba batho.” (Mat. 4:19) Sehlogong se re tlo ithuta ka dilo tše tharo tšeo di tlago go re thuša gore re tšwele pele re bolela ditaba tše dibotse, go sa šetšwe gore re na le mathata afe. Re tlo ithuta gore ke ka baka la eng go le bohlokwa go etiša pele modiro wa go bolela ditaba tše dibotse, go se fele pelo le go dula re na le tumelo e tiilego.

4. Ke ka baka la’ng re swanetše go etiša pele modiro wo Jehofa a re filego wona?

⁴ Jesu o boletše e sa le pele dilo tšeo re tlago go bona ka tšona gore ke mehla ya bofelo. O be a tseba gore dilo tšeo di ka dira gore balatedi ba gagwe ba se sa etiša pele modiro wa go bolela ditaba tše dibotse. O ile a botša barutiwa ba gagwe gore ‘ba dule ba phakgame.’ (Mat. 24:42) Mehleng ya Noa go be go na le dilo tše dintši tšeo di bego di šitiša batho go mo theetša. Le rena lehono dilo tšeo di ka re šitiša. (Mat. 24:37-39; 2 Pet. 2:5) Ke ka baka leo re nyakago go dula re etišitše pele modiro woo Jehofa a re filego wona.

5. Lengwalo la Ditiro 1:6-8 le re ditaba tše dibotse di be di tla bolelwa go fihla kae?

⁵ Lehono go bohlokwa kudu gore re etiše pele modiro wa go bolela ditaba tše dibotse. Jesu o ile a bolela e sa le pele gore balatedi ba gagwe ba be ba tlo tšwela pele ka go dira modiro wo, e bile ba be ba tla o dira go feta kamoo yena a o dirilego ka gona. (Joh. 14:12) Ka morago ga gore Jesu a hwe, ba bangwe ba barutiwa ba gagwe ba ile ba boela morago modirong wa go rea dihlapi. Ke moka, ka morago ga gore Jesu a tsošwe bahung, o ile a thuša ba bangwe ba barutiwa ba gagwe gore ba sware dihlapi tše dintši ka mohlolo. O ile a diriša mohlolo woo go thuša barutiwa ba gagwe go lemoga gore modiro wa go ba barei ba batho o bohlokwa kudu go feta modiro le ge e le ofe. (Joh. 21:15-17) Pejana ga ge Jesu a ka rotogela legodimong, o ile a botša barutiwa ba gagwe gore modiro wa go bolela ditaba tše dibotse o be o ka se dirwe nageng ya Isiraele feela. (Bala Ditiro 1:6-8.) Mengwaga e mentši ka morago ga moo, Jesu o ile a bontšha moapostola Johane pono ya seo se bego se tla direga “letšatšing la Morena.” * Se sengwe sa dilo tše di makatšago tšeo Johane a di bonego ponong yeo, e be e le morongwa yo a bego “a na le ditaba tše dibotse tša ka mo go sa felego gore a di tsebiše . . . ditšhaba tšohle, meloko yohle, maleme ohle le batho  bohle.” (Kut. 1:10; 14:6) Ga go pelaelo gore le rena lehono Jehofa o nyaka gore re dire modiro wo o bohlokwa wa go bolela ditaba tše dibotse go fihlela a re go lekane.

