“E Monyenyane” o Fetogile “ba Sekete”
“E Monyenyane” o Fetogile “ba Sekete”
“E monyenyane ó tlo tšwa ba sekete; ’me mmôtlana ó tlo tšwa ’thšaba se matla.”—JESAYA 60:22.
1, 2. (a) Ke ka baka la’ng lefsifsi le apareditše lefase lehono? (b) Seetša sa Jehofa se ile sa edišetša batho ba gagwe bjang ka mo go tšwelago pele?
“LEFSIFSI le khurumeditše lefase, boso bo thibile dithšabeng; xomme wene, s’etša se Xo hlabêlaxo ké Yêna Morêna; xo bônala letaxô la xaxwe xodimo xa xaxo.” (Jesaya 60:2) Mantšu a a hlalosa gabotse boemo bjo bo bilego gona lefaseng ga e sa le go tloga ka 1919. Bojakane bo ganne pontšho ya go ba gona ga Jesu Kriste e le kgoši, yena “seetša sa lefase.” (Johane 8:12; Mateo 24:3) Ka baka la go “tuka boxale ka kudu” ga Sathane, kgoši ya “balaola-mafase ba lefsifsi,” ngwaga-kgolo wa bo-20 e bile nako ya bošoro bjo bogolo-golo le e senyago kudu ya histori ya motho. (Kutollo 12:12; Ba-Efeso 6:12) Batho ba bantši kudu ba phela lefsifsing la moya.
2 Lega go le bjalo, seetša se hlabile lehono. Jehofa o ‘hlabile’ godimo ga bahlanka ba gagwe, mašaledi a tloditšwego, bao e lego baemedi ba lefaseng ba “mosadi” wa gagwe wa legodimong. (Jesaya 60:1) Kudu-kudu ga e sa le ba lokollwa bothopšeng bja Babele ka 1919, ba ba ile ba bonagatša letago la Modimo gomme ba ‘dirile gore seetša sa bona se bonegele batho.’ (Mateo 5:16) Go tloga ka 1919 go fihla ka 1931, seetša sa Mmušo se ile sa bonegela kudu ge ba ba tloša ditlemo tše di šaletšego tša monagano wa Babele. Ba ile ba oketšega ka dipalo tša masome a dikete ge Jehofa a phethagatša kholofetšo ya gagwe e rego: “Ke tlo le kxobêla ruri, lena ba xa-Jakobo, ka moka xa lena. Ke tlo bá ka phutha mašalêla a Isiraele ka moka, ka ba dira dinku tša lešaka, mohlape mo phulong ya wôna, mabotho-botho a batho.” (Mika 2:12) Ka 1931, letago la Jehofa godimo ga batho ba gagwe le ile la bonagala kudu ge ba be ba amogela leina Dihlatse tša Jehofa.—Jesaya 43:10, 12.
3. Go ile gwa bonagala bjang gore seetša sa Jehofa se be se tla edišetšwa ba bangwe ka ntle le batlotšwa?
3 Na Jehofa o be a tla taga feela godimo ga mašaledi a “mohlatswana o monyenyane”? (Luka 12:32) Aowa. Tokollo ya Morokami (wa Seisemane) ya September 1, 1931 e ile ya šupa sehlopha se sengwe. Tlhalosong e botse ya Hesekiele 9:1-11, e bontšhitše gore monna yo a swerego sebjana sa pilwana sa mongwadi yo go bolelwago ka yena ditemaneng tšeo o emela mašaledi a tloditšwego. Ke bomang bao ba swaiwago phatleng ke “monna” yoo? “Dinku tše dingwe,” bao ba nago le kholofelo ya go phela ka mo go sa felego lefaseng la paradeise. (Johane 10:16; Psalme 37:29) Ka 1935 sehlopha se sa “dinku tše dingwe” se ile sa hlaolwa e le “lešaba le lexolo la . . . ba dithšaba ka moka” leo le bonwego ke moapostola Johane ponong. (Kutollo 7:9-14) Go tloga ka 1935 go fihla gona bjale, go ile gwa lebišwa tlhokomelo e kgolo go kgoboketšweng ga lešaba le legolo.
4. “Dikxoši” le “ba-ntle” bao go bolelwago ka bona go Jesaya 60:3 ke bomang?
