RE KA THUŠWA KE ENG GORE RE FENYE LEHLOYO?
3 | Ntšha Lehloyo ka mo Monaganong wa Gago
Beibele e re:
“Fetogang ka go fetola menagano ya lena, e le gore le itlhatselele thato e botse le e amogelegago le e phethegilego ya Modimo.” —BAROMA 12:2.
Seo e se Bolelago:
Dilo tšeo re di naganago di bohlokwa go Modimo. (Jeremia 17:10) Ga se ra swanela go no phema goba go bolela dilo tšeo di bontšhago lehloyo. Lehloyo le thoma ka dilo tšeo re di naganago le ka dipelong. Ka gona, re swanetše go tlogela go nagana ka dilo tšeo di ka dirago gore re hloye ba bangwe. Seo se tla re thuša gore re ‘fetoge’ re fenye lehloyo.
Seo o ka se dirago:
Naganišiša ka gore o ikwa bjang ka batho ba bangwe, kudukudu ka batho ba merafo e mengwe goba bao ba tšwago dinageng tše dingwe. Ipotšiše gore: ‘Ke ba lebelela bjang? Na tsela yeo ke ba lebelelago ka yona e ithekgile ka seo ke se tsebago ka bona? Goba ke a ba kgetholla?’ Phema go bala ditaba inthaneteng le go lebelela dimubi tšeo di kgothaletšago lehloyo le bošoro.
Lentšu la Modimo le ka re thuša go ntšha lehloyo leo le “tsemilego” ka medu ka menaganong le dipelong tša rena.
Ga go bonolo go hlahloba tsela yeo re naganago ka yona le kamoo re ikwago ka gona. Eupša, lentšu la Modimo le ka re thuša “go lemoga dikgopolo le maikemišetšo a pelo.” (Baheberu 4:12) Ka gona, tšwela pele o ithuta Beibele. Leka go bapiša seo e se bolelago le seo o se naganago. Leka go dira sohle seo o ka se kgonago ka go nagana ka tsela yeo e kgahlišago Modimo. Lentšu la Modimo le ka re thuša go ntšha lehloyo leo le ‘tsemilego’ ka monaganong le ka dipelong tša rena.—2 Bakorinthe 10:4, 5.
You May Also Like
BEIBELE E FETOŠA MAPHELO
“Ga ke sa le Monna yo Mobe”
Sébastien Kayira o thušitšwe ke eng gore a tlogele go rata bobe le go tlaiša batho?
BEIBELE E FETOŠA MAPHELO
Ke Ile ka Bea Marumo Fase
Bona kamoo molaetša o kgothatšago wa Beibele o ilego wa thuša Cindy go fetoša semelo sa gagwe sa go ba yo bogale.
