Mokgatlo wa Ditšhaba tše Kopanego o kgothaletša batho lefaseng ka moka gore ba ratane le go phedišana ka khutšo. Ka baka la’ng? Karabo e mantšung a Maher Nasser yo a ngwadilego ka makasineng wa UN Chronicle gore: “Batho lefaseng ka moka ba tshwenyegile ka go senyega ga leratadima, bokebekwa, go gatelelwa ga batho, dikgohlano, go hudušwa ga batho ka kgapeletšo, botšhošetši le malwetši a go fetela le dilo tše dingwe tša go swana le tšeo tše di dirago gore batho ba se šireletšege.”

Batho ba bangwe ba ile ba leka mokgwa o sa kgonegego gore go be le khutšo mo lefaseng. Ba ile ba lwela gore mo lefaseng go buše mmušo o tee. Ba bangwe ba batho bao ke radifilosofi wa Italy e lego Dante (yo a belegwego ka 1265 gomme a hlokofala ka 1321), yoo gape e bego e le sereti le radipolotiki wa go tuma. Yo mongwe ke Albert Einstein (yo a belegwego ka 1879 gomme a hlokofala ka 1955), yo e bego e le rasaense. Dante o be a dumela gore mo lefaseng go ka se tsoge go bile le khutšo ka gore go na le mekgatlo e mentši ya dipolotiki. Dante o ile a bolela mantšu ao a boletšwego ke Jesu Kriste a gore: “Mmušo o mongwe le o mongwe wo o aroganego o a šwalalana.”—Luka 11:17.

Ka moragonyana ga Ntwa ya Bobedi ya Lefase, yeo go yona go ilego gwa thuthupišwa dipomo tše pedi tše dikgolo, Albert Einstein o ile a ngwalela Lekgotla la Mokgatlo wa Ditšhaba tše Kopanego lengwalo leo batho ba bantši ba ilego ba le bala dikuranteng. Lengwalong leo o itše: “Mokgatlo wa Ditšhaba tše Kopanego o swanetše gore ka pelapela o dire gore mo lefaseng go buše mmušo o tee.”

Ge seo se be se ka direga, na boradipolotiki bao e bego e tla ba karolo ya mmušo woo ba be ba ka kgona go se be baradia, ba tshepagala le go se gatelele batho? Goba na le bona e be e tla ba baradia go no swana le boradipolotiki ba bangwe? Dipotšišo tše di re gopotša mantšu a radihistori wa Mobrithania e lego Morena Acton, yo a itšego: “Go ba le matla a bolaodi go dira gore motho e be moradia, go ba le matla a magolo go dira gore motho e be moradia wa mafelelo.”

E le gore batho ba phedišane ka khutšo le ka kwano, ba swanetše go ba selo setee. Eupša seo se kgonega bjang? Na se ka tsoga se kgonegile? Beibele e re seo se a kgonega, e bile e re se tlo kgonega. Bjang? Se tlo kgonega ge go buša Modimo, e sego batho bao ba tletšego boradia. Mmušo wa Gagwe ke wona feela o tla kgonago go buša batho gabotse. Beibele e re Mmušo woo ke “Mmušo wa Modimo.”—Luka 4:43.

Jesu Kriste o be a naganne ka Mmušo wa Modimo ge a be a ruta barutiwa ba gagwe go rapela. O itše: “Mmušo wa gago a o tle. Thato ya gago a e direge . . . mo lefaseng.” (Mateo 6:9, 10) Ee, Mmušo wa Modimo o tlo dira gore mo lefaseng go direge thato ya Modimo, e sego thato ya boradipolotiki ba megabaru le bao ba inaganelago ba nnoši.

Mmušo wa Modimo gape o bitšwa “Mmušo wa magodimo.” (Mateo 5:3) Ka baka la’ng? Ka gore o tlo buša mo lefaseng o le gona kua legodimong. O nagana gore go tlo ba bjang ge Mmušo wa Modimo o tla be o buša mo lefaseng? Go ka se sa nyakega gore re ntšhe ditšhelete tša go se fele, go swana le go ntšha metšhelo. Ruri bophelo bo tlo ba bose ge Mmušo wa Modimo o tla be o buša mo lefaseng!

Go etša ge lentšu “mmušo” le itlhalosa, Mmušo wa Modimo ke pušo. Kgoši ya wona ke Jesu Kriste, yoo Modimo a mo filego matla a go buša. Ge Beibele e bolela ka Jesu e re:

•   “E tla ba moaparankwe . . . Mmušo wa gagwe o tla oketšega; khutšo ya wona ke ya go ya go ile.”—Jesaya 9:5, 6, Beibele ya Taba ye Botse.

• “A newa pušo, seriti le mmušo, gore batho ba merafo, ditšhaba le maleme ka moka ba mo hlankele. Pušo ya gagwe . . . e ka se [ke] ya fedišwa.”—Daniele 7:14.

• “Mmušo wa lefase o fetogile mmušo wa Morena wa rena [e lego Modimo] le wa Kriste wa gagwe.”—Kutollo 11:15.

Go etša ge Jesu a boletše thapelong yeo a e rutilego balatedi ba gagwe, Mmušo wa Modimo o tlo dira gore thato ya Modimo e direge mo lefaseng. Ka nako yeo, batho ka moka ba tlo ithuta go hlokomela lefase gore le boele e be le lebotse gape, gomme ba thabela go phela go lona.

Go feta tšohle, Modimo o tlo tšwela pele a ruta batho bao a tla bego a ba buša. Batho ba Modimo e tlo ba selo setee, gwa se sa ba le dikgohlano goba dikarogano. Lengwalo la Jesaya 11:9 le re: “Go ka se sa dirwa tše mpe goba gwa gobatšanwa, ka gobane naga e tla be e tletše batho ba ba tsebago Morena bjalo ka ge lewatle le tletše meetse.”—Beibele ya Taba ye Botse.

Ge Mmušo wa Modimo o tla be o buša mo lefaseng, batho ka moka ba tlo ratana le go phedišana ka khutšo, e lego seo Mokgatlo wa Ditšhaba tše Kopanego o palelwago ke go se dira. Psalme 37:11 e re: “Ba tla thaba kudu ka baka la go ata ga khutšo.” Ka nako yeo, re tlo lebala gore mo lefaseng go kile gwa ba le “bosenyi,” “tšhilafalo,” “bodiidi” le “ntwa.” Eupša seo se tlo direga neng? Ka mantšu a mangwe, Mmušo wa Modimo o tlo thoma neng go buša mo lefaseng? Gona o tlo buša bjang? O ka dira’ng gore o tle o phele Mmušong woo? Dikarabo di sehlogong se se latelago.