Ge eba go se bjalo o ka ba o ile wa bona ba bangwe ba swara ka tsela yeo goba ka tsela e nngwe. Re dula re e kwa dipego ka batho bao ba hloilwego ka gobane ele ba merafo e mengwe, ba e tšwa dinageng tše dingwe goba ele di-gay goba di-lesbian. Ka gona mebušo e mentši e bea melao yeo e otlago batho bao ba senyetšago ba bangwe ka gobane ba ba hloile.

Batho bao ba hloilwego le bona ba hloya ba bangwe gomme ba itefeletša ka go ba dira dilo tše di mpe ke moka seo sa dira gore lehloyo le dule le le gona.

Mohlomongwe le wena o ile wa kgethollwa, wa kwerwa, wa rogwa le go tšhošetšwa. Eupša lehloyo ga felele moo. Le ka feleletša ka gore motho a dule a kwatile kudu, a swara batho ba bangwe gampe, a senyetše batho diphahlo tša bona goba meago ya bona, a hlasele batho, a kate le go bolaya ba bangwe.

Makasine wo o tlo re bontšha kamoo re ka fenyago lehloyo le go araba dipotšišo tšeo di latelago:

• Ke ka baka la’ng go tletše lehloyo?

• Ke eng seo se ka re thušago gore re fenye lehloyo?

• Na go ka ba le nako moo lehloyo le ka se sa ba go gona?