Ka moka ga rena re tlo welwa ke ledimo le legolo leo le sa tlago. Ledimo leo ke’ng? Ke “masetlapelo a magolo” ao Jesu a boletšego ka ona e sa le pele. (Mateo 24:21) Ga go na motho yo a ka tšhabelago masetlapelo ao, eupša go na le selo seo re ka se dirago gore re itšhireletše. Selo seo ke’ng?

Ge Jesu Kriste a be a ruta batho Thutong ya gagwe ya Thabeng, o ile a ba botša gore: “Tšwelang pele le tsoma Mmušo pele le toko ya gagwe.” (Mateo 6:33) O be a e ra gore’ng?

Tsoma Mmušo wa Modimo pele. Go tsoma Mmušo wa Modimo pele go ra gore re swanetše go tšea Mmušo wa Modimo o le bohlokwa kudu go feta dilo ka moka. (Mateo 6:25, 32, 33) Ka baka la’ng? Ka gobane batho ga ba kgone go rarolla mathata ka moka a batho, eupša ke Mmušo wa Modimo feela woo o tla kgonago go fediša mathata a batho ka moka.

Tsoma toko ya Modimo. Re swanetše go dira sohle seo re ka se kgonago gore re phele ka melao ya Modimo ya go loka. Ke ka baka la’ng re swanetše go dira bjalo? Ke ka gobane ge re ka se latele melao ya Modimo gomme ra itaola, re tlo wela mathateng. (Diema 16:25) Ka lehlakoreng le lengwe, ge re ka phela ka melao ya Modimo re tlo thabiša Modimo gomme seo sa dira gore le rena re thabe.—Jesaya 48:17, 18.

Tšwela pele o tsoma Mmušo wa Modimo pele le toko ya gagwe. Jesu o lemošitše gore ba bangwe ba tlo šitišega go tsoma Mmušo wa Modimo pele ka ge ba tla be ba ipotša gore ge ba ka dira tšhelete e ntši ba tlo šireletšega. Ba bangwe bona ba tlo  swarega ka dilo tša lefase le, gomme seo sa dira gore ba palelwe ke go tsoma Mmušo wa Modimo pele.—Mateo 6:19-21, 25-32.

Jesu o tshepišitše bao ba thekgago Mmušo wa Modimo gore Modimo o tlo ba nea dilo tšeo ba di hlokago gona bjale, e bile a ba direla dilo tše dingwe tše dibotse nakong e tlago.—Mateo 6:33.

Le ge barutiwa ba Jesu ba be ba tsoma Mmušo wa Modimo pele le toko ya gagwe, ga se ba ka ba bona Modimo a fediša mathata ka moka mehleng ya bona. Eupša ba be ba šireletšegile. Bjang?

Ka ge ba be ba phela ka melao ya Modimo ya go loka, ba ile ba šireletšega mathateng ka moka ao a bego a wela batho bao ba bego ba sa nyake go phela ka melao ya Modimo. Le ge ba be ba na le mathata, ba be ba na le tumelo ya gore Mmušo wa Modimo ke wona o tlago go rarolla mathata ao. Le gona Modimo o ile a ba nea “matla a fetago a tlwaelegilego” gore ba kgone go kgotlelela mathata a bona.—2 Bakorinthe 4:7-9.

Bakriste bao ba phetšego mengwageng e 100 ya mathomo, ba ile ba kwa taelo ya Jesu ya gore ba ‘tsome Mmušo wa Modimo pele.’ Ba be ba botša batho ditaba tše dibotse tša Mmušo wa Modimo gohle moo ba bego ba dula gona. (Bakolose 1:23) Na lehono go sa na le batho ba bangwe bao ba botšago batho ditaba tše dibotse tša Mmušo wa Modimo?

Ee, ba sa le gona! Batho bao ke Dihlatse tša Jehofa. Dihlatse tša Jehofa di a lemoga gore kgauswinyane Mmušo wa Modimo o tlo fediša mathata a batho mo lefaseng. Di šoma ka thata go botša batho ditaba tše dibotse ka ge di ekwa taelo ya Jesu yeo e rego: “Ditaba tše tše dibotse tša Mmušo [wa Modimo] di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mateo 24:14.

Wena o tlo dira eng ge o ekwa ditaba tše dibotse tša Mmušo wa Modimo? Re kgopela gore o ekiše mohlala wa Baberea bao ba bego ba dula Matsedonia. Ge moapostola Paulo a be a ba botša ditaba tše dibotse tša Mmušo wa Modimo, ba ile ba di amogela ka mafolofolo. Ke moka ba ‘hlahloba Mangwalo ka kelohloko’ go bona ge e ba seo Paulo a bego a ba ruta sona se be se etšwa ka Mangwalong. Ka morago ga moo, ba ile ba phela ka seo ba ithutilego sona.—Ditiro 17:11, 12.

Le wena o ka swana le bona. Ge o ka dira gore Mmušo wa Modimo o tle pele bophelong bja gago, o ka se itshole! O tlo šireletšega gona bjale le nakong e tlago, gomme wa phela ka khutšo.