Lehloyo ke go se rate goba go swara motho goba batho ba itšego gampe, gomme lehloyo leo le tšwela pele ka nako e telele.

Go na le mabaka a mantši ao a dirago gore batho ba hloye ba bangwe. Gantši batho ba hloya ba bangwe e se go ka baka la seo ba se dirago, eupša ka baka la seo ba lego sona. Batho ba bangwe ba ka ba hloilwe ka gobane ba re ga se ba loka, ba ka gobatša ba bangwe, goba ba ka se tsoge ba fetogile. Ba ka ba lebelelwa e le bao ba nyatšegago, ba le kotsi, goba ba ka baka mathata. Batho bao ba hloilwego ba ka ba ba ile ba tlaišwa, ba swarwa ka go hloka toka, goba go ile gwa direga selo se sengwe seo se ilego sa dira gore ba swarwe gampe.

Motho a ka hloya motho yo mongwe le ge a sa ka a kopana le yena. Ka mohlala, batho ba hloya ba bangwe ka gobane ba leloko goba bagwera ba ba hloile. Ka gona, seo se dira gore lehloyo le phatlalale ka pela.

Ge e ba re kwešiša gore lehloyo le phatlalala bjang, gona re tlo kwešiša le gore ke ka baka la eng batho ba hloyana. Le ga go le bjalo, go na le lebaka le lengwe leo le bontšhago gore re ka fenya lehloyo leo le tletšego mo lefaseng. Gore re tsebe lebaka leo, re swanetše go tseba pele gore lehloyo le thomile kae. Beibele e re fa karabo.

MODIMO GA SE A RE BOPA RE NA LE LEHLOYO. Lehloyo le thomile ge morongwa yo a bego a dula legodimong yo a bitšwago Sathane Diabolo, a thoma go se sa botegela Modimo. Diabolo “e bile mmolai wa batho go tloga mathomong” ge a be a se sa botegela Modimo. Bjalo ka “moaketši le tatago maaka,” o dira gore batho ba tlale lehloyo le go swara ba bangwe gampe. (Johane 8:44; 1 Johane 3:11, 12) Beibele e mo hlalosa e le yo mobe, yo a galefilego, le yo a swarago batho gampe.—Jobo 2:7; Kutollo 12:9, 12, 17.

GO BONOLO GORE BATHO BA BE LE LEHLOYO KA GE BA SA PHETHAGALA. Monna wa pele e lego Adama, o ile a dira sebe go swana le Sathane. Ka baka leo, batho ka moka ba na le sebe sa leabela. (Baroma 5:12) Morwa wa mathomo wa Adama e lego Kaine, o ile a hloya ngwanabo e lego Abele a ba a feleletša a mmolaile. (1 Johane 3:12) Ke nnete gore batho ba bantši ba sa bontšhana lerato le kwelobohloko. Eupša ka ge batho ba na le sebe sa leabela, ba bantši ba na le mona, ga ba naganele ba bangwe e bile ba a ikgantšha. Mekgwa yeo e dira gore go be le lehloyo.—2 Timotheo 3:1-5.

GANTŠI MOTHO YO A SA RATEGO BA BANGWE O NA LE LEHLOYO. Lefase leo re phelago go lona, le dira gore go dule go na le lehloyo ka go dira gore go se ke gwa ba le kwelobohloko le go tlogela batho ba itshwara gampe le go ba tlogela ba dira dilo tše mpe. Ka ge lefase le “rapaletše matleng a yo kgopo,” e lego Sathane, seo se dira gore batho ba hloye ba bangwe ka ge ba sa swane le bona, ba ba sware gampe, ba a roge, ba ba kwere, le go senya dilo tša bona.—1 Johane 5:19.

Le ga go le bjalo, Beibele ga e bolele fela gore lehloyo le thomile kae, e re botša le gore re ka le fenya bjang.