1. Dikgaetšedi di thekga mokgatlo bjang, eupša ke mathata afe ao tše dintši di lebeletšanago le wona? (Bona seswantšho sa letlakala la ka ntle.)

RE THABIŠWA ke go ba le dikgaetšedi tše dintši tšeo di šomago ka thata ka diphuthegong! Ka mohlala, di tšea karolo ka dibokeng e bile di ya le tšhemong. Dikgaetšedi tše dingwe di thuša go hlokomela Diholo tša Mmušo e bile di bontšha gore di rata bana babo rena le dikgaetšedi. Eupša ga se gore dikgaetšedi ga di na mathata. Tše dingwe di hlokometše batswadi bao ba tšofetšego. Tše dingwe di a ganetšwa ka lapeng. Ke moka tše dingwe di šoma ka thata go godiša bana di nnoši.

2. Ke ka baka la’ng re swanetše go thekga dikgaetšedi ka phuthegong?

² Ke ka baka la’ng re swanetše go thekga dikgaetšedi ka phuthegong? Ka gobane gantši batho ba lefase ga ba hlomphe basadi. Le gona Beibele e re kgothaletša gore re ba thekge. Ka mohlala, moapostola Paulo o ile a botša phuthego ya kua Roma gore e amogele Foibe le go mo nea “thušo le ge e le efe yeo a e nyakago.” (Baroma 16:1, 2) Ka ge Bafarisei ba be ba dumela gore basadi ga se ba swanela go hlomphiwa, Paulo le yena ge e be e sa le mofarisei o be a sa hlomphe basadi. Eupša ka morago ga gore e be Mokriste o ile a ekiša Jesu, a thoma go swara basadi ka tlhompho le ka botho.—1 Bakor. 11:1.

3. Jesu o be a swara basadi bjang, le gona o be a lebelela bjang bao ba dirago thato ya Modimo?

³ Jesu o be a hlompha basadi ka moka. (Joh. 4:27) O be a sa ba lebelele go swana le baetapele ba bodumedi ba Bajuda ba mehleng ya gagwe. Puku e nngwe ya go hlalosa Beibele e boletše gore: “Jesu ga se a ka a bolela selo le ge e le sefe sa go nyatša basadi.” Le gona, Jesu o be a hlompha kudu basadi bao ba dirago thato ya Tatagwe. Ge a be a bolela ka bao e lego karolo ya lapa la gabo, o ile a bolela ka banna le basadi.—Mat. 12:50.

4. Re tlo ithuta ka’ng sehlogong se?

 ⁴ Ka mehla Jesu o be a thuša basadi bao ba hlankelago Modimo. O ile a ba bontšha gore ba bohlokwa go yena e bile a ba emelela. Anke re kweng gore re ka ekiša Jesu bjang tseleng yeo a bego a swara basadi ka yona.

5. Ke ka baka la’ng dikgaetšedi tše dingwe di ka thatafalelwa ke go thabela segwera ka phuthegong?

⁵ Ka moka ga rena re nyaka go thabela go ba le bana babo rena le dikgaetšedi. Eupša ka dinako tše dingwe dikgaetšedi di hwetša go le thata go dira seo. Ka baka la’ng? Ekwa seo dikgaetšedi tše dingwe di se bolelago. Kgaetšedi yo mongwe yo a bitšwago Jordan * o re: “Ka ge ke se ka nyalwa, ke ikwa ke se na mohola ka mo phuthegong.” Kristen yo e lego mmulamadibogo yo a hudugetšego tlhokagalong o re: “Ge o sa tšwa go fihla phuthegong e nngwe, o ka ikwa eka o lahlegile.” Bana babo rena ba bangwe le bona ba ka ikwa bjalo. Bao ba dulago ka malapeng ao ba bangwe e sego Dihlatse, ba ka hwetša go le thata gore ba gwerane le ba gabo, ka nako e swanago ba hwetša go le thata gore ba gwerane le ba bangwe ka phuthegong. Dikgaetšedi tše dingwe di ka ikwa di lewa ke bodutu ka gobane di babja e bile di sa kgone go tšwa ka gae goba di hlokometše yo mongwe wa ka lapeng yo a babjago. Annette o boletše gore: “Ke be ke sa kgone go fetša nako le bana babo rena le dikgaetšedi ka gobane ke nna ke bego ke hlokometše mma.”

