Ke ka Baka la Eng o Swanetše go Hlompha Batho ba Bangwe?

BAPALA

KE KA BAKA LA ENG GO LE BOHLOKWA GO HLOMPHA BA BANGWE?

Go hlompha ba bangwe go dira gore go dule go na le khutšo le gore re se ke ra feleletša re lwele le batho ba bangwe.

Seema se sengwe sa ka Beibeleng se re: “Karabo e boleta e fokotša kgalefo, eupša lentšu la go hlaba le baka kgalefo.” (Diema 15:1) Go bolela le go dira dilo tšeo di bontšhago gore ga re hlomphe ba bangwe, go dira gore go be le dikgohlano e bile gantšhi ga go be le mafelelo a mabotse.
Jesu o boletše gore: “Molomo o bolela go tšwa go se se tletšego pelong.” (Mateo 12:34) Ge e ba re bolela gampe ka batho ba morafo o mongwe, ba tšwago nageng e nngwe goba bao ba lego maemong ao a sa swanego le a rena seo se bontšha gore ga re ba hlomphe. Le gona ge e ba re na le bothata bjoo bja go bolela batho gampe re swanetše go bo lokiša.

Nyakišišong yeo e sa tšwago go dirwa, go botšišitšwe batho ba 32,000 ka taba ya tlhompho. Bontšhi bja batho bao, ba boletše gore batho ba bantšhi lehono ga ba sa na tlhompho e bile ga ba swarane gabotse.

SEO O KA SE DIRAGO

Hlompha batho ka moka, e ka ba bao o tsenago le bona sekolo goba bašomigotee le wena le ge e ba o sa dumelelane le bona ka dilo tše dingwe. Leka go bona dilo tšeo o dumelelanago le ba bangwe ka tšona. Seo se tlo go thuša gore o se ke wa ngangišana le bona goba wa ba ahlola.

“Tlogelang go ahlola gore le se ahlolwe.” —Mateo 7:1.

Swara ba bangwe ka tsela yeo o ka ratago ba go swara ka yona. Ge e ba o swara batho ba bangwe gabotse e bile o ba bontšha botho, seo se ka dira gore le bona ba go sware bjalo.

“Ka mo le nyakago batho ba le dira ka gona, le lena le ba direng ka wona mokgwa woo.”—Luka 6:31.

O se ke wa boloka sekgopi. O se ke wa nagana gore motho yo mongwe o go kwešitše bohloko ka boomo.

“Motho yo a nago le temogo ga a kwate ka pela, le gona, ge e ba a sa latišiše molato o tla hlomphiwa.”—Diema 19:11.

SEO DIHLATSE TŠA JEHOFA DI SE DIRAGO

Dihlatse tša Jehofa di bontšha batho ba mo di dulago gona le bašomigotee le tšona tlhompho.

Re ruta batho Beibele mahala eupša ga re ba gapeletše go dumela ditumelo tša rena goba go ba gapeletša go bona dilo ka tsela ya rena. Go e na le moo, ge re botša batho molaetša wa rena re leka go diriša keletšo ya Beibele yeo e rego re dire bjalo “ka moya o boleta le ka tlhompho e tseneletšego.”—1 Petro 3:15; 2 Timotheo 2:24.

Ga re kgetholle batho re amogela batho ka moka bao ba nyakago go ithuta Beibele dibokeng tša rena. Re leka go “hlompha batho bohle” le ge re sa dumelelana le dilo tšeo ba di naganago goba ba di dirago.—1 Petro 2:17, Beibele ya Taba ye Botse.

Re hlompha melao ya mmušo ya moo re dulago gona. (Baroma 13:1) Re latela melao le go patela lekgetho. Le ge re sa tšee karolo ditabeng tša dipolotiki, re hlompha batho bao ba dirago bjalo.

PHAFOGA!