Ke ka Baka la Eng re Swanetše go Hlompha ba ka Lapeng?

BAPALA

KE KA BAKA LA ENG GO LE BOHLOKWA GO BONTŠHANA TLHOMPHO KA LAPENG?

Ge ditho tša lapa di bontšhana tlhompho ka lapeng seo se dira gore go be le khutšo.

Puku ya The Seven Principles for Making Marriage Work e re ‘ge banyalani ba hlomphana seo se dira gore ba ratane le go feta, le go bontšhana lerato leo ka dilo tše dinyenyane.’
Dinyakišišo di bontšha gore ge e ba bana ba ithuta go hlompha batho ba bangwe seo se dira gore le bona ba itlhomphe, ba be le segwera se sebotse le batswadi ba bona e bile ba be le khutšo ya monagano.

SEO O KA SE DIRAGO

Dirang lenaneo leo le tlago go le latela bjalo ka lapa. Sa pele, kgonthišetša gore lapa ka moka le a kwešiša gore go bontšha “tlhompho” go bolela eng. Sa bobedi, ngwalang fase dilo tšeo di letetšwego go yo mongwe le yo mongwe wa lena le dilo tšeo le sa swanelago go di dira. Sa boraro, boledišanang ka dintlha tšeo le di ngwadilego lenaneong la lena gore yo mongwe le yo mongwe a tsebe gore o swanetše go dira’ng gore a bontšhe tlhompho.

“Maano a a pala ge batho ba sa rerišane, eupša ge go na le baeletši ba bantšhi dilo di tla sepela gabotse.”—Diema 15:22.

Eba mohlala o mobotse. Na o phela o bolela ka mafokodi a ba geno, o nyatša dikgopolo tša bona, o sa ba theetše goba o ba tsena ganong ge ba bolela? Gopola gore ke wena o swanetšego go thoma pele go bontšha ba bangwe tlhompho.

Leka go dira se: Bontšha molekane wa gago le bana ba gago tlhompho le ge ba dira dilo tšeo di dirago gore go be thata go ba hlompha.

“Go bontšhaneng kgodišo, etelelang pele.” —Baroma 12:10.

Bontšha ba bangwe tlhompho le ge o sa dumelelane le dikgopolo tša bona. Ge o bolela ka tsela yeo o ikwago ka yona, leka go se diriše mantšu a go swana le “o phela o” goba “go no swana, ga o ke o.” Mantšu a mohuta wo a ka dira gore motho yo mongwe a ikwe e ka o lwa le yena e bile a ka dira le gore go thulana ka dikgopolo go feleletše ka ntwa e kgolo.

“Karabo e boleta e fokotša kgalefo, eupša lentšu la go hlaba le baka kgalefo.”—Diema 15:1.

SEO DIHLATSE TŠA JEHOFA DI SE DIRAGO

Dihlatse tša Jehofa di kgothaletša ditho tša malapa gore di swarane ka tlhompho, di bolela kudu ka taba ye ka gare ga dimakasine le diporoutšha tšeo di di gatišago gotee le dibidio tšeo di hwetšagalago mahala.

BANYALANI ba ka thušwa ke dihlogwana tšeo di lego ka tlase ga Thušo Bakeng sa Lapa gore ba . . .

theetšane ka kelohloko
se ke ba homolelana
se ngangišane

(Nyaka “Thušo Bakeng sa Lapa” go jw.org/nso)

BATSWADI ba ka thušwa ke dihlogwana tšeo di lego ka tlase ga Thušo Bakeng sa Lapa go tlwaetša bana ba bona gore ba . . .

be le tlhompho
thuše ka mešongwana ya ka gae
ithute go “kgopela” le go “leboga”

(Nyaka sehlogo seo se rego “Godiša Bana” le seo se rego “Godiša Baswa” go jw.org/nso)

Bona letlakala la lemetletšo leo le nago le sehlogo seo se rego, “Dipotšišo tša Batswadi,” ka gare ga puku ya Baswa ba Botšiša—Dikabo tšeo di Šomago, Bolumo 1. (Nyaka “Dipotšišo tša Batswadi” go jw.org/nso)

BASWA ba ka thušwa ke karolwana yeo e nago le sehlogo seo se re go Baswa go jw.org/nso yeo e nago le dihlogwana, dibidio, le mešomo ya go ithuta Beibele gore ba kgone go phedišana gabotse le . . .

bana babo bona gotee le batswadi ba bona
go boledišana ka tlhompho le batswadi ba bona ka melao yeo ba ba beetšego yona
gore batswadi ba bona ba kgone go ba tshepa

(Nyaka sehlogo seo se rego “Baswa” go jw.org/nso)

Ga go na motho yo a tlago go go patediša go tsena wepesaeteng ya jw.org/nso. Ge o diriša wepesaete ye ga o tlo ntšha tšhelete kgwedi le kgwedi e bile ga go hlokagale gore o fane ka boitsebišo bja gago.

PHAFOGA!