Motho wa go kgona go kgotlelela ke yo a kgonago go boela sekeng ka pela ka morago ga go diragalelwa ke selo seo se kwešago bohloko. Gore motho a be le kgotlelelo o swanetše go feta maemong a thata bophelong. Go swana le ge ngwana a ka se kgone go ithuta go sepela ntle le gore a fele a ewa, ka mo go swanago, go ka se kgonege gore dilo di no mo sepelela gabotse bophelong ntle le gore a fele a kopana le mathata.

Bana ba bangwe ba fela matla ge ba paletšwe ke go dira selo se itšego, ba wetšwe ke mathata goba ge batho ba bangwe ba ba bontšha diphošo tša bona. Ba bangwe ba lahlela toulo. Eupša ba swanetše go kwešiša gore:

• Dilo di ka se dule di re sepelela gabotse. —Jakobo 3:2.

• Ka moka re tlo fela re welwa ke mathata.—Mmoledi 9:11.

• Ge motho a phošollwa o kgona go kaonefatša.—Diema 9:9.

Ge ngwana a ithuta go kgotlelela o tla kgona go lebeletšana le mathata bophelong.

Ge ngwana wa gago a paletšwe ke go dira selo se itšego.

KELETŠO YA BEIBELE: “Moloki le ge a ka wa gašupa, o tla tsoga gape.”—Diema 24:16.

Thuša ngwana wa gago gore ge a lebeletšane le bothata, a tsebe ge e ba e le bjo bogolo goba e le bjo bonyenyane. Ka mohlala, o tla dira’ng ge e ba a ka feila molekwana sekolong? Na o tla ngala a re: “Ga ke kgone selo?”

Gore o rute ngwana wa gago go kgotlelela, mo thuše gore a tsebe dilo tšeo a ka di dirago gore a kaonefatše nakong e tlago. Seo se tla mo thuša gore a lokiše bothata go e na le go dula a nyamile.

Ge o dutše o mo thuša, o se ke wa mo rarollela mathata a gagwe. Go e na le moo, mo thuše gore a nagane gore a ka a rarolla bjang. O ka mmotšiša gore: “O ka dira’ng gore o kgone go kwešiša seo ba go rutago sona sekolong?”

Ge ngwana wa gago a welwa ke mathata.

KELETŠO YA BEIBELE: “[Ga le] tsebe gore bophelo bja lena bo tla ba bjang gosasa.”—Jakobo 4:14.

Ditlalemeso ga di tsebje. Motho yo a humilego, a ka no tsoga a se sa na selo, motho yo a phetšego  gabotse mmeleng, a ka no tsoga a babja. Beibele e re: “Yo a nago le lebelo ga a thope sefoka lebelong, ba matla ga ba fenye ntweng, . . . ka gobane nako le ditiragalo tšeo di sa letelwago di ba wela ka moka.”—Mmoledi 9:11

Ka ge o le motswadi, o dira sohle seo o ka se kgonago go šireletša ngwana wa gago gore a se wele mathateng. Eupša go no bolela nnete, o ka se kgone go šireletša ngwana wa gago dilong ka moka.

Ke nnete gore ngwana wa gago e ka ba e sa le yo monyenyane go ka ba le mathata a tša ditšhelete goba go lahlegelwa ke mošomo. Eupša go dutše go le bjalo, o ka mo thuša go kgotlelela mathata a mangwe, ka mohlala, go swana le ge segwera sa gagwe le motho yo a itšego se fedile goba ge yo mongwe wa lapa a hlokofetše. *

Ge ngwana wa gago a phošollwa.

KELETŠO YA BEIBELE: “Theetša keletšo gomme o amogele tayo, gore o tle o hlalefe ka moso.”—Diema 19:20.

Ge motho a phošolla ngwana wa gago, ga se gore o a mo tshwenya, eupša o nyaka go mo thuša gore e be motho yo mokaone.

Ge o thuša ngwana wa gago gore a amogele keletšo ge a phošollwa, seo se tla hola lena ka bobedi. Tate yo a bitšwago John o re: “Ge e ba bana ba sa phošollwe ge ba dirile diphošo, ba ka se tsoge ba ithutile selo. Ba tlo no dula ba dira diphošo, ke moka wena o tlo dula o kitima ka morago ga bona gore o di lokiše. Seo se tla hlafiša bophelo bja gago le bja ngwana wa gago.”

O ka thuša ngwana wa gago bjang gore a holege ge a phošollwa? Ge ngwana wa gago a phošollwa, e ka ba sekolong goba go gongwe, o se ke wa mo emelela. Go e na le moo, o ka mmotšiša gore:

• “O nagana gore ke ka baka la’ng motho yo a go phošollotše?”

• “O ka dirang gore o se ke wa bušeletša phošo yeo?”

• “O tlo dira’ng nakong e tlago ge motho yo mongwe a go phošolla?”

Dula o gopola gore ge ngwana wa gago a phošollwa, o tla holega gona bjale le ge a gotše.