Ditho tše Difsa tša Sehlopha se Bušago

KA Mokibelo, October 2, 1999, Seboka sa Ngwaga le Ngwaga sa Watch Tower Bible and Tract Society of Pennsylvania se ile sa phethwa ka tsebišo yeo e bego e sa letelwa. Ba 10 594 bao ba bego ba le gona goba ba kgokagantšwe ka mogala ba ile ba thabela go kwa gore go okeleditšwe ditho tše nne tše difsa Sehlopheng se Bušago sa Dihlatse tša Jehofa. Ditho tše difsa, tšeo ka moka e lego Bakriste ba tloditšwego ke Samuel F. Herd; M. Stephen Lett; Guy H. Pierce; le David H. Splane.

• Samuel Herd o thomile go bula madibogo ka 1958, gomme go tloga ka 1965 go fihla ka 1997 o be a le modirong wa tikologo le wa selete. Ka morago ga moo, yena le mosadi wa gagwe, Gloria, ba ile ba ba karolo ya lapa la Bethele ya United States, moo Ngwanabo rena Herd a bego a dutše a šoma Lefapheng la Tirelo. O be a hlankela gape e le mothuši Komiting ya Tirelo.

• Stephen Lett o thomile go bula madibogo ka December 1966, gomme go tloga ka 1967 go fihla ka 1971, o ile a hlankela Bethele ya United States. Ka October 1971, o ile a nyala mosadi wa gagwe, Susan, gomme a tsena tirelong ya bobulamadibogo bjo bo kgethegilego. Go tloga ka 1979 go fihla ka 1998, o ile a hlankela e le molebeledi wa tikologo. Ga e sa le go tloga ka April 1998, yena le Susan ba be ba dutše e le karolo ya lapa la Bethele ya United States. Moo o ile a šoma Lefapheng la Tirelo e bile e le mothuši Komiting ya go Ruta.

• Guy Pierce o godišitše lapa ke moka ka morago yena le mosadi wa gagwe ba thoma go bula madibogo ka April 1982. O ile a hlankela e le molebeledi wa tikologo go tloga ka 1986 go fihla ka 1997, ge yena le mosadi wa gagwe, Penny, ba e-ba karolo ya lapa la Bethele ya United States. Ngwanabo rena Pierce o be a dutše a hlankela e le mothuši Komiting ya Sehlopha sa Bašomi.

• David Splane o thomile go bula madibogo ka September 1963. E le sealoga sa sehlopha sa bo-42 sa Gilead, o ile a hlankela e le moromiwa Senegal, Afrika gomme lebaka la nywaga e 19 a hlankela modirong wa tikologo Canada. Yena le mosadi wa gagwe, Linda, ba bile Bethele ya United States ga e sa le go tloga ka 1990, moo Ngwanabo rena Splane a šomilego lefapheng la Tirelo le la Bongwadi. Ga e sa le go tloga ka 1998, o be a dutše e le mothuši Komiting ya Bongwadi.

Go okeletša go ditho tše nne tše difsa, Sehlopha se Bušago ga bjale se akaretša C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle le D. Sydlik. Bohle re rapelela gore Jehofa a tšwele pele a šegofatša le go matlafatša Sehlopha se Bušago, seo gona bjale se katološitšwego, ge se dutše se tšwela pele go okamela mediro ya batho ba Modimo go dikologa lefase gotee le go hlankela dikgahlego tša bona tša moya.