Batho ba dimilione go dikologa lefase ba dumela gore moetlo wa Keresemose o emela go ketekwa ga matswalo a Jesu Kriste. Eupša, na o kile wa ipotšiša ge e ba Bakriste bao ba bego ba phela kgauswi kudu le Jesu ba kile ba keteka Keresemose? Le gona, na o tseba seo Beibele e se bolelago ka matšatši a matswalo? Go hwetša dikarabo tša dipotšišo tše go ka re thuša go kwešiša ge e ba Bakriste ba swanetše go keteka Keresemose.

Sa pele, ga gona mo Beibele e bolelago ka go ketekwa ga letšatši la matswalo la Jesu goba la yo mongwe wa barapedi ba botegago ba Modimo. Beibele e bolela ka batho ba babedi feela bao ba ilego ba keteka matšatši a bona a matswalo. Bobedi bja bona ba be ba sa rapele Jehofa, e lego Modimo wa ka Beibeleng, e bile nakong ya ge go ketekwa matšatši a bona a matswalo go diregile dilo tše mpe. (Genesi 40:20; Mareka 6:21) Go ya ka Encyclopædia Britannica, Bakriste ba lekgolong la pele la mengwaga ba be ba sa dumelelane le “motlwae wa boheitene wa go keteka matšatši a matswalo.”

Beibele ga e bolele ka go lebanya gore Jesu o belegwe neng. Cyclopedia ya McClintock le Strong e re: “Ge e le gabotse, letšatši la matswalo a Kriste le ka se kgonthišetšwe go tšwa Testamenteng e Mpsha goba go tšwa mothopong le ge e le ofe o mongwe.” Ga go pelaelo gore ge e ba Jesu a be a nyaka balatedi ba gagwe ba keteka letšatši la gagwe la matswalo, o be a tla netefatša gore ba tseba letšatši leo a belegwego ka lona.

Sa bobedi, Beibele ga e re botše gore Jesu goba yo mongwe wa barutiwa ba gagwe o ile a keteka Keresemose. Go ya ka New Catholic Encyclopedia, go keteka Keresemose go boletšwe la mathomo ka go “Chronograph ya Philocalus, e lego puku yeo e tšweletšwago ngwaga le ngwaga ya Roma ya 336 [C.E.].” Go molaleng gore ka nako yeo e be e le kgale Beibele e feditšwe go ngwalwa, e bile e le mengwaga e makgolo Jesu a tlogile lefaseng. Ka gona, McClintock le Strong ba bolela gore “go keteka Keresemose ga se taelo yeo e tšwago go Modimo goba ka Testamenteng e Mpsha.” *

Bjalo ka Morutiši yo Mogolo, Jesu o file ditaelo tše di kwagalago mabapi le seo a nyakago balatedi ba gagwe ba se dira, gomme di hwetšagala ka Beibeleng. Lega go le bjalo, go keteka Keresemose ga se e nngwe ya ditaelo tšeo. Go swana le ge morutiši a sa nyake barutwana ba gagwe ba fetela ka kua ga ditaelo tšeo a ba filego tšona, Jesu le yena ga a nyake balatedi ba gagwe ba “fetela ka kua ga dilo tše di ngwadilwego” ka Mangwalong a Makgethwa.—1 Bakorinthe 4:6.

Ka lehlakoreng le lengwe go na le tiragalo e tee ya bohlokwa yeo Bakriste ba lekgolong la pele la mengwaga ba bego ba tlwaelane le yona, e lego Segopotšo sa lehu la Jesu. Jesu ka boyena o boditše barutiwa ba gagwe gore ba gopole tiragalo yeo neng, le go ba bontšha gore ba e gopole bjang. Ditaelo tše tšeo di lebanyago gotee le letšatši la lehu la gagwe di ngwadilwe ka Beibeleng.—Luka 22:19; 1 Bakorinthe 11:25.

Ka ge re šetše bone, Keresemose ke letšatši la matswalo gomme Bakriste ba lekgolong la pele la mengwaga ga se ba ka ba latela motlwae woo wa boheitene. Go oketša moo Beibele ga e bolele gore Jesu goba motho le ge e le ofe o kile a keteka Keresemose. Dintlha tše ka moka, di dirile gore Bakriste ba dimilione go dikologa lefase ba phethe ka gore ga se ba swanela go keteka Keresemose.