SEO BATHO BA BANGWE BA SE BOLELAGO

Baisiraele ba be ba rapela “modingwana wa setšhaba sa bona wa ntwa” yo a nyoretšwego madi.

SEO BEIBELE E SE BOLELAGO

Ditšhaba tšeo Baisiraele ba bego ba di fenya di be di lemaletše bošoro le ditiro tše kgopo, tšeo di akaretšago go robala le diphoofolo, go robala le wa leloko le go dira dihlabelo ka bana. Ka morago ga gore Modimo a ba fe nako e telele kudu gore ba fetoše mekgwa ya bona, Modimo o ile a re: “Ka gobane ditšhaba tšeo ke di rakago pele ga lena di itšhilafaditše ka dilo tšeo ka moka.”—Lefitiko 18:21-25; Jeremia 7:31.

“Jehofa Modimo wa gago o raka ditšhaba tše pele ga gago ka baka la bokgopo bja tšona.”—Doiteronomio 9:5.

O KA BA O LEMOGILE SE

Dintweng tše dintši, baetapele ba bodumedi ba bolela gore Modimo o thekga sehlopha seo ba lego ka go sona. Puku ya The Causes of War e re: “Bodumedi bo be bo dutše bo tšea karolo dintweng ka moka tše di bilego gona.”

SEO BEIBELE E SE BOLELAGO

Bakriste ga se ba swanela go lwa le manaba a bona. Moapostola Paulo o ngwaletše Bakriste gotee le yena gore: “Ge e ba go kgonega, go fihla moo go ithekgilego ka lena, ebang le khutšo le batho bohle. . . . Le se ke la itefeletša.”—Baroma 12:18, 19.

Go e na le gore Jesu a romele balatedi ba gagwe ntweng, o ile a re go bona: “Tšwelang pele le rata manaba a lena le go rapelela bao ba le tlaišago, e le gore le itlhatsele le le barwa ba Tatago lena yo a lego magodimong.” (Mateo 5:44, 45) Le ge e ba ditšhaba tšeo ba dulago gare ga tšona di eya ntweng, Bakriste ga se ba swanela go tšea lehlakore ka gobane ‘ga se karolo ya lefase.’ (Johane 15:19) Ge e ba Modimo a nyaka gore barapedi ba gagwe ditšhabeng ka moka ba rate manaba a bona le go dula e se karolo ya lefase, gona a ka thekga bjang sehlopha se sengwe dintweng tša mehleng yeno?

“Mmušo wa ka ga se karolo ya lefase le. Ge nkabe mmušo wa ka e be e le karolo ya lefase le, bahlanka ba ka ba ka be ba lwela gore ke se ke ka gafelwa Bajuda. Eupša ka mo go lego ka gona, mmušo wa ka ga o tšwe mono.”—Johane 18:36.

SEO BATHO BA BANGWE BA SE BOLELAGO

Ntwa e tla dula e le gona. Puku ya War and Power in the 21st Century e re: “Ntwa e tla dula e le gona. Go ka se tsoge go bile le khutšo ya sa ruri lefaseng ka moka.”

SEO BEIBELE E SE BOLELAGO

Dintwa di tlo fela ge go tla be go se sa na batho bao ba nyakago go lwa. Ka baka leo, Mmušo wa Modimo goba pušo ya kgonthe yeo e bušago e le legodimong, kgauswinyane e tla fediša dibetša ka moka mo lefaseng le go ruta batho go phela ka khutšo. Beibele e re kgonthišetša gore Modimo o tla “lokiša ditaba le ditšhaba tše matla tša kgole. Ba tla rula ditšhoša tša bona ba di dira megoma gomme marumo a bona ba a dira disekela. Setšhaba se ka se emišetše se sengwe tšhoša, e bile di ka se sa hlwa di ithuta ntwa.”—Mika 4:3.

Beibele e ruta gore ka tlase ga pušo ya Modimo go ka se sa ba le mebušo yeo e lwelago dilo tša go ikhola. E ruta le gore go ka se be le melao ya go hloka toka yeo e dirago gore batho ba rabele goba kgethollo yeo e dirago gore batho ba merafo e sa swanego ba arogane le go feta. Ka baka leo, ntwa e ka se sa ba gona. Modimo o holofetša gore: “Di ka se gobatše goba tša senya thabeng ka moka ya ka e kgethwa; ka gobane lefase le tla tlala tsebo ya Jehofa go etša ge meetse a khurumeditše lewatle.”—Jesaya 11:9.

“O fediša dintwa go fihla pheletšong ya lefase. O robaganya bora gomme a ripaganya lerumo; dikoloi tša ntwa o di tšhuma mollong.”—Psalme 46:9.