6. Re ka kgona bjang gore re dule re etišitše pele modiro wa go bolela ditaba tše dibotse?

⁶ Re ka kgona go dula re etišitše pele modiro wo wa go bolela ditaba tše dibotse maphelong a rena ka go nagana ka dilo ka moka tšeo Jehofa a di dirago go re thuša. Ka mohlala, o re nea dikgatišo tšeo di phrinthilwego le tšeo di lego wepesaeteng ya rena, dikgatišo tša go theetšwa, dibidio le kgašo ya JW. Nagana ka se: Wepesaeteng ya rena dikgatišo di hwetšagala ka maleme a ka godimo ga a 1 000! (Mat. 24:45-47) Batho bao ba sa hlankelego Modimo ba arogane ka baka la gore ba thekga mekgatlo ya dipolotiki e fapafapanego, ba tsena dikereke tša go se swane e bile ba bangwe ke badiidi mola ba bangwe e le bahumi. Eupša batho ba ka godimo ga dimilione tše seswai bao ba hlankelago Modimo ba thabela go ba le botee. Ka mohlala, ka Labohlano la di-19 tša April 2019, Dihlatse tša Jehofa lefaseng ka moka di ile tša bogela bidio yeo e bego e hlalosa ka temana ya letšatši. Mantšiboeng ao, batho ba 20 919 041 ba bile gona Segopotšong sa lehu la Jesu. Re nyaka go dula re bolela ditaba tše dibotse ka ge e le tokelo go bona dilo tše tše dikgolo le go ba karolo ya tšona.

7. Mohlala wa Jesu o re thuša bjang gore re dule re etišitše pele modiro wa go bolela ditaba tše dibotse?

⁷ Go latela mohlala wa Jesu go ka re thuša gore re dule re etišitše pele modiro wa go bolela ditaba tše dibotse. O be a sa dumelele selo se mo šitiša go bolela ditaba tše dibotse. (Joh. 18:37) Ga se a ka a lekega ge Sathane a be a re o tlo mo nea “mebušo ka moka ya lefase le letago la yona,” e bile ga se a ka a lekega ge ba bangwe ba be ba nyaka go mo dira kgoši. (Mat. 4:8, 9; Joh. 6:15) Jesu ga se a ka a šitišwa ke go nyaka go ba le dilo tše dintši, le gona ga se a ka a tšhoga ge ba bangwe ba be ba mo ganetša. (Luka 9:58; Joh. 8:59) Ge tumelo ya rena e lekwa, re ka dula re botegela Modimo ka go gopola keletšo yeo moapostola Paulo a ilego a e nea. O ile a kgothaletša Bakriste gore ba latele mohlala wa Jesu e le gore ‘ba se ke ba lapa gomme ba felelwa ke matla.’—Baheb. 12:3.

8. Go se fele pelo ke’ng, gona ke ka baka la’ng go le bohlokwa gore re bontšhe seka se gona bjale?

⁸ Go se fele pelo ke go kgona go leta re išitše maswafo fase gore boemo bjo itšego bo fetoge. Go nyakega gore re se ke ra fela pelo maemong a fapafapanego, e ka ba re letile gore boemo bjo bo sa kgahlišego bo fete goba re letile nako e telele gore selo se itšego se se kgahlišago se direge. Moporofeta Habakuku o be a duma gore Modimo a fediše bošoro bjo bo bego bo atile nageng ya Juda. (Habak. 1:2) Barutiwa ba Jesu ba be ba holofela gore Mmušo wa Modimo o be o tla tšwelela “ka yona nako yeo” ke moka wa ba lokolla gore ba se sa bušwa ke Baroma. (Luka 19:11) Re nyaka gore Mmušo wa Modimo o fediše bobe ka moka mo lefaseng, ke moka o tliše lefase le lefsa leo le tletšego ka batho ba go loka. (2 Pet. 3:13) Eupša ga se ra swanela go fela pelo, re swanetše go leta nako yeo Jehofa a e beilego ya gore o tlo dira dilo tšeo. Nagana ka ditsela tše dingwe tšeo Jehofa a re rutago ka tšona gore re se ke ra fela pelo.

