Rosie o re: “Ke be ke dulela go tshwenyega kudu moo monagano wa ka o bego o feleletša ka go feteletša dilo.” Rosie o thušitšwe ke ditemana dife tša Beibele? E nngwe ya ditemana tšeo ke Mateo 6:34, yeo e rego: “Le ka mohla le se ke la belaela ka letšatši le le latelago, gobane letšatši le le latelago le tla ba le dipelaelo tša lona. Letšatši le lengwe le le lengwe le lekanwe ke bošula bja lona.” Ga bjale Rosie o re mantšu ao a Jesu a mo thušitše go se sa belaela ka seo se ka diregago letšatšing le le latelago. O oketša ka gore: “Ke be ke na le mathata a mantši, ke sa bale ao ke bego ke nagana gore a ka direga goba ao mohlomongwe e bilego a be a ka no se direge.”

Yasmine le yena o be a ikwa gore o imetšwe ke dipelaelo. O re: “Ke be ke fetša matšatši a mantši mo bekeng ke lla e bile mašegong a mangwe ke sa kgone le go robala. Ke be ke ikwa gore ke fetšwa ke dikgopolo tše di fošagetšego.” Yasmine o thušitšwe ke lengwalo lefe? O re ke la 1 Petro 5:7, leo le rego: “[Lahlelang] dipelaelo tša lena ka moka go [Modimo], gobane o a le hlokomela.” Yasmine o re: “Ge nako e dutše e eya, ke ile ka tšwela pele ke rapela Jehofa gomme o ile a araba dithapelo tša ka. Ke ile ka kwa eka ke be ke tlošitšwe morwalo o boima magetleng. Ke sa fela ke eba le dikgopolo tše fošagetšego, eupša ga bjale ke tseba go di lwantšha.”

Kgarebe e nngwe yeo e bitšwago Isabella e re: “Ke nagana gore go dikadika ke leabela ka gobane tate le yena o bjalo. Ke beela go dira dilo tša bohlokwa ka thoko gomme ka fo dula ka iketla goba ka bogela thelebišene. Ke mokgwa o kotsi ka gobane o oketša kgateletšego e bile o dira gore motho a se ke a dira mošomo o mobotse.” Isabella o thušitšwe ke molao wa motheo wo o lego go 2 Timotheo 2:15, yeo e rego: “Dira sohle se o ka se kgonago gore o itšweletše o amogelega go Modimo, o le yo a šomago go se seo se go hlabišago dihlong.” Isabella o re: “Ke be ke sa nyake go leša Jehofa dihlong ka mošomo wa ka e le fela ka gobane ke ile ka dikadika.” Isabella o kaonefaditše kudu.

Ka mo go swanago, Kelsey le yena o re: “O be o tla hwetša ke na le mošomo wo o nyakegago ka nako e itšego gomme ke o dira metsotsong ya mafelelo. Ke be ke lla, ke palelwa ke go robala e bile ke belaela. Seo se be se nkgobatša.” Kelsey o thušitšwe ke lengwalo la Diema 13:16, leo le rego: “Yo bohlale o tla dira dilo ka tsebo, eupša setlaela se tla gaša bošilo gohle.” O hlalosa seo a ithutilego sona ka go naganišiša ka lengwalo leo. O re: “Ke gabohlale go rulaganya dilo e sa le pele. Ga bjale ke na le pukwana yeo ke dulago ke e beile tafoleng ya ka bakeng sa go rulaganya mešomo yeo ke swanetšego go e dira. Ka gona, se se nthuša gore ke be le thulaganyo le gore ke se ke ka tlogelela dilo metsotsong ya mafelelo.”

Kirsten o re: “Molekane wa ka o ile a ntlogela le bana ba bane.” Kirsten o ile a thušwa ke molao ofe wa motheo wa Beibele? Lengwalo la Diema 17:17 le re: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.” Kirsten o ile a kgopela thušo go ba bangwe bao ba hlankelago Jehofa bjalo ka yena. O ile a hwetša’ng? O re: “Bagwera ba ka ba ile ba nthekga ka ditsela tše dintši. Ba bangwe ba be ba ntlišetša korosari le matšoba. Makgeng a mararo ge nna le bana ba ka re be re huduga, sehlophana sa batho se be se etla go re thuša. Yo mongwe o ile a nthuša gore ke hwetše mošomo. Bagwera ba ka ba be ba nthekga ka dinako tšohle.”

Delphine yo go boletšwego ka yena pejana, le yena ka mo go swanago o be a lewa ke bodutu. Ka morago ga go lahlegelwa, o gopola ka gore: “Ke be ke bona batho ba phela gotee gomme nna ke phela ke nnoši e bile ke sa thaba. Ke be ke lewa ke bodutu kudu.” Lengwalo le lengwe leo le mo thušitšego ke la Psalme 68:6, leo le rego: “Modimo o dudiša badulanoši ka ntlong.” Delphine o hlalosa gore: “Ke be ke tseba gore temana yeo e be e sa bolele ka legae la kgonthe gona bjale. Go e na le moo, ke ile ka kwešiša gore Modimo o re nea legae la batho bao ba mo rapelago, e lego legae leo le šireletšegilego le leo batho ba gona ba ratanago e bile e le batee le bao ba ratago Jehofa. Eupša ke be ke tseba gore ke swanetše go ba kgauswi le Jehofa pele nka ba kgauswi le batho ba bangwe. Ka gona, Psalme 37:4 e nthušitše tabeng yeo, yona e re: ‘Thabela Jehofa kudu, gomme yena o tla go nea tše pelo ya gago e di kgopelago.’”

Delphine o phetha ka gore: “Ke ile ka lemoga gore ke swanetše go kgomarela Jehofa kudu. O lokile kudu. Ka gona, ke ile ka dira lelokelelo la dilo tšeo nka di thabelago le ba bangwe e le gore ke kgone go ba le bagwera bao ba ratago Jehofa. Ke ile ka ithuta go bona dilo tše dibotse bathong ba bangwe le go se šetše mafokodi a bona.”

Ke nnete gore bagwera bao ba hlankelago Jehofa le bona ga ba phethagala. Dihlatse tša Jehofa le tšona di na le mathata go swana le mang le mang. Eupša Beibele e tlwaetša batho gore ba thuše ba bangwe kamoo ba ka kgonago. Ke gabohlale go gwerana le batho ba bjalo. Ka gona, na melao ya motheo ya Beibele e ka kgona go re thuša mathateng ao a ka se kgonego go rarollega lehono a bjalo ka bolwetši bjo bo sa folego le manyami a go hwelwa?