Ge e ba re na le lebaka leo le ka re dirago gore re dumele gore mathata a rena a tlo fela, gona re tlo lebelela bophelo gabotse e bile ra se bee Modimo molato.

Batho ba bantši ba ka rata go fediša mathata ao a re welago, eupša ba ka se kgone go a fediša. Nagana ka dilo tše di latelago:

Le ge mekgwa ya go alafa malwetši e kaonafetše kudu . . .

• Bolwetši bja pelo bo sa dutše bo bolaya batho ba bantši kudu.

• Bolwetši bja kankere bo bolaya batho ba bantši ngwaga le ngwaga.

• Ka pukung ya Frontiers in Immunology Dr. David Bloom o ngwadile gore: “Le ge lehono go na le dihlare tše dintši tše difsa, dingaka di sa palelwa ke go fodiša malwetši a mantši. Le gona batho ba swarwa ke malwetši a mafsa e bile ba swarwa le ke malwetši ao e lego kgale a sa bonagale.”

Le ge dinaga tše dingwe di humile . . .

• Go sa na le bana ba bantši kudu bao ba hlokofalago ngwaga le ngwaga, kudukudu bao ba dulago dinageng tšeo di diilago.

• Go sa na le batho ba bantši bao ba se nago dintlwana tša maleba tša boithomelo.

• Le gona batho ba bantši kudu ga ba na meetse a hlwekilego a go nwa.

Le ge batho ba bantši ba tseba gore ba swanetše go swara bjang batho ba bangwe . . .

• Pego ya United Nations e re: “Dinageng tše dintši batho ba utswa batho gomme ba ba rekiša, eupša batho bao ga ba swarwe. Lebaka e ka ba gore maphodisa ga ba tsebe seo se diregago, goba ga ba kgone go swara batho bao ka gobane ga ba na dilo tšeo ba di hlokago gore ba ba sware.”

  ITHUTE KA MO GO OKETŠEGILEGO

  Bona bidio yeo e rego Mmušo wa Modimo ke Eng? go jw.org/nso.

Modimo o a re rata.

O a re bona ge re welwa ke mathata.

PSALME 22:24 e re: “[Modimo] ga se a nyatša goba a hlaswa mohlako wa mohlaki; ga se a mo utela sefahlego sa gagwe. Ge a llela thušo go yena, o ile a kwa.”

PETRO WA PELE 5:7 e re: “[Lahlelang] dipelaelo tša lena ka moka go [Modimo], gobane o a le hlokomela.”

Mathata a ka se be gona go ya go ile.

Beibele e re botša gore seo Modimo a re tshepišitšego sona se tla direga.

KUTOLLO 21:3, 4 e re: “Modimo . . . o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”

Modimo o tlo fediša dilo ka moka tšeo di re bakelago mathata.

O tlo diriša Mmušo wa gagwe go fediša mathata ka moka.

DANIELE 2:44 e re: “Modimo wa legodimo o tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. . . . Wona o tla ema go iša mehleng ya neng le neng.”