Mosadi yo a bitšwago Patricia o re: “GO TLOGA KE SA LE NGWANA, KE BE KE EKWA BATHO BA ROGANA E BILE BA HLABELANA MAŠATA. Ke be ke sa kgone go lebalela. Gaešita le ge ke gotše, ke be ke dula ke nagana ka dilo tšeo batho ba nkgopišitšego ka tšona, moo ke bego ke sa kgone le go robala.” Motho yo a dulago a galefile e bile a sa kgone go lebalela ba bangwe, ga a thabe e bile ga a phele gabotse mmeleng. Dinyakišišo di bontšha gore batho bao ba sa lebalelego ba bangwe . . . 

• Ba ka dumelela kgalefo e senya ditswalano tša bona le ba bangwe, e lego seo se ka dirago gore motho a ipee kgole le ba bangwe le go lewa ke bodutu

• Ba ka kgopišega ka pela, ba dula ba belaela goba gaešita le go gateletšega kudu monaganong

• Ba ka dula ba nagana ka dilo tšeo batho ba bangwe ba ba kgopišitšego ka tšona moo ba ka feleletšago ba sa ipshine ka bophelo

• Ba ka ikwa ba sa latele melao ya Modimo

• Ba ka ba le kgateletšego (stress), ba lwala, ba ba le high blood, bolwetši bja pelo, ba opelwa ke marapo le go rengwa ke hlogo *

GO LEBALELA KE ENG? Go lebalela ke go swarela motho yo a go kgopišitšego le go tlogela go galefa le go se nagane go itefeletša. Ga go bolele go hlokomologa phošo, go e nyenyefatša goba go dira e ka ga se ya direga. Go e na le moo, go lebalela ke kgetho yeo e naganišišitšwego gabotse yeo e bontšhago gore motho o rata go dira khutšo le go ba le segwera se sebotse le batho ba bangwe.

Go lebalela go bontšha gore motho o a kwešiša. Motho yo a lebalelago o kwešiša gore ka moka re dira diphošo, e ka ba ka seo re se bolelago goba ka seo re se dirago. (Baroma 3:23) E le go thekga seo, Beibele e re: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.”—Bakolose 3:13.

Ka gona, go molaleng gore go lebalela ke seka se bohlokwa sa go bontšha lerato, leo e lego “setlemo se se phethagetšego sa botee.” (Bakolose 3:14) Go ya ka wepesaete ya Mayo Clinic go lebalela . . . 

•   Go tiiša segwera, go dira gore o kwele motho yo a go kgopišitšego bohloko, o mo kwešiše le go mmontšha botho

• Go dira gore motho a phele gabotse monaganong le go ba le segwera se sebotse le Modimo

• Go dira gore motho a se ke a belaela kudu, a se ke a galefa kudu le go gateletšega kudu

• Go fokotša go ba le kgateletšego ya monagano

ITEBALELE. Makasine wa Disability & Rehabilitation o bontšha gore go itebalela e ka ba selo se “thata seo motho a ka se dirago.” Lega go le bjalo, go itebalela “go bohlokwa kudu e le gore motho a phele gabotse” monaganong le mmeleng. Ke eng seo se ka go thušago gore o kgone go itebalela?

• O se ke wa letela gore o be motho yo a phethagetšego, eupša amogela gore le wena o tlo dira diphošo go swana le batho ka moka.—Mmoledi 7:20

• Ithute diphošong tša gago e le gore o se ke wa di bušeletša

• O se ke wa iphelela pelo ka gobane mafokodi a mangwe le mekgwa e mengwe e mebe di ka no se tloge ka pela.—Baefeso 4:23, 24

• Gwerana le batho bao ba go kgothatšago le bao ba nago le botho e bile e le bao ba ka se tšhabego go go botša nnete.—Diema 13:20

• Amogela ge e ba o kgopišitše motho yo mongwe gomme o kgopele tshwarelo ka pela. Ge o dira khutšo le ba bangwe, o tlo thaba.—Mateo 5:23, 24

Patricia yo go boletšwego ka yena mathomong a sehlogo se, o ile a ithuta go lebalela ka morago ga gore a thome go ithuta Beibele. O ngwadile gore: “Ke ikwa ke se sa na kgalefo yeo ke bego ke na le yona pele. Ga ke sa tlaišega e bile ke phedišana le batho ba bangwe gabotse. Melao ya motheo ya Beibele e re kgonthišetša gore Modimo o a re rata e bile o re nyakela tše kaone.”

Monna yo a bitšwago Ron o re: “Nka se kgone go laola tsela yeo batho ba bangwe ba naganago le go dira dilo ka yona, eupša nka kgona go laola tsela yeo nna ke naganago le go dira dilo ka yona. Ka ge ke be ke nyaka go ba le khutšo, ke be ke swanetše go ithuta go lebalela batho ba bangwe. Ke ile ka thoma go bona khutšo le go se lebalele e le dilo tše pedi tšeo di sa kopanego. Ka gona, ke be ke swanetše go kgetha e tee ya tšona. Ga bjale ke na le letswalo le botse.”