Modimo o bopile mebele ya rena e na le bokgoni bjo bo makatšago bja go iphodiša. Ge motho yo a phetšego gabotse a ka segwa ke selo, a ngwapega goba a hlabja, mmele wa gagwe o kgona go “iphodiša ka tsela e makatšago go sa šetšwe gore ke ntho e kgolo goba e nyenyane gakaakang.” (Johns Hopkins Medicine) Di tloga fase, mmele o dira se sengwe gore madi a kgaotše go tšwa le go fodiša ntho.

NAGANA KA TABA ŠE: Ge e ba Modimo a bopile mebele ya rena ka tsela ya gore e kgone go iphodiša, na a ka palelwa ke go dira gore re fole ge re kwele bohloko maikwelong? Mopsalme yo mongwe o ngwadile gore: “[Modimo] o alafa ba dipelo tše di kwelego bohloko, o tlema dintho tša bona tše bohloko.” (Psalme 147:3) Eupša ge e ba o kwele bohloko maikwelong ka baka la mathata ao a go wetšego, ke’ng se se ka dirago gore o kgolwe gore Jehofa o tla alafa dintho tša gago, gona bjale le nakong e tlago?

Modimo o re: “O se ke wa boifa gobane ke na le wena. O se ke wa lealea gobane ke Modimo wa gago. Ke tla go matlafatša. Ruri ke tla go thuša.” (Jesaya 41:10) Motho yo a tsebago gore Jehofa o na le taba le yena o ba le khutšo ya monagano le matla a go kgotlelela mathata a go fapafapana. Ge moapostola Paulo a bolela ka khutšo ya monagano o re ke “khutšo ya Modimo yeo e fetago kwešišo yohle.” Paulo o okeditše ka gore: “Dilong tšohle ke na le matla ka baka la yo a mphago matla.”​—Bafilipi 4:4-7, 9, 13.

Mangwalo a re thuša go ba le tumelo dilong tšeo Jehofa a rego o tlo re direla tšona nakong e tlago. Ka mohlala lengwalo la Kutollo 21:4, 5 (leo le lego letlakaleng leo le latelago) le re botša seo Modimo a tlago go se dira le lebaka leo re ka tshepago gore o tla se dira:

• “O tla phumola megokgo ka moka” mahlong a batho. Jehofa o tlo fediša dipelaelo le mathata a rena ka moka, le ge batho ba bangwe ba ka bona dilo tšeo e se selo.

• “A [dutše] sedulong sa bogoši” legodimong, Jehofa, e lego Kgoši e Matla, yo a bopilego dilo ka moka, o tlo diriša matla a gagwe go thibela tlaišego le go re thuša ge re hloka thušo.

• Jehofa o re ditshepišo tša gagwe di “a botega e bile ke [tša] therešo.” O tiišetša ka leina la gagwe le botumo bja gagwe gore o tlo phethagatša seo a se tshepišitšego.

“‘O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.’ Yo a dutšego sedulong sa bogoši a re: ‘Bonang! Dilo ka moka ke di dira tše mpsha.’ Gape, a re: ‘Ngwala, gobane mantšu a a botega e bile ke a therešo.’”​—Kutollo 21:4, 5.

Beibele le dilo tšeo di bopilwego di bontšha gore Tatago rena wa legodimong ke Modimo wa mohuta mang. Le ge tlholo e sa re botše ka go lebanya gore re be bagwera ba Modimo, Beibele yona e re botša ka go lebanya. E re: “Batamelang Modimo gomme o tla le batamela.” (Jakobo 4:8) Lengwalo la Ditiro 17:27 le re: “Ga a kgole le yo mongwe le yo mongwe wa rena.”

Ge o dutše o ipha nako ya go tseba Modimo, o tlo kgodišega gore “o a [go] hlokomela.” (1 Petro 5:7) Bjale taba ya gore Modimo o a go hlokomela e ka go hola bjang?

Ekwa ka seo se ilego sa diragalela Toru, yo a dulago Japane. Mmagwe e be e le Hlatse ya Jehofa, eupša yena o ile a thoma go gwerana le sehlopha sa disenyi tše šoro tša Japane seo se bitšwago yakuza. Ge Toru a hlalosa o re: “Ke be ke ipotša gore Modimo o ntlhoile, e bile ge batho bao ke ba ratago ba hlokofala, ke be ke nagana gore o a nkotla.” Toru o dumela gore ka baka la tikologo e šoro yeo a bego a phela go yona le tsela yeo a bego a lebelela dilo ka yona, o ile a thoma go ba “motho yo a se nago kwelobohloko.” O re: “Ka ge ke be ke nyaka go tuma, ke ile ka bolaya motho yo mongwe yo a bego a tumile go mpheta. Ka morago ga go dira seo, ke be ke se sa nyaka go phela.”

Ge Toru le mosadi wa gagwe yo a bitšwago Hannah ba be ba ithuta Beibele le Dihlatse tša Jehofa,  Toru o ile a dira diphetogo tše dikgolo bophelong bja gagwe le tseleng yeo a bego a bogega ka yona. Hannah o re: “Monna wa ka o ile a dira diphetogo ke mo lebeletše.” Ga bjale, Toru o bolela ka kgodišego gore: “Modimo o na le taba le rena. Ga a nyake go bona motho le ge e le ofe a ehwa, e bile o ikemišeditše go lebalela bao ba tlogago ba itsholela diphošo tša bona. O a theetša ge re mmotša dilo tšeo re ka se kgonego go di botša batho ba bangwe le dilo tšeo go se nago motho yo a ka re kwešišago ge re mmotša tšona. Nakong e tlago, Jehofa o tlo fediša mathata ka moka, tlaišego le bohloko. Gaešita le gona bjale o re thuša ka ditsela tšeo re sa di letelago. O a re rata e bile o a re thuša ge re imetšwe.”​—Psalme 136:23.

Mohlala wa Toru o bontšha gore Modimo o tlo fediša mathata ka moka le tlaišego, e bile o tlo dira bjalo e se kgale. Go tseba seo go dira gore re tshepe gore dilo di tlo loka le gore re ka phela bophelo bjo bobotse gaešita le gona bjale. Ee, gaešita le ge re phela lefaseng leo le tletšego tlaišego, o ka holwa ke go tseba gore Modimo o a re rata le gore o na le taba le rena.