1. Batho bao ba botegago ba ka ba le segwera sefe le Jehofa?

LAPA la Jehofa leo le mo hlankelago le akaretša Jesu, yoo e lego “leitšibulo la tlholo yohle,” le barongwa ba bantšintši. (Bakol. 1:15; Ps. 103:20) Ge Jesu a be a le mo lefaseng, o ile a bolela gore batho bao ba botegago ba ka lebelela Jehofa e le Tatago bona. E bile ge a be a bolela le barutiwa ba gagwe o ile a ba botša gore Jehofa ke ‘Tate le Tatago lena.’ (Joh. 20:17) Le gona ge re ineela go Jehofa le go kolobetšwa re ba karolo ya lapa leo le ratanago la bana babo rena le dikgaetšedi.—Mar. 10:29, 30.

2. Re tlo ithuta’ng sehlogong se?

² Batho ba bangwe ba thatafalelwa ke go lebelela Jehofa e le Tatago bona yo a nago le lerato. Ba bangwe ga ba tsebe gore ba ka bontšha bjang gore ba rata bana babo bona le dikgaetšedi. Mo sehlogong se re tlo kwa kamoo Jesu a re thušago gore re lebelele Jehofa e le Tate yo a nago le lerato le go ba le segwera se sebotse le yena. Re tlo kwa le gore re ka ekiša Jehofa bjang tseleng yeo re swarago bana babo rena le dikgaetšedi ka yona.

3. Thapelo yeo Jesu a e rutilego barutiwa ba gagwe e re thuša bjang go ba le segwera se sebotse le Jehofa?

³ Jehofa ke Tatago rena yo a re ratago. Jesu o nyaka gore re lebelele Jehofa ka tsela yeo a mo lebelelago ka yona. O nyaka re mo lebelela e le motswadi yo a re ratago le yoo re ka bolelago le yena nako le ge e le efe, e sego molaodi yo a sego botho yoo sa gagwe e lego go no re beela melao. Re bona se thapelong yeo Jesu a ilego a e ruta barutiwa ba gagwe. O ile a thoma thapelo yeo ka mantšu ao a rego: “Tatago rena.” (Mat. 6:9) Jesu a ka ba a ile a re laela gore re bitše Jehofa “Ramatlaohle,” “Mmopi” goba “Kgoši ya bosafelego,” e lego maina ao ka moka a lego gona ka  Mangwalong. (Gen. 49:25; Jes. 40:28; 1 Tim. 1:17) Eupša Jesu o ile a kgetha go re laela gore re bitše Jehofa gore ke ‘Tate.’

4. Re tseba bjang gore Jehofa o nyaka gore re be bagwera ba gagwe?

⁴ Na o hwetša go le thata go lebelela Jehofa bjalo ka Tate yo a nago le lerato? Ba bangwe ba rena re ikwa bjalo. Re ka thatafalelwa ke go nagana gore go ka ba go na le motswadi yo a re ratago ka ge re se ra godišwa gabotse. Ruri go a kgothatša go tseba gore Jehofa o kwešiša kamoo re ikwago ka gona! O nyaka go ba le segwera sa kgauswi le rena. Ke ka baka leo Beibele e re kgothaletšago gore: “Batamelang Modimo gomme o tla le batamela.” (Jak. 4:8) Jehofa o a re rata e bile o nyaka go ba Tatago rena yo mokaonekaone.

5. Go ya ka Luka 10:22, Jesu a ka re thuša bjang gore re be le segwera se sebotse le Jehofa?

⁵ Jesu a ka re thuša gore re be le segwera se sebotse le Jehofa. O tseba Jehofa gabotse e bile o na le dika tša go swana le tša gagwe. Ke ka baka leo a ilego a re: “Yo a bonego nna o bone le Tate.” (Joh. 14:9) Ka ge Jesu e le leitšibulo ka lapeng la Jehofa, o re ruta kamoo re ka hlomphago Tatago rena le go mo kwa gaešita le go phema dilo tšeo di ka dirago gore a se ke a re amogela. O ile a dira seo kudukudu nakong ya ge a be a le mo lefaseng. O ile a re ruta kamoo Jehofa e lego Tate yo a nago le botho le lerato. (Bala Luka 10:22.) A re kweng e mengwe ya mehlala yeo e bontšhago seo dirapeng tše di latelago.

6. Nea mehlala ya kamoo Jehofa a ilego a theetša Jesu.

⁶ Jehofa o theetša bana ba gagwe. Nagana kamoo a ilego a theetša Morwa wa gagwe wa leitšibulo. Ruri ga go na pelaelo gore Jehofa o ile a kwa dithapelo tše dintši tšeo Morwa wa gagwe a ilego a di rapela ge a be a le mo lefaseng. (Luka 5:16) O ile a kwa Jesu a rapela pele a ka dira diphetho tše bohlokwa tša go swana le go kgetha baapostola ba 12. (Luka 6:12, 13) Le gona Jehofa o ile a kwa Jesu a rapela nakong ya ge a be a gateletšegile kudu. Pejana ga ge Judase a ka mo eka, Jesu o ile a rapela Tatagwe a mo kgopela gore a mo thuše go lebeletšana le dilo tšeo di bego di le kgauswi le go mo diragalela. Jehofa ga se a no kwa thapelo yeo ya Morwa wa  gagwe yo a mo ratago, eupša o ile a ba a romela morongwa gore a yo mo matlafatša.—Luka 22:41-44.

7. Go tseba gore Jehofa o theetša dithapelo tša rena go dira gore re ikwe bjang?

⁷ Lehono Jehofa o sa dutše a theetša dithapelo tša bahlanka ba gagwe, le gona o di araba ka tsela e swanetšego le ka nako ya maleba. (Ps. 116:1, 2) Kgaetšedi yo mongwe wa kua India o ile a bona kamoo Jehofa a ilego a araba dithapelo tša gagwe ka gona. O be a na le bothata bja go dula a tshwenyegile kudu gomme o ile a rapela Jehofa ka bjona. O ngwadile gore: “Kgašo ya JW ya May 2019 yeo e bego e bolela ka seo re swanetšego go se dira ge re tshwenyegile, e nthušitše kudu le gona e tlile ka nako yeo ke bego ke e hloka ka yona. Modimo o ile a diriša Kgašo yeo go araba dithapelo tša ka.”

8. Jehofa o ile a bontšha bjang gore o rata Jesu?

⁸ Go no swana le ge Jehofa a ile a bontšha gore o rata Jesu le go mo hlokomela ge a be a le mo lefaseng, le rena o re swara ka tsela e swanago. (Joh. 5:20) Jehofa o ile a thuša Jesu gore a dule a na le tumelo e tiilego, a mo kgothatša ge a be a na le mathata le go kgonthišetša gore o na le dilo ka moka tšeo a bego a di hloka. Le gona Jehofa o ile a bolela gore o rata Morwa wa gagwe ebile o a mo amogela. (Mat. 3:16, 17) Ka ge Jesu a be a dula a ithekgile ka Tatagwe wa legodimong, ga se a ka a ikwa a le noši.—Joh. 8:16.

9. Re tseba bjang gore Jehofa o a re rata?

⁹ Go no swana le Jesu, ka moka ga rena re bone ka ditsela tše dintši gore Jehofa o a re rata. Nagana ka se: Jehofa o re dumeletše gore re be bagwera ba gagwe e bile o re neile bana babo rena ba bantši le dikgaetšedi bao ba re ratago, bao ba dirago gore re thabe le go re kgothatša ge re na le mathata. (Joh. 6:44) Le gona Jehofa o re nea dilo ka moka tšeo re di hlokago gore re tiiše tumelo ya rena. E bile o re thuša ka go re nea dilo tšeo re di hlokago. (Mat. 6:31, 32) Go naganišiša ka tsela yeo Jehofa a re ratago ka yona go dira gore re mo rate le go feta.

10. Re ka ithuta’ng tseleng yeo Jehofa a swarago bana babo rena le dikgaetšedi?

¹⁰ Jehofa o rata bana babo rena le dikgaetšedi. Eupša ka dinako tše dingwe rena re ka hwetša go se bonolo go ba rata. Ka baka la’ng? Ka gobane re tšwa ditšong tša go se swane e bile re godišitšwe ka ditsela tša go se swane. Le gona ka moka ga rena re dira diphošo tšeo di ka tenago batho ba bangwe le go ba nyamiša. Eupša re sa dutše re ka bontšha bana babo rena le dikgaetšedi gore re a ba rata. Re ka dira seo bjang? Ka go ekiša tsela yeo Tatago rena a ba ratago ka yona. (Baef. 5:1, 2; 1 Joh. 4:19) A re boneng gore re ka mo ekiša bjang.

11. Jesu o bontšhitše bjang gore o na le “lešoko” go swana le Jehofa?

¹¹ Jehofa o na le “lešoko le legolo.” (Luka 1:78) Motho yo a nago le lešoko o a tshwenyega ge a bona ba bangwe ba na le mathata, le gona o nyaka ditsela tšeo a ka ba thušago ka tšona le go ba homotša. Tsela yeo Jesu a ilego a swara batho ka yona e be e bontšha gore o na le lešoko go swana le Jehofa. (Joh. 5:19) Nakong e nngwe ge Jesu a be a bona mašaba a batho, o ile “a a šokela, gobane a be a šokiša gomme a gašane go swana le dinku tše di se nago modiši.” (Mat. 9:36) Le gona Jesu ga se a ka a bontšha mašaba ao gore o na le lešoko, eupša o ile a dira se sengwe gore a a thuše. O ile a fodiša batho bao ba bego ba babja le go thuša bao ba bego ba ‘lapile le go imelwa.’—Mat. 11:28-30; 14:14.

12. Nea mohlala wa kamoo re ka bontšhago bana babo rena le dikgaetšedi gore re a ba šokela.

¹² E le gore re kgone go šokela bana babo rena le dikgaetšedi, re swanetše go ipotšiša gore ba lebeletšane le mathata afe. Ka mohlala, kgaetšedi yo a itšego a ka ba a babja kudu. Le ge kgaetšedi yo a sa ke a belaela ka mathata a gagwe, ga go pelaelo gore o tlo thaba kudu ge motho yo mongwe a ka mo thuša. Ipotšiše gore: Na kgaetšedi yo o kgona go hlokomela ba lapa la gagwe ka dilo tšeo ba di hlokago? Na a ka thaba ge nka mo thuša ka go apea goba go hlwekiša ntlo? Goba mohlomongwe ngwanabo rena a ka ba a lahlegetšwe ke mošomo. Na nka mo fa tšheletenyana yeo e tlago go mo thuša go fihlela a hwetša mošomo o mongwe, e bile mohlomongwe ka se bolele gore e tšwa go nna?

13-14. Re ka dira’ng gore re fane go swana le Jehofa?

 ¹³ Jehofa o rata go fana. (Mat. 5:45) Go swana le Jehofa, re swanetše go bontšha gore re šokela bana babo rena le dikgaetšedi ka go ba direla dilo tše itšego le pele ba re kgopela. Re se ke ra letela gore ba tle ba re kgopele gore re ba thuše. Jehofa o re hlabišetša letšatši ka mehla le ge re sa mo kgopele. Le gona motho yo mongwe le yo mongwe o hwetša borutho bja letšatši, e sego feela bao ba lebogago. Jehofa o re bontšha gore o a re rata ka go re nea dilo tšeo re di hlokago. Re rata Jehofa kudu ka gobane o lokile e bile o rata go fana.

¹⁴ Bana babo rena ba bantši le dikgaetšedi ba bontšha gore ba ekiša Tatago bona wa legodimong ka gore ba fane. Ka mohlala, ka 2013 kua Philippines go bile le ledimo le matla leo le bitšwago Haiyan leo le ilego la senya kudu. Magae a bana babo rena ba bantši le dikgaetšedi a ile a senyega e bile ba ile ba lahlegelwa ke dilo tša bona tše dintši. Eupša bana babo bona le dikgaetšedi lefaseng ka moka ba ile ba ba thuša kapejana. Ba bantši ba ile ba ntšha meneelo ya bona ya tšhelete, ba bangwe ba thuša go aga dintlo tše e ka bago tše 750 gomme ba di fetša pele ngwaga o fela. Nakong ya bolwetši bja Corona, bana babo rena ba bantši le dikgaetšedi ba ile ba šoma ka thata go thekga ba bangwe ka phuthegong. Ge re thekga bana babo rena le dikgaetšedi kapejana ge ba hloka thušo, re ba bontšha gore re a ba rata.

15-16. Luka 6:36 e re re swanetše go dira’ng go bontšha gore re ekiša Tatago rena wa legodimong?

¹⁵ Jehofa o a gaugela e bile o a lebalela. (Bala Luka 6:36.) Tatago rena wa legodimong o re gaugela letšatši le lengwe le le lengwe. (Ps. 103:10-14) Le ge barutiwa ba Jesu ba be ba fela ba dira diphošo, eupša o ile a ba gaugela le go ba lebalela. Le gona o ile a neela bophelo bja gagwe e le sehlabelo gore re kgone go lebalelwa dibe  tša rena. (1 Joh. 2:1, 2) Ka ge Jehofa le Jesu ba re gaugela e bile ba re lebalela, seo se dira gore re be le segwera sa kgauswi le bona.

¹⁶ Ge e ba re ‘lebalela’ bana babo rena le dikgaetšedi “ka bolokologi,” segwera sa rena le bona se tla tia. (Baef. 4:32) Ke nnete gore ka dinako tše dingwe go ka no se be bonolo gore re lebalele batho ba bangwe, eupša re swanetše go leka ka thata gore re dire bjalo. Kgaetšedi yo mongwe o re o thušitšwe ke Morokami woo o nago le sehlogo seo se rego, “Lebalelanang ka Bolokologi” gore a kgone go lebalela batho ba bangwe. * O ngwadile gore: “Sehlogo se se nthušitše go bona gore go lebalela ba bangwe le nna go ka nthuša. Le gona se hlalositše gore go lebalela batho bao ba go kgopišitšego ga go bolele gore ga se ba go direla phošo goba ga se ba go kweša bohloko. Eupša go lebalela go bolela go lebala ka dilo tšeo ba bangwe ba go dirilego tšona gomme wa tšwela pele o phela ka khutšo.” Ge re lebalela bana babo rena le dikgaetšedi ka bolokologi, re bontšha gore re a ba rata le gore re ekiša Tatago rena Jehofa.