9. Ke mehlala efe yeo e bontšhago gore Jehofa ga a fele pelo?

⁹ Jehofa o re beetše mohlala o mobotse kudu wa go se fele pelo. O ile a nea Noa nako e lekanego ya gore a age areka le gore a lemoše batho ka meetsefula ao a bego a tlo tla. (2 Pet. 2:5; 1 Pet. 3:20) Jehofa o ile a theetša Aborahama ge a be a mmotšiša gantši ka taba ya gore o nyaka go tlo fediša batho ba babe ba Sodoma le Gomora. (Gen. 18:20-33) Jehofa o ile a fetša mengwaga e mentši a sa felele setšhaba sa Isiraele pelo seo se bego se sa mmotegele. (Neh. 9:30, 31) Lehono re a bona gore Jehofa ga a fele pelo ka gobane o  nea batho ka moka bao ba nyakago go mo hlankela nako ya gore ‘ba itshole.’ (2 Pet. 3:9; Joh. 6:44; 1 Tim. 2:3, 4) Go se fele pelo ga Jehofa go re thuša gore le rena re se ke ra fela pelo ge re bolela ditaba tše dibotse. Le gona Jehofa o re ruta gore re se ke ra fela pelo ka go diriša papišo yeo e lego ka Beibeleng. A re kweng gore ke efe.

10. Mohlala wa molemi woo o lego go Jakobo 5:7, 8, o re ruta’ng?

¹⁰ Bala Jakobo 5:7, 8. Mohlala wa molemi wo o lego ditemaneng tše o re ruta go se fele pelo. Ke nnete gore dimela tše dingwe di gola ka pela. Eupša dimela tše dintši, kudukudu tšeo di tšweletšago dijo, di tšea nako go gola. Kua Isiraeleng, go be go tšea dikgwedi tše e ka bago tše tshela gore motho a bune seo a se bjetšego. Molemi o be a bjala ka morago ga pula ya pele yeo e bego e ena magareng ga October, ke moka a buna ka morago ga pula ya mafelelo yeo e bego e ena magareng ga April. (Mar. 4:28) Re tla be re bontšha bohlale ge re ka ekiša go se fele pelo ga molemi yoo. Eupša seo se ka no se be bonolo.

11. Go se fele pelo go tla re thuša bjang modirong wa go bolela ditaba tše dibotse?

¹¹ Gantši batho ba nyaka go bona mafelelo a seo ba se dirago kapelapela. Ge e ba re nyaka go buna seo re se bjetšego, re swanetše go dula re hlokomela dilo tšeo re di bjetšego. Re swanetše go lema, re bjale, re hlagole ge go na le ngwang goba sekoro e bile re nošetše. Modiro wa go bolela ditaba tše dibotse le wona o nyaka gore re šome ka thata. Go tšea nako e telele gore re rute barutwana ba Beibele gore ba se ke ba ba le kgethollo eupša ba be le lerato. Go se fele pelo go tla re thuša gore re se ke ra nyama ge batho ba sa theetše molaetša wa rena. Ge batho ba nyaka go re theetša, le gona moo re swanetše gore re se ke ra fela pelo. Re ka se gapeletše morutwana wa Beibele gore tumelo ya gagwe e gole. Ka dinako tše dingwe, gaešita le barutiwa ba Jesu ba be ba sa kwešiše kapejana dilo tšeo a bego a ba ruta tšona. (Joh. 14:9) Ga se ra swanela go lebala gore re ka bjala le go nošetša, eupša Modimo ke yena a godišago seo re se bjetšego.—1 Bakor. 3:6.

12. Re ka bontšha bjang go se fele pelo ge e ba re botša batho ba gabo rena bao e sego Dihlatse ditaba tše dibotse?

 ¹² Go ka ba thata gore re se fele pelo ge e ba re botša ba gabo rena bao e sego Dihlatse ditaba tše dibotse. Molao wa motheo wo o lego go Mmoledi 3:7 o ka re thuša tabeng ye. O re: “[Go na le] nako ya go homola le nako ya go bolela.” Boitshwaro bja rena bjo bobotse bo ka thuša ba gabo rena gore ba nyake go theetša molaetša wa rena, le gona re swanetše go dula re nyaka dibaka tša go ba botša ka Jehofa. (1 Pet. 3:1, 2) Re swanetše go bolela ditaba tše dibotse ka mafolofolo, eupša seo ga se re gore re felele ba bangwe pelo, go akaretša le ba gabo rena.

