Go ya ka 1 Bakorinthe 15:8, Paulo o itše: “Mafelelong o iponagaditše le go nna bjalo ka ge eka ke go yo a belegwego pele ga nako.” Nakong e fetilego re be re hlalosa gore Paulo o be a bolela ka yena ge a be a bona pono ya letago la Jesu. Go be go le bjalo ka ge eka o neilwe tokelo ya go tswalwa gape goba go tsošwa le go thabela bophelo bja legodimong mengwaga pele ga ge tsogo e bjalo e ka ba gona. Ka morago ga go nyakišiša temana ye, go bonala go hlokagala go lokiša tlhaloso ya yona.

Ke therešo gore mo Paulo o be a bolela ka seo se diragetšego nakong ya tshokologo ya gagwe. Eupša o be a era gore’ng ge a be a re o ‘belegwe pele ga nako’? Go na le dikgonagalo tše dintši tša seo a bego a se bolela.

Tshokologo ya gagwe e bile ka nakwana e bile e be e kweša bohloko. Gantši ngwana yoo a belegwago pele ga nako o tla ka nako yeo e sa letelwago. Ge Saulo (yoo ka morago a ilego a tsebja ka la Paulo) a be a eya Damaseko go yo tlaiša Bakriste, o be a se a letela go bona pono ya Jesu yo a tsošitšwego bahung. Tshokologo ya Paulo ga se ya makatša yena feela eupša e makaditše le Bakriste bao a bego a eya go ba tlaiša motseng woo. Go sokologa ga gagwe e bile mo go kwešago bohloko moo e lego gore o ile a ba sefofu ka nakwana.—Dit. 9:1-9, 17-19.

O ile a sokollwa ka “nako yeo e sego ya maleba.” Lentšu la Segerika leo le fetoletšwego e le “yo a belegwego pele ga nako” le ka fetolelwa gape e le “yo a belegwego ka nako yeo e sego ya maleba.” The Jerusalem Bible e e bea ka tsela ye: “Go be go le bjalo ka ge eka ke tswetšwe go sa letelwa.” Nakong ya tshokologo ya Paulo, Jesu o be a šetše a boetše legodimong. Go fapana le bao Paulo a boletšego ka bona temaneng e fetilego, o be a se a bona Jesu pele ga ge a ka rotogela legodimong. (1 Bakor. 15:4-8) Pono yeo e sa letelwago ya Jesu yo a tsošitšwego, e neile Paulo tokelo ya go bona Jesu le ge a šetše a rotogetše legodimong, le ge go be go bonagala eka ke “nako yeo e sego ya maleba.”

O be a bolela ka tsela ya go inyatša. Go ya ka diithuti tše dingwe, polelo yeo Paulo a e dirišitšego mo e ka ba e bolela gore Paulo o be a ipona phošo. Se se be se era gore Paulo o be a nagana gore ga a swanelwe ke tokelo ya go ba moapostola. Ge e le gabotse o ile a re: “Ke yo monyenyane go baapostola ka moka gomme ga ke swanelwe ke go bitšwa moapostola, gobane ke ile ka hlomara phuthego ya Modimo. Eupša ke seo ke lego sona ka botho bjo bogolo bja Modimo.”—1 Bakor. 15:9, 10.

Go bonagala Paulo a be a bolela ka tsela ya tšhoganetšo yeo Jesu a iponagaditšego go yena ka yona, tshokologo ya gagwe yeo e bego e sa letelwa, goba gore o be a sa swanelege go ka amogela kutollo ye e makatšago. Go sa šwetšwe seo temana ye e se bolelago, go bonagala Paulo a be a tšeela godimo tokelo yeo a bego a ena le yona. E ile ya mo kgonthišetša gore Jesu o be a tsošitšwe bahung. Ga go makatše gore o be a fela a bolela ka tokelo ye yeo e sa letelwago ge a be a ruta ba bangwe ka tsogo ya Jesu.—Dit. 22:6-11; 26:13-18