6. Go ya ka Luka 10:38-42, Jesu o ile a thuša bjang Mareta le Maria?

⁶ Jesu o be a fetša nako le basadi bao ba hlankelago Modimo e bile e be e le mogwera wa bona wa nnete. Nagana ka segwera sa gagwe le Maria le Mareta. (Bala Luka 10:38-42.) Jesu o ile a bontšha ka seo a bego a se bolela le seo a bego a se dira gore o nyaka gore basadi ba lokologe ge ba na le yena. Ka mohlala, Maria o ile a ikwa a lokologile go dula dinaong tša Jesu. * Le gona, ge Mareta a be a tshwenyegile ka ge Maria a be a sa mo thuše, o ile a ikwa a lokologile go botša Jesu ka taba yeo. Ge ba be ba le moo, Jesu o ile a kgona go thuša basadi ba ba babedi go ithuta dithuto tše bohlokwa. O ile a bontšha gore o na le taba le basadi ba ba babedi le kgaetšedi ya bona e lego Latsaro, ka go ba etela ka dinako tše dingwe. (Joh. 12:1-3) Le gona ga go makatše gore ge Latsaro a be a babja, Maria le Mareta ba ile ba kgopela Jesu gore a tle a ba thuše.—Joh. 11:3, 5.

7. Tsela e nngwe yeo re ka kgothatšago dikgaetšedi ke efe?

⁷ Ka ge dikgaetšedi tše dingwe di sa kgone go ya dipokanong tše itšego, di kgona feela go bokana gotee le bana babo rena le dikgaetšedi ka go ya dibokeng. Bjale re swanetše go diriša sebaka seo gore re di amogele, re boledišane le tšona le go di botša gore re na le taba le tšona. Jordan yoo go boletšwego ka yena pejana o re: “Ke a kgothatšega ge ba bangwe ka phuthegong ba ntheta ge ke arabile, ba kgopela gore ke sepele le bona tšhemo le go mpontšha ka ditsela tše dingwe gape gore ba na le taba le nna.” Re swanetše go bontšha dikgaetšedi gore di bohlokwa go rena. Kia o re: “Ke a tseba gore ge nka palelwa ke go ya dibokeng, bana babo rena le dikgaetšedi ba tlo nthomela molaetša gore ba tsebe ge e ba ke phetše gabotse. Seo se mpontšha gore ba na le taba le nna.”

8. Ke ditsela dife tše dingwe tšeo ka tšona re ka ekišago Jesu?

⁸ Re ka ekiša Jesu ka gore re iphe nako ya go ba le dikgaetšedi tša ka phuthegong. Mohlomongwe re ka di mema gore di tle di je le rena  goba re ipshine mmogo. Ge re na le dikgaetšedi tše, re nyaka go di kgothatša. (Baroma 1:11, 12) Bagolo ba swanetše go lebelela dikgaetšedi go swana le kamoo Jesu a bego a lebelela basadi bao ba hlankelago Modimo. Jesu o be a tseba gore go be go ka se bonolo gore ba bangwe ba dule ba se ba nyalwa, eupša o ile a bolela gore motho o be a ka se dule a thabile feela ka gore a nyetšwe goba a na le bana. (Luka 11:27, 28) Go e na le moo, o tla dula a thabile ge feela a etiša pele go hlankela Jehofa.—Mat. 19:12.

9. Bagolo ba ka dira’ng gore ba thuše dikgaetšedi?

⁹ Bagolo ba swanetše go swara basadi ba ka phuthegong bjalo ka dikgaetšedi tša bona le bomma. (1 Tim. 5:1, 2) Ba dira gabotse ge ba ipha nako ya go boledišana le dikgaetšedi pele diboka di thoma goba ka morago ga diboka. Kristen o re: “Mogolo yo mongwe o ile a lemoga gore ga ke na nako ka ge ke dula ke swaregile ka mošomo wa ka le ka bobulamadibogo, ka baka leo o ile a nyaka go tseba gore ke beakantše bjang lenaneo la ka. Ke ile ka thabišwa ke go tseba gore o na le taba le nna.” Ge bagolo ba ipha nako ya go boledišana le dikgaetšedi, seo se bontšha gore ba na le taba le tšona. * Annette yoo go boletšwego ka yena o boletše bohlokwa bja go  dula re boledišana le bagolo. O re: “Seo se nthuša gore ke ba tsebe gakaone le bona ba ntsebe gakaone. Ke moka ge ke na le mathata go ba bonolo gore ke ba kgopele thušo.”

