Modimo ga se a re Bopela Gore re hwe
KE MANG a sa nyakego go phela nako e telele le gona a thabile? Nagana gore bophelo bo be tla ba monate bjang ge nkabe re sa lwale e bile re sa hwe! Re be re tlo fetša nako e ntši re phela le batho bao re ba ratago, re sepela mafase, re ithuta dilo tše difsa le go dira dilo tšeo re di ratago.
Ke ka baka la’ng batho ba sa nyake go hwa? Ke ka gobane Beibele e re Modimo o re bopile ka tsela ya gore re se nyake go hwa. (Mmoledi 3:11) E bile e re: “Modimo ke lerato.” (1 Johane 4:8) Ka ge Modimo a re rata, na a ka nyaka gore re hwe mola e le yena a re bopilego ka tsela ya gore re se nyake go hwa?
Ga go na motho yo a nyakago go hwa. E bile Beibele e re lehu ke “lenaba.” (1 Bakorinthe 15:26) Batho ba bangwe ba hlokofala ka pela go feta ba bangwe. Eupša se se šalago ke gore ga go na yo a ka tšhabelago lehu. Batho ba bantši ga ba nyake le go nagana ka lona. Na ka letšatši le lengwe lehu le tla fela?
BOHLATSE BJA GORE LEHU LE TLO FELA
Na o be o tseba gore ga se thato ya Modimo gore batho ba hlokofale? Beibele e re nea bohlatse bja gore Modimo o be a nyaka gore re phele ka mo go sa felego mo lefaseng. Ka mohlala, o ile a bopa lefase le na le dilo ka moka tšeo batho ba bego ba tla di hloka. Ka morago ga moo, a bopa monna wa mathomo e lego Adama, ke moka a mmea lefelong le lebotsebotse e lego tšhemong ya Edene. Mafelelong ge “Modimo a lebelela se sengwe le se sengwe seo a se dirilego a bona e le se sebotse kudu.”—Genesi 1:26, 31.
Adama o bopilwe a se na sebe e bile a na le dika tša go swana le tša Modimo. (Doiteronomio 32:4) Mosadi wa Adama e lego Efa, le yena o be a se na sebe e bile a phetše gabotse monaganong le mmeleng. Ke moka Modimo o ile a ba botša gore: “Tswalang le ate le tlale lefase le be le le fenye, le buše dihlapi tša lewatle le dinonyana tše di fofago magodimong le sephedi se sengwe le se sengwe se se gagabago lefaseng.”—Genesi 1:28.
Go be go tlo tšea nako gore Adama le Efa ba tlatše lefase ka bana. Efa o be a tlo ba le bana, bana bao le bona ba ba le bana go fihlela lefase le tlala ka batho bjalo ka ge Modimo a boletše. (Jesaya 45:18) Na Modimo o be a ka botša Adama le Efa gore ba tlatše lefase ka bana mola ba be ba ka se phele go fihlela ba bona ditlogolwana tša bona?
Nagana le ka taba e nngwe še: Modimo o be a boditše Adama gore a buše diphoofolo goba go di hlokomela. Le gona o be a mmoditše gore a di ree maina, e lego mošomo wo o bego o tlo tšea nako e telele. (Genesi 2:19) Eupša e le gore Adama a kgone go hlokomela diphoofolo tšeo, o be a swanetše gore a ithute tšona le go di kwešiša. Seo se be se tlo mo tšea nako e telele kudu.
Ka gona, taelo ya Modimo ya gore Adama le Efa ba tlatše lefase ka bana le go hlokomela diphoofolo, e bontšha gore Modimo o be a ba bopetše go phela nako e telele. Ge e le gabotse, Adama o ile a phela nako e telele kudu.
MORERO WA MODIMO E BE E LE GORE BATHO BA PHELE KA MO GO SA FELEGO LEFASENG LA PARADEISE
BATHO BAO BA ILEGO BA PHELA NAKO E TELELE
Adama o phetše mengwaga e 930
Methusela o phetše mengwaga e 969
Noa o phetše mengwaga e 950
Lehono re phela mengwaga e 70 go ya go e 80
Beibele e bontšha gore batho ba kile ba phela nako e telele go feta rena lehono. Ka mohlala, e re: “Matšatši ka moka ao Adama a a phetšego e bile nywaga e makgolosenyane-masometharo (930).” Le gona e bolela le ka batho ba bangwe ba tshela bao ba ilego ba phela mengwaga e fetago e 900. Batho bao ke Sethe, Enoshe, Kenane, Methusela le Noa. Ka moka ga bona ba phetše pele ga Meetsefula a mehleng ya Noa, gomme Noa yena o phetše mengwaga e 600 pele ga Meetsefula. (Genesi 5:5-27; 7:6; 9:29) Go tlile bjang gore batho bao ba phele nako e telele ka tsela ye?
Lebaka ke gore mebele ya bona e be e se ya hlwa e hlagala kudu go swana le ya rena ka gore ba belegwe e se kgale Adama le Efa ba dirile sebe. Go ka direga gore seo ke sona se dirilego gore ba phele nako e telele. Bjale, ge nkabe re se na sebe re be re tlo phela nako e kaaka’ng? Gona lehu le tlo fela bjang? E le gore re hwetše dikarabo, sa pele re swanetše go kwešiša gore ke ka baka la eng re tšofala le go hwa.