TABA YA LETLAKALA LA KA NTLE | BARONGWA—NA GO TSEBA KA BONA GO BOHLOKWA?

Na o ka Rata go Tseba ka Barongwa?

BAPALA

Na o ka rata go tseba nnete ka barongwa—gore ke bomang, go tlile bjang gore ba be gona le seo ba se dirago? Ga go na moo o ka hwetšago dikarabo tše kaone ntle le ka Lentšung la Modimo leo le buduletšwego, e lego Beibele. (2 Timotheo 3:16) Beibele e re’ng?

Ka ge Modimo e le Moya, barongwa le bona ke meoya e sa bonagalego yeo e se ‘nago nama le marapo.’ Barongwa bao ba kwago Modimo ba dula legodimong gomme ba kgona go bona Modimo yo a lego legodimong.—Luka 24:39; Mateo 18:10; Johane 4:24.
Ka dinako tše dingwe barongwa ba kile ba iponagatša e le batho. Morero e be e le gore ba dire mešomo yeo Modimo a bego a ba file yona lefaseng. Ka morago ga go phetha mešomo yeo ba ile ba se sa bonagala.—Baahlodi 6:11-23; 13:15-20.
Ka Beibeleng ge go bolelwa ka barongwa go kwagala e le banna. Ka mehla ge ba be ba iponagatša bathong ba be ba tšwelela ka sebopego sa banna. Lega go le bjalo, go barongwa ga go na monna goba mosadi. Ga ba nyalane e bile ga ba belege. Go oketša moo, barongwa ga se ba thoma e le batho lefaseng—mohlomongwe e le masea, bana goba batho ba bagolo. Barongwa ba bopilwe ke Jehofa; ke ka baka leo Beibele e ba bitšago “barwa ba Modimo wa therešo.”—Jobo 1:6; Psalme 148:2, 5.
Beibele e bolela ka “maleme a batho le a barongwa,” e lego seo se bontšhago gore Modimo le barongwa ba na le tsela yeo ba bolelago ka yona le leleme leo ba le dirišago. Le ge Modimo a ile a diriša barongwa go bolela le batho, eupša ga a re dumelele go rapela barongwa.—1 Bakorinthe 13:1; Kutollo 22:8, 9.
Go na le barongwa ba dimiriate tše dimiriate, mohlomongwe ke ba dibilione. *—Daniele 7:10; Kutollo 5:11.
Barongwa ba na le “matla a magolo,” e lego matla ao a fetago a batho, e bile ba feta batho ka bohlale. Ba na le lebelo kudu, go feta selo le ge e le sefe sa mo lefaseng.—Psalme 103:20; Daniele 9:20-23.
Le ge barongwa ba na le matla a magolo e bile ba le bohlale kudu, ga ba kgone dilo ka moka. E bile go na le dilo tše dingwe tšeo ba sa di tsebego.—Mateo 24:36; 1 Petro 1:12.
Barongwa ba bopilwe ba sa swane ka dimelo e bile ba na le dika tša go swana le tša Modimo. E bile ba na le tokologo ya go ikgethela. Ka baka leo, go swana le batho, le bona ba ka kgetha go dira se se lokilego goba se se fošagetšego. Ka manyami, barongwa ba bangwe ba ile ba kgetha go se kwe Modimo.—Juda 6.

^ par. 8 Miriate e tee e lekana le 10 000. Miriate e tee ge e balwa ga miriate e dira dimilione tše 100. Ka gona, lengwalo la Kutollo le bolela ka barongwa ba “dimiriate tša dimiriate.” Tšeo ke dibopiwa tša moya tše dimilione tše makgolo, goba mohlomongwe tše dibilione!

Barongwa Ba Modimo Ba Rulagantšwe Bjang?

Morongwa yo mogolo e lego Mikaele ke morongwa yo a phagamego ka ge a na le matla le bolaodi. Mangwalo a bontšha gabotse gore Mikaele ke leina le lengwe la Jesu Kriste.—1 Bathesalonika 4:16; Juda 9.

Baserafi ba phagametše barongwa ba bangwe ka maemo le ka letago, e bile ba hlankela kgauswi le sedulo sa bogoši sa Modimo.—Jesaya 6:1-3.

Bakerubi le bona ba na le maemo a phagamego. Ba phetha maikarabelo a kgethegilego ao a sepedišanago kudu le gore Modimo Ramatlaohle a tumišwe goba a newe letago. Gantši go bolelwa ka bona e le bao ba dulago ba hlankela Modimo.—Genesi 3:24; Hesekiele 9:3; 11:22.

Barongwa ba bangwe bao e lego baromiwa, bao ba balwago ka dimiriate goba dimilione ba hlankela e le bommaditsela goba baemedi ba Modimo yo a Phagamego tabeng ya go phetha thato ya Modimo. *—Baheberu 1:7, 14.

^ par. 19 Bakeng sa tsebišo e oketšegilego mabapi le barongwa, bona kgaolo 10 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa. Bona le sehlogo sa lemetletšo seo se rego, “Mikaele Morongwa yo Mogolo ke Mang?” Puku ye e hwetšagala gape le go www.pr418.com/nso.