Stress ke tsela yeo mmele wa gago o arabelago ka yona ge o lebeletšane le bothata. Bjoko bja gago bo romela dihomoune tše dintši dikarolong ka moka tša mmele wa gago. Ge seo se direga, pelo ya gago e thoma go pompa ka lebelo, madi a gago a sepela ka lebelo le le sa tlwaelegago, maswafo a gago a oketšega goba a fokotšega gomme mešifa ya gago ya ngangega. Dilo tše di direga mmeleng wa gago le pele ga ge o ka lemoga. Ge selo seo se bego se go bakela stress se fetile, mmele wa gago o boela sekeng.

Stress ke tsela ya tlhago ya mmele ya go itokišeletša go lebeletšana le bothata goba boemo bjo kotsi. Tsela yeo mmele wa gago o arabelago ka yona e thoma bjokong. Stress seo se holago se go thuša go dira dilo kapejana. Stress se se lekanetšego se ka go thuša gore o kgone go dira dilo tše itšego gabotse. E ka ba dilo tša go swana le ge o ngwala tlhahlobo, o hlahlobelwa mošomo goba ge o raloka papadi e itšego.

Eupša stress seo se sa felego se ka go gobatša. Ge o dula o swerwe ke stress, o ka thoma go babja, wa nyama goba wa galefagalefa le go ikwa o se sa nagana gabotse goba wa lebala dilo. Mekgwa ya gago e ka fetoga, go akaretša le tsela yeo o swarago batho ka yona. Stress seo se tšeago nako e telele se ka dira gore motho a feleletše a diriša dipilisi gampe, a kgoga di-drugs le go dira dilo tše dingwe tšeo di ka mo gobatšago e le ge a leka go itebatša mašuana. Se ka dira le gore motho a swarwe ke depression, a lape kudu goba a nagane go ipolaya.

Le ge stress se sa sware batho go swana, se ka baka malwetši a mantši. Le gona, se ka dira gore dikarolo tše dintši tša mmele di se sa šoma gabotse.