13-14. Ke mehlala efe e mengwe ya batho ba go se fele pelo yeo re ka e ekišago?

¹³ Re ka ithuta go se fele pelo mehlaleng ya batho ba botegago bao go bolelwago ka bona ka Beibeleng, le bathong ba bangwe ba botegago ba lehono. Habakuku o be a nyaka gore Modimo a fediše batho ba babe ba mehleng ya gagwe, eupša o ile a bontšha go se fele pelo ka go bolela gore: “Ke tla dula ke eme lefelong la tlhapetšo.” (Habak. 2:1) Moapostola Paulo le yena o ile a bolela gore o be nyaka go “fetša” bodiredi bja gagwe. Eupša o ile a tšwela pele ‘a bolela ditaba tše dibotse’ a sa fele pelo.—Dit. 20:24.

¹⁴ Nagana ka mohlala wa banyalani bao ka morago ga gore ba aloge sekolong sa Gilead ba ilego ba romelwa nageng yeo go se nago Dihlatse tša Jehofa tše dintši le moo batho ba bantši ba sa dumelego go Jesu. Batho ba bantši moo ba be ba sa nyake go ithuta Beibele. Eupša batho ba bangwe bao ba tsenego le banyalani bao sekolong sa Gilead, ba be ba ba botša gore dinageng tšeo ba lego go tšona ba ithuta Beibele le batho ba bantši e bile ba ba thušitše gore e be Dihlatse tša Jehofa. Le ge batho ba bantši ba be ba sa theetše molaetša wa banyalani bao, ba ile ba no tšwela pele ba bolela ditaba tše dibotse ka go se fele pelo. Ka morago ga go šoma tšhemo yeo e thata ka mengwaga e seswai, mafelelong ba ile ba thabela go bona yo mongwe wa barutwana ba bona ba Beibele a kolobetšwa. Mehlala ye ya ka Beibeleng le ya lehono e re ruta’ng? E re ruta gore batho ba ka moka bao ba botegago ba ile ba dula ba le mafolofolo le gona ga se ba ka ba khutšiša diatla tša bona. E bile Jehofa o ile a ba šegofatša ka baka la go se fele pelo ga bona. Eka re ka ekiša batho “bao ka tumelo le go se fele pelo ba jago bohwa bja dikholofetšo.”—Baheb. 6:10-12.

15. Go ba le tumelo go tlo re thuša bjang gore re se ke ra tlogela go bolela ditaba tše dibotse?

¹⁵ Re na le tumelo go molaetša wo re o bolelago, ke ka baka leo re nyakago go o botša batho ba bantši kamoo re ka kgonago. Re tshepa le dilo tšeo Modimo a re botšago gore o tlo re direla tšona ka Lentšung la gagwe. (Ps. 119:42; Jes. 40:8) Re bone le boporofeta bja ka Beibeleng bo phethega lehono. E bile re bone le kamoo batho ba fetošago maphelo a bona ge ba diriša seo ba ithutago sona ka Beibeleng. Ruri se se dira gore re kgonthišege gore batho ka moka ba swanetše go kwa ditaba tše tše dibotse tša Mmušo wa Modimo.

16. Go ya ka Psalme 46:1-3, go ba le tumelo go Jehofa le go Jesu go re thuša bjang gore re dule re bolela ditaba tše dibotse?