4 Modiro wo wa go kgoboketša go ukangwa ka wona boporofeteng bja Jesaya ge bo re: “Ba-ntlê ba tlo tla seetšeng sa xaxo, le dikxoši di tlo tlêla ’etša sa masa a xaxo.” (Jesaya 60:3) “Dikxoši” tšeo go bolelwago ka tšona mo ke bomang? Ke mašaledi a ba 144 000 bao, gotee le Jesu Kriste, e lego baja-bohwa ba Mmušo wa legodimong gomme ba eteletšego pele modirong wa go nea bohlatse. (Ba-Roma 8:17; Kutollo 12:17; 14:1) Lehono, dikete tše mmalwa tšeo di šetšego tša mašaledi a tloditšwego di fetwa kgole kudu ke “ba-ntlê,” bao ba nago le kholofelo ya lefaseng ba ba tlago go Jehofa gore a ba rute ba bile ba laletša ba bangwe gore ba dire ka mo go swanago.—Jesaya 2:3.
Bahlanka ba Jehofa ba Fišegago
5. (a) Ke ditherešo dife tšeo di bontšhago gore phišego ya batho ba Jehofa ga se ya hwelela? (b) Ke dinaga dife tše di bilego le dikoketšego tše kgethegilego ka 1999? (Bona tšhate go matlakala 17-20.)
5 Dihlatse tša Jehofa tša mehleng yeno di bontšhitše phišego e kgolo gakaakang go theoša le lekgolo la bo-20 la nywaga! Le gona go sa šetšwe dikgateletšo tše di oketšegago, phišego ya tšona ga se ya ka ya fokotšega ge ngwaga wa 2000 o dutše o batamela. Di be di sa dutše di tšeela godimo taelo ya Jesu e rego: “Le dirê dithšaba ka moka barutiwa.” (Mateo 28:19, 20) Palo ya bagoeledi ba mafolofolo ba ditaba tše di lokilego ngwageng wa mafelelo wa tirelo wa lekgolo la bo-20 la nywaga e fihleletše tlhora e mpsha ya 5 912 492. Ba dirišitše palo e kgolo-kgolo ya diiri tše 1 144 566 849 ba boledišana le ba bangwe ka Modimo le merero ya gagwe. Ba dirile maeto a go boela a 420 047 796 bathong bao ba thabelago gomme ba swara dithuto tše sa lefelelwego tša legae tša Beibele tše 4 433 884. A pego e kgahlišago gakaakang ya tirelo e mafolofolo!
6. Go ile gwa dirwa thulaganyo efe e mpsha bakeng sa babulamadibogo, gomme go bile le karabelo efe?
6 Ngwagola ka January, Sehlopha se Bušago se ile sa tsebiša ka phetogo e dirilwego ya diiri tšeo di nyakegago bakeng sa babulamadibogo. Ba bantši ba ile ba diriša sebaka se ka mo go holago gomme ba tsena lelokelelong la babulamadibogo ba ka mehla goba ba go thuša. Ka mohlala, dikgweding tše nne tša pele almanakeng ya 1999, ofisi ya lekala ya Netherlands e ile ya amogela dikgopelo tša bobulamadibogo bja ka mehla tše ipoeleditšego gane go feta tšeo di ilego tša amogelwa nakong e swanago ngwageng wa ka pele. Ghana e bega gore: “Ga e sa le pakane e mpsha ya diiri e thoma go šoma, palo ya babulamadibogo ba rena ba ka mehla e ile ya ya godimo ganyenyane-ganyenyane.” Ngwageng wa tirelo wa 1999, palo ya babulamadibogo lefaseng ka bophara e ile ya fihla go 738 343—e lego pontšho e kgahlišago ya go ba “dirôtô medirong e botse.”—Tito 2:14.
7. Jehofa o ile a šegofatša bjang modiro o dirwago ka phišego wa bahlanka ba gagwe?
7 Na Jehofa o šegofaditše modiro wo wa phišego? Ee. O bolela ka Jesaya gore: “Takataketša mahlô O xadiê; ka moka xa bôná ba a kxobokana, ba tla xo wene; barwa ba xaxo ba tla bà e-tšwa kxolê, barwedi ba xaxo ba kukilwe ka mabôxô.” (Jesaya 60:4) “Barwa” le “barwedi” ba ba tloditšwego bao ba kgobokeditšwego ba sa dutše ba hlankela Modimo ka phišego. Gona bjale, dinku tše dingwe tša Jesu di kgobokeletšwa lehlakoreng la “barwa” le “barwedi” ba Jehofa ba tloditšwego dinageng tše 234 le dihlakahlakeng tša lewatle.
