Ge Lehloyo le Tla be le se sa le Gona sa Ruri!
Le ge rena re ka tlogela go ba le lehloyo, re ka se kgone go thibela ba bangwe gore ba se sa ba le lona. Batho bao ba se nago molato ba hloilwe. Bjale, ke mang a ka dirang gore lehloyo le se sa ba gona?
Jehofa Modimo ke yena feela yoo a ka fedišago lehloyo ka mo go feletšego. Se ke seo Beibele e re tshepišago gore Modimo o tlo se dira.—Diema 20:22.
MODIMO O TLA FEDIŠA DILO KA MOKA TŠEO DI DIRA GORE GO BE LE LEHLOYO
-
1. SATHANE DIABOLO. Sathane ke yena a dirago gore go be le lehloyo. Modimo o tlo fediša Sathane gotee le bao ba nago le lehloyo go swana le yena.—Dipsalme 37:38; Baroma 16:20.
-
2. LEHLOYO LA SATHANE LE TLETŠE MO LEFASENG. Modimo o tlo fediša dilo ka moka tšeo di hlohleletšago lehloyo go akaretša le boradipolotiki le baetapele ba bodumedi bao ba dirago gore go be le lehloyo. Modimo o tlo fediša le dikgwebo tšeo di nago le megabaru, tša go se latele molao le utswetša batho.—2 Petro 3:13.
-
3. GO SE PHETHAGALE GA BATHO. Beibele e hlalosa gore batho ba na le sebe sa leabela, seo se dirago gore ba nagane le go dira dilo tšeo di sa lokago. (Baroma 5:12) E mengwe ya mediro ya sebe ke gore batho ba ikwe le go bontšha gore ba hloile ba bangwe. Modimo o tlo re thuša gore re se sa ba le mekgwa yeo e mebe le go fediša lehloyo ka mo go sa felego.—Jesaya 54:13.
BEIBELE E RE TSHEPIŠA GORE GO KA SE SA BA LE LEHLOYO
-
1. GO KA SE SA BA LE GO HLOKA TOKA. Mmušo wa Modimo o tlo buša mo lefaseng, gomme o tla be o buša o le legodimong ke moka wa dira gore go be le toka mo lefaseng. (Daniele 2:44) Go ka se sa ba le go hloka toka le go se kwešišane. Modimo o tlo fediša dilo ka moka tšeo di dirago gore go seke gwa ba le toka mo lefaseng.—Luka 18:7.
-
2. BATHO KA MOKA BA TLO BA LE KHUTŠO. Ga go na motho yo a tlago go tlaišega ka baka la dintwa goba bošoro. (Dipsalme 46:9) Mo lefaseng, batho ka moka ba tlo rata khutšo ba phela ka polokego.—Dipsalme 72:7.
-
3. BATHO BA TLO PHELA SA RURI GO SE NA MATHATA. Batho ka moka ba tlo bontšhana leratorato. (Mateo 22:39) Ga go na motho yo a tlogo tshwenyega ka baka la dikgopolo tše mpe goba go nagana ka dilo tše mpe tšeo di kilego tša direga. (Jesaya 65:17) Ka nako yeo, lehloyo le tla be le se sa le gona, batho ba tlo thaba kudu ka baka la “go ata ga khutšo.” —Dipsalme 37:11.
Na o ka thabela go phela lefaseng le le bjalo? Le gona bjale, batho ba bantši ba sa ithuta gore ba ka tlogela lehloyo bjang ba diriša melao metheo ya Beibele. (Dipsalme 37:8) Dihlatse tša Jehofa lefaseng ka moka di dira sona seo. Le ge ba etšwa ditšong tša go se swane le mafelong a go se swane, ba na le botee ebile ba a ratana.—Jesaya 2:2-4.
Dihlatse tša Jehofa di rata go abelana le wena seo di ithutilego sona gore o ka fenya bjang go hloka toka le kgethollo. Seo o ithutago sona se tla go thuša gore o tlogele go hloya ba bangwe, eupša o ba bontšhe lerato. O ka ithuta go bontšha lerato le go batho bao ba sa lebogego goba bao ba bontšhago lehloyo. Ka gona, seo se tlo dira gore o thabe le go phedišana gabotse le batho ba bangwe. Go feta tšohle, o tlo ithuta gore o ka dirang gore o tle o phele ka fase ga Mmušo wa Modimo moo lehloyo le tla beng le se sa le gona ka mo go sa felego.—Dipsalme 37:29.
You May Also Like
MOROKAMI
Mmušo wa Modimo o tlo re Direla Eng?
Jesu o be a tseba gore Mmušo wa Modimo ke wona feela wo o ka rarollago mathata ka moka mo lefaseng. Mmušo woo o šetše o dirile eng gore re o tshepe?
PHAFOGA!
Selo Seo se Tlago go Fediša Kgethollo go ya go Ile
Ke dilo dife tše nne tšeo Mmušo wa Modimo o tlago go di dira go fediša kgethollo?
