Dihlogong tše di fetilego re ithutile gore e se kgale Modimo o tlo fediša batho bao ba sa mo rapelego le dilo ka moka tše mpe tšeo di diregago mo lefaseng. Re ka kgodišega gore Modimo o tlo dira dilo tšeo a di boletšego. Ka baka la’ng? Ka gobane Lentšu la Modimo e lego Beibele le re tshepišiše gore:

“Lefase le a feta.” —1 JOHANE 2:17.

Re ka kgodišega gore go tlo ba le batho bao ba phologago ka gobane yona temana yeo e tsopotšwego ka mo godimo e re tshepiša gape gore:

“Yo a dirago thato ya Modimo o dula a le gona ka mo go sa felego.”

Ka baka leo, go re re tle re phologe, re swanetše go dira thato ya Modimo. Ka gona, go re re tsebe gore thato ya Modimo ke efe, re swanetše go thoma pele ka go mo tseba.

Jesu o itše: “Se se bolela bophelo bjo bo sa felego, gore ba tsebe wena Modimo a nnoši wa therešo.” (Johane 17:3) E le gore re tle re phologe bofelo gomme re phele ka mo go sa felego, re swanetše ‘go tseba Modimo’. Go tseba Modimo go feta go no tseba gore o gona goba go no tseba ganyenyane ka yena. Re swanetše go ba bagwera ba gagwe. Go re segwera sa rena le batho ba bangwe se tie, re fetša nako re na le bona. Go gwerana le Modimo le gona go bjalo. Nagana ka dithuto tše bohlokwa tšeo re ithutago tšona ka Beibeleng tšeo di re thušago gore re be le segwera se sebotse le Modimo.

Re dula re eja dijo gore re kgone go phela. Eupša Jesu o itše: “Motho a ka se phele ka senkgwa feela, eupša o tla phela le ka polelo e nngwe le e nngwe e tšwago molomong wa Jehofa.”—Mateo 4:4.

Lehono, Jehofa o bolela le rena a diriša Beibele. Ge o dutše o ithuta puku ye e kgethwa, o tla ithuta seo Modimo a ilego a se dira nakong e fetilego, a se dirago gona bjale le seo a tlago go se dira nakong e tlago.

O ka dira’ng ge e ba o nyaka go kwa ditaelo tša Modimo eupša o palelwa ke go tlogela dilo tšeo a rego di fošagetše? Boemong bjoo, o ka thušwa ke go tseba Modimo gabotse.

Nagana ka mosadi yo a bitšwago Sakura, yoo a bego a phela bophelo bjo bo gobogilego. Ge a be a thoma go ithuta Beibele, o ile a ithuta ka molao wa Modimo wo o rego “tšhabang bootswa.” (1 Bakorinthe 6:18) Sakura o ile a rapela Modimo gore a mo thuše gomme a kgona go kgaotša mokgwa woo o mobe. Eupša o swanetše go tšwela pele a lwantšhana le diteko. O re: “Ge ke tlelwa ke dikgopolo tšeo di gobogilego, ke rapela Jehofa go tšwa pelong ka gobane ke a tseba gore nka se kgone go di lwantšha ka matla a ka. Thapelo e nthušitše gore ke dule ke le kgauswi le Jehofa.” Go swana le Sakura, batho ba dimilione ba ithuta ka Modimo. O ba fa matla ao ba a hlokago gore ba fetoše maphelo a bona gomme ba phele ka tsela yeo e mo kgahlago.—Bafilipi 4:13.

Ge o thoma go tseba Modimo gabotse, le yena o tlo go tseba o le mogwera wa gagwe yo mogolo. (Bagalatia 4:9; Psalme 25:14) Ke moka o tlo kgona go phologa bofelo gomme wa phela lefaseng leo e tla bego e le Paradeise. Eupša lefase le lefsa le tla ba le le bjang? Sehlogo se se latelago se tla re hlalosetša.