Na Lefase la Rena le tla Loka?
Meetse a Hlwekilego
GO KA SE KGONEGE gore re phele ntle le meetse mo lefaseng, kudukudu ao a hlwekilego. Ge e le gabotse meetse , a bapala karolo e kgolo kudu go diphedi ka moka. Matsha,dinoka, mafelo ao a nago le monola, le meetse ao a lego ka tlase ga mmu a dira gore batho le diphoofolo ba kgone go ba le meetse a go nwa le go nošetša
Ke ka Baka la Eng re ka no se be le Meetse a Lekanego ao a Hlwekilego?
Karolo e kgolo ya lefase la rena e tletše ka meetse. Lega go le bjalo go ya ka World Meteorological Organization, ‘meetse ao a ka šomišwago le a go hlweka ke a manyenyane kudu’. Le ge meetse a a manyenyane a lekanetše diphedi ka moka tšeo di lego lefaseng, a šilafatšwa ka bontšhi goba ga a sa hwetšagala gabonolo ka baka la gore a hlokega kudu e bile maemo a leratadima a fetofetogago. Ditsebi di akanya gore mo e ka bago mengwaga e 30 go tloga ga bjale batho ba e ka bago ba 5 bilione ba tlo hloka meetse a lekanego ao a hlwekilego.
Lefase la Rena le Bopilwe ka Tsela Yeo e Dirago Gore le Dule le le Gona
Lefase le bopilwe ka tsela yeo e dirago gore go dule go na le meetse ao a lekanego. Mmu, diphedi tša ka meetseng le letšatši di šoma mmogo go dira gore meetse a hlweke. Bona bohlatse bjo bo lego gona bjo bo bontšhago gore lefase la rena le tlo dula le le gona.
-
Mmu o thuša go tloša dilo tše dintšhi tšeo di šilafatšago meetse. Mafelong ao a nago le monola, dibjalo tše dingwe di kgona go tloša nitrogen, phosphorus, le dikhemikhale tšeo di dirišwago go bolaya dikhunkhwane.
-
Borasaense ba ithutile ditsela tšeo ka tšona tlhago e dirago gore meetse a dule a hlwekile. Ge meetse a dutše a kitima ka lebelo a dira gore dikhemikhale tše kotsi di se sa ba bogale, ke moka paketheria ya di bolaya ka mo go feletšego.
-
Diphedi tša ka meetseng tšeo di bitšwago di clams le di mussels, di kgona go ntšha dikhemikhale tše kotsi ka meetseng ka matšatši a se go kae fela,—e bile go bonala di kgona go dira seo go phala dilo tšeo di dirišwago go hlwekiša meetse.
-
Lefase la rena le boloka meetse le diriša modikologo wa meetse Modikologo woo le ditsela tše dingwe tša tlhago di dira gore meetse a dule a le gona lefaufaung.
Seo Batho ba Lekago go se Dira
Ge re lokiša dikoloi tša rena gore di se dutle oli le go lahlela dikhemikhale tše kotsi mo go swanetšego, re dira gore meetse a dule a hlwekile
Ditsebi di re botša gore re leke go dira sohle seo re ka se kgonago gore re se ke ra senya meetse. E le gore meetse a se ke a šilafala, ba re kgothaletša gore re lokiše dikoloi tša rena gore di se dutle oli, re se lahlele dihlare tšeo re sa di šomišago ka ntlwaneng ya boithomelo ya go diriša meetse goba ra tšhollela dikhemikhale tše kotsi ka gare ga kelelatšhila.
Borasaense ba tlile ka ditsela tšeo di kgahlišago tša go ntšha letswai leo le lego ka meetseng ao a tšwago ka lewatleng. Morero wa bona ke go oketša meetse ao a hlwekilego.
Eupša go sa na le mošomo o montšhi wo o nyakago go dirwa. Go ntšha letswai ka meetseng a tšwago lewatleng ga se tharollo e botse ka gobane go a tura e bile go diriša mohlagase o montšhi. Pego ya 2021 ya Ditšhaba tše di Kopanego ge e bolela ka go šireletša meetse ao a hlwekilego e re : ‘Lefaseng ka moka meetse ao a hlwekilego a swanetše go šireletšwa kudu go feta ka tsela yeo a šireletšwago ka yona gona bjale.’
Ekwa Gore Beibele e re Tshepiša Eng
“Modimo . . . o ga marothi a meetse, a hlotlega e le pula gomme ya ba kgodi ya gagwe, e le gore maru a rothe, a rothela batho e le a mantši.”—Jobo 36:26-28.
Modimo o dirile medikologo ya tlhago gore e šireletše meetse ao a lego lefaseng.—Mmoledi 1:7.
Ka ge Mmopi a bopile lefase ka tsela yeo le kgonago go hlwekiša meetse, gona go a kwagala go dumela gore o ikemišeditše e bile o na le matla a go lokiša tshenyo yeo e dirilwego ke batho. Bona Sehlogo seo se rego “Modimo o re Holofetša Gore Lefase la Rena le tla Dula le le Gona,” go letlakala 15.
