DOREEN o be a maketše ge dingaka di hwetša gore monna wa gagwe Wesley, yo a bego a na le mengwaga e 54, o na le serurugi se kotsi kudu bjokong (brain tumor). * Dingaka di ile tša mmotša gore o šaletšwe ke dikgwedi tše sego kae feela gore a phele. Doreen o re: “Ke be ke sa kgolwe seo ke bego ke se kwa. Ke tšere dibeke ke gakanegile. Go be go le bjalo ka ge eka seo ga se diragalele rena. Ke be ke sa itokišetša boemo bjoo.”

Ka maswabi, tsela yeo Doreen a ilego a ikwa ka yona e tlwaelegile. Motho le ge e le ofe a ka swarwa ke bolwetši bja go se alafege ka nako le ge e le efe. Se se kgahlišago ke gore batho ba bantši ba ithaopela go hlokomela motho wa gabo bona yo a swerego ke bolwetši bja go se alafege. Lega go le bjalo, go hlokomela molwetši ga se papadi. Ba lapa ba ka dira’ng go kgothatša le go hlokomela molwetši? Bahlokomedi ba ka swaragana bjang le maikwelo a fapafapanego ao ba ka lebeletšanago le ona nakong ya ge ba hlokometše molwetši yoo? Go ka letelwa eng ge molwetši a le kgauswi le go hlokofala? A re thomeng ka go bona lebaka leo ka lona go hlokomela molwetši yo a babjago wa go hwa e lego bothata bjo bogolo mehleng yeno.

Tsebo ya tša kalafo ya mehleng yeno e fetošitše tsela yeo batho ba hlokofalago ka yona. Mengwageng e lekgolo goba go feta moo e fetilego, batho ba be ba phela nako e kopana, gaešita le bao ba dulago dinageng tše di hlabologilego. Batho ba be ba ehwa ka pela ba bolawa ke malwetši ao a fetelago goba dikotsi. Ka ge batho ba be ba sa kgone go ya dipetlele, ba be ba hlokomelwa ke ba gabo bona gomme ba hlokofalela ka gae.

Lehono tšwelopele yeo e dirilwego go tša kalafo e thušitše dingaka gore di kgone go lwantšha malwetši kudu, e le gore batho ba kgone go phela nako e teletšana.  Malwetši ao kgale a bego a ka bolaya motho ka pela, lehono batho ba kgona go phela ka ona mengwaga e mentši. Lega go le bjalo, ga se gore ge motho a phela nako e teletšana go ra gore o fodile. Gantši batho ba swarwa ke malwetši a šoro ao a ba dirago gore ba se kgone go itlhokomela. Ka gona, go ba hlokomela go tloga go le thata e bile go nyaka maiteko a magolo.

Ka baka leo, batho ba bantši lehono ba hlokofalela dipetlele e sego ka gae. Ke batho ba sego kae feela lehono bao ba kilego ba bona motho a hlokofala, gomme ba bantši ga ba tsebe gore go direga eng ge motho a hlokofala. Ka gona, go tšhaba selo seo motho a sa se tsebego, go ka mo dira gore a palelwe ke go hlokomela motho wa gabo yo a lwalago. Ke eng seo se ka thušago?

Ka ge re bone tabeng ya Doreen, batho ba bantši ba a hlakahlakana ge go hwetšwa gore wa lapa goba mogwera o na le bolwetši bjo kotsi. Ke eng seo se ka go thušago go itokišetša maemo ao a lego ka pele nakong ya ge o tshwenyegile, o tšhogile e bile o nyamile? Mohlanka yo a botegago wa Modimo o ile a rapela ka gore: “Re bontšhe kamoo re ka balago matšatši a rena ka tsela yeo re ka kgonago go hwetša pelo e bohlale.” (Psalme 90:12) Rapela Jehofa Modimo go tšwa pelong gore a go bontšhe kamoo o ka ‘balago matšatši a gago’ ka tsela e bohlale, e le gore o fetše gabotse matšatši ao a šetšego o na le wa lapa goba mogwera.

Seo se nyaka gore o rulaganye dilo gabotse. Ge e ba molwetši a sa kgona go bolela e bile a ikemišeditše go bolela ka taba ye, e ka ba gabohlale gore o mmotšiše gore mohlang a se sa kgona go bolela, o nyaka go direlwa ke mang diphetho. Boledišana le yena ka bolokologi ka ditaba tša ge e ba a ka nyaka go tsošwa ge a idibetše, go išwa sepetlele goba go alafiwa ka tsela e itšego. Se se ka fokotša go se kwešišane goba maikwelo a go ba le molato dithong tša lapa tšeo di gapeletšegago go dira diphetho legatong la molwetši yo a sa kgonego go itirela seo. Go boledišana ka bolokologi e sa le ka pela, go thuša lapa gore le tshwenyege kudu ka go mo hlokomela nakong ya ge a lwala. Beibele e re: “Maano a a fela ge batho ba sa ntšhetšane sa mafahleng.”—Diema 15:22.

