Mathata a ka re kgoma ka ditsela tša go se swane.

• Ge batho ba welwa ke mathata, ba swarwa ke stress, gomme ba ka feleletša ba babja ge se ka ba swara ka nako e telele.

• Ka baka la mathata goba dikotsi tšeo di welago batho, dipetlele di ka palelwa ke go ba thuša ka moka ka ge go se na dihlare le di dirišwa tše di lekanego.

• Mathata a kgoma maemo a batho a tša ditšhelete, ke moka seo se dira gore go be thata gore ba hwetše dilo tšeo ba di hlokago tša go swana le dijo le dihlare.

• Malwetši le stress di ka dira gore o se sa dira diphetho tše dibotse, ke moka seo sa dira gore o se sa itlhokomela. Ka baka la seo, o ka babja le go feta.

• Ge o ka no dula ka bolwetši, bo ka mpefala le go feta. Seo se ka bea bophelo bja gago kotsing.

• Ge o itlhokomela, o tlo kgona go dira diphetho tše dibotse ge o le ka gare ga mathata.

• Le ge o se na tšhelete e ntši, go na le dilo tšeo o ka di dirago gore o kgone go itlhokomela.

Motho yo bohlale, o lemoga dikotsi di sa tla, ke moka a dira se sengwe gore a kgone go itšhireletša. Seo se ka akaretša le go itlhokomela. O ka phema go tsenwa ke malwetši gantši ka go dula o hlwekile le go hlwekiša legae la gago. Gopola gore thibela bolwetši e phala kalafo.

Andreas a o re: “Ka ge nna le mosadi wa ka re dula re hlwekile e bile re hlwekiša legae la rena, ga re ye ngakeng gantši. Ka baka la seo, re seketša tšhelete ya lapa.”