Puku ya Hope in the Age of Anxiety e re: “KHOLOFELO KE . . . SELO SA BOHLOKWA GO RE THUŠA GORE RE GWERANE LE MODIMO. Ke tharollo e phalago tšohle bakeng sa go fenya maikwelo a go ikwa o se na mohola, o lahlegile e bile o tšhogile.”

Taba ya gore re be le kholofelo e hlaloswa ka Beibeleng, e lego seo se re thušago gore re gane ditshepišo tša maaka. Psalme 146:3 e re: “Le se ke la bota bakgomana, goba la bota ngwana wa motho wa lefaseng, ka ge a sa kgone go phološa.” Go e na le go tshepa maiteko a batho a gore ba ka re phološa, ke gabohlale gore re tshepe Mmopi wa rena yo a nago le matla a go phethagatša ditshepišo tša gagwe. Modimo o re tshepišitše eng? Ela hloko dilo tše di latelago.

BOBE BO TLO FELA GOMME BALOKI BA TLO PHELA KA KHUTŠO KA MO GO SA FELEGO: Psalme 37:10, 11 e re: “Go se gokae yo kgopo o tla be a se sa le gona . . . Eupša ba boleta bona e tla ba beng ba lefase, ba tla thaba kudu ka baka la go ata ga khutšo.” Temana ya 29 e oketša ka gore ‘baloki ba tla dula [goba ba phela] ka mo go sa felego’ mo lefaseng.

DINTWA DI TLO FELA. Psalme 46:8, 9 e re: “[Jehofa] o fediša dintwa go fihla pheletšong ya lefase. O robaganya bora gomme a ripaganya lerumo; dikoloi tša ntwa o di tšhuma mollong.”

GO KA SE SA BA LE BOLWETŠI, TLAIŠEGO GOBA LEHU. Kutollo 21:3, 4 e re: “Tente ya Modimo e bathong, . . . O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”

GO TLA BA LE DIJO TŠA GO LEKANA BATHO KA MOKA. Psalme 72:16 e re: “Go tla ba le mabele a mantši mo lefaseng; dintlheng tša dithaba go tla ba le motlalo wa mabele.”

GO TLA BA LE PUŠO YA GO LOKA KA MMUŠO O TEE WA LEFASE KA MOKA, E LEGO MMUŠO WA KRISTE. Daniele 7:14 e re: “[Jesu Kriste] a newa pušo, seriti le mmušo, gore batho ba merafo, ditšhaba le maleme ka moka ba mo hlankele. Pušo ya gagwe ke ya neng le neng, yeo e ka se kego ya fedišwa gomme mmušo wa gagwe ke wo o ka se kego wa senywa.”

Ke ka baka la’ng re ka tshepa ditshepišo tšeo? Ge Jesu a be a le mo lefaseng, o ile a bontšha phatlalatša gore ke yena a swanelegago go ba Kgoši e Kgethilwego. O ile a fodiša balwetši, a fepa badiidi le go tsoša bahu. Sa bohlokwa kudu e be e le dithuto tša gagwe ka gobane di be di na le melao ya motheo yeo e tla thušago batho gore ba phele gotee ka khutšo ka mo go sa felego. Jesu o ile a bolela ka ditiragalo tša nakong e tlago, go akaretša le tšeo di bego di tla bontšha mehla ya bofelo bja lefase le la gona bjale.

Jesu o boletše gore mehla ya bofelo e ka se bonale ka khutšo le polokego, eupša e tla bonala ka se se fapanego. O boletše gore pontšho ya “bofelo bja tshepedišo ya dilo” e be e tlo akaretša dintwa, tlhaelelo ya dijo, leuba la malwetši le ditšhišinyego tša lefase. (Mateo 24:3, 7; Luka 21:10, 11; Kutollo 6:3-8) Gape Jesu o itše: “Ka baka la go oketšega ga go hloka molao, lerato la ba bantši le tla fola.”—Mateo 24:12.

Go fola moo go bonala ka ditsela tše dintši moo mongwadi yo mongwe wa Beibele a boletšego ka gona ka go lebanya. Go 2 Timotheo 3:1-5 re bala gore “mehleng ya bofelo” batho e be e tlo ba baithati, ba go rata tšhelete le maipshino. E be e tlo ba batho ba go ikgogomoša le ba bogale. Malapa a be a tlo hloka lerato la tlhago gomme bana ba se kwe batswadi. Madumedi a be a tlo tlala ka boikaketši.

Maemo ao a thata a bontšha gore re phela mehleng ya bofelo. E bile a bontšha gore khutšo ya ge go tla be go buša Mmušo wa Modimo e kgauswi. Ge e le gabotse, ge Jesu a be a porofeta mabapi le mehla ya bofelo o kgonthišeditše gore: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mateo 24:14.

Ditaba tše tše dibotse di nea temošo go badiradibe gape di nea kholofelo go baloki, e lego kgonthišetšo ya gore kgauswinyane dilo tše di holofeditšwego di tlo phethagala. Na o ka rata go ithuta mo go oketšegilego ka ditšhegofatšo tšeo? Ge e ba go le bjalo, hle bona letlakala la ka morago la makasine wo.