17. Go ya ka Mateo 5:16, re ka dira’ng gore Tatago rena wa legodimong a retwe?

¹⁷ Ke tokelo e kgolo go ba karolo ya bana babo rena le dikgaetšedi bao ba ratanago lefaseng ka moka. Re nyaka gore batho ba bantši ka mo go kgonegago le bona ba tle ba hlankele Modimo le rena. Ka baka leo, ga se ra swanela go dira selo le ge e le sefe seo se tla dirago gore batho ba nagana dilo tše mpe ka Jehofa goba ka batho ba gagwe. Re leka go dira sohle seo re ka se kgonago go itshwara ka tsela yeo e tlago go dira gore batho ba nyake go theetša ditaba tše dibotse.—Bala Mateo 5:16.

18. Re ka thušwa ke’ng gore re bolele ditaba tše dibotse ka sebete?

¹⁸ Ka dinako tše dingwe batho ba bangwe ba ka re nyatša goba ba re tlaiša ka gobane re theetša Tatago rena wa legodimong. Re ka thušwa ke eng gore re bolele ditaba tše dibotse ge re ikwa re tšhoga? Re ka ithekga ka Jehofa le Morwa wa gagwe gore ba re thuše. Jesu o boditše barutiwa ba gagwe gore ba se ke ba tshwenyega ka seo ba tlago go se bolela le gore ba tla se bolela bjang. Ke ka baka la’ng ba be ba se ba swanela  go tshwenyega? Jesu o hlalositše gore: “Seo le tlago go se bolela le tla se newa ka nako yeo, gobane bao ba bolelago ga se lena feela, eupša ke moya wa Tatago lena wo o bolelago ka lena.”—Mat. 10:19, 20.

19. Nea mohlala wa motho yo mongwe yoo a ilego a bolela ditaba tše dibotse ka sebete.

¹⁹ Nagana ka mohlala wa Robert. Nakong e fetilego ge a be a sa thoma go ithuta Beibele e bile a sa tsebe Mangwalo a mantši, o ile a išwa kgorong ya tsheko Afrika Borwa gore a yo bolela gore ke ka baka la eng a be a sa nyake go tsenela bošole. O ile a bontšha sebete gomme a bolela gore ga a nyake go tsenela bošole ka gobane a rata bana babo ba Bakriste. O ile a bontšha gore o leboga go ba karolo ya lapa la bana babo le dikgaetšedi. Moahlodi o ile a mmotšiša le semeetseng gore: “Bana beno ke bomang?” Robert o be a sa nagane gore o tla botšišwa potšišo yeo, eupša o ile a gopola temana ya letšatši leo kapelapela. Temana yeo e be e le go Mateo 12:50 yeo e rego: “Mang le mang yo a dirago thato ya Tate yo a lego legodimong, yoo ke ngwanešo le kgaetšedi ya ka le mma.” Le ge Robert a be a sa thoma go ithuta Beibele, moya wa Jehofa o ile wa mo thuša gore a arabe potšišo yeo le dipotšišo tše dingwe tšeo a ilego a di botšišwa a se a nagana. Ruri Jehofa o ile a ikgantšha ka Robert! Le rena Jehofa o ikgantšha ka rena ge a bona gore re ithekga ka yena gore a re fe sebete sa go bolela ditaba tše dibotse le ge go se bonolo.

20. Re swanetše go ikemišetša go dira’ng? (Johane 17:11, 15)

²⁰ Eka re ka dula re leboga tokelo yeo re nago le yona ya go ba karolo ya lapa la bana babo rena le dikgaetšedi bao ba ratanago. Re na le Tate yo mokaonekaone le bana babo rena ba bantši le dikgaetšedi bao ba re ratago. Ka mehla re swanetše go dula re leboga dilo tše tšeo re nago le tšona. Sathane le batho ba gagwe bao ba re hloilego ba leka go dira gore re belaele ge e ba Tatago rena wa legodimong a re rata e bile ba leka go šitiša botee bjoo re nago le bjona. Eupša Jesu o ile a re rapelela a kgopela Tatago rena gore a re šireletše e le gore lapa le la gabo rena le dule le na le botee. (Bala Johane 17:11, 15.) Jehofa o tšwela pele a araba thapelo yeo. Eka re ka ekiša Jesu gomme le ka mohla re se ke ra belaela gore Tatago rena wa legodimong o a re rata e bile o tla re thuša. Anke re ikemišetšeng go tšwela pele re na le segwera se sebotse kudu le bana babo rena le dikgaetšedi.