“Medirô e Botse ka Moka”
8. Dihlatse tša Jehofa di swaregile ‘medirong efe e botse’?
8 Bakriste ba na le boikarabelo bja go bolela ditaba tše di lokilego tša Mmušo le go thuša batho ba thabelago gore e be barutiwa. Eupša ba ‘kgonišwa go dira mediro e botse ka moka.’ (2 Timotheo 3:17) Ka gona, ka lerato ba hlokomela malapa, ba bontšha go amogela baeng gotee le go etela balwetši. (1 Timotheo 5:8; Ba-Hebere 13:16) Gape baithapi ba tšea karolo medirong e bjalo ka ya go aga Diholo tša Mmušo—mošomo wo le wona o neago bohlatse. Kua Togo ka morago ga go agwa ga holo e nngwe ya mmušo, balaodi ba kereke ya lefelong leo e nago le tutuetšo e kgolo ba be ba nyaka go tseba lebaka leo ka lona Dihlatse tša Jehofa di kgonago go ikagela meago ya tšona mola kereke e be e swanelwa ke go thwala batho bakeng sa morero wo! Togo e bega gore go agwa ga Diholo tša Mmušo tša boemo bjo bobotse go kgoma tikologo gabotse mo e lego gore batho ba bangwe ba leka go hira goba go aga dintlo mafelong ao go ona diholo di tlago agiwa.
9. Dihlatse tša Jehofa di ile tša arabela bjang ge dikotsi tša tlhago di hlasela?
9 Ka dinako tše dingwe, go nyakega gore go dirwe mohuta o mongwe wa modiro o mobotse. Ngwageng o fetilego wa tirelo dinaga tše dintši di ile tša hlaselwa ke dikotsi tša tlhago, gomme gantši bao ba bego ba nea thušo pele tiragalong e be e le Dihlatse tša Jehofa. Ka mohlala, bogolo bja naga ya Honduras bo ile bja senywa ke Ledimo la Mitch. Kapejana, lekala le ile la hloma dikomiti tša go hlokomela maemo a tšhoganetšo gore di rulaganye mediro ya tlhakodišo. Dihlatse tša kua Honduras le dinaga tše dingwe tše dintši di ile tša neela ka diaparo, dijo, dihlare tša kalafo le dilo tše dingwe tša motheo. Dikomiti tša tša Meago tša Tikologo di ile tša diriša bokgoni bja tšona go aga dintlo lefsa. Go se go ye kae, ke ge banababo rena bao e bego e le bahlaselwa ba kotsi ya tlhago ba thušwa gore ba boele medirong ya bona ya ka mehla. Kua Ecuador, Dihlatse tša Jehofa di ile tša thuša banababo tšona ge mafula a magolo a be a senya dintlo tše dingwe. Ka morago ga go bogela tsela e šomago yeo di ilego tša swaragana le boemo ka yona, mohlankedi wa mmušo o ile a re: “Ge nkabe ke na le sehlopha se, ke be ke tla dira mehlolo! Batho ba swanago le lena ba swanetše go ba gona dikarolong ka moka tša lefase.” Modiro woo o mobotse o tlišetša Jehofa Modimo theto e bile ke bohlatse bja ‘boineelo bja rena go Modimo bjo bo holago dilong tšohle.’—1 Timotheo 4:8, NW.
Ba tla ‘ba Fofa Bo-ka Maru’
10. Go sa šetšwe dipalo tše di fokotšegago tša batlotšwa, ke ka baka la’ng leina la Jehofa le bolelwa go feta le ge e le neng pele?
10 Jehofa bjale o botšiša gore: “Ké bô-mang bála ba fofaxo bo-ka maru, byalo ka maeba xe a kxoroxêla dihlaxeng tša ôna? Ka kxonthe, dihlakehlake di ntebeletše. Ma-sela-watlê a kwa Tarasisi a etile pele, a tliša bana ba xaxo ba kxolê. . . . Merakô ya xaxo e axwa ke bana ba ba-ntlê; ’me dikxoši tša bôná di a Xo hlankêla.” (Jesaya 60:8-10) Ba pele ba go arabela ‘letagong’ la Jehofa e bile “barwa” ba gagwe, e lego Bakriste ba tloditšwego. Ka morago go ile gwa latela “ba-ntlê,” e lego lešaba le legolo leo le hlankelago banababo lona ba tloditšwego ka potego e sa kwanantšhego, le latela boetapele bja bona go boleleng ditaba tše di lokilego. Ka gona, le ge palo ya batlotšwa e fokotšega, leina la Jehofa le bolelwa lefaseng ka moka go feta le ge e le neng pele.
11. (a) Ke eng seo se sa dutšego se tšwela pele gomme se bile le mafelelo afe ka 1999? (b) Ke dinaga dife tše di bilego le dipalo tše dikgolo tša bao ba kolobeditšwego bakeng sa 1999? (Bona tšhate go matlakala 17-20.)
11 Ka baka leo, ba dimilione ba “byalo ka maeba xe a kxoroxêla dihlaxeng tša ôna,” ba hwetