1. Go ya ka Maleaki 3:16, ke puku efe yeo Jehofa a bego a dutše a e ngwala, gona go ngwadilwe eng ka go yona?

 JEHOFA o feditše mengwaga e diketekete a ngwala puku e bohlokwa. Puku ye e na le maina a mantši go tloga ka leina la mohlanka wa Jehofa yo a botegago wa mathomo e lego Abele. * (Luka 11:50, 51) Go tloga ka nako yeo, Jehofa o be a dutše a ngwala maina a mangwe a dimilione go fihla le lehono. Beibele e bitša puku yeo gore ke “puku ya kgopotšo,” “puku ya bophelo,” le “lengwalo la go phuthwa la bophelo.” Eupša sehlogong se re tlo e bitša gore ke “puku ya bophelo.”—Bala Maleaki 3:16; Kut. 3:5; 17:8.

2. Ke bomang bao maina a bona a ngwadilwego ka pukung ya bophelo, gona rena re ka dira’ng gore maina a rena a ngwalwe ka pukung yeo?

² Puku ye e na le maina a bao ba rapelago Jehofa, ba mmoifago, ba mo hlomphago le go rata leina la gagwe. Ba na le sebaka sa go hwetša bophelo bjo bo sa felego. Lehono maina a rena a ka ngwalwa ka pukung yeo ge e ba re na le segwera se se tiilego le Jehofa seo se theilwego go sehlabelo sa Jesu sa topollo. (Joh. 3:16, 36) Ka moka ga rena re nyaka gore maina a rena a ngwalwe ka pukung yeo go sa šetšwe gore re ya go phela legodimong goba mo lefaseng!

3-4. (a) Na re ka kgona go tlo phela ka mo go sa felego ge e ba maina a rena gona bjale a ngwadilwe ka pukung ya bophelo? Hlalosa. (b) Re tlo ithuta’ng sehlogong se le se se latelago?

³ Na se se ra gore bao maina a bona a ngwadilwego ka pukung ya bophelo ba tlo hwetša bophelo bjo bo sa felego?  Re hwetša karabo ya potšišo ye mantšung ao Jehofa a a boditšego Moshe go Ekisodo 32:33. Jehofa o itše: “Mang le mang yo a ntiretšego sebe ke tla mo phumola pukung ya ka.” Ka go realo maina ao gona bjalo a lego pukung ya bophelo a ka phumolwa. Go bjalo ka ge e ka maina a mathomong a be a ngwadilwe ka phensele. (Kut. 3:5.) Re swanetše go kgonthišetša gore maina a rena a ba ka pukung ye go fihlela a ngwalwa ka enke.

⁴ Se se ka dira gore re ipotšiše dipotšišo. Ka mohlala, Beibele e re’ng ka bao maina a bona a ngwadilwego ka pukung ya bophelo le bao maina a bona a sego a ngwalwa ka pukung ye? Bao maina a bona a lego ka pukung ye ba tlo hwetša bophelo bjo bo sa felego neng? Re ka re’ng ka bao ba ilego ba hlokofala pele ba hwetša sebaka sa go ithuta ka Jehofa? Na go na le kgonagalo ya gore maina a bona a ka ngwalwa ka pukung ye? Re tlo araba dipotšišo tše sehlogong se le sehlogong se se latelago.

KE BOMANG BAO MAINA A BONA A NGWADILWEGO KA PUKUNG YA BOPHELO?

5-6. (a) Go ya ka Bafilipi 4:3, ke bomang ba bangwe bao maina a bona a ngwadilwego ka pukung ya bophelo? (b) Ke neng moo maina a bona a tlago go ngwalelwa sa ruri ka pukung ya bophelo?

⁵ Ke maina a bomang ao a lego ka gare ga puku ya bophelo? E le gore re hwetše karabo, a re boleleng ka dihlopha tše hlano tša batho. Ba bangwe mo dihlopheng tše ba ngwadilwe ka pukung ya bophelo mola ba bangwe ba se ba ngwalwa.

⁶ Sehlopha sa mathomo se bopja ke bao ba kgethilwego go yo buša le Jesu legodimong. Na gona bjale maina a bona a ngwadilwe ka pukung ya bophelo? Ee. Go ya ka mantšu a moapostola Paulo ao a a ngwaletšego Bakristegotee le yena goba  “badirišani “ ba gagwe ba kua Filipi, maina a batlotšwa bao ba yago go buša le Jesu a ngwadilwe ka pukung ya bophelo. (Bala Bafilipi 4:3.) Eupša e le gore a dule a ngwadilwe kamoo pukung, ba swanetše go dula ba botega. Ge ba swaiwa la mafelelo pele ba hlokofala goba pele masetlapelo a magolo a thoma, maina a bona a tlo ngwalelwa sa ruri ka pukung yeo.—Kut. 7:3.

