Lentšu kwelobohloko le hlaloswa e le “go kgona go kwešiša maikwelo a motho yo mongwe, goba dilo tšeo di mo diragaletšego gomme wa ipea maemong a gagwe.” Dr. Rick Hanson, e lego setsebi sa monagano, o re: “Ka tlhago re kgona go kwela batho ba bangwe bohloko.”

NAGANA KA TABA ŠE: Go tla bjang gore re kgone go kwela batho ba bangwe bohloko, e lego seka seo diphedi tše dingwe di sa kgonego go se bontšha? Beibele e re Modimo o re bopile ka seswantšho sa gagwe. (Genesi 1:26) Ka ge re bopilwe ka seswantšho sa Modimo, re kgona go bontšha dika tša go swana le tša gagwe. Ka gona, ge batho ba bontšha ba bangwe kwelobohloko, ba ekiša Mmopi wa bona, e lego Jehofa Modimo.—Diema 14:31.

Modimo o re kwela bohloko e bile ga a rate go bona re tlaišega. Baisiraele ba bogologolo ba ile ba kgotlelela go swarwa bjalo ka makgoba kua Egipita le go phela ga boima mengwaga e 40 lešokeng. Ge Beibele e bolela ka bona e re: “Tlalelong ka moka ya bona le yena o be a tlalelwa.” (Jesaya 63:9) Ga se gore Modimo o be a no bona go tlaišega ga bona. Le yena o be a ekwa bohloko. O itše: “Ke tseba mahloko a bona gabotse.” (Ekisodo 3:7) Modimo o boletše gape gore: “Yo a le kgwathago o kgwatha thaka ya leihlo la ka.” (Sakaria 2:8) Ge batho ba bangwe ba re kweša bohloko, Modimo le yena o kwa bohloko.

Le ge re ka ikwa re se bohlokwa goba re sa swanelwe ke kwelobohloko ya Modimo, Beibele e re kgonthišetša gore: “Modimo ke yo mogolo go feta dipelo tša rena gomme o tseba dilo tšohle.” (1 Johane 3:19, 20) Modimo o re tseba go feta ka mo re itsebago ka gona. O tseba maemo a rena, dikgopolo tša rena le kamoo re ikwago ka gona. O re kwela bohloko.

Seo Mangwalo a re botšago sona

• “Le tla bitša gomme Jehofa o tla araba; le tla llela thušo gomme o tla re: ‘Ke nna yo!’”​—JESAYA 58:9.

• “‘Ka gobane nna ke tseba gabotse menagano yeo ke e naganago ka lena,’ o re’alo Jehofa, ‘e lego menagano ya khutšo, e sego ya bošula, gore ke le nee bokamoso le kholofelo. Le tla mpitša, la tla la nthapela, gomme ke tla le theetša.’”​—JEREMIA 29:11, 12.

• “Tsenya megokgo ya ka ka lekukeng la gago. Na ga e ka pukung ya gago?”​—PSALME 56:8.

Na go tseba gore Modimo o re kwela bohloko go ka re thuša go lebeletšana le mathata? Ee. Ekwa seo se ilego sa diragalela Maria, o re:

“Ge morwa wa ka yo a bego a na le mengwaga e 18 a be a hlokofala ka morago ga gore a tlaišwe ke kankere ka mengwaga e mebedi, ke ile ka kwa bohloko kudu e bile ke bona bophelo bo le thata. Ke be ke galefetše Jehofa, ke ipotšiša gore ke ka baka la’ng a se a mo fodiša!

“Ka morago ga mengwaga e tshela, mogwera wa ka yo lena e bego e le Hlatse ya Jehofa, o ile a ntheetša ge ke mmotša gore ke be ke bona eka Jehofa ga a nthate. Ka morago ga gore a ntheetše ka diiri tše dintši ntle le go ntsena ganong, o ile a nkgopotša lengwalo leo le ilego la nkgothatša kudu. Lengwalo leo ke la 1 Johane 3:19, 20, leo le rego: ‘Modimo ke yo mogolo go feta dipelo tša rena gomme o tseba dilo tšohle.’ O ile a ntlhalosetša gore Jehofa o kwešiša mathata a rena.

“Le ka morago ga gore a bolele le nna, ke be ke ikwa ke sa galefile. Ke ile ka bala Psalme 94:19, yeo e rego: ‘Ge dikgopolo tša ka tše di mpherekanyago di be di ata ka go nna, dikhomotšo tša gago di ile tša okobatša moya wa ka.’ Ke ile ka kwa eka ditemana tšeo di be di ngwaletšwe nna. Mafelelong, ke ile ka homotšega ge ke be ke boledišana le Jehofa ka mathata a ka ke tseba gore o ntheeditše e bile o a nkwešiša.”

Ruri go tseba gore Modimo o a re kwešiša le gore o re kwela bohloko go a homotša! Eupša ke ka baka la’ng re tlaišega gakaakaa? Na ke ka gobane Modimo o a re otla ka baka la diphošo tša rena? Na go na le seo Modimo a ka se dirago go fediša dilo tšeo di re tlaišago? Dipotšišo tše di tla arabja dihlogong tše di latelago.