10. Ke’ng seo se ka thušago dikgaetšedi gore di ikwe di thabile?

¹⁰ Go sa šetšwe gore re banna goba basadi, ka moka ga rena re a thaba ge ba bangwe ba lemoga mediro ya rena e bile ba re reta. Eupša ge go se na motho yo a lemogago bokgoni bja rena goba yo a lebogago seo re se dirago, re a nyama. Abigail e lego kgaetšedi wa mmulamadibogo yo a sa nyalwago o re ka dinako tše dingwe o ikwa eka batho ga ba na taba le yena. O itše: “Ba no mpona ke le ngwanabo semangmang goba morwedi wa semangmang. Ka dinako tše dingwe ke ikwa okare ga ke bonagale.” Eupša ekwa seo kgaetšedi Pam yo a sa nyalwago a ilego a se bolela. O feditše mengwaga e mentši e le moromiwa. Ka morago o ile a ya gae go yo hlokomela batswadi ba gagwe. Gona bjale o na le mengwaga ya ka godimo ga e 70 gomme e sa le mmulamadibogo. Pam o re: “Seo se nthušitšego kudu ke ge batho ba mpotša gore ba leboga seo ke se dirago.”

11. Jesu o ile a bontšha bjang gore o be a leboga basadi bao ba botegago bao ba bego ba sepela le yena?

¹¹ Basadi ba botegago ba ile ba hlankela Jesu ka “dilo tša bona” gomme o be a leboga kudu thušo ya bona. (Luka 8:1-3) Jesu ga se a ba fa feela tokelo ya gore ba mo hlankele, o ile a ba ruta le ditherešo tše bohlokwa ka Modimo. Ka mohlala, o ile a ba botša gore o be a tlo bolawa ke moka a tla a tsošwa. (Luka 24:5-8) Ka ge a ile a thuša baapostola gore ba tle ba kgone go lebeletšana le mathata ao ba tlago go kopana le ona, o ile a thuša le basadi bao. (Mar. 9:30-32; 10:32-34) Le ge baapostola ba bangwe ba ile ba tšhaba ge Jesu a be a swarwa, basadi ba bangwe bao ba bego ba sepela le yena ba be ba lebeletše ba le kgojana ge a be a ehwa koteng ya tlhokofatšo.—Mat. 26:56; Mar. 15:40, 41.

12. Jesu o ile a nea basadi ba bangwe mošomo ofe?

¹² Jesu o ile a nea basadi ba bangwe mošomo o bohlokwa kudu. Ka mohlala, basadi bao ba bego ba hlankela Modimo ke bona ba mathomo ba go mmona ka morago ga gore a tsošwe bahung. O ile a roma basadi bao gore ba yo botša baapostola ba gagwe gore o tsošitšwe bahung. (Mat. 28:5, 9, 10) Le gona ka Pentekoste ya 33 C.E., go ka direga gore basadi ba be ba le gona ge barutiwa ba be ba newa moya o mokgethwa. Ge e ba go le bjalo, le bona ba ile ba kgona go bolela ka maleme a šele le go botša batho ka “matete a Modimo.”—Dit. 1:14; 2:2-4, 11.

13. Ke’ng seo basadi ba Bakriste ba se dirago lehono, gona re ka bontšha bjang gore re leboga seo ba se dirago?

¹³ Dikgaetšedi ka phuthegong di swanelwa ke go retwa ka baka la seo di se dirago go hlankela Jehofa. E mengwe ya mediro yeo di e dirago e akaretša go aga le go hlokomela meago ya mokgatlo, go thekga dihlopha tša tšhemo tša go diriša leleme le šele le go ithaopela go šoma Bethele. Di thuša ka modiro wa go hlakodiša, go fetolela dikgatišo tša rena le go hlankela e le babulamadibogo le baromiwa. Go no swana le bana babo rena, dikgaetšedi le tšona di ya sekolong sa babulamadibogo, Sekolong sa Baebangedi ba Mmušo le Sekolong sa Gilead. E bile basadi bao ba nyetšwego ba thuša banna ba bona ka go ba thekga gore ba kgone go dira mešomo ya bona ya bona ya ka phuthegong le ya ka mokgatlong. Bana babo rena ba e le go “dimpho tšeo e lego banna” ba dira mo gontši go thuša phuthego. Eupša go be go tlo ba thata gore ba dire se ge basadi ba bona ba be ba sa ba thekge. (Baef. 4:8) Na o ka nagana ka ditsela tšeo o ka thekgago dikgaetšedi tše modirong woo di o dirago?

