BATHO ba bantši ga ba tshepe gore maleatlana le boloi di gona. Ba nagana gore dilo tšeo ke maaka goba gore e fo ba dilo tšeo bahlami ba dimubi ba inaganelago tšona. Eupša Beibele e bolela se se fapanego. E re botša gore re se ke ra dirišana le meoya e mebe. Ka mohlala, Doiteronomio 18:10-13 e re: “Go wena go se ke gwa hwetšwa . . . senoge, ramalea goba motho yo a dirišago dipheko goba moloi, goba yo a fošago ba bangwe ka meleko goba yo a dirišanago le meoya e mebe goba sedupe goba motho le ge e le ofe yo a botšišago dilo bahung.” Ke ka baka la eng Beibele e re re pheme dilo tše? Lengwalo le le tšwela pele ka gore: “Ka gobane motho yo mongwe le yo mongwe yo a dirago dilo tše ke selo se se šišimišago go Jehofa . . . O ipontšhe o se na bosodi go Jehofa Modimo wa gago.”

Ke ka baka la eng Beibele e re ganetša go dirišana le meoya e mebe goba go kgahlwa ke dilo tše di nago le boloi?

Beibele e re botša gore kgalekgale pele Modimo a ka bopa lefase, o ile a bopa dibopiwa tše dimilionemilione tša moya, goba barongwa. (Jobo 38:4, 7; Kutollo 5:11) Modimo o ile a nea morongwa yo mongwe le yo mongwe tokelo ya go itirela diphetho, e lego bokgoni bja go kgetha magareng ga go dira se se nepagetšego goba se se fošagetšego. Ba bangwe ba barongwa bao ba ile ba kgetha go se kwe Modimo, gomme ba tlogela mešomo ya bona ya legodimong gore ba tle ba bake mathata mo lefaseng. Ka baka la seo, lefase le ile la ‘tlala bošoro.’—Genesi 6:2-5, 11; Juda 6.

Beibele e re barongwa bao ba babe ba kgona go diriša batho dilo tše mpe, gomme ba fora batho ba dimilionemilione. (Kutollo 12:9) Le gona ka  ge batho ba rata go tseba tša ka moso, barongwa bao ba diriša sebaka seo go ba fora.—1 Samuele 28:5, 7; 1 Timotheo 4:1.

Ke therešo gore mekgwa yeo ya boloi e ka bonala e thuša batho. (2 Bakorinthe 11:14) Lega go le bjalo, therešo ke gore barongwa ba babe ba foufatša batho gore ba se tsebe therešo ka Modimo.—2 Bakorinthe 4:4.

Ka gona go ya ka Beibele, go dirišana le meoya e mebe go kotsi. Beibele e re botša ka batho ba bangwe bao ba bego ba nyaka go ba barutiwa ba Jesu eupša ba dirišana le meoya e mebe e bile ba dira dilo tša boloi. Ka morago ga gore ba ithute gore dilo tšeo di fošagetše, ba ile “ba kgobokanya dipuku tša bona tša boloi gomme ba di fiša,” gaešita le ge di be di ba turetše.—Ditiro 19:19, Byington.

Ka mo go swanago lehono, batho ba bantši ba feditše le pelo gore ba ka se sa bogela goba go dira selo le ge e le sefe seo se nago le botemona goba boloi. Ka mohlala, ge Maria * a be a na le mengwaga e 12, o be a bonala eka o kgona go bona dilo di sa tla, go akaretša le dikotsi. O be a šomiša dikarata tšeo di nago le diswantšho go phekola bao a tsenago le bona sekolo. Ge dilo tšeo a bego a di porofeta di direga, o ile a thoma go rata go dirišana le meoya e mebe.

Maria o be a ipotša gore Modimo ke yena a mo neilego bokgoni bjoo bja go thuša batho. Lega go le bjalo, Maria o dumela ka gore: “Eupša go na le selo seo se bego se mmakatša. Ge ke be ke šomiša dikarata tšeo go thuša batho ba bangwe, ba be ba thušega. Eupša ge nna ke be ke di šomiša gore ke tsebe ka bokamoso bja ka, ke be ke sa thušege.”

 Ge Maria a be a sa gakanegile, o ile a rapela Modimo gore a mo thuše gomme ka morago Dihlatse tša Jehofa tša tla gagabo. Dihlatse tša Jehofa di ile tša mo ruta Beibele. Maria o ile a ithuta go tšwa ka Beibeleng gore Modimo ga se yena a bego a mo fa bokgoni bja go bona dilo tšeo di sa tlago. Le gona o ile a ithuta gore bao ba nyakago go thabiša Modimo ba swanetše go lahla dilo ka moka tšeo di sepedišanago le boloi. (1 Bakorinthe 10:21) Maria o ile a dira eng ka morago ga gore a ithute Beibele le Dihlatse tša Jehofa? O ile a lahla dilo ka moka tšeo a bego a di šomiša tšeo di sepedišanago le meoya e mebe. Gona bjale le yena o thuša batho ba bangwe go tseba seo a ithutilego sona ka Beibeleng.

Ge Michael e be e sa le mofsa, o be a rata go bala ditori tša go bolela ka maleatlana le boloi. O re: “Ke be ke kgahlwa ke bana ba go lekana le nna ba ditoring tšeo, bao ba bego ba kgona go dira mehlolo.” Ganyenyane-ganyenyane, Michael o ile a tlwaela go bala dipuku tše di bolelago ka maleatlana (magic) le mekgwa ya Bosathane. Michael o re: “Go rata go tseba go ile gwa ntira gore ke nyake go bala dipuku tša go bolela ka dilo tšeo le go bogela dimubi tša gona.”

Eupša ka morago ga gore Michael a ithute Beibele, o ile a thoma go ipotšiša dipotšišo ka dilo tšeo a bego a di bala. O re: “Ke ile ka ngwala fase dilo ka moka tšeo di sepedišanago le boloi gomme ka di lahla ka moka ga tšona. Ke ile ka ithuta taba e nngwe ya bohlokwa lengwalong la 1 Bakorinthe 10:31. Lengwalo leo le re: ‘Dirang dilo tšohle gore le tagafatše Modimo.’ Ga bjale ke ipotšiša gore: ‘Na selo seo ke se balago se bolela ka dilo tšeo Modimo a di hloilego?’ Ge e ba go le bjalo, go ra gore ga se ka swanela go se bala.”

Taba ya gore Beibele ke lebone bophelong bja rena ke therešo. Ke yona feela e ka re thušago go bona dilo tšeo di sepedišanago le boloi. (Psalme 119:105) Eupša Beibele ga e re thuše tabeng yeo feela. E re botša gape ka lefase le le kgahlišago leo Modimo a re tshepišitšego lona. Lefaseng leo, go ka se sa ba le Sathane le meoya e mebe. Go tla ba le phetogo e kgolo kudu bathong. Ka mohlala, Psalme 37:10, 11 e re: “Go se gokae yo kgopo o tla be a se sa le gona; wena o tla lebelela lefelo la gagwe, gomme yena o tla be a se gona. Eupša ba boleta bona e tla ba beng ba lefase, ba tla thaba kudu ka baka la go ata ga khutšo.”