Kamoo o ka Thabelago Bophelo Gona Bjale
NA GA o dume go bona ka letšatši le lengwe go se sa na malwetši, botšofadi le lehu? Seo se tlo direga e se kgale! Eupša gona bjale bophelo bo sa tletše ka mathata. Ka gona, o ka dira’ng gore o thabele bophelo gona bjale? Beibele e na le dikeletšo tšeo di ka go thušago gore o thabele bophelo gaešita le gona bjale. Ekwa ka a mangwe a mathata ao a re welago le keletšo yeo Beibele e re neago yona.
KAMOO O KA HWETŠAGO KGOTSOFALO BOPHELONG
Beibele e re: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona.”—Baheberu 13:5.
Bophelo bja lehono bo dira gore re kitimiše dilo tša lefase le. Eupša Beibele yona e re re kgotsofale ‘ka dilo tše re nago le tšona.’ O ka dira seo bjang?
O se ke wa “rata tšhelete.” Ka baka la go rata tšhelete, batho ba bangwe lehono ga ba sa na taba le bophelo bja bona, boitshwaro bja bona, malapa a bona, bagwera gaešita le seriti sa bona. (1 Timotheo 6:10) Seo ke bošilo bjo bogolo! Ka baka la’ng? Ka gobane Beibele e re morati wa tšhelete ‘a ka se kgotsofale.’—Mmoledi 5:10.
Batho ba bohlokwa go feta dilo tše re nago le tšona. Ke nnete gore dilo tšeo re nago le tšona di ka re thuša. Eupša dilo tšeo di ka se re bontšhe lerato goba tša re leboga; ke batho feela bao ba ka dirago bjalo. Ka gona, go ba le ‘bagwera ba kgonthe’ go tla go thuša gore o kgotsofale bophelong.—Diema 17:17.
O KA THABELA BOPHELO GONA BJALE KA GO KWA KELETŠO YA BEIBELE
KAMOO O KA KGOTLELELAGO GE O BABJA
Beibele e re: “Pelo e thabilego e etša sehlare se se fodišago.”—Diema 17:22.
Go swana le “sehlare se se fodišago,” go thaba go ka go thuša go kgotlelela ge o babja. Eupša o ka dira’ng gore o thabe ge o babja?
Eba le tebogo. Ge o ka dula o nagana ka mathata a gago, o tlo bona eka bophelong bja gago ga go loke selo. (Diema 15:15) Go e na le go dula o nagana ka mathata a gago, Beibele e re o be le ‘tebogo.’ (Bakolose 3:15) Ithute go leboga dilo mo bophelong, le tše di ka bonalago di sa re selo. Ka mohlala, o ka leboga tlholo ya Modimo, wa leboga thušo yeo ba bangwe ba go fago yona goba bophelo ka bo bjona. Dilo tše di ka dira gore o thabele bophelo.
Direla batho dilo. Le ge re ka ba re babja, Beibele e re “go na le lethabo le legolo go neeng go feta go amogeleng.” (Ditiro 20:35) Ge batho ba leboga dilo tše re ba diretšego tšona, re a thaba gomme ra se sa nagana kudu ka mathata a rena. Ge re thuša batho ba bangwe, re tla holega.
KAMOO O KA TIIŠAGO LENYALO LA GAGO
Beibele e re: “Le kgonthišetše dilo tše bohlokwa kudu.”—Bafilipi 1:10.
Banyalani bao ba sa fetšego nako e ntši ba le gotee ba ka senya lenyalo la bona. Ka baka leo, banyalani ba swanetše go etiša lenyalo la bona pele ga dilo ka moka ka gobane lenyalo ke se sengwe sa dilo tše bohlokwa kudu bophelong.
Dirang dilo mmogo. Go e na le go no dira dilo o nnoši, dirang dilo tše itšego mmogo. Beibele e re: “Ba babedi ba phala o tee.” (Mmoledi 4:9) Le ka hlatswa mmogo, la hlwekiša mmogo, la itloša bodutu mmogo goba la dira dilo tše dingwe mmogo.
Bontšha molekane wa gago gore o a mo rata. Beibele e re monna le mosadi ba swanetše go ratana le go hlomphana. (Baefeso 5:28, 33) Dilo tše dinyenyane tša go swana le go smaelela molekane wa gago, go mo gokarela, go mo reta goba go mo rekela mphonyana, di ka tiiša lenyalo la lena. Eupša gopola gore ga se wa swanela go ba le thobalano le motho yo mongwe yoo o sa nyalanago le yena.—Baheberu 13:4.
You May Also Like
PHAFOGA!
Kamoo re ka Hwetšago Lethabo—Go Hwetša Tsela ya go Thaba
Na o motho yo a thabilego? Ke eng seo se dirago gore motho a thabe?
PHAFOGA!
O ka thaba le ge o na le mathata!
Na bohlale bja Beibele bo ka go thuša gore o thabe kutšwanyana?
LAPA LA GAGO LE KA THABA
Kgopela Thušo ya Modimo Gore o be le Lenyalo le le Thabilego
Go diriša dipotšišo tše pedi tše bonolo go ka go thuša go kaonefatša lenyalo la gago.
