1. Motho a ka ikwa bjang ge yo mongwe ka lapeng a kgaotšwe?

NA GO na le motho wa geno yoo a kgaotšwego ka phuthegong? Seo se kweša bohloko! Kgaetšedi Hilda o re: “Ge monna wa ka yo a botegago a be a hlokofala ka morago ga mengwaga e 41 re nyalane, ke ile ka nagana gore ga go se se ka tsogago se nkwešitše bohloko kudu go feta se. * Eupša ge morwa wa ka a be a tlogela phuthego e bile a tlogela mosadi wa gagwe le bana ba gagwe, se se ile sa nkweša bohloko le go feta.”

2-3. Go ya ka Psalme 78:40, 41, Jehofa o ikwa bjang ge bahlanka ba gagwe ba tlogela go mo hlankela?

² Nagana kamoo Jehofa a ilego a kwa bohloko ka gona ge barongwa bao e bego e le karolo ya lapa la gagwe ba be ba tlogela go mo hlankela! (Juda 6) Le gona nagana kamoo a ilego a ikwa ka gona ge setšhaba sa gagwe seo a bego a se rata sa Baisiraele se be se mo hlanogela gantši le gantši. (Bala Psalme 78:40, 41.) Kgodišega gore Tatago rena wa legodimong yoo a re ratago, o kwa bohloko kudu ge yo mongwe ka lapeng la gago goba la geno a tlogela go mo hlankela. O kwešiša bohloko bjoo o bo kwago e bile o tla bontšha gore o go kwela bohloko ka go go kgothatša le go go thekga.

³ Sehlogong se, re tlo boledišana ka seo re ka se dirago gore Jehofa a re thuše ge yo mongwe ka lapeng a kgaotšwe. Le gona re tlo kwa gore re ka thuša bjang ba bangwe ka phuthegong bao ba lebeletšanego le bothata bjo. Eupša a re thomeng pele ka go boledišana ka tsela e fošagetšego yeo re sa swanelago go nagana ka yona.

4. Batswadi ba bantši ba ikwa bjang ge ngwana wa bona a tlogela go hlankela Jehofa?

⁴ Ge ngwana a tlogela go hlankela Jehofa, gantši batswadi ba ipotšiša gore ba be ba swanetše go ba ba dirile eng gore ba mo thuše  go dula a mo hlankela. Ka morago ga gore morwa wa ngwanabo rena Luke a kgaolwe, Luke o itše: “Ke be ke ipona molato e bile ke lora le ditoro tša go tšhoša ka taba ye. Ka dinako tše dingwe ke be ke lla le pelo ya ka e le bohloko kudu.” Elizabeth yoo le yena morwa wa gagwe a ilego a kgaolwa o be a dula a nagana gore: “Ke paletšwe kae bjalo ka motswadi? Ke ile ka ikwa eka ga se ka ruta morwa wa ka ka mo go lekanego gore a rate Jehofa.”

5. Ke mang yo a nago le molato ge motho yo mongwe a tlogela go hlankela Jehofa?

⁵ Re swanetše go gopola gore Jehofa o file yo mongwe le yo mongwe tokologo ya go itirela diphetho. Se se ra gore re swanetše go kgetha ge e ba re tla mo hlankela goba go se mo hlankele. Bafsa ba bangwe ga se ba godišwa ke batswadi bao ba ba rutilego go hlankela Jehofa, eupša ba ile ba kgona go mo hlankela le go dula ba mmotegela. Ba bangwe bao batswadi ba bona ba ilego ba kgona go šoma ka thata go ba ruta go hlankela Jehofa, ka morago ba ile ba tlogela go mo hlankela. Mafelelong yo mongwe le yo mongwe wa rena ke yena a swanetšego go ikgethela ge e ba a nyaka go hlankela Jehofa. (Josh. 24:15) Ka gona lena batswadi bao le kwelego bohloko ka ge bana ba lena ba tlogetše go hlankela Jehofa, le se ke la ipea molato!

6. Mofsa a ka ikwa bjang ge motswadi wa gagwe a tlogela go hlankela Modimo?

⁶ Ka dinako tše dingwe motswadi o tlogela go hlankela Jehofa a ba a tlogela le lapa la gagwe. (Ps. 27:10) Se se ka kweša bana bohloko ka ge ba lebelela motswadi e le mohlala woo ba swanetšego go o ekiša. Esther yoo tatagwe a ilego a kgaolwa o re: “Ke be ke dula ke lla ka gobane ke ile ka lemoga gore tate o be a se a dira phošonyana ka go tlogela therešo. O be a phethile le pelo ya gagwe gore ga a sa nyaka go kwa selo ka go hlankela Jehofa. Ke rata tate ka gona ke be ke dula ke tshwenyega ka yena. Ke ile ka feleletša ke na le bolwetši bja go tshwenyega ka mo go feteletšego.”

