1. Re tseba bjang gore Jehofa o nyaka go batamela kgauswi le rena?

 JEHOFA o re mema gore re batamele kgauswi le yena. (Jak. 4:8) O nyaka go ba Modimo wa rena, Tate wa rena le Mogwera wa rena. O araba dithapelo tša rena e bile o a re thuša nakong ya mathata. E bile o šomiša mokgatlo wa gagwe go re ruta le go re šireletša. Eupša ke eng seo re swanetšego go se dira gore re batamele kgauswi le Jehofa?

2. Re ka batamela bjang kgauswi le Jehofa?

² Re ka batamela kgauswi le Jehofa ka go mo rapela, le ka go bala Lentšu la gagwe gomme ra naganišiša ka lona. Ge re dutše re dira bjalo, re tlo mo rata kudu le go mo leboga. Re ikwa re na le mafolofolo a go mo theetša le go mo tumiša ka ge seo se mo swanela. (Kut. 4:11) Ge re dutše re ithuta ka Jehofa, re tlo mo tshepa ra ba ra tshepa le mokgatlo wa gagwe wo a re lokišeleditšego wona go re thuša.

3. Sathane o leka bjang go re aroganya le Jehofa, gona re tlo thušwa ke’ng gore re se tlogele Modimo le mokgatlo wa gagwe? (Psalme 31:13, 14)

³ Sathane o leka go re aroganya le Modimo, kudu ge re lebeletšane le mathata. O dira seo bjang? O leka ganyenyane-ganyenyane go re dira gore re se sa tshepa Jehofa le mokgatlo wa gagwe. Eupša re fenya diteko tšeo. Ge tumelo ya rena e tiile e bile re tshepa Jehofa ka mo go feletšego, re ka se tlogele Modimo wa rena le mokgatlo wa gagwe.—Bala Psalme 31:13, 14.

4. Re tlo ithuta ka eng sehlogong se?

⁴ Sehlogong se, re tlo ithuta ka ditlhohlo tše tharo tšeo di ka tšwelelago ka ntle ga phuthego, tšeo di ka dirago gore re se sa tshepa Jehofa le mokgatlo wa gagwe. Ditlhohlo tše di ka re aroganya bjang le Jehofa? Gona re ka  dira eng go lwantšhana le maano a Sathane?

5. Mathata ao re kopanago le ona a ka dira bjang gore re se sa tshepa Jehofa?

⁵ Ka dinako tše dingwe re kopana le mathata a bjalo ka go ganetšwa ke ba malapa a bo rena goba go lahlegelwa ke mešomo ya rena. Mathata a mohuta wo a ka dira bjang gore re se sa tshepa Jehofa le mokgatlo wa gagwe le go re aroganya le yena? Ge re kgotlelela mathata ka nako e telele, re ka no ikwa re se na matla e bile re nyamile. Sathane o diriša mathata a go re dira gore re nagane eka Jehofa ga a re rate. O nyaka gore re ipotšiše ge e ba Jehofa ke yena a re bakelago mathata goba mokgatlo wa gagwe ke ona o re bakelago mathata. Se se swanago se diragaletše Baisiraele ba bangwe kua Egipita. Mathomong ba be ba dumela gore Jehofa o kgethile Moshe le Arone gore ba ba lokolle bokgobeng. (Ek. 4:29-31) Eupša ka morago ga gore Farao a ba tlaiše, ba ile ba sola Moshe le Arone ka mathata a bona gomme ba bolela gore: “Le dirile gore re hloiwe ke Farao le bahlanka ba gagwe moo le bilego le ba neile tšhoša ka seatleng gore ba re bolaye.” (Ek. 5:19-21) Ke mo go nyamišago e le ruri gore ba ile ba sola bahlanka ba Modimo bao ba botegago. Ge e ba o kgotleletše mathata ka nako e telele, o ka dula o tshepa Jehofa bjang gotee le mokgatlo wa gagwe?