14. Ka go dumelelana le Psalme 68:11, bagolo ba bontšha bohlale ka go dira’ng?

 ¹⁴ Bagolo ba bontšha bohlale ka go lemoga gore dikgaetšedi ke “lekoko le legolo” goba ke madira a mantši, le gore gantši di na le bokgoni bja go bolela ditaba tše dibotse. (Bala Psalme 68:11.) Ka gona bagolo ba leka go ithuta dilo tše itšego go dikgaetšedi. Abigail yo go boletšwego ka yena pejana o re o a kgothatšega ge bana babo rena ba mmotšiša gore o hweditše ditsela tše dibotse tša go boledišana le batho ba tšhemong e le dife. O re: “Se se nthuša go bona gore Jehofa o mphile mošomo o bohlokwa ka mokgatlong wa gagwe.” Le gona bagolo ba lemoga gore dikgaetšedi tše di godilego di kgona go thuša dikgaetšedi tše difsa ge di na le mathata. (Tito 2:3-5) Ruri re swanetše go rata dikgaetšedi le go di leboga!

15. Ke neng moo dikgaetšedi di ka hlokago motho wa go di bolelela?

¹⁵ Ka dinako tše dingwe dikgaetšedi di ka hloka motho yo a tlago go di bolelela ge di kopana le mathata a itšego. (Jes. 1:17) Ka mohlala, mohlologadi goba kgaetšedi yo a hladilwego a ka hloka motho gore a mmolelele, a mo thuše go dira tše dingwe tša dilo tšeo monna wa gagwe a bego a di dira. Kgaetšedi yo a tšofetšego a ka hloka motho yo a mo thušago go bolela le dingaka. Kgaetšedi yo e lego mmulamadibogo e bile gape a dira mešomo e mengwe ka mokgatlong, a ka hloka motho yo a tlogo mo emelela ge ba bangwe ba bolela gore ga a tšwe tšhemo go swana le babulamadibogo ba bangwe. Ditsela tše dingwe tša go thuša dikgaetšedi ke dife? A re ithuteng mohlaleng wa Jesu gape.

16. Go ya ka Mareka 14:3-9, Jesu o ile a emelela Maria bjang?

¹⁶ Jesu o be a sa tšhabe go emelela basadi bao ba bego ba hlankela Modimo ge batho ba bangwe ba be ba sa ba kwešiše. Ka mohlala, o ile a emelela Maria ge Mareta a be a re ga a dire mošomo wo a bego a swanetše go o dira. (Luka 10:38-42) Le gona o ile a emelela Maria ka lekga la bobedi ge ba bangwe ba be ba mo omanya ba re o sentše. (Bala Mareka 14:3-9.) Jesu o be a kwešiša maikemišetšo a Maria, e bile o ile a mo reta a re: “O ntiretše tiro e botse. . . . O dirile se a ka se kgonago.” O ile a bolela le gore selo se sebotse seo mosadi yo a mo diretšego sona, se be se tla bolelwa “kae le kae mo ditaba tše dibotse di bolelwago gona lefaseng ka moka,” go swana le ge gona bjale re bala ka taba yeo sehlogong se. Go a kgahliša gore Jesu o ile a bolela gore ditaba tše dibotse di be di tla bolelwa lefaseng ka moka ge a be a reta Maria ka selo se sebotse seo a mo diretšego sona. Ruri mantšu a gagwe a swanetše go ba a ile a kgothatša Maria ka morago ga gore batho ba mo sole!

