Ee, barongwa ba babe ba gona. Ba tšwa kae? Gopola gore Modimo o bopile barongwa ba na le tokologo ya go ikgethela. Ka moragonyana ga ge Adama le Efa ba bopilwe, morongwa yo a phethagetšego o ile a diriša gampe tokologo ya gagwe ya go ikgethela. O ile a dira gore batho ba se kwe Modimo mo lefaseng. O ile a atlega ka go dira gore Adama le Efa ba se kwe Modimo. (Genesi 3:1-7; Kutollo 12:9) Beibele ga e re botše gore leina la morongwa yoo e be e le mang. E bile ga e re botše gore o be a na le maemo afe legodimong pele ga ge a ka thoma go se kwe Modimo. Eupša ka morago ga gore morongwa yoo a se kwe Modimo, Beibele e mmitša gore ke Sathane le Diabolo. Leina Sathane le ra gore “Moganetši” gomme leina Diabolo le ra gore “Mothomeletši.”—Mateo 4:8-11.

Ka manyami, go se kwe Modimo ga se gwa felela moo. Mehleng ya Noa barongwa bao palo ya bona e sa bolelwego, ‘ba ile ba tlogela bodulo bja bona bjo bo swanetšego’ bja go dula le Modimo legodimong. Ba ile ba tla lefaseng gomme ba iphetoša batho gore ba itshware gampe ka tša thobalano. Seo e be e le go thulana le morero wo Modimo a ba bopetšego wona.—Juda 6; Genesi 6:1-4; 1 Petro 3:19, 20.

Go ile gwa direga eng ka barongwa bao ba babe? Ge Modimo a be a fediša lefase ka moka ka meetsefula, barongwa bao ba ile ba apola mebele ya nama gomme ba boela legodimong. Lega go le bjalo, Modimo ga se a ka a dumelela barongwa bao ba babe gore ba boele ‘boemong bja bona bja pele.’ Go e na le moo, o ile a ba gafela maemong a tlase a “meleteng ya leswiswi,” yeo e tsebjago e le Tatarase. (Juda 6; 2 Petro 2:4) Batemona bao ba ile ba kgetha go laolwa ke Sathane Diabolo, e lego “mmuši wa batemona” yo a ‘dulago a itira morongwa wa seetša.’—Mateo 12:24; 2 Bakorinthe 11:14.

Beibele e ruta gore Mmušo wa Modimo wa Mesia, e lego pušo ya legodimong, o hlomilwe ka 1914. * Ka morago ga tiragalo yeo e sa lebalegego, Sathane le batemona ba gagwe ba ile ba rakwa legodimong gomme ba lahlelwa lefaseng. Bobe le boitshwaro bjo bo gobogilego tšeo di tletšego mo lefaseng, di bontšha gore ba galefile e bile ba nyaka go senya.—Kutollo 12:9-12.

Lega go le bjalo, go oketšega ga boitshwaro bjo bobe le bošoro bjo bo boifišago, go bontšha gore pušo ya bona e mpe e kgauswi le go fela. Go se go ye kae, barongwa ba ba babe ba tlo fedišwa. Mmušo wa Modimo o tlo buša lefaseng la paradeise ka mengwaga e 1 000. Ka morago ga moo, barongwa bao ba babe ba tlo newa nako e kopana ya gore ba leke batho. Ke moka ba tla fedišetšwa sa ruri.—Mateo 25:41; Kutollo 20:1-3, 7-10.