1-2. Moporofeta Hagai o boletše gore go be go tlo direga’ng mehleng ya rena?

“KA METSOTSONYANA feela ke ge lebenkele le meago ya kgale e thoma go wa.” “Batho ka moka ba be ba tlaletšwe . . . Batho ba bantši ba re tšhišinyego ye e tšere metsotso ye e ka bago e mebedi. Eupša nna ke bone eka e tšere nako e telele.” A ke a mangwe a mantšu ao a boletšwego ke batho bao ba phologilego tšhišinyego ya lefase kua Nepal ka 2015. Ke nnete gore ge o ka diragalelwa ke selo sa go tšhoša o ka no se tsoge o lebetše.

² Gona bjale go na le tšhišinyego e nngwe yeo e diregago ditoropong goba dinageng tša go fapafapana. Jehofa o šišinya ditšhaba lefaseng ka moka le gona o na le mengwaga e mentši a dira seo. Moporofeta Hagai o ile a bolela e sa le pele gore Jehofa o be a tlo šišinya ditšhaba. O itše: “Se ke seo Jehofa wa madira a se boletšego: ‘Go šetše lebakanyana feela—ke mo ke tlago go šišinya magodimo le lefase le lewatle gotee le naga e omilego.’”—Hag. 2:6.

3. Tšhišinyego yeo Hagai a boletšego ka yona e fapana bjang le tšhišinyego ya nnete ya lefase?

³ Tšhišinyego yeo Hagai a boletšego ka yona ga e swane le tšhišinyego ya nnete ya lefase yeo ditlamorago tša yona e lego go senya feela, eupša yona e na le mafelelo a mabotse. Jehofa o re: “Ke tla šišinya ditšhaba ka moka gomme matsaka a ditšhaba ka moka a tla tla; ke tla tlatša ntlo ye ka letago.” (Hag. 2:7) Boporofeta bjo bo be bo bolela’ng go batho ba mehleng ya Hagai? Gona bo bolela’ng go rena lehono? Re tlo boledišana ka dikarabo tša dipotšišo tše le go ithuta kamoo rena re tšeago karolo go šišinyeng ditšhaba lehono.

4. Ke ka baka la’ng Jehofa a ile a romela moporofeta Hagai bathong ba gagwe?

⁴ Jehofa o ile a nea moporofeta Hagai mošomo o bohlokwa. Nagana ka seo se diregilego pele ga moo. Go ka direga gore Hagai o be a le gare ga bao ba ilego ba boela Jerusalema ba etšwa bothopša Babilona ka 537 B.C.E. Ka moragonyana ga gore bahlanka ba ba botegago ba Jehofa ba fihle Jerusalema ba ile ba thoma go aga tempele ka mafolofolo, e lego ntlo ya Jehofa. (Esera 3:8, 10) Eupša kapejana go ile gwa direga selo se sengwe se se nyamišago. Ba ile ba felelwa ke matla ke moka ba tlogela go aga ka gobane batho bao ba bego ba dula kgauswi le bona ba ile ba thoma go ba thibela. (Esera 4:4; Hag. 1:1, 2) Ka gona ka 520 B.C.E, Jehofa o ile a botša Hagai gore a thuše Baisiraele gore ba boele ba be le mafolofolo a go aga tempele. *—Esera 6:14, 15.

5. Ke ka baka la’ng molaetša wa Hagai o ile wa kgothatša batho ba Modimo?

⁵ Molaetša wa Hagai o be o matlafatša Bajuda gore ba be le tumelo go Modimo. Moporofeta Hagai o ile a bontšha sebete ka gore a botše Bajuda bao ba bego ba nyamile gore: “‘Tiang matla lena batho ka moka ba naga,’ o re’alo Jehofa, ‘gomme le šome.’ ‘Gobane ke na le lena,’ o re’alo Jehofa wa madira.” (Hag. 2:4) Polelwana “Jehofa wa madira” e be e kgonthišetša Bajuda gore Jehofa o tlo ba thuša. Jehofa o na le madira a mantši a barongwa ao a a laolago. Ka gona Bajuda ba be ba swanetše go ithekga ka yena gore ba kgone go atlega.