7. Kutollo 7:16, 17 e re thuša bjang go kwešiša nako yeo Modimo a tlago go ngwalela sa ruri ba dinku tše dingwe ka pukung ya gagwe ya bophelo?

⁷ Sehlopha sa bobedi ke sa lešaba le legolo la dinku tše dingwe. Na gona bjale maina a bona a ngwadilwe ka pukung ya bophelo? Ee. Na maina a bona a tla dula a le ka pukung ya bophelo ka morago ga gore ba phologe Haramagedone? Ee. (Kut. 7:14) Jesu o ile a re ba ba dinku tše dingwe ba tla ya “bophelong bjo bo sa felego.” (Mat. 25:46) Eupša bao ba phologilego Haramagedone ba ka se hwetše bophelo bjo bo sa felego ka nako yeo. Maina a bona a tla tšwela pele a ngwadilwe ka pukung ya bophelo ka phensele. Nakong ya Pušo ya Jesu ya Mengwaga e Sekete, ‘o tlo ba diša a ba iša didibeng tša meetse a bophelo.’ Bao ba latelago tlhahlo ya Jesu gomme mafelelong ba ahlolwa e le bao ba botegago pele ga Jehofa, maina a bona a tlo ngwalelwa sa ruri ka pukung ya bophelo.—Bala Kutollo 7:16, 17.

8. Ke maina a bomang ao a sego a ngwalwa ka pukung ya bophelo gona go tlo direga eng ka bona?

⁸ Sehlopha sa boraro ke sa bao ba hlaotšwego e le dipudi bao ba tlago go fedišwa ka Haramagedone. Maina a bona ga se a ngwalwa ka pukung ya bophelo. Jesu o itše, “ba tla fedišetšwa sa ruri.” (Mat. 25:46) Paulo o ile a budulelwa go re botša gore “bona ba ba tla welwa ke kotlo ya kahlolo ya tshenyego ya ka mo go sa felego.” (2 Bathes. 1:9; 2 Pet. 2:9) Se se tlo direga le go bao ba ilego ba senyetša moya o mokgethwa. Le bona ba tlo fedišwa gomme ba ka se ke ba hwetša bophelo bjo bo sa felego. Go molaleng gore ba ka se tsošwe. (Mat. 12:32; Mar. 3:28, 29; Baheb. 6:4-6) Ga bjale a re boneng dihlopha tše pedi tša batho bao ba tlago go tsošetšwa mo lefaseng.

BAO BA TLAGO GO TSOŠETŠWA MO LEFASENG

9. Go ya ka Ditiro 24:15, ke dihlopha dife tše pedi tša bao ba tlago go tsošetšwa mo lefaseng, gona phapano ke efe magareng ga dihlopha tše?

⁹ Beibele e bolela ka dihlopha tše pedi tša bao ba tlago go tsošwa ba na le kholofelo ya go phela ka mo go sa felego mo lefaseng e lego, “ba lokilego” le “ba sa lokago.” (Bala Ditiro 24:15.) “Ba lokilego” ke bao ba ilego ba hlankela Jehofa ka potego nakong ya ge ba sa phela. Ka lehlakoreng le lengwe, ba sa lokago ke bao ba sa kago ba hlankela Jehofa ka potego. Ge e le gabotse, ba bantši ba bona boitshwaro bja bona e be e le bjo bo sa lokago. Ka ge dihlopha tše tše pedi di tsošetšwa mo lefaseng, na re ka re maina a bona a ngwadilwe ka pukung ya bophelo? E le gore re arabe potšišo ye, a re boleleng ka sehlopha setee gomme ka morago re boleleng ka se sengwe.

10. Ke ka baka la’ng “ba lokilego” ba tlo tsošwa, gona ba bangwe ba bona ba tlo thabela ditokelo dife? (Bona le “Dipotšišo tše di Tšwago go Babadi” gore o tsebe ka bao ba tlago go tsošwa mo lefaseng.)

¹⁰ Sehlopha sa bone ke sa bao “ba lokilego”. Pele ba ehwa maina a bona a be a  ngwadilwe ka pukung ya bophelo. Na maina a bona a ile a phumolwa ka morago ga gore ba hwe? Aowa ka gobane ba be ba sa “phela” ka kgopolong ya Jehofa. Jehofa “ke Modimo wa ba phelago, e sego wa bahu, gobane go yena bohle ba a phela.” (Luka 20:38) Se se ra gore ge bao ba lokilego ba tsošetšwa mo lefaseng ba tlo hwetša maina a bona a sa ngwadilwe ka pukung ya bophelo le ge a sa ngwadilwe ka phensele. (Luka 14:14) Ba bangwe ba bao ba tsošitšwego ba tlo hwetša ditokelo tša go hlankela e le “dikgošana lefaseng ka moka.”—Ps. 45:16

11. “Bao ba sa lokago” ba tlo swanelwa ke go ithuta’ng pele maina a bona a ka ngwalwa ka pukung ya bophelo?