¹⁶ Re na le tumelo go Jehofa, e lego yena yoo a re neilego molaetša woo re o botšago batho ba bangwe. E bile re na le tumelo go Jesu yoo Jehofa a mo filego matla a gore a buše e le Kgoši Mmušong wa gagwe. (Joh. 14:1) Go sa šetšwe gore re diragalelwa ke eng, Jehofa o tla dula e le setšhabelo le matla a rena. (Bala Psalme 46:1-3.) Le gona re kgodišegile gore Jesu o diriša matla ao Jehofa a mo neilego wona go etelela pele modiro wa go bolela ditaba tše dibotse a le legodimong.—Mat. 28:18-20.

17. Nea mohlala wo o bontšhago gore ke ka baka la eng re swanetše go tšwela pele re bolela ditaba tše dibotse.

¹⁷ Go ba le tumelo go re thuša gore re tshepe gore Jehofa o tlo šegofatša maiteko a rena a go  botša ba bangwe ditaba tše dibotse. Ka dinako tše dingwe o tlo re šegofatša ka ditsela tšeo re sa di letelago. (Mmo. 11:6) Ka mohlala, batho ba bantši letšatši le letšatši ba bona dikgatišo tša rena ditafoleng le diteroling tša rena. Na mokgwa wo wa go bolela ditaba tše dibotse o a šoma? Ee! Tirelo ya Rena ya Mmušo ya November 2014 e boletše ka morutwana wa yunibesithi yo a bego a nyaka go ngwala pego ka Dihlatse tša Jehofa. Ga se a ka a kgona go hwetša Holo ya rena ya Mmušo, eupša o ile a hwetša tafola ya dikgatišo tša rena gona moo yunibesithing e bile o ile a kgona go hwetša dilo tšeo a ka di dirišago go ngwala pego ya gagwe. Mafelelong o ile a kolobetšwa, gona bjale o hlankela Jehofa e le mmulamadibogo wa ka mehla. Diphihlelo tše bjalo ka tše ke tšona di re thušago gore re se ke ra tlogela go botša batho ditaba tše dibotse, ka gobane di re bontšha gore go sa na le batho bao ba nyakago go kwa ka Mmušo wa Modimo.

18. Ke ka baka la’ng re kgodišegile gore modiro wa go bolela ditaba tše dibotse o tlo fela ka nako ya Jehofa?

¹⁸ Re ka kgodišega gore modiro wa go bolela ditaba tše dibotse o tlo fela ka nako ya maleba. Nagana ka seo se ilego sa direga mehleng ya Noa. Jehofa o ile a bontšha gore ka mehla o dira dilo ka nako. Mengwaga e ka bago e 120 pele Meetsefula a ka tla, Jehofa o be a šetše a beile nako ya gore a tlo tla neng. Mengwaga e mentši ka morago ga moo, Jehofa o ile a laela Noa gore a age areka. Noa o ile a tšwela pele a šoma ka thata mengwaga e ka bago e 40 goba e 50 pele Meetsefula a ka tla. Le ge batho ba be ba sa mo theetše, Noa o ile a no tšwela pele a ba lemoša go ba go fihla Jehofa a re ke nako ya gore a tsenye diphoofolo ka arekeng. Ke moka ka nako ya maleba “Jehofa [o ile] a tswalela mojako.”—Gen. 6:3; 7:1, 2, 16.

19. Ke’ng seo re tlago go bona se direga ge re ka se khutšiše diatla tša rena?

¹⁹ Kgauswinyane Jehofa o tlo re botša gore re feditše modiro wa rena wa go bolela ditaba tše dibotse. Ke moka o tlo fediša lefase la Sathane gomme a tliša lefase le lefsa leo go lona go tla tlalago batho bao ba mo kwago. Re sa letile gore nako yeo e fihle, a re ekišeng Noa, Habakuku le ba bangwe bao ba sa kago ba khutšiša diatla tša bona. A re duleng re etišitše pele modiro wa go bolela ditaba tše dibotse, re se ke ra fela pelo e bile re be le tumelo e tiilego go Jehofa le go tshepa gore dilo tšeo a re holofeditšego tšona o tlo di dira.