6. Tšhišinyego yeo Hagai a bego a boletše ka yona e be e tlo ba le mafelelo afe?

⁶ Jehofa o ile a laela Hagai gore a yo botša Bajuda gore o be a tla šišinya ditšhaba ka moka ka tsela ya seswantšhetšo. Molaetša woo o ile wa kgothatša Bajuda bao ba bego ba aga tempele e bile ba nyamile, ka gore Jehofa o be a ba kgonthišetša gore o tlo šišinya Peresia, yeo e bego e le mmušo wa lefase ka nako yeo gomme o laola ditšhaba tše dintši. Go be go tlo direga’ng ka morago ga gore Jehofa a šišinye Peresia? Sa pele batho ba Modimo ba be ba tlo fetša modiro wa go aga tempele. Ke moka batho bao e bego e se Bajuda le bona ba be ba tlo thoma go hlankela Jehofa tempeleng yeo e bego e agilwe lefsa. Molaetša woo wa Hagai o swanetše go ba o ile wa kgothatša batho ba Modimo kudu!—Sak. 8:9.

7. Ke modiro ofe wo o šišinyago lefase wo re ka thušago go o dira lehono? Hlalosa.

⁷ Boporofeta bja Hagai bo re ama bjang lehono? Go swana le mehleng ya Hagai, Jehofa o šišinya ditšhaba ka moka. Le gona re mo thuša go dira mošomo woo. Nagana ka se, ka 1914 Jehofa o ile a bea Jesu Kriste gore e be Kgoši ya Mmušo wa gagwe legodimong. (Ps. 2:6) Go hlongwa ga Mmušo wo wa Modimo go be go bontšha gore mebušo ya lefase e kgauswi le go fedišwa. Le gona go be go bontšha gore “dinako tše di beilwego tša ditšhaba” e lego nako yeo go bego go se sa na kgoši yeo e emelago Jehofa, e fihlile mafelelong. (Luka 21:24) Ka baka leo bahlanka ba Modimo ba be ba botša batho ka moka gore Mmušo wa Modimo ke wona feela wo o ka kgonago go thuša batho, kudukudu ga e sa le go tloga ka 1919. Modiro wo wa go botša batho ‘ditaba tše dibotse tša Mmušo’ le lehono o sa šišinya lefase ka moka.—Mat. 24:14.

8. Go ya ka Psalme 2:1-3, batho ba bantši ba arabela bjang molaetšeng wa rena?

⁸ Batho ba arabela bjang molaetšeng wa rena? Batho ba bantši ga ba o amogele. (Bala Psalme 2:1-3.) Ditšhaba di ferekane e bile di  gana go amogela kgoši yeo e kgethilwego ke Jehofa. Le gona di nagana gore molaetša wa Mmušo wa Modimo woo re o bolelago ga se “ditaba tše dibotse.” Ge e le gabotse mebušo e mengwe e thibetše modiro wa go bolela ditaba tše dibotse! Le ge baetapele ba bantši bao ba bušago ditšhaba ba re ba hlankela Modimo, eupša ga ba nyake go tlogela go buša. Go no swana le ge babuši ba mehleng ya Jesu ba ile ba dira, le lehono babuši ba sa ganetša Motlotšwa wa Jehofa ka go hlasela balatedi ba gagwe ba botegago.—Dit. 4:25-28.