Gantši mohlokomedi o thuša kudu ka go homotša molwetši. Motho yo a lego kgauswi le go hlokofala o nyaka go kgonthišetšwa gore o a ratwa, le gore ga se a lahlwa. O ka dira seo bjang? O ka mmalela goba wa mo opelela. Kgetha dipuku le dikoša tšeo a di ratago le tšeo di ka mo matlafatšago. Batho ba bantši ba homotšwa ke ge wa lapa a ba swara ka seatla e bile a ba bolediša gabotse.

 Gantši go a thuša gore o botše molwetši gore o etetšwe ke bomang. Pego e nngwe e re: “Go thwe go dikwi ka moka tše hlano tšeo motho a nago le tšona, go kwa ke gona go sa hwego ka pela. Le ge [balwetši] ba ka bonala ba robetše, go ka direga gore ba a kwa. Ka gona, le se ke la bolela dilo tšeo le ka se di bolelego ge ba tsogile.”

Ge e ba go kgonega, rapelang mmogo. Beibele e re botša gore ka nako e nngwe, moapostola Paulo le bagwera ba gagwe ba ile ba ba ka tlase ga kgatelelo e feteletšego e bile ba sa kgonthišege gaešita le ka maphelo a bona. Ba ile ba nyaka thušo efe? Paulo o ile a kgopela bagwera ba gagwe gore: “Le lena le ka thuša ka ditopo tša lena tša go re lopela.” (2 Bakorinthe 1:8-11) Go bohlokwa go rapela go tšwa pelong ge motho a gateletšegile kudu e bile a lwala kudu.

Go tseba gore wa lapa goba mogwera o tlo hlokofala go a nyamiša. Seo ga se makatše ka gore lehu ga se selo sa tlhago. Ga se ra bopša ka tsela ya gore re amogele gore lehu ke karolo ya bophelo bja rena. (Baroma 5:12) Ke ka baka leo Beibele e rego lehu ke “lenaba.” (1 Bakorinthe 15:26) Ka gona, go a kwagala e bile ke ga tlhago ge re palelwa ke go amogela gore wa lapa goba mogwera o tlo hlokofala.

Lega go le bjalo, go itokišeletša seo se ka diregago go ka thuša ba lapa gore ba se tšhoge le gore ba thuše kamoo ba ka kgonago. Dilo tše dingwe tšeo di ka diregago di ngwadilwe lepokising leo le rego, “ Dibekeng tša Mafelelo tša Bophelo.” Ke nnete gore ga se balwetši ka moka bao ba diragalelwago ke dilo ka moka tšeo di ngwadilwego moo. Le gona, ga se gore dilo tšeo di direga ka go latelelana. Lega go le bjalo, balwetši ba bantši ba diragalelwa ke tše dingwe tša dilo tšeo.

Ka morago ga gore wa lapa goba mogwera a hlokofale, e ka ba gabohlale gore o boledišane le mogwera wa gago yo a ithaopetšego go go thuša. Bahlokomedi le ba lapa ba ka nyaka go kgonthišetšwa gore motho yoo ga a sa kwa bohloko e bile ga a sa tlaišega. Ka lerato, Mmopi wa rena o re kgonthišetša gore “bahu ga ba tsebe selo le gatee.”—Mmoledi 9:5.

Go bohlokwa go ithekga ka Modimo, e sego feela ge wa lapa a babja eupša le nakong ya manyami a ka morago ga ge a hlokofetše. Modimo a ka re thuša ka go diriša batho gore ba re botše mantšu a kgothatšago le go re direla dilo. Doreen o re: “Ke ithutile gore ke se ke ka gana ge motho a ithaopela go nthuša. Ge e le gabotse, thušo ye re e hweditšego e ile ya re makatša kudu. Nna le monna wa ka re be re tloga re bona gore Jehofa o re botša gore, ‘Ke na le lena, ke tla le thuša go kgotlelela.’ Ruri nka se tsoge ke lebetše seo!”

Ruri Jehofa Modimo ke Mohlokomedi yo mogologolo! Ka ge e le Mmopi wa rena, o kwešiša gabotse bohloko bjo re bo kwago le manyami a rena. Jehofa o a kgona e bile o ikemišeditše go re thuša le go re kgothatša e le gore re kgone go kgotlelela. E bile sa go thabiša le go feta ke gore o re tshepišitše gore kgauswinyane o tlo fediša lehu sa ruri gomme a tsoše batho ba dibilione bao ba lego mogopolong wa gagwe. (Johane 5:28, 29; Kutollo 21:3, 4) Ke moka, ka moka ga rena re tla bolela mantšu a moapostola Paulo a rego: “Lehu, phenyo ya gago e kae? Lehu, lebolela la gago le kae?”—1 Bakorinthe 15:55.