Ge re bona batho ba go loka ba welwa ke mathata, re a nyama. Batho ba bangwe ba bolela gore go hola eng go ba yo a lokilego mola e le gore o tlo no welwa ke mathata.

Batho ba bangwe ba dumela gore batho ba hwa le go belegwa gantšintši. Ba re batho bao ba dirilego dilo tše dibotse, ge ba ehwa, ba tlo belegwa gape gomme ba phela bophelo bjo bobotse. Mola bao ba dirilego dilo tše mpe, le bona ba tlo belegwa gape eupša bona ba phelela go tlaišwa. Go ya ka tumelo ye, le ge motho yo a lokilego a ile a dira dilo tše mpe bophelong bja nakong e fetilego, o tla no tlaišetšwa dibe tšeo. Eupša . . .

• Gore’ng motho yo a ka no tlaišwa, ka gobane ge motho a belegwe gape, ga a gopole dilo tše a di dirilego nakong e fetilego?

• Ge e ba re tlo lwala, goba go welwa ke dikotsi ka baka la dilo tše mpe tše re di dirilego bophelong bja nakong e fetilego, gore’ng gona bjale re šoma ka thata gore re dule re phetše gabotse le go phema dikotsi tšeo?

  ITHUTE KA MO GO OKETŠEGILEGO

  Bona bidio yeo e rego, Ke ka Baka la Eng Modimo a Dumelela Gore Batho ba Welwe ke Mathata? go jw.org/nso.

Ge batho ba welwa ke mathata, ga se gore Modimo o a ba otla.

Eupša mathata a mantši ao a re welago, gantši a bakwa ke dikotsi. Mohlomongwe motho a ka ba a le lefelong le le fošagetšego ka nako e fošagetšego.

MMOLEDI 9:11 e re: “Yo a nago le lebelo ga a thope sefoka lebelong, ba matla ga ba fenye ntweng, ba bohlale le bona ga ba na dijo, bao ba kwešišago le bona ga ba na mahumo le  . .  bao ba nago le tsebo ga ba ratwe; ka gobane nako le ditiragalo tšeo di sa letelwago di ba wela ka moka.”

Sebe seo re belegwego le sona, le sona se dira gore re welwe ke mathata.

Gantši ge batho ba bolela ka sebe, ba bolela ka dilo tše mpe tšeo batho ba di dirago. Eupša sebe seo Beibele e bolelago ka sona ke seo batho ka moka ba belegwego le sona, e ka ba ba lokilego goba ba babe.

PSALME 51:5 e re: “Ke belegwe gabohloko ke na le molato, le gona mma o nkimile ke na le sebe.”

Sebe seo re belegwego le sona se dira gore batho ba tlaišege.

Sebe se, se dira gore go be thata gore re kwe melao ya Modimo. E bile se sentše tsela yeo re phedišanago le batho ka yona, se dira gore re lwale mmeleng le monaganong e bile se dira gore batho ba senye lefase. Ruri sebe se se dira gore batho ka moka ba tlaišege kudu.

BAROMA 7:21 e re: “Ge ke kganyoga go dira se se lokilego, se sebe se gona go nna.”

BAROMA 8:22 e re: “Tlholo yohle e tšwela pele e tsetsela gotee gomme e ekwa bohloko gotee go fihla bjale.”