1. Go dula re “hlaphogetšwe monaganong” go bolela’ng? (2 Timotheo 4:5)

 GE RE kopana le mathata, potego ya rena go Jehofa le mokgatlo wa gagwe e ka lekwa. Re ka fenya bothata bjo bjang? Re swanetše go dula re hlaphogetšwe monaganong e bile re dule re phakgame re eme re tiile tumelong. (Bala 2 Timotheo 4:5.) Re ka dula re hlaphogetšwe monaganong ka go iša maswafo fase, go nagana gabotse le go lebelela dilo ka tsela yeo Jehofa a di lebelelago ka yona. Ge re ka dira bjalo menagano ya rena e ka se laolwe ke tsela yeo re ikwago ka yona.

2. Re tlo boledišana ka’ng sehlogong se?

² Sehlogong se se fetilego, re ithutile ka mathata a mararo ao re ka kopanago le ona ka ntle ga phuthego. Sehlogong se, re tlo boledišana ka mathata a mararo ao a ka lekago potego ya rena go Jehofa ka phuthegong. Mathata ao ke (1) ge re sa swarwe gabotse ke Mokristegotee le rena, (2) ge re newa tayo, le (3) ge re thatafalelwa ke go amogela diphetogo tša mokgatlo. Re ka dula re hlaphogetšwe monaganong bjang le go botegela Jehofa le mokgatlo wa gagwe ge re kopana le mathata a?

3. Re ka arabela bjang ge Mokristegotee le rena a sa re sware gabotse?

³ Na o kile wa se swarwe gabotse ke ngwanabo rena goba kgaetšedi, goba motho yo a nago le boikarabelo go swana le mogolo? Mohlomongwe, ngwanabo rena o be a se a ikemišetša go go kweša bohloko. (Baroma 3:23; Jak. 3:2)  Eupša ditiro tša gagwe di ka ba di go kgopišitše moo o felelwago le ke boroko ka go nagana ka bothata bjoo. O ka ba o ile wa ipotšiša gore, ‘na mokgatlo wo ke wa Modimo ge eba ngwanabo rena a itshwara ka tsela ye?’ Sathane o nyaka re nagana bjalo. (2 Bakor. 2:11) Ge e ba re nagana ka tsela yeo, re ka kgaotša go hlankela Jehofa le go tlogela mokgatlo wa gagwe. Ka gona ge re ikwa eka ngwanabo rena goba kgaetšedi ga se a re swara gabotse, re ka dira eng gore re dule re hlaphogetšwe monaganong le go phema go nagana dilo tše di fošagetšego?

4. Josefa o ile a dula a hlaphogetšwe monaganong bjang le ge a be a sa swarwe gabotse, gona re ithuta’ng mohlaleng wa gagwe? (Genesi 50:19-21)

⁴ O se ke wa galefa. Ge Josefa e be e sale mofsa, bana babo ba be ba sa mo sware gabotse. Ba be ba mo hloile e bile ba bangwe ba nyaka go mmolaya. (Gen. 37:4, 18-22) Mafelelong ba ile ba mo rekišetša bokgobeng, moo Josefa a ilego a kopana le mathata a magolo ka mengwaga e ka bago e 13. Josefa a ka ba a ile a nagana gore Jehofa ga a mo rate. A ka ba a ile a ipotšiša ge e ba Jehofa a mo lahlile ka nako yeo a bego a hloka thušo ya gagwe. Eupša Josefa ga se a galefa. Go e na le moo, o ile a dula a hlaphogetšwe monaganong ka go dula a išitše maswafo fase. Ge a be a hwetša sebaka sa go itefeletša go bana babo, o ile a phema go dira bjalo gomme a ba bontšha lerato le go ba lebalela. (Gen. 45:4, 5) Josefa o ile a itshwara ka tsela yeo ka gobane o be a kgona go nagana gabotse. Ga se a nagana ka mathata a gagwe eupša o be a dula a nagana ka seo Jehofa a bego a se nyaka. (Bala Genesi 50:19-21.) Re ithuta’ng? Ge e ba o sa swarwe gabotse o se ke wa galefela Jehofa goba wa ipotšiša ge e ba a go lahlile. Go e na le moo, naganišiša kamoo a go thušago go kgotlelela bothata bjoo e bile ge ba bangwe ba sa go sware gabotse leka go bipa bofokodi bjoo ka lerato.—1 Pet. 4:8.

