Beibele e kgona go lahliša batho mekgwa e mebe. Ekwa ka mehlala ya batho ba ba latelago ba babedi e lego Ricardo le Andres.

RICARDO: Ge ke be ke sa na le mengwaga e 15, ke ile ka ba setho sa sehlopha sa ditsotsi. Bagwera bao ba ka ba ile ba mphetoša kudu. Ge e le gabotse, ke ile ka ba ka ipotša gore ke nyaka go fetša mengwaga e lesome teronkong. O ka nagana gore seo ke bošilo. Eupša mo ke goletšego gona, batho bao ba bego ba feditše mengwaga e mentši ba le teronkong ba be ba tšeelwa godimo e bile ba hlompšha. Ka gona ke be ke nyaka go swana le bona.

Ke ile ka dira dilo ka moka tšeo di dirwago ke ditsotsi, go akaretša go kgoga di-drugs, go dira thobalano le go ba motho yo šoro. Bošegong bjo bongwe re ile ra thuntšhana le ditsotsi tše dingwe. Ke be ke ipona ke hwile, eupša ka phonyokga ka lešobana la nalete. Ka morago ga moo, ke ile ka thoma go nagana kudu ka bophelo bja ka le ka seo ke se nyakago bophelong, ka ipotša gore ke nyaka go lahla mekgwa yeo e mebe. Eupša ke be ke tla thoma kae? Ke be ke tla hwetša kae thušo?

Ba bantši ba leloko la gešo ba be ba se ba thaba. Ba be ba na le mathata a mantši. Eupša lapa la malome lona le be le thabile. E be e le batho ba go loka e bile ba phela ka melao ya Beibele. Ge e le gabotse, ke bona ba kilego ba nthuta gore leina la Modimo ke Jehofa. Ka moragonyana ga gore ke phonyokge mothuntšhano wola, ke ile ka rapela Jehofa, ka mmitša ka leina gomme ka mo kgopela gore a nthuše. Go ile gwa direga mohlolo! Letšatšing le le latelago, Hlatse ya Jehofa e ile ya tla mo ke dulago. Hlatse yeo ya Jehofa e ile ya thoma go nthuta Beibele.

Ka moragonyana ga moo, ke ile ka ba le bothata bjo bogolo. Gantši bagwera ba ka ba kgale ba be ba mfounela ba re ke tle ke hlwe le bona. Ke be ke gana, le ge go be go se bonolo. Ke be ke sa nyake go tlogela go ithuta Beibele, le gona ke leboga gore ga sa nka ka tlogela. Bophelo bja ka bo ile bja fetoga ka tsela e makatšago. Ga bjale ke thabile e le ka nnete.

Ke gopola ke rapela Modimo ke mmotša gore nkile ka ipotša gore ke nyaka go fetša mengwaga e lesome teronkong gore batho ba tle ba ntlhomphe. Eupša ga bjale ke ile ka mo kgopela gore a nthuše go mo šomela, ke fetše nako e ntši ke ruta batho Beibele. Ke ile ka mo kgopela gore ke dire seo ka mengwaga e ka bago e lesome e le gore ke kgone go thuša ba bangwe go swana le ge le nna ke thušitšwe. Modimo o arabile thapelo ya ka, ka gore ke na le mengwaga e 17 ke ruta batho Beibele ka mehla. E bile ke thabišwa ke gore le teronkong ga sa nka ka le bea.

Ka maswabi, bagwera ba ka ba bantši ba kgale ba ahloletšwe mengwaga e mentši teronkong. Ba bangwe ba hwile. Ke leboga lapa la malome leo e lego Dihlatse tša Jehofa. Lapa leo le be le sa swane le batho ba bangwe ka gore le be le phela ka Beibele. Ke ile ka hlompha Dihlatse tša Jehofa kudu go feta motho le ge e le ofe sehlopheng sa ditsotsi seo nkilego ka se šomela. Go feta tšohle, ke leboga Modimo ge a mpontšhitše tsela yeo e di phalago ka moka ya go phela.

 ANDRES: Ke goletše motseng wa go diila. Batho ba bantši ba be ba kgoga di-drugs, ba swara batho poo, ba bolaya e bile ba bangwe ba gweba ka mmele. Tate e be le setagwa e bile e le lekgoba la sehlare-tagi seo se bitšwago cocaine. Yena le mma ba be ba dula ba elwa, ka mantšu le ka difeisi.

Ke thomile go nwa bjala le go kgoga di-drugs ke sa le yo monyenyane. Ke be ke phela seterateng, ke utswa ke moka ke rekiša dilo tšeo ke di utswitšego. Ge ke dutše ke gola, tate o ile a leka go gwerana le nna, eupša o ile a dira bjalo ka tsela e fošagetšego. O ile a nthuta botsotsi bja go tliša nageng ya gešo di-drugs le dilo tše dingwe tšeo di sego molaong le go di rekiša. Ke be ke dira tšhelete e ntši kapejana. Ka letšatši le lengwe, maphodisa a ile a tla gagešo. A ile a ntshwara a nkiša teronkong. Ke ile ka ahlolelwa mengwaga e mehlano teronkong ka ge ke lekile go bolaya motho.

Mesong e mengwe, bagolegwa ba ile ba tsebišwa gore Dihlatse tša Jehofa di ba memela go tlo ba ruta ka Modimo. Ke ile ka ya. Ditaba tšeo ke ilego ka di kwa moo teronkong di be di kwagala, ka gona ke ile ka thoma go ithuta Beibele le Dihlatse tša Jehofa gona moo. Dihlatse tšeo di be di sa re fihlele selo. Di ile tša re ruta gore Modimo o nyaka re phela bjang.

Go se go ye kae, ke ile ka lemoga gore ke be nka se kgone go fetoša bophelo bja ka ka bo nna, kudukudu ge bagolegwa bao ba bego ba sa rate seo ke bego ke se dira ba be ba thoma go ntšhošetša. Ke ile ka rapela Jehofa Modimo gore a mphe matla le bohlale. O ile a nthuša. Sa go makatša ke gore go e na le gore ke boife, ke ile ka ba le sebete sa go bolela le bagolegwa ba bangwe ka Beibele.

Ge nako ya gore ke lokollwe teronkong e fihla, ke be ke tšhogile kudu moo ke bego ke sa nyake le go tšwa teronkong. Ge ke be ke lokollwa, bagolegwa ba bantši ba ile ba ntakaletša tše dibotse. E bile bangwe ba be ba bolela mantšu a mabotse ba re: “Sepela gabotse moruti wa  rena.”

Ga ke tsebe gore nkabe ke le kae ge nkabe ke ile ka gana ge Dihlatse tša Jehofa di be di kgopela go re ruta ka Modimo. Ke leboga kudu gore Modimo o a nthata le gore ga se a ka a ntlhapa diatla. a