Modimo o ile a re go Adama: ‘Mohlang o ka jago dienywa tša sehlare sa go tseba botse le bobe, o tla hwa lehu.’ (Genesi 2:17) Modimo o be a ka se botše Adama taba ye ge nkabe a be a mmopetše gore a tle a tšofale le go hwa. Adama le yena o be a tseba gore ge a be a ka se je dienywa tša sehlare seo, o be a ka se hwe.

Go be go sa hlokagale gore Adama le Efa ba je dienywa tša sehlare sa go tseba botse le bobe gore ba phele. Ka ba baka la’ng? Ka gobane Modimo o be a ba neile dihlare tše dintši tšeo ba bego ba ka ja dienywa tša tšona. (Genesi 2:9) Ge nkabe Adama le Efa ba se ba ja dienywa tša sehlare seo, nkabe ba bontšhitše gore ba kwa Modimo, yena yo a ba filego bophelo. Le gona nkabe ba bontšhitše gore ba a dumela gore Modimo o na le tshwanelo ya go ba nea melao.

E le gore re kwešiše gore ke ka baka la eng Adama le Efa ba ile ba hwa, sa pele re swanetše go kwešiša poledišano yeo e bilego gona tšhemong ya Edene. Poledišano yeo le rena e a re ama. Sathane o ile a šomiša noga gore e botše Efa maaka a matala ka Modimo. Beibele e re: “Bjale noga e be e le šedi kudu mo go diphoofolo ka moka tša naga tšeo Jehofa Modimo a di dirilego. Ka gona ya re go mosadi: ‘A ke therešo gore Modimo o itše le se ke la ja tše di tšwago sehlareng se sengwe le se sengwe sa mo serapeng?’”—Genesi 3:1.

Efa o ile a araba noga yeo a re: “Dienywa tša dihlare tša mo serapeng re ka di ja. Eupša ge e le mabapi le go ja dienywa tša sehlare seo se lego gare ga serapa, Modimo o itše: ‘Le se ke la ja tša sona, le se ke la se kgwatha le gatee e le gore le se ke la hwa.’” Ke moka Noga ya re: “Le ka se hwe lehu. Gobane Modimo o tseba gore ka lona letšatši leo le tlago go ja tša sona, mahlo a lena a tla bulega gomme la swana le Modimo, la tseba botse le bobe.” Ka go bolela mantšu ao, Sathane o be a e ra gore Modimo o forile Adama le Efa le gore o be a sa nyake ba ipshina ka bophelo.—Genesi 3:2-5.

Efa o ile a kgolwa maaka ao a Sathane. O ile a lebeledišiša sehlare seo, a bona gore dienywa tša sona di be di kgahliša e bile di dumiša! Ke moka a kga seenywa sa sona a se ja. Beibele e re: “Ka morago a nea le monna wa gagwe ge a be a na le yena, le yena a ja.”—Genesi 3:6.

Ruri Modimo o swanetše go ba a ile a kwa bohloko ge a bona bana bao ba gagwe ba tshela molao wa gagwe ka boomo! O ile a dira’ng? O ile a re  go Adama: “O tla . . . boela mmung, gobane o ntšhitšwe go wona. Gobane o lerole gomme o tla boela leroleng.” (Genesi 3:17-19) Ka baka la go se kwe Modimo, “matšatši ka moka ao Adama a a phetšego e bile nywaga e makgolosenyane-masometharo (930) gomme a hwa.” (Genesi 5:5) Ge Adama a ehwa, ga se a ya legodimong goba lefelong le lengwe. Pele ga ge Modimo a ka mmopa ka lerole la mmu, o be a se gona. Ka gona ge a be a ehwa, o ile a boela leroleng leo a bopilwego ka lona. O ile a se sa ba gona. Ruri tše ke ditaba tše bohloko kudu!

Ka ge Adama le Efa ba ile ba se kwe Modimo ka boomo, ba ile ba ba le sebe gomme gwa se sa kgonega gore ba tle ba phele ka mo go sa felego. Ba ile ba thoma go fokola mmeleng gomme ba ba le sebe. Eupša sebe seo ba se dirilego ga se sa ama bona feela. Ba ile ba fetišetša sebe seo le ditlamorago tša sona go rena. Baroma 5:12 e re: “Go etša ge ka motho o tee [e lego Adama,] sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.”

Beibele e hlalosa sebe le lehu e le “lešira le le širilego merafo ka moka le lešela le le apešitšego ditšhaba ka moka.” (Jesaya 25:7) Ke ka baka leo go se nago motho yo a ka tšhabelago lehu. Se se tiišetša taba ya gore batho ‘bohle ba hwa’ ka baka la Adama. (1 Bakorinthe 15:22) Eupša se se dira gore re ipotšiše potšišo yeo moapostola Paulo a kilego a e botšiša, yeo e rego: “Ke mang yo a tlago go ntlhakodiša mmeleng wo o hwago lehu le?” Na go na le yo a ka kgonago go fediša lehu?—Baroma 7:24.