Ke ka Baka la Eng re Swanetše go Hlompha Bophelo?
KE KA BAKA LA ENG GO LE BOHLOKWA GO HLOMPHA BOPHELO?
Ge o dira dilo tšeo di ka go gobatšago mmeleng goba tša gobatša batho ba bangwe, seo se bontšha gore ga o hlomphe bophelo bja gago le maphelo a batho ba bangwe.
-
Go kgoga motšoko go dira gore motho a be le kankere e bile go dira gore go be thata gore mašole a mmele a lwantšhane le yona. Batho ba bantšhi ba bolaya ke kankere ya mafahla ka baka la go tsuba goba go phela le batho bao ba tsubago.
-
Kua Amerika ngwaga o mongwe le o mongwe batho ba ba le kgateletšego maikwelong ka baka la go thuntšhwa ga batho ba bantši ka nako e tee. Pego ya Yunibesithi ya Stanford e re: “Nyakišišo e nngwe e bontšha gore le batho bao ba ilego ba kgona go tšhaba ntle le go gobala mmeleng ge go be go thuntšhwa batho dikolong, ba šala ba gobetše maikwelong ka mengwaga e mentši.”
-
Batho bao ba otlelago ba nwele bjala goba ba dirišitše diokobatši ba dira gore go be le dikotsi mo tseleng le moo go swanetšego go sepela batho feela. Ge batho ba dira dilo tšeo di sa bontšhego gore ba hlompha batho ba bangwe seo se dira gore batho bao ba se nago molato ba gobale.
SEO O KA SE DIRAGO
Hlokomela mmele wa gago. O sa dutše o na le nako ya go tlogela mekgwa yeo e ka gobatšago mmele wa gago yeo e swanago le go tsuba, go nwa kudu le go diriša dihlaretagi gampe. Go dira dilo tšeo go senya bophelo bja gago e bile go bontšha gore ga o hlomphe maphelo a batho ba bangwe go akaretša le ba geno.
Kgonthišetša gore wena le batho ba bangwe le dula le bolokegile. E le gore batho ba bangwe ba se ke ba gobala, kgonthišetša gore legae la gago le dula le le maemong a mabotse. Dula o ntšhitše mahlo dinameng ge o otlela le go kgonthišetša gore koloi ya gago e dula e le maemong a mabotse. O se ke wa dumelela batho ba go gapeletša go dira dilo tšeo di ka go gobatšago goba tša go bolaya.
Bontšha ba bangwe botho. Go bontšha gore re hlompha bophelo, re tlo swara batho bao ba tšwago merafong e mengwe goba dinageng tše dingwe gabotse go sa šetšwe gore ke badiidi goba bahumi le gore ba rutegile goba ga se ba rutega. Ge e le gabotse, kgethollo le lehloyo ke tšona tšeo di dirago gore mo lefaseng go be le dintwa le bošoro.
SEO DIHLATSE TŠA JEHOFA DI SE DIRAGO
Dihlatse tša Jehofa di ruta batho gore ba itshware gabotse. Batho ba bantšhi bao ba ilego ba ithuta le Dihlatse tša Jehofa ba ile ba kgona go tlogela botagwa, go šomiša dihlaretagi gampe le mekgwa e mengwe e mebe.
Medirong ya rena ya go aga re kgonthišetša gore melao ya tšhireletšo e a latelwa. Baithaopi bao ba agago diholo tša rena tša mmušo le meago e mengwe ya rena, ba tlwaetšwa go latela melao yeo e tlago go dira gore ba dule ba šireletšegile. Nako le nako go ba le batho bao ba hlahlobago meago ya rena go kgonthišetša gore e sa le maemong a mabotse.
Re thuša batho bao ba wetšwego ke dikotsi tša tlhago. Ka 2022 re ile ra thuša dikotsing tša tlhago tše 200 tšeo di bilego gona lefaseng ka moka e bile re dirišitše tšhelete e ka lekanago dimilione tše 224.
Ge bolwetši ba Ebola bo thoma go hlasela dinaga tša ka bodikela bja Afrika ka (2014) le kua Congo ka (2018), re ile ra ruta batho gore ba ka itšhireletša bjang gore bolwetši bjo bo kotsi bo se ke bja ba fetela. Re ile ra romela bana babo rena go boledišana le batho ka taba ya gore “Go kwa go Phološa Maphelo.” Mafelong a rena a borapedi, re ile ra dira gore go be le moo batho ba hlapago matsogo gona le go bontšha batho bohlokwa bja go hlapa matsogo le go latela melao ya tšhireletšo.
Kua Sierra Leone, seteišene se sengwe sa seyalemoya se ile sa leboga ge Dihlatse di ile tša thuša batho ka moka go akaretša le bao e se go Dihlatse tša Jehofa gore ba se ke ba tsenwa ke Ebola.
Holong ya Mmušo moo batho ba bego ba hlapela diatla gona ka 2014 nakong ya bolwetši bja Ebola kua Liberia
a Batho bao ba bego ba dula ka bohlabela bja lewatle la mediterranean, ba be ba bontšha gore ba nyaka gore ba malapa a bona le batho ba bangwe ba dule ba bolokegile ka go latela molao woo.
