Mo e ka bago mengwaga e 3 500 e fetilego, Jehofa o ile a botša batho bao ba bego ba mo rapela seo ba swanetšego go se dira gore ba be le bokamoso bjo bobotse. O rile, “Ke beile bophelo le lehu pele ga lena, tšhegofatšo le thogako; le kgethe bophelo e le gore le dule le phela, lena le bana ba lena.”—Doiteronomio 30:19.

Batho bao ba be ba swanetše go dira phetho e botse gore ba be le bokamoso bjo bobotse. Lehono, le rena re swanetše go dira phetho e swanago. Beibele e re botša kamoo re ka kgethago bokamoso bjo bobotse, e re, “Gore le rate Jehofa Modimo wa lena, ka go theetša lentšu la gagwe.”—Doiteronomio 30:20.

ITHUTE BEIBELE: O swanetše go ithuta Beibele pele gore o kgone go rata Jehofa. Ge o dutše o ithuta ka yena o tlo lemoga gore o a go rata e bile o nyaka gore o atlege bophelong. O go mema gore o mo rapele “Ka gobane o a [go] hlokomela.” (1 Petro 5:7) Beibele e go tshepiša gore ge e ba o dira maiteko a go batamela Modimo, “le yena o tla [go] batamela.”—Jakobo 4:8.

DIRIŠA SEO O ITHUTAGO SONA: Go theetša Modimo go ra gore re swanetše go latela keletšo yeo e lego ka Beibeleng. Ge o dira bjalo, Modimo “o tla atlegišago tsela ya gago ke moka wa dira ka bohlale.”—Joshua 1:8.