¹¹ A re boleleng ka sehlopha sa mafelelo sa bohlano e lego sa “bao ba sa lokago.” Ka ge ba be ba sa tsebe Jehofa, ga se ba phela ka melao ya gagwe go fihlela ba ehwa. Ka gona maina a bona ga se a ngwalwa ka pukung ya bophelo. Ge Modimo a ba tsoša o ba nea sebaka sa gore le bona maina a bona a ngwalwe ka pukung ya bophelo. “Bao ba sa lokago” ba tlo hloka thušo e kgolo. Ba bangwe ba bona ba dirile dilo tše mpe kudu bophelong bja bona bja nako e fetilego, ka gona ba tlo hloka go rutwa go phela ka melao ya Jehofa. E le gore seo se direge, Mmušo wa Modimo o tlo rulaganya modiro o mogolo wa go ruta e lego woo o sa kago wa ba gona.

12. (a) Ke mang a tlago go ruta ba sa lokago? (b) Go tlo direga eng ka bao ba ganago go diriša seo ba ithutilego sona?

¹² Ke mang a tlago go ruta ba sa lokago? Lešaba le legolo le bao ba lokilego ba tsošitšwego. E le gore ba sa lokago ba ngwalwe pukung ya bophelo, ba swanetše go ba le segwera se sebotse le Jehofa e bile ba ineele go yena. Tšwelopele ya bona e tlo hlokomelwa ke Jesu Kriste le batlotšwa go bona ge e ba ba diriša seo ba ithutilego sona. (Kut. 20:4) Bao ba sa fetogego ba tla  fedišwa le ge e ba ba tla be ba na le mengwaga e lekgolo. (Jes. 65:20) Jehofa le Jesu ba kgona go bona dipelo, e bile ba ka se dumelele motho gore a ye lefaseng le lefsa ge a fihla a le senye.—Jes. 11:9; 60:18; 65:25; Joh. 2:25.

GO TSOŠETŠWA BOPHELONG LE GO TSOŠETŠWA KAHLOLONG

13-14. (a) Mathomong re be re kwešiša bjang mantšu a Jesu ao a lego go Johane 5:29? (b) Ke eng seo re swanetšego go se tseba ka mantšu ao?

¹³ Jesu o ile a bolela le ka bao ba tlago go tsošetšwa bophelong mo lefaseng. Ka mohlala, o itše: “Nako e a tla yeo ka yona bohle bao ba lego mabitleng ba tlago go kwa lentšu la gagwe gomme ba tšwa, bao ba dirilego dilo tše dibotse ba tla tsogela bophelong, bao ba tlwaetšego go dira dilo tše mpe ba tla tsogela kahlolo.” (Joh. 5:28, 29) Jesu o be a e ra go re’ng?

¹⁴ Nakong e fetilego re be re nagana gore mantšu a Jesu a ra gore ka morago ga tsogo batho bao ba lokilego ba tlo tšwela pele ba dira dilo tšeo di lokilego gomme ba babe ba tšwela pele ba dira dilo tše mpe. Eupša hlokomela gore mo Jesu ga a re bao ba tlago go tsošwa mabitleng ba tlo dira dilo tše mpe goba ba tlo dira tše dibotse. O bolela ka bao ba “bego ba dira dilo tše dibotse” le bao ba “bego ba dira dilo tše mpe” nakong e fetilego. Se se bontšha gore ba di dirile pele ba ka hlokofala. Se se a kwagala. Le gona, lefaseng le lefsa ga go na motho yo a tlago go dumelelwa go dira dilo tše mpe. Bao ba sa lokago ba swanetše go ba ba dirile dilo tše mpe pele ba ka hlokofala. Bjale re ka kwešiša bjang mantšu a Jesu a “go tsogela bophelong” le “go tsogela kahlolong”?

15. Ke bomang bao ba tlago go “tsogela bophelong”, gona ka baka la’ng?

¹⁵ Baloki e lego bao ba dirilego dilo tše dibotse pele ba hlokofala ba tlo “tsogela bophelong” ka gobane maina a bona a šetše a ngwadilwe ka pukung ya bophelo. Se se ra gore tsogo ya “bao ba dirilego dilo tše dibotse” yeo e lego go Johane 5:29 e swana le ya “ba lokilego” yeo e lego go Ditiro 24:15. Kwešišo ye e sepedišana le Baroma 6:7, yeo e rego: “Yo a hwilego o hunologile sebeng sa gagwe.” Dibe tšeo di dirilwego ke bao ba lokilego di ile tša phumolwa ge ba hlokofala, eupša ba ile ba lebelelwa ba lokile. (Baheb. 6:10) Ge baloki ba tsošwa bahung ba tlo swanelwa ke go dula ba botega e le gore maina a bona a ngwalwe ka pukung ya bophelo.

16. Go “tsogela kahlolong” go ra go re’ng?

¹⁶ Go tlo direga eng ka bao ba dirilego dilo tše mpe pele ba hlokofala? Le ge dibe tša bona di phumotšwe pele ba ehwa, eupša ga se ba hlankela Jehofa ka go botega. Maina a bona ga se a ngwalwa ka pukung ya bophelo. Tsogo ya bao “ba dirilego dilo tše mpe,” e swana le tsogo ya bao “ba sa lokago” bao go bolelwago ka bona go Ditiro 24:15. Bona ba tla “tsogela kahlolong.” * Go tsogela kahlolong go ra gore bao ba tsošitšwego ba tlo lekolwa go bona kamoo ba phelago ka gona. (Luka 22:30) Ka morago ga nako, Jesu o tlo tseba ge e ba ba swanetšwe ke go ngwalwa ka pukung ya bophelo goba aowa. Maina a bao ba sa lokago  a tlo ngwalwa ka pukung ya bophelo ge feela ba ka fetoša tsela ya bona ya kgale ya go phela gomme ba ineela go Jehofa.

17-18. Bao ba tlago go tsošetšwa mo lefaseng ba swanetše go dira’ng, gona “ditiro” tše go hlaloswago ka tšona go Kutollo 20:12, 13 ke eng?

¹⁷ Go sa šetšwe gore bao ba tsošitšwego e be e le ba lokilego goba ba sa lokago pele ba ka hwa, ka moka ga bona ba tlo swanelwa ke go kwa mangwalo a go phuthwa ao a tla bego a butšwe nakong ya Mengwaga e Sekete. Moapostola Johane o hlalosa seo a se bonego ponong: “Ka bona bahu ba bagolo le ba banyenyane ba eme pele ga sedulo sa bogoši gomme mangwalo a go phuthwa a bulwa. Eupša lengwalo le lengwe la go phuthwa la bulwa; ke lengwalo la go phuthwa la bophelo. Bahu ba ahlolwa ka dilo tšeo di ngwadilwego mangwalong a go phuthwa go ya ka ditiro tša bona.”—Kut. 20:12, 13.

¹⁸ Bao ba tlago go tsošwa ba tlo ahlolwa ka “ditiro” dife? Na ke ditiro tšeo ba di dirilego pele ba ehwa? Aowa! Gopola gore dibe tša bona di ile tša phumolwa ge ba ehwa. Mo ga go bolelwe ka “ditiro tšeo ba di dirilego” pele ba ehwa. Eupša go tlo ahlolwa go lebeletšwe kamoo ba arabelago ka gona tlwaetšong yeo ba e newago lefaseng le lefsa. Le banna bao ba bego ba botega ba go swana le Noa, Samuele, Dafida le Daniele ba tlo swanelwa ke go ithuta ka Jesu Kriste le go bontšha tumelo sehlabelong sa gagwe. Ge e ba banna ba ba tlo swanelwa ke go bontšha tumelo, gona bao ba sa lokago ba tlo swanelwa ke go e bontšha ka mo go oketšegilego!

19. Go tlo direga eng ka bao ba sa nyakego go kwa ditaelo tša Jesu?

¹⁹ Go tlo direga eng ka bao ba sa nyakego go kwa ditaelo tša Jesu? Kutollo 20:15 e re botša gore: “Mang le mang yo a sa hwetšwago a ngwadilwe pukung ya bophelo a lahlelwa letsheng la mollo.” Ee, ba tlo fedišetšwa sa ruri. Ka gona go bohlokwa gore re kgonthišetše gore maina a rena a dula a ngwadilwe ka pukung ya bophelo!

20. Ke modiro ofe woo o thabišago wo o tlago go dirwa nakong ya Pušo ya Mengwaga e Sekete? (Bona seswantšho sa letlakala la ka ntle.)

²⁰ Pušo ya Mengwaga e Sekete e tlo thabiša kudu. E tlo ba lesolo le legolo kudu la go ruta leo le sa kago la ba gona mo lefaseng. Gape e tlo ba nako ya go lekola boitshwaro bja ba lokilego le ba sa lokago. (Jes. 26:9; Dit. 17:31) Lesolo la go ruta le tlo dirwa ka tsela efe? Sehlogo se se latelago se tlo re thuša go kwešiša le go thabela tokelo ye ya moswananoši.