6. Re ithuta’ng go moporofeta Habakuku ka go lebeletšana le mathata? (Habakuku 3:17-19)

⁶ Tšhollela pelo ya gago go Jehofa ka thapelo, gomme o tla go thekga. Moporofeta Habakuku o ile a kopana le mathata a mantši. Ka nako e nngwe o ile a thoma go belaela ge eba Jehofa a ena le taba le yena. O ile a ntšhetša Jehofa seo se lego mafahleng ka thapelo. O boletše gore: “Jehofa, ke tla llela thušo go wena go fihlela neng gomme o sa nkwe? Ke ka baka la’ng wena o dula o lebeletše bokgopo.” (Habak. 1:2, 3) Jehofa o ile a kwa thapelo e tšwago pelong ya mohlanka wa gagwe yo a botegago. (Habak. 2:2, 3) Ka morago ga go naganišiša ka moo Jehofa a ilego a phološa batho ba gagwe ka gona, Habakuku o ile a boela a thaba gape. O ile a kgodišega gore Jehofa o na le taba le yena gomme a ka mo thuša go kgotlelela mathata le ge e le afe. (Bala Habakuku 3:17-19.) Re ithuta’ng? Ge o lebeletšane le mathata, rapela Jehofa gomme o mmotše ka moo o ikwago ka gona o bone ge a go thekga. Ge o dutše o dira bjalo, o tlo kgodišega gore Jehofa o tlo go nea matla ao o a hlokago gore o kgotlelele. Tumelo ya gago e tlo tia ge o bona thušo ya gagwe.

7. Ba leloko la bo Shirley ba ile ba leka go mo dira gore a nagane eng, gona o thušitšwe ke’ng gore a dule a botegela Jehofa?

⁷ Dula o dira dilo tšeo di tlago go go thuša go tiiša segwera sa gago le Jehofa. Se ke seo se ilego sa thuša Shirley, kgaetšedi yo a dulago Papua New Guinea ge a be a lebeletšane le mathata. b Lapa la gabo le be le diila e bile ka dinako tše dingwe ba sa kgone go hwetša dijo tše di lekanego. Yo mongwe wa ba leloko la gabo o ile a nyatša tsela ya Shirley ya go tshepa Jehofa. O boletše gore: “E kae thušo yeo o rego o e hwetša go moya o mokgethwa wa Modimo? Lapa la geno le sa diila. O itshenyetša nako ka go bolela ditaba tše dibotse.” Shirley o re: “Ke ile ka ipotšiša gore: ‘Na Modimo o na le taba le  rena goba aowa?’ Ke ile ka rapela Jehofa di sa tloga fase gomme ka mmotša dilo ka moka tšeo ke di naganago. Ke ile ka tšwela pele ke ithuta Beibele le dikgatišo tša rena gotee le go dula ke botša batho ditaba tše dibotse le go ya dibokeng.” Shirley o ile a thoma go lemoga gore Jehofa o be a hlokometše lapa la gabo. Ba be ba thabile e bile ba se sa swara ke tlala. Shirley o re: “Ke be ke bona gore Jehofa o araba dithapelo tša ka.” (1 Tim. 6:6-8) Ge e ba o dira sohle go tiiša segwera sa gago le Jehofa, le wena o ka se dumelele mathata goba dipelaelo di go aroganya le Jehofa.

8. Ke’ng seo se ka diragalelago bana babo rena bao ba etelelago pele ka mokgatlong wa Jehofa?

⁸ Manaba a diriša inthanete go phatlalatša maaka goba boitsebišo bjo bo sa felelago ka bana babo rena bao ba etelelago pele ka mokgatlong wa Modimo. (Ps. 31:13) Ba bangwe ba bana ba bo rena ba ile ba latofatšwa le go swarwa. Bakriste ba lekgolong la pele la mengwaga ba ile ba kopana le mathata a swanago ge moapostola Paulo a latofatšwa le go swarwa mo elego gwa phošo. Ba ile ba itshwara bjang?

9. Bakriste ba bangwe ba ile ba itshwara bjang ge Paulo a golegwa?

⁹ Bakriste ba bangwe ba lekgolong la pele la mengwaga ba ile ba se sa thekga Paulo ge a be a golegilwe kua Roma. (2 Tim. 1:8, 15) Ke ka lebaka la eng? Na ba be ba swabiša ke Paulo ka gobane batho ba be ba mo lebelela bjalo ka modiradibe? (2 Tim. 2:8, 9) Goba ba be ba tšhošwa ke gore le bona ba be ba tla tlaišwa? Go sa šetšwe mabaka a bona, nagana kamoo Paulo a ilego a ikwa ka gona. O ile a kgotlelela mathata a mantši a ba a bea bophelo bja gagwe kotsing ka baka la bona. (Dit. 20:18-21; 2 Bakor. 1:8) Ga se ra swanela go swana le batho bao ba lahlilego Paulo ge a be a hloka thušo. Ke eng  seo re swanetšego go dula re se gopola ge bana babo rena bao ba etelelago pele ka mokgatlong wa Modimo ba tlaišwa?

10. Ke’ng seo re swanetšego go se gopola ge bana babo rena ba tlaišwa, gona ka baka la’ng?

¹⁰ Gopola gore ke ka baka la eng re tlaišwa le gore ke mang a re tlaišago. Timotheo wa Bobedi 3:12 e bolela gore: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” Ka gona ga re makale ge Sathane a hlasela bana ba bo rena bao ba etelelago pele ka mokgatlong wa Modimo. O nyaka gore ditlhaselo tše bjalo di tšhoše bana ba bo rena le go ba dira gore ba se sa tshepa Jehofa.—1 Pet. 5:8.

11. Re ithuta’ng mohlaleng wa Onesiforo? (2 Timotheo 1:16-18)

¹¹ Tšwela pele o thekga bana beno ka potego. (Bala 2 Timotheo 1:16-18.) Mokriste wa lekgolong la pele la mengwaga e lego Onesiforo o ile a itshwara ka mo go fapanego ge Paulo a golegwa. “Ga se a hlabišwa dihlong ke diketane tša [Paulo] tša kgolego.” Go e na le mo, Onesiforo o ile a nyaka Paulo, ge a mo hwetša, o ile a nyaka ditsela tšeo a ka mo thušago ka tšona. Ka go dira bjalo, Onesiforo o ile a bea bophelo bja gagwe kotsing. Re ithuta’ng go se? Ga se ra swanela go dumelela go tšhaba batho go re thibela go thekga bana babo rena ge ba tlaišwa. Re swanetše go dira sohle seo re ka se kgonago go ba thuša. (Die. 17:17) Ba hloka lerato le thekgo ya rena.

12. Re ithuta’ng mohlaleng wa bana babo rena le dikgaetšedi ba kua Russia?

¹² Nagana kamoo bana babo rena le dikgaetšedi ba kua Russia ba ilego ba thuša bana babo bona ge ba be ba golegwa. Ge ba bangwe ba eya tshekong, bana babo rena le dikgaetšedi ba bantši ba tla kgorong ya tsheko go ba thekga. Re ithuta’ng go se? Ga se ra swanela go tšhošwa ke go bona bana babo rena bao ba etelelago pele ba rogakwa, ba golegwa goba go tlaišwa. Re ka ba rapelela, ra hlokomela malapa a bo bona ra ba ra nyaka ditsela tšeo re ka ba thekgago ka tšona.—Dit. 12:5; 2 Bakor. 1:10, 11.

13. Bakweri ba ka dira’ng gore re se sa tshepa Jehofa le mokgatlo wa gagwe?

¹³ Ba leloko bao ba sa dumelego, bašomigotee le rena le bao re tsenago le bona sekolo ba ka re kwera ka lebaka la modiro wa rena wa go bolela ditaba tše dibotse goba ge re phela ka melao ya Modimo. (1 Pet. 4:4) Ba ka no bolela gore: “Ke a go rata bjalo ka motho eupša a ke rate bodumedi bja gago, bo šiile ke nako.” Ba bangwe ba ka belaela tsela yeo re swarago bao ba kgaotšwego ka gona, ba bolela gore: “O ipitša bjang motho yo a ratago batho?” Dipolelo tše bjalo di ka dira gore re thome go belaela malao ya Jehofa. Re ka thoma go nagana gore: ‘Na Jehofa o letetše go gontši kudu go tšwa go nna? Na mokgatlo wa gagwe o a re gatelela?’ Ge e ba o lebeletšane le bothata bjo bjalo, o ka batamela bjang kgauswi le Jehofa le mokgatlo wa gagwe?

14. Re swanetše go itshwara bjang ge ba bangwe ba re kwera ka go phela ka melao ya Jehofa? (Psalme 119:50-52)

¹⁴ Ikemišetše go dira seo se lokilego mahlong a Jehofa. Jobo e be e le monna yo a tlwaetšego go dira seo se lokilego mahlong a Jehofa go sa šetšwe gore ba be ba mo kwera. Yo mongwe wa banna bao ba bego ba itira bagwera ba Jobo, o ile a  leka go mo kgodiša gore Modimo ga a na taba le gore Jobo o dira se se lokilego mahlong a gagwe goba aowa. (Jobo 4:17, 18; 22:3) Eupša Jobo o ile gana go dumela maaka ao. O be a tseba gore melao ya Jehofa ya seo se lokilego le seo se sa lokago ke ya therešo, e bile o be a ikemišeditše go phela ka yona. Ga se a dumelela ba bangwe ba mo dira gore a se sa botega. (Jobo 27:5, 6) Rena re ithuta’ng? O se dumelele bakweri ba go dira gore o belaele melao ya Modimo. Nagana ka bophelo bja gago. Na ga se wa bona gore melao ya Jehofa e lokile e bile e a hola? Ikemišetše go dula o le karolo ya mokgatlo wo o thekgago melao ya Jehofa. Ge o dira bjalo, ga go na bakweri bao ba ka go aroganyago le Jehofa.—Bala Psalme 119:50-52.

15. Ke ka baka la’ng Brizit a ile a kwerwa?

¹⁵ Nagana ka mohlala wa kgaetšedi yo a tšwago India e lego Brizit. Ba ka lapeng la gabo ba ile ba mo kwera ka baka la tumelo ya gagwe. Ka moragonyana ga go kolobetšwa ka 1997, monna wa gagwe yo e be go e se Hlatse o ile a lahlegelwa ke mošomo. Ka gona monna wa gagwe o ile a phetha ka gore yena, Brizit le barwedi ba bona ba swanetše go huduga ba dule le batswadi ba gagwe bao ba dulago motseng o mongwe. Eupša se se be se tlo dira gore Brizit a kopane le mathata a mantši. Ka ge monna wa gagwe a be a se sa šoma, se se be se tlo dira gore a šome mošomo wa boiphedišo ka nako e tletšego e le gore a kgone go hlokomela lapa la gagwe. Go oketša moo, phuthego ya kgauswi le moo e be e ka ba bokgole bja dikhilomithara tše e ka ba go tše 350. Ka manyami ba gabo monna wa gagwe ba ile ba mo ganetša ka lebaka la tumelo ya gagwe. Kganetšo yeo e ile ya ba e šoro kudu moo e lego gore lapa la Brizit le ile la swanelwa ke go huduga gape. Monna wa gagwe o ile a hlokofala go sa letelwa. Ka morago, yo mongwe wa barwedi ba gagwe o ile a bolawa ke kankere a ena le mengwaga e 12. Se se kwešago bohloko le go feta ke gore ba leloko la bo Brizit ba  ile ba mmona molato. Ba ile ba bolela gore ge nkabe e se yo mongwe wa Dihlatse tša Jehofa, mathata a ka moka nkabe a se gona. Le ga go le bjalo, o ile a tšwela pele a tshepa Jehofa le mokgatlo wa gagwe.

16. Brizit o ile a šegofatšwa bjang ka go dula a le kgauswi le Jehofa le mokgatlo wa gagwe?

¹⁶ Ka ge Brizit a be a dula kgole le phuthego, molebeledi wa tikologo o ile a mo kgothaletša gore a tšwele pele ka go bolela ditaba tše dibotse mo a dulago gona le go swara diboka ka gae. Mathomong o be a bona seo se le boima. Eupša o ile a latela keletšo yeo ngwanabo rena a mo filego yona. O ile a botša ba bangwe ditaba tše dibotse, a swara diboka ka gae, a ba a bea nako ka thoko bakeng sa borapedi bja lapa le barwedi ba gagwe. Mafelelo e bile afe? Brizit o ile a thoma go swara dithuto tše dintši tša Beibele, gomme bontši bja barutwana ba gagwe ba ile ba kolobetšwa. Ka 2005 o ile a thoma go hlankela bjalo ka mmulamadibogo wa ka mehla. O ile a putswa ka gobane o be a tshepa Jehofa le mokgatlo wa gagwe. Barwedi ba gagwe ba hlankela Jehofa ka potego, e bile gona bjale go na le diphuthego tše pedi lefelong la bo bona. Brizit o kgodišegile gore Jehofa ke yena a mo filego matla a go lebeletšana le mathata gotee le go kgotlelela go kwerwa ke ba gabo.

17. Re swanetše go ikemišetša go dira’ng?

¹⁷ Sathane o nyaka gore re dumele gore Jehofa a ka se re thuše ge re kopana le mathata le gore re tlo ba le mathata a mantši ge re thekga mokgatlo wa gagwe. Sathane o nyaka re tšhoge ge re bona bana babo rena bao ba etelelago pele ba rogakwa, ba tlaišwa goba ba golegwa. O a re kwera ge re tshepa melao ya Jehofa le mokgatlo wa gagwe. Eupša re tseba maano a gagwe e bile ga re nyake go forwa ke ona. (2 Bakor. 2:11) Ikemišetše go gana maaka a Sathane gomme o dule o botegela Jehofa le mokgatlo wa gagwe. Gopola, Jehofa a ka se go lahle. (Ps. 28:7) Ka gona, o se dumelele selo se go aroganya le Jehofa!—Baroma 8:35-39.

18. Re tlo boledišana ka’ng sehlogong se se latelago?

¹⁸ Sehlogong se, re boletše ka mathata ao re ka kopanago le ona ka ntle ga phuthego. Eupša re ka lekega gore re se sa tshepa Jehofa le mokgatlo wa gagwe ge re kopana le mathata ka phuthegong. Re ka lebeletšana bjang ka katlego le mathata a? Re tlo boledišana ka se sehlogong se se latelago.