7. Jehofa o ikwa bjang ka bafsa bao batswadi ba bona ba kgaotšwego ka phuthegong?

⁷ Lena bafsa, ge e ba yo mongwe wa batswadi ba lena a kgaotšwe ka phuthegong re le kwela bohloko kudu! Kgodišegang gore Jehofa le yena o a tseba gore seo se le kweša bohloko. Tsebang gore o a le rata e bile o a thaba ge a bona gore le tšwela pele le mo hlankela ka go botega. Le rena bana babo lena le dikgaetšedi ba ka phuthegong re thabela seo. Gopolang gore ga se la swanela go ipea molato ka phetho yeo e dirilwego ke batswadi ba lena. Go no swana le ge re boletše pejana, Jehofa o file yo mongwe le yo mongwe tokologo ya go itirela phetho ya ge e ba a nyaka go mo hlankela goba go se mo hlankele. Le gona motho yo mongwe le yo mongwe yoo a ineetšego go yena le go kolobetšwa, o swanetše go “rwala morwalo wa gagwe.”—Bagal. 6:5.

8. Batho bao ba botegago ka lapeng ba ka dira’ng ge ba sa dutše ba letile gore motho yoo a kgaotšwego a boele go Jehofa? (Bona le lepokisi leo le rego “ Boela go Jehofa.”)

⁸ Ge motho yo mongwe ka lapeng a tlogela go hlankela Jehofa, ke ga tlhago gore re dule re na le kholofelo ya gore o tla boela a mo hlankela. O ka dira’ng ge o sa dutše o letile gore a boe? O ka dula o tiiša segwera sa gago le Jehofa. Ka go dira seo, o tlo beela ba bangwe ka lapeng mohlala, mohlomongwe a ka o beela le motho yo a kgaotšwego. Le gona o tlo ba le matla a go kgotlelela bohloko bjoo o bo kwago. A re boneng gore ke  dilo dife tše dingwe tšeo o ka di dirago gore o dule o tiiša segwera sa gago le Jehofa.

9. O ka dira’ng gore o tiiše segwera sa gago le Jehofa? (Bona le lepokisi leo le rego “ Mangwalo ao a ka go Kgothatšago ge e ba yo Mongwe ka Lapeng a Tlogetše go Hlankela Jehofa.”)

⁹ Dira sohle seo o ka se kgonago go tiiša segwera sa gago le Jehofa. Go bohlokwa kudu gore o dule o tiiša tumelo ya gago le ya ba bangwe ka lapeng. O ka dira seo bjang? O ka dira seo ka go bala Beibele ka mehla le go naganišiša ka seo o se badilego gotee le go ya dibokeng. Joanna yoo tatagwe le sesi wa gagwe ba tlogetšego go hlankela Jehofa o re: “Ke ikwa ke sa tshwenyege kudu ge ke bala ka batho ba ka Beibeleng ba go swana le Abigaile, Esitere, Jobo, Josefa le Jesu. Mohlala wa bona o a nkgothatša e bile o dira gore ke dule ke naganne ka dilo tše dibotse. Le gona, dikoša tša rena tšeo di lego wepesaeteng le tšona di nkgothatša kudu.”

10. Psalme 32:6-8, e re thuša bjang go kgotlelela ge re ikwa re nyamile?

¹⁰ Botša Jehofa dilo ka moka tšeo di go tshwenyago. Ge o ikwa o nyamile, o se ke wa tlogela go mo rapela. Dula o kgopela Modimo yo a nago le lerato gore a go thuše go lebelela dilo ka tsela yeo a di lebelelago ka yona e bile a go ‘nee temogo le go go ruta tsela yeo o swanetšego go sepela ka yona.’ (Bala Psalme 32:6-8.) Ke nnete gore go ka no se be bonolo go botša Jehofa kamoo o ikwago ka gona. Eupša Jehofa o tloga a kwešiša bohloko bjoo bo lego ka garegare ga pelo ya gago. O go rata kudu e bile o go kgothaletša gore o mmotše kamoo o ikwago ka gona.—Ek. 34:6; Ps. 62:7, 8.

11. Go ya ka Baheberu 12:11, ke ka baka la’ng re swanetše go tshepa tayo ya Jehofa yeo e bontšhago gore o a re rata? (Bona le lepokisi leo le rego “ Go Kgaolwa ke Tayo Yeo e Bontšhago Gore Jehofa o a re Rata.”)

¹¹ Thekga diphetho tšeo bagolo ba di dirago. Go kgaolwa ke tayo e tšwago go Jehofa e sego go bagolo. Tayo ye yeo e bontšhago gore Jehofa o a  re rata, e tla hola motho yo a kgaotšwego ya ba ya hola le batho ba bangwe. (Bala Baheberu 12:11.) Ba bangwe ka phuthegong ba ka bolela gore bagolo ga se ba ahlola gabotse. Eupša bona batho bao ga ba bolele ka dilo tše mpe tšeo motho yo a kgaotšwego a di dirilego. Ga re tsebe ditaba ka moka. Ka gona ke ga bohlale go tshepa gore bagolo bao ba ahlolago ba dira sohle seo ba ka se kgonago go latela melao ya motheo ya ka Beibeleng le go ‘ahlolela Jehofa.’—2 Dikor. 19:6.

12. Batho ba bangwe ba hotšwe bjang ke go thekga phetho ya Jehofa ya go laya motho?

¹² Ge e ba re thekga phetho yeo bagolo ba e dirilego ya go kgaola motho, mafelelong seo se ka mo thuša gore a boele go Jehofa. Elizabeth yoo re boletšego ka yena pejana o re: “Go be go le thata kudu gore re se ke ra boledišana goba ra dira dilo le morwa wa rena. Eupša ka morago ga gore a bušetšwe ka phuthegong, o ile a bolela gore o be a swanetše gore a kgaolwe. Ge nako e dutše e eya, o ile a bolela gore o ithutile dilo tše dintši kudu tše dibotse. Nna ke ithutile gore ka mehla ge Jehofa a re laya o bontšha gore o a re rata.” Monna wa gagwe e lego Mark o oketša ka gore: “Ka morago, morwa wa rena o ile a mpotša gore se sengwe sa dilo tšeo di ilego tša dira gore a nyake go boa ka phuthegong ke tsela yeo re ilego ra mo swara ka yona. Ke leboga gore Jehofa o re thušitše gore re mo kwe.”

13. Ke’ng seo se ka go thušago go kgotlelela ge o kwele bohloko?

¹³ Boledišana le bagwera ba gago ba o ba tshepago bao ba ka kgonago go ipea boemong bja gago. Gwerana le bana babo rena le dikgaetšedi bao e lego kgale ba hlankela Jehofa bao ba ka go thušago gore o kgone go kgotlelela. (Die. 12:25; 17:17) Joanna yo re boletšego ka yena pejana o re: “Mathomong ke be ke ikwa ke le noši, eupša ka morago ga gore ke boledišane le bagwera ba ka bao ke ba tshepago ke ile ka ikwa ke le kaone.” Eupša o tla dira’ng ge e ba ba bangwe ka phuthegong ba ka thoma go bolela dilo tšeo di ka go dirago gore o kwe bohloko le go feta?

14. Ke ka baka la’ng re swanetše go ‘tšwela pele re kgotlelelana le go lebalelana ka bolokologi’?

¹⁴ O se ke wa felela bana beno le dikgaetšedi pelo. Ke nnete gore ga se batho ka moka bao ba tlago go re kgothatša. (Jak. 3:2) Ka ge ka moka ga rena re se ra phethagala, ga se ra swanela go makala ge motho yo mongwe a sa tsebe seo a tlago go se bolela goba a bolela selo seo se tlago go re kweša bohloko a se a ikemišetša. Gopola keletšo ya moapostola Paulo yeo e rego: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.” (Bakol. 3:13) Kgaetšedi yo mongwe yoo ka gabo go bego go na le motho yo a kgaotšwego o re: “Jehofa o ile a nthuša go lebalela bana bešo bao ba ilego ba nkgopiša ge ba be ba leka go nkgothatša. Batho ba bangwe ka phuthegong ba ka dira’ng ka go thuša bao ba botegago bao ka malapeng a gabo bona go nago le bao ba kgaotšwego?

15. Re ka dira’ng go thuša batho bao yo mongwe wa gabo bona a sa tšwago go kgaolwa?

¹⁵ Bontšha botho go bao yo mongwe wa gabo bona a sa tšwago go kgaolwa. Kgaetšedi Miriam o re o be a dikadika go ya dibokeng ka morago ga  gore kgaetšedi ya gagwe a kgaolwe. O re: “Ke be ke tšhoga gore batho ba tla reng. Eupša go be go na le bana babo rena ba bantši le dikgaetšedi bao le bona ba bego ba kwešitšwe bohloko ke seo se diragetšego le gona ga se ba ka ba bolela dilo tše mpe ka kgaetšedi ya ka. Ke a ba leboga ka gobane ba ile ba lla le nna.” Kgaetšedi yo mongwe o itše: “Ka morago ga gore morwa wa rena a kgaolwe, bana babo rena ba bangwe le dikgaetšedi ba ile ba tla go re kgothatša. Ba bangwe ba re boditše gore ba be ba sa tsebe gore ba reng. Eupša ba bangwe ba ile ba lla le nna gomme ba bangwe ba nthomela mangwalo a go nkgothatša. Seo ba ilego ba se dira se ile sa nthuša kudu!”

16. Phuthego e ka dira’ng gore e dule e kgothatša le go thuša malapa ao a nago le motho yo a kgaotšwego?

¹⁶ Dulang le kgothatša le go thuša ba malapa ao a nago le motho yo a kgaotšwego. Ba hloka gore le ba bontšhe gore le a ba rata le go ba kgothatša, kudukudu gona bjale. (Baheb. 10:24, 25) Ka dinako tše dingwe, batho ba malapa ao a nago le motho yo a kgaotšwego ba lemogile gore ba bangwe ka phuthegong ga ba sa ba bolediša, le gore ba ba swara bjalo ka ge eka le bona ba kgaotšwe. Ga se ra swanela go ba dira gore ba ikwe ka tsela yeo! Go ena le moo, re swanetše go reta le go kgothatša bafsa bao batswadi ba bona ba tlogetšego go hlankela Jehofa. Maria yoo monna wa gagwe a kgaotšwego e bile a tlogetšego lapa la gagwe o re: “Bana bešo ba bangwe le dikgaetšedi ba be ba etla ntlong ya ka e bile ba lla le nna, ba nthuša ka go apea e bile ba nthuša ge ke be ke ruta bana ba ka. Ba be ba ipeile boemong bja ka. Ge batho ba be ba bolela maaka ka nna, ba be ba kgona le go nkemelela. Ruri ba nkgothaditše kudu!”—Baroma 12:13, 15.

17. Bagolo ba ka dira’ng go kgothatša bao ba kwelego bohloko?

¹⁷ Bagolo, dirišang sebaka se sengwe le se sengwe seo le se hwetšago go kgothatša bana babo rena le dikgaetšedi ba botegago bao ka gabo bona go nago le bao ba kgaotšwego. Le filwe boikarabelo bja go dira seo. (1 Bathes. 5:14) Pele ga diboka le ge diboka di etšwa, ebang ba mathomo go yo ba kgothatša. Ba eteleng le be le rapeleng le bona. Eyang le bona tšhemong gomme ka dinako tše dingwe le ba memeng borapeding bja lapa. Bagolo ba swanetše go bontšha bao ka gabo bona go nago le motho yoo a kgaotšwego gore ba na le taba le bona ka go ba kwela bohloko le go ba rata.—1 Bathes. 2:7, 8.

18. Go ya ka Petro wa Bobedi 3:9, Modimo o nyaka gore batho bao ba tlogetšego go mo hlankela ba dire’ng?

¹⁸ Jehofa “ga a rate gore go fedišwe le ge e le mang, eupša o rata gore bohle ba fihlelele boitsholo.” (Bala 2 Petro 3:9.) Le ge motho a ka ba a dirile sebe se segolo, o sa le bohlokwa kudu go Modimo. Gopola gore Jehofa o ile a romela yo Morwa wa gagwe yoo a mo ratago gore a tlo hwela yo mongwe le yo mongwe wa rena. Jehofa o bontšha gore o rata bao ba tlogetšego go mo hlankela ka go leka go ba thuša gore ba boele go yena. O tshepa gore ba tla kgetha go boela go yena go no swana le seo se ilego sa direga papišong ya Jesu ya morwa wa lehlaswa. (Luka 15:11-32) Ba bantši bao ba bego ba tlogetše go hlankela Jehofa ba ile ba boela go yena. Le gona, phuthego e ile ya ba amogela ka diatla tše pedi. Elizabeth yoo re boletšego ka yena pejana o ile a thaba kudu ge a be a bona morwa wa gagwe a boela ka phuthegong. Ge a nagana ke seo se diragetšego o re: “Ke leboga kudu batho ba bantši bao ba ilego ba re kgothatša gore re se ke ra felelwa ke matla.”

19. Ke ka baka la’ng re swanetše go dula re tshepa Jehofa?

¹⁹ Re swanetše go dula re tshepa Jehofa. Le ka mohla a ka se re fe keletšo yeo e ka dirago gore re kwe bohloko. Ke Tate yoo a ratago kudu batho bao ba mo ratago le bao ba mo rapelago. Le gona o re kwela bohloko e bile o rata go fana. Kgodišega gore Jehofa a ka se tsoge a go tlogetše ge o na le mathata. (Baheb. 13:5, 6) Mark yo re boletšego ka yena pejana o re: “Jehofa ga se a ka a re tlogela, le gona ge re na le mathata o dula a re thuša.” Jehofa o tla tšwela pele a go fa “matla a fetago a tlwaelegilego.” (2 Bakor. 4:7) O ka dula o botegela Jehofa le go se fele matla le ge yo mongwe ka lapeng a tlogetše go hlankela Jehofa.