O nagana gore bophelo bo be bo tlo ba bjang ge nkabe go se na letšatši? Ruri e be e tlo ba mathata feela! Ekwa gore letšatši le re thuša bjang. Letšatši le tšweletša matla ao a thušago mehlare gore e be le matlakala, matšoba, dienywa, ditokomane (goba dimake) le peu. Le gona letšatši le thuša gore mehlare e kgone go monya meetse ka medu mo mobung, gomme meetse ao a fihla matlakaleng a mohlare, ka morago ga moo, meetse ao a moyafala.

Modimo o re nešetša pula e le gore lefase le tšweletše dijo gore re se bolawe ke tlala. E bile o re neile dihla tšeo di tšweletšago dijo tšeo re ipshinago ka tšona gomme seo se dira gore re thabe.

Botate ba bantši ba tshwenyega ka gore ba hlokomele malapa a bona ka dijo le diaparo. Eupša na Modimo yena a ka palelwa ke go re hlokomela? Ekwa gore Mangwalo a Makgethwa a reng. Mateo 6:25, 26 e re: “Šetšang ka kelohloko dinonyana tša legodimo; ga di bjale peu goba go buna goba go kgobela dintlong tša polokelo. Lega go le bjalo, Tatago lena wa legodimong o a di fepa. Na ga le bohlokwa go di feta?”

Mateo 6:28-30 e re: “Ithuteng ka matšoba a naga ao a bitšwago dilili, kamoo a golago ka gona . . . , eupša ke re go lena gaešita le [Kgoši] Solomone letagong la gagwe ka moka ga se a ka a tšhepha bjalo ka le lengwe la ona. Bjale ge e ba Modimo a apeša dimela tša naga ka mokgwa woo . . . , na a ka se upše a apeša lena kudu?”

Ka ge Modimo a kgona go re fa dijo le diaparo, go ra gore a ka kgona le go re fa le dilo tše dingwe tšeo re di hlokago mo bophelong. Ge e ba re dira gore go mo hlankela go tle pele maphelong a rena, o tlo re šegofatša. O tlo re thuša gore ge re bjala, re kgone go tšweletša dijo goba re hwetše mešomo yeo e tlago go re thuša gore re reke dilo tšeo re di hlokago.—Mateo 6:32, 33.

Ruri ge re lebelela letšatši, dipula tšeo di re nelago, dinonyana le matšoba, re kgona go bona gore Modimo o a re rata. Bjale, sehlogong se se latelago, re tlo kwa gore Modimo o ile a boledišana bjang le batho.