5. Miqueas o ile a dira’ng ge a be a sa swarwe gabotse?

⁵ Nagana ka phihlelo ya mogolo yo a tšwago South America yo a bitšwago Miqueas. b O ile a gopola nako yeo bana babo rena bao ba nago le maikarabelo ka mokgatlong wa Jehofa ba bego ba sa mo sware gabotse. O itše: “Bophelong bja ka ga se ka ka ka gateletšega monaganong ka tsela ye. Ke be ke sa kgone go robala bošego ke belaela e bile ke lla, ka gobane go be go se na seo nka se dirago.” Eupša Miqueas o ile a dula a hlaphogetšwe monaganong gomme a laola tsela yeo a ikwago ka yona. O be a rapela ka mehla a kgopela Jehofa gore a mo nee moya o mokgethwa le matla a go kgotlelela. O ile a dira le nyakišišo ka dikgatišong tša rena gore a hwetšwe dintlha tšeo a ka di dirišago. Re ithuta’ng? Ge ngwanabo rena goba kgaetšedi a se a go swara gabotse, dula o išitše maswafo fase o leke go laola tsela yeo o naganago ka yona. O ka ba o sa tsebe lebaka leo le dirilego gore motho yoo a bolele le go dira dilo ka tsela yeo. Bolela le Jehofa ka thapelo, o mo kgopele gore a go thuše go bona dilo ka tsela yeo motho yoo a di lebelelago ka yona. Seo se ka go thuša gore o bone gore ngwanabo rena goba kgaetšedi o be a sa ikemišetša go go kweša bohloko gomme wa mo lebalela. (Die. 19:11) Gopola gore Jehofa o bona seemo sa gago e bile o tlo go nea matla ao o a hlokago gore o kgone go kgotlelela.—2 Dikor. 16:9; Mmo. 5:8.

6. Ke ka baka la’ng go le bohlokwa go kwešiša gore Jehofa o re phošolla ka gobane a re rata? (Baheberu 12:5, 6, 11)

⁶ Re ka nyama kudu ge Jehofa a re phošolla. Eupša ge re šetša maikwelo a rena a go kwa bohloko, re ka thoma go nyenyefatša tayo e bile ra kwa e hloka toka. Seo se ka re thibela go kwešiša selo se bohlokwa kudu e lego gore Jehofa o re phošolla ka gobane a re rata. (Bala Baheberu 12:5, 6, 11.) Ge re dumelela maikwelo a rena a re laola, re nea Sathane sebaka sa go re hlasela. O nyaka re gane tayo, re tlogele phuthego e bile re se sa hlankela Jehofa. O ka dula o hlaphogetšwe monaganong bjang ge o neilwe tayo?

7. (a) Ka ge seswantšho se bontšha, Jehofa o ile a dira’ng ka morago ga gore Petro a amogele tayo? (b) O ithutile’ng mohlaleng wa Petro?

⁷ Amogela tayo, gomme o dire diphetogo. Ke gantšinyana Jesu a phošolla Petro pele ga barutiwa ba bangwe. (Mar. 8:33; Luka 22:31-34) Seo se ka ba se ile sa dira gore Petro a hlabje ke dihlong. Lega go le bjalo Petro o ile a dula a botegela Jesu, a amogela tayo le go ithuta diphošong tša gagwe. Ka gona Jehofa o ile a putsa Petro, a mo nea boikarabelo ka phuthegong. (Joh. 21:15-17; Dit. 10:24-33; 1 Pet. 1:1) Re ithuta’ng mohlaleng wa Petro? Re tlo holega ra ba ra hola batho ba bangwe ge re sa hlabje ke dihlong gomme ra amogela tayo le go dira diphetogo. Ge re dira bjalo re ba le mohola go Jehofa le go bana babo rena.

8-9. Bernardo o ile a ikwa bjang ka morago ga gore a hwetše tayo, gona o thušitšwe ke eng go fetoša tsela yeo a naganago ka yona?

⁸ Nagana ka seo se ilego sa diragalela ngwanabo rena wa kua Mozambique, e lego Bernardo. O ile a tlošwa gore e se sa ba mogolo. Mathomong Bernardo o ile a ikwa bjang? O re: “Ke be ke kgopišegile ka gobane ke be ke sa rate tayo yeo ke neilwego yona.” O be a tshwenyegile ka gore ba bangwe ka phuthegong ba ka nagana dilo tše mpe ka yena. O oketša ka gore: “Go ile gwa ntšea dikgwedi tše dintšinyana gore ke lebelele boemo bja ka ka tsela e botse le go tshepa Jehofa le mokgatlo wa gagwe gape.” Bernardo o thušitšwe ke eng go fetoša tsela yeo a naganago ka yona?

⁹ Bernardo o ile a fetoša tsela yeo a naganago  ka yona. O hlalosa gore: “Ge ke be ke le mogolo, Ke be ke diriša lengwalo la Baheberu 12:7 go thuša ba bangwe gore ba lebelele tayo ya Jehofa ka tsela e botse. Ka gona ke ile ka ipotšiša gore: ‘Ke mang a ka dirišago lengwalo le?’ Ke bahlanka ka moka ba Jehofa go akaretša le nna.” Bernardo o ile a dira diphetogo tša gore a tshepe Jehofa le Mokgatlo wa gagwe gape. O ile a fetša nako e ntši a bala Beibele le go naganišiša ka seo a ithutago sona. Le ge a be a tshwenyegile ka gore bana babo le dikgaetšedi ba be ba mo lebelela bjang, eupša o be a šoma le bona tšhemong le go tšea karolo dibokeng. Ge nako e dutše e eya, Bernardo o ile a bušetšwa gore e be mogolo gape. Ge e ba o hweditše tayo go swana le Bernardo, leka go phema go hlabja ke dihlong gomme o amogele keletšo le go dira diphetogo. c (Die. 8:33; 22:4) Ge o dira bjalo o ka kgodišega gore Jehofa o tla go putsa ka ge o dula o mmotegela e bile o botegela le mokgatlo wa gagwe.

10. Potego ya banna ba Baisiraele e ile ya lekwa ke eng?

¹⁰ Potego ya rena e ka lekwa ke diphetogo tša mokgatlo. Ge re sa hlokomele re ka di dumelela di re aroganya le Jehofa. Ka mohlala, nagana kamoo boemo bja Baisiraele bo ilego bja fetoga ka gona. Pele Jehofa a ka nea Baisiraele Molao, dihlogo tša malapa di be di dira dilo tšeo baperisita ba bego ba di dira. Ba be ba aga dialetare le go direla Jehofa dihlabelo. (Gen. 8:20, 21; 12:7; 26:25; 35:1, 6, 7; Jobo 1:5) Eupša ge molao o thewa, dihlogo tša malapa di be di se sa dumeletšwe go dira dilo tšeo. Jehofa o kgethile baperisita lapeng la Arone gore e be bona ba dirago dihlabelo. Go tloga ka nako yeo dihlogo tša malapa tšeo e bego e se barwa ba Arone, di be di ka bolawa ge di ka dira mešomo ya baperisita. d (Lef. 17:3-6, 8, 9) Na le e ka ba e le lebaka leo ka lona Kora, Dathane, Abirama le dikgošana tše 250 di ilego tša se kwane le bolaodi bja Moshe le Arone? (Num. 16:1-3) Ga re tsebe karabo. Eupša re a tseba gore Kora le banna bao a bego a na le bona ba ile ba palelwa ke go botegela Jehofa. Re ka dira’ng ge potego ya rena e lekwa ke diphetogo tša mokgatlo?

11. Re ithuta’ng mohlaleng wa Balefi ba Bakohathe?

¹¹ Thekga diphetogo tša mokgatlo ka botlalo. Bakohathe ba be ba na le kabelo e bohlokwa kudu nakong ya ge ba le lešokeng. Nako le nako ge Baisiraele ba huduga, Bakohathe ba bangwe ba be ba swara areka ya kgwerano pele ga batho ka moka. (Num. 3:29, 31; 10:33; Josh. 3:2-4) Yeo e be e le tokelo e kgolo kudu! Eupša dilo di ile tša fetoga ge Baisiraele ba tsena nageng e holofeditšwego. Go be go se sa hlokagala gore areka e hudušwe gantši. Ka gona nakong yeo Solomone a bego a buša e le kgoši, Bakohathe ba bangwe ba be ba abetšwe go šoma e le diopedi, baletakgoro gomme ba bangwe ba be ba hlokomela dintlo tša polokelo. (1 Dikor. 6:31-33; 26:1, 24) Ga gona pego yeo e bontšhago gore  Bakohathe ba be ba nyaka maemo a godimo ka gobane ba be ba na le kabelo e kgethegilego peleng. Re ithuta’ng? Thekga le go amogela diphetogo tšeo mokgatlo wa Jehofa o di dirago ka pelo ka moka le tšeo di ka amago kabelo ya gago. Thabela kabelo e nngwe le e nngwe yeo o newago yona. Eupša o gopole gore kabelo ya gago ga se yona e go dirago gore o be bohlokwa go Jehofa. Jehofa o tšeela godimo go kwa ga gago go feta kabelo le ge e le efe yeo o nago le yona.—1 Sam. 15:22.

12. Zaina o ile a ikwa bjang ge kabelo ya gagwe ya Bethele e fetoga?

¹² Nagana ka mohlala wa kgaetšedi Zaina, yo a ilego a hwetša kabelo e mpsha gomme a lahlegelwa ke tokelo yeo a bego a e rata kudu. O ile a abelwa go ya tšhemong ka morago ga go hlankela Bethele ka mengwaga e 23. O re: “Ge kabelo ya ka e be e fetošwa ke ile ka makala. Ka ikwa ke se na mohola le go ipotšiša gore, ‘Ke dirile eng se sebe?’” Ka manyami, bana babo rena le dikgaetšedi ka phuthegong ba ile ba mo kweša bohloko le go feta ka gore: “Ge e ba o be o swanelega mokgatlo o be o ka se go tlogele o sepela.” Seo se ile sa nyamiša Zaina kudu e bile sa dira gore a lle bošego bjo bongwe le bjo bongwe. Eupša o re: “Ga se ka itumelela go belaela mokgatlo goba lerato la Jehofa.” Zaina o thušitšwe ke eng gore a dule a hlaphogetšwe monaganong?

13. Zaina o ile a dira’ng gore a fenye dikgopolo tšeo di sa lokago?

¹³ Zaina o ile a kgona go fenya dikgopolo tšeo di sa lokago. Bjang? O ile a bala dihlogo ka dikgatišong tša rena, tšeo di bego di bolela ka boemo bja gagwe gomme tša mo thuša go kgotlelela. Sehlogo seo se rego: “O ka Lebeletšana ka Katlego le go Nyama!” ka go Morokami wa February 1, 2001 se ile sa mo thuša kudu. Sehlogo seo se hlalosa kamoo Mareka a ilego a ikwa go swana le yena ge kabelo ya gagwe e be e fetoga. Zaina o re: “Ke be ke hloka mohlala wa Mareka gore ke kgaotše go nyama.” Zaina ga se a kgaotša go ba le bagwera ba gagwe le go bolela ditaba tše dibotse le bana babo rena le dikgaetšedi e bile ga se a ka a ikwela bohloko. O ile a bona gore moya o mokgethwa ke ona o hlahlago mokgatlo wa Jehofa le gore bana babo rena bao ba bego ba etelela pele ba  be ba mo hlokomela. Eupša o ile a lemoga le gore mokgatlo wa Modimo o swanetše go dira sohle seo o ka se kgonago gore o phethe mošomo wa Jehofa.

14. Vlado o be a thatafalelwa ke eng, gona o thušitšwe ke eng?

¹⁴ Mogolo wa mengwaga e 73 wa kua Slovenia e lego Vlado, o ile a hwetša go le thata ge phuthego ya gabo ya kgauswi e be e kopantšwe le phuthego e nngwe. O re: “Ke be ke sa kwešiše gore ke ka baka la’ng Holo ya Mmušo e botse kudu e ka tswalelwa. Ke ile ka kwa bohloko ka gobane re be re sa tšwa go e tsošološa. Ke šoma ka go betla ka gona ke be ke dirile thoto e mpsha ya moo. E bile go kopanywa ga diphuthego tše, go be go nyaka diphetogo tše dintši tšeo go sego bonolo gore bagoeledi bao ba godilego ba ka di fihlelela.” Vlado o ile a thušwa ke eng go thekga tlhahlo yeo? O re: “Go amogela diphethogo tšeo di dirilego ke mokgatlo wa Jehofa go re nea ditšhegofatšo. E bile go re tlwaetšwa go amogela diphetogo tše dikgolo tšeo di sa tlago go dirwa nakong e tlago.” Na o thatafalelwa ke go amogela diphetogo tša go kopanywa ga diphuthego goba go fetošwa ga dikabelo? Kgodišega gore Jehofa o kwešiša ka tsela yeo o ikwago ka yona. O tlo šegofatšwa ge o thekga diphetogo le go botegela mokgatlo wa Jehofa.—Ps. 18:25.

15. Re ka dula re hlaphogetšwe monaganong bjang ge re kopana le mathata ka phuthegong?

¹⁵ Re swanetše go letela go kopana le mathata ka phuthegong ge re dutše re batamela bofelong bja tshepedišo ye ya dilo. Mathata ao a ka leka potego ya rena go Jehofa. Ka gona re swanetše go dula re hlaphogetšwe monaganong. O se ke wa kgopišega ge Mokristegotee le wena a sa go sware gabotse. Ge o hwetša tayo o se ke wa hlabja ke dihlong, amogela keletšo e bile o dire diphetogo. Ge mokgatlo wa Jehofa o dira diphetogo tšeo di go amago, di amogele ka pelo ka moka le go kwa tlhahlo.

16. O ka dira’ng gore o dule o tshepa Jehofa le mokgatlo wa gagwe?

¹⁶ O ka dula o tshepa Jehofa le mokgatlo wa gagwe ge potego ya gago e lekwa. Eupša gore o dire bjalo, o swanetše go dula o hlaphogetšwe monaganong e lego go dula o išitše maswafo fase le go lebelela dilo ka tsela yeo Jehofa a di lebelelago ka yona. Ikemišetše go ithuta ka batho ba ka Beibeleng bao ba ilego ba ba boemong bjo bo swanago le bja gago le go naganišiša ka mehlala ya bona. Kgopela Jehofa ka thapelo gore a go thuše. O se ke wa ikarola go phuthego. Go sa šetšwe gore go ka direga eng, Sathane a ka se kgone go go aroganya le Jehofa le mokgatlo wa gagwe.—Jak. 4:7.