17. Nea mohlala wa gore ke neng moo go ka nyakegago gore re emelele kgaetšedi yo a itšego.

¹⁷ Na o emelela dikgaetšedi tša ka phuthegong ge go hlokagala? Ka mohlala, nagana ka boemo bjo. A re re ba bangwe ka mo phuthegong ba lemogile gore kgaetšedi yo mongwe yoo monna wa gagwe e sego Hlatse gantši o fihla diboka di šetše di thomile ke moka o tšwa gateetee ge di fela. E bile gantši ga a tle le bana dibokeng. Ba thoma go mo sola ka ge ba nagana gore o swanetše go botša monna wa gagwe gore a mo dumelele a tle le bana dibokeng. Eupša seo ba sa se tsebego ke gore kgaetšedi yoo o dira sohle seo a ka se kgonago. Ga a itaole, e bile ga se yena a dirago diphetho ka bana ba bona. O be o ka dira’ng ge o be o ka kwa ba bangwe ba sola kgaetšedi ka yona tsela yeo? Ge o be o ka reta kgaetšedi yoo le go botša ba bangwe ka mediro ya gagwe e mebotse, seo se be se tla dira gore ba bangwe ba tlogele go mo sola.

18. Ke ditsela dife tše dingwe tšeo ka tšona re ka thušago dikgaetšedi?

¹⁸ Re ka bontšha ka mediro gore re na le taba le dikgaetšedi tša rena e bile re a di rata. (1 Joh.  3:18) Annette yo a bego a hlokometše mmagwe yo a babjago o re: “Bana babo rena le dikgaetšedi ba be ba etla ka gae go tlo hlokomela mma gore nna ke kgone go dira mediro e mengwe, goba ba be ba re tlišetša dijo. Se se ile sa dira gore ke ikwe gore ba a nthata e bile ke ikwe ke le karolo ya phuthego.” Jordan le yena o ile a hwetša thušo. Ngwanabo rena yo mongwe o ile a mo ruta gore a ka hlokomela bjang koloi ya gagwe. O re: “Go bose go tseba gore bana babo rena le dikgaetšedi ba na le taba le nna, ba nyaka ke sepela ka koloi yeo e šireletšegilego.”

19. Ke ka ditsela dife tše dingwe tšeo bagolo ba ka thušago dikgaetšedi?

¹⁹ Bagolo le bona ba hlokomela dikgaetšedi le go di thuša. Ba a tseba gore Jehofa o nyaka dikgaetšedi di hlokomelwa gabotse. (Jak. 1:27) Ba ekiša Jesu ka go se bee melao, eupša ba swara dikgaetšedi ka botho le go di naganela. (Mat. 15:22-28) Ge bagolo ba dira maiteko a go thekga dikgaetšedi, ba di thuša go bona gore Jehofa o a di rata. Ge molebeledi wa sehlopha sa tšhemo seo Kia a bego a le go sona a ekwa gore o tlo huduga, kapelapela o ile a kgopela bana babo rena le dikgaetšedi gore ba tle ba mo thuše. Kia o re: “Seo se ile sa dira gore ke imologe kudu. Ka gobane ba ile ba nkgothatša le go nthuša, seo se ile sa mpontšha gore le nna ke yo bohlokwa ka phuthegong le gore ba tla nthekga ge ke na le mathata.”

20-21. Re ka bontšha bjang gore re rata dikgaetšedi ka moka ka phuthegong?

²⁰ Lehono ka diphuthegong tša gabo rena go na le dikgaetšedi tše dintši tšeo di šomago ka thata tšeo re swanetšego go di thekga. Mohlala wa Jesu o re rutile gore re iphe nako ya go ba le dikgaetšedi tše le go di tseba gabotse. Re ka bontšha gore re leboga seo di se dirago go hlankela Modimo. E bile re ka di bolelela ge go hlokagala.

²¹ Mafelelong a lengwalo leo moapostola Paulo a le ngwaletšego Baroma, o boletše basadi ba senyane ba Bakriste ka maina. (Baroma 16:1, 3, 6, 12, 13, 15) Ruri basadi bao ba swanetše go ba ba ile ba kgothatšega ge ba ekwa ditumedišo tša gagwe le go kwa a ba reta. Le rena re swanetše go thekga dikgaetšedi ka moka ka phuthegong. Ka go dira bjalo, re bontšha gore re a di rata ka ge le tšona e le karolo ya phuthego.