9. Jehofa o arabela bjang ka ge ditšhaba di sa nyake go theetša molaetša wa Mmušo?

⁹ Jehofa o arabela bjang ka ge ditšhaba di sa nyake go theetša molaetša wa Mmušo? Re hwetša karabo go Psalme 2:10-12 yeo e rego: “Bjale lena dikgoši, dirišang temogo; phošollegang lena baahlodi ba lefase. Hlankelang Jehofa ka poifo gomme le thabe ka go thothomela. Atlang morwa, gore Modimo a se tuke bogale le se tlo hwelela tseleng, gobane bogale bja gagwe bo tuka gabonolo. Go thaba bohle bao ba tšhabelago go yena.” Ka botho Jehofa o nea batho ba bao ba ganago go kwa molaetša wa Mmušo sebaka se sengwe. Ba sa dutše ba ka fetoša dikgopolo gomme ba amogela molaetša wa Mmušo wa Modimo. Eupša ga go sa na nako. Re phela “mehleng ya bofelo” ya lefase le la Sathane. (2 Tim. 3:1; Jes. 61:2) Gona bjale go bohlokwa kudu gore batho ba tsebe therešo gomme ba kgethe go hlankela Jehofa kapelapela.

10. Go ya ka Hagai 2:7-9, modiro wo o šišinyago lefase o na le mafelelo afe a mabotse?

¹⁰ Batho ba bangwe ba arabela gabotse modirong wo wa go šišinya ditšhaba woo Hagai a boletšego ka wona e sa le pele. O re botša gore mafelelo a go šišinywa ga lefase, ke gore “matsaka a ditšhaba ka moka” e lego batho bao ba nyakago go ithuta ka Modimo, ba tla hlankela Jehofa. * (Bala Hagai 2:7-9.) Jesaya le Mika le bona ba ile ba bolela gore “mehleng ya bofelo” batho ba be ba tla tla ke moka ba hlankela Jehofa.—Jes. 2:2-4; Mika 4:1, 2.

11. Ngwanabo rena yo mongwe o ile a dira’ng ge a be a thoma go kwa molaetša wa Mmušo wa Modimo?

 ¹¹ Nagana ka seo se ilego sa dirwa ke ngwanabo rena Ken yo a hlankelago ntlongkgolo ya Dihlatse tša Jehofa ka morago ga gore a kwe molaetša o kgahlišago wa Mmušo wa Modimo. O sa gopola gabotse kamoo a ilego a ikwa ka gona ge a be a thoma go kwa molaetša wa Mmušo wa Modimo mengwaga e ka bago e 40 e fetilego. Ken o re: “Ge ke be ke thoma go kwa ditherešo tše di lego ka Beibeleng ke ile ka thaba kudu go ithuta gore re phela mehleng ya bofelo. Ke ile ka bona gore e le gore Modimo a nkamogele le gore ke tle ke hwetše bophelo bjo bo sa felego, ke swanetše go tlogela go dira dilo tše mpe tšeo di dirwago mo lefaseng le gore ke thekge Mmušo wa gagwe. Ke ile ka tlogela go thekga mebušo ya lefase gomme ka thekga Mmušo wa Modimo wo o tlago go ba gona go ya go ile.

12. Tempele ya Jehofa ya moya e tladitšwe bjang ka letago mehleng ye ya bofelo?

¹² Go molaleng gore Jehofa o be a dutše a šegofatša batho ba gagwe. Batho bao ba hlankelago Jehofa ka go botega ba oketšegile kudu mehleng ye ya bofelo. Ka 1914 re be re le ba dikete tše sego kae feela. Eupša gona bjale re ka godimo ga dimilione tše seswai gomme batho ba bangwe ba dimilione ba ba gona Segopotšong sa ngwaga le ngwaga sa lehu la Jesu. Ka baka leo malapa a tempele ya Jehofa ya moya ya mo lefaseng, e lego tokišetšo ya gagwe ya go mo hlankela ka tsela yeo a e amogelago, a tletše ka “matsaka a ditšhaba ka moka.” Le gona leina la Jehofa le a retwa ge batho ba ba dira diphetogo maphelong a bona.—Baef. 4:22-24.

13. Ke diporofeto dife tše dingwe tšeo di phethegilego tšeo di bontšhitšego gore batho ba be ba tlo oketšega ka mokgatlong wa Jehofa? (Bona seswantšho sa letlakala la ka ntle.)

¹³ Go oketšega ga batho ka mo mokgatlong wa Jehofa go phethagaditše diporofeto tše dingwe go swana le boporofeta bjo bo lego go Jesaya kgaolo 60. Temana ya 22 kgaolong yeo e re: “Yo monyenyane e tla ba ba sekete gomme mmotlana a ba setšhaba se matla. Nna Jehofa, ke tla akgofiša se ka nako ya gona.” (Jes 60:22) Ka ge batho ba bantši ba thoma go hlankela Jehofa, selo se sengwe sa go kgahliša se a direga. “Matsaka a ditšhaba” goba batho bao ba nyakago go hlankela Jehofa ba tla ba na le bokgoni bja go se swane le mafolofolo a go  bolela “ditaba tše dibotse tša Mmušo.” Mafelelong batho ba Jehofa ba tla diriša bokgoni bjo bja bona bjoo Jesaya a bo hlalosago e le “maswi a ditšhaba.” (Jes. 60:5, 16) Ka baka la thušo ya batho ba ba bohlokwa, ditaba tše dibotse di bolelwa dinageng tše 240, le gona dikgatišo tša rena di tšweletšwa ka maleme a fetago a 1 000.

14. Batho ba swanetše go dira phetho efe gona bjale?

¹⁴ Mehleng ye ya bofelo, go šišinywa ga ditšhaba ka moka go gapeletša batho gore ba dire kgetho. Na ba tla kgetha go thekga Mmušo wa Modimo goba na ba tla tshepa mebušo ya lefase le? Ye ke phetho yeo yo mongwe le yo mongwe a swanetšego go e dira. Le ge batho ba Jehofa ba ekwa melao ya dinageng tšeo ba dulago go tšona, ba dira sohle seo ba ka se kgonago gore ba se ke ba tsenatsena dipolotiki tša lefase. (Baroma 13:1-7) Ba a tseba gore ke Mmušo wa Modimo feela wo o tlago go rarollela batho mathata. Le gona Mmušo woo ga se karolo ya lefase le.—Joh. 18:36, 37.

15. Puku ya Kutullo e bontšha bjang gore go botegela ga rena Modimo go tla lekwa kudu?

¹⁵ Puku ya Kutullo e re botša gore go botegela ga rena Modimo go tla lekwa mehleng ye ya bofelo. Go lekwa moo go tla akaretša go tlaišwa le go ganetšwa o šoro. Mebušo ya lefase le e tlo re gapeletša gore re e rapele e bile ya tlaiša bao ba ganago go e thekga. (Kut. 13:12, 15) Mebušo yeo e tla “gapeletša batho ka moka ba banyenyane le ba bagolo, bahumi le badiidi, ba lokologilego le bahlanka gore ba swaiwe seatleng sa bona sa le letona le phatleng.” (Kut. 13:16) Mehleng ya kgale makgoba a be a swaiwa go bontšha gore ke makgoba a bomang. Le lehono batho ba letetše gore go bonagale gore motho yo mongwe le yo mongwe o thekga mang. Le gona ba nyaka gore motho yo mongwe le yo mongwe a bontšhe ka tsela yeo a naganago ka yona le ka ditiro tša gagwe gore o thekga dipolitiki.

16. Ke ka baka la’ng go le bohlokwa gore re matlafatše tsela yeo re botegelago Jehofa ka yona gona bjale?

¹⁶ Na re tla amogela leswao le gomme ra thekga dipolitiki? Bao ba ganago go amogela leswao ba tlo tlaišwa le go tsena mathateng. Puku ya Kutollo e re: ‘Go ka se be le motho yo a rekago goba yo a rekišago ka ntle le motho yo a nago le leswao.’ (Kut. 13:17) Eupša batho ba Modimo ba a tseba gore Modimo o tlo dira eng ka batho bao ba nago le leswao bao go bolelwago ka bona go Kutollo 14: 9, 10. Ge ba gana go amogela leswao leo go tlo swana le ge eka seatleng sa yo mongwe le yo mongwe wa bona go ngwadilwe gore, “Ke wa Jehofa.” (Jes. 44:5) Gona bjale ke nako ya go kgonthišetša gore re tiiša tsela yeo re botegelago Jehofa ka yona. Ge re ka dira bjalo, Jehofa o tlo thabela go re bitša batho ba gagwe!

17. Ke eng seo re swanetšego go se gopola ka go se fele pelo ga Jehofa?

¹⁷ Jehofa o bontšhitše gore ga a fele pelo mehleng ye ya bofelo. Ga a nyake gore motho le ge e le ofe a fedišwe. (2 Pet. 3:9) Ka baka leo o file batho ka moka sebaka sa gore ba itshole gomme ba kgethe go mo hlankela. Eupša go se fele pelo ga gagwe go tlo fela. Bao ba sa nyakego go thekga Mmušo wa Modimo ba tlo diragalelwa ke seo se ilego sa diragalela Farao mehleng ya Moshe. Jehofa o ile a botša Farao gore: “Ga bjale nkabe ke šetše ke otlolotše seatla sa ka gore ke otle wena le setšhaba sa gago ka leuba la bolwetši gore le fedišwe mo lefaseng. Eupša ge e le gabotse ke go tlogeletše lona lebaka le, gore ke go bontšhe matla a ka e le gore leina la ka le bolelwe lefaseng lohle.” (Ek. 9:15, 16) Mafelelong Ditšhaba ka moka di  tla tseba gore Jehofa ke Modimo a nnoši wa therešo. (Hesek. 38:23) Seo se tla kgonega bjang?

18. (a) Hagai 2:6, 20-22 e bolela ka mohuta ofe o mongwe wa go šišinywa ga ditšhaba? (b) Re tseba bjang gore mantšu a Hagai a tla phethagala nakong e tlago?

¹⁸ Mengwaga e mentšintši ka morago ga gore Hagai a hwe, moapostola Paulo o ile a bolela gore mantšu ao a lego go Hagai 2:6, 20-22 a tla phethagala nakong e tlago. (Bala.) Paulo o ngwadile gore: “[Modimo] o holofeditše a re: ‘Ke tla buša ke šišinya e sego lefase feela, eupša le legodimo.’ Bjale mantšu a rego ‘Ke tla buša’ a bolela go tlošwa ga dilo tšeo di šišinywago, e lego dilo tšeo di dirilwego, e le gore dilo tšeo di sa šišinywego di šale.” (Baheb. 12:26, 27) Ka go se swane le go šišinywa mo go boletšwego go Hagai 2:7, go šišinywa mo go bolela go fedišwa ga batho ka moka bao ba swanago le Farao bao ba ganago go dumela gore Jehofa ke yena feela yo a nago le tshwanelo ya go buša.

19. Ke eng seo se ka se šišinywego, gona re tseba bjang?

¹⁹ Ke eng seo se ka se šišinywego goba sa fedišwa? Paulo o tšwetše pele ka gore: “Ka ge le bona gore re tlile go amogela mmušo wo o ka se šišinywego, a re tšweleng pele re thabela botho bjo bogolo bja Modimo, bjoo ka bjona re ka direlago Modimo tirelo e kgethwa ka go mmoifa le go mo šia.” (Baheb. 12:28) Ka morago ga gore tšhišinyego ye e fete, ke Mmušo wa Modimo feela wo o tlago go šala o le gona. O ka se tsoge wa šišinywa!—Ps. 110:5, 6; Dan. 2:44.

20. Batho ba swanetše go kgetha go dira’ng, gona re ka ba thuša bjang?

²⁰ Nako e jelwe ke magotlo! Batho ba swanetše go kgetha ge e ba ba tšwela pele ba dira dilo tše mpe tšeo di tla dirago gore ba fedišwe, goba ba thekga Mmušo wa Modimo gore ba tle ba hwetše bophelo bjo bo sa felego. (Baheb. 12:25) Ge re botša batho ditaba tše dibotse re ka ba thuša go thekga Mmušo wa Modimo. Eka re ka thuša batho ba bangwe ba bantši kudu gore ba kgethe go thekga Mmušo wa Modimo. Le gona eka re ka dula re gopola mantšu a Morena wa rena Jesu ao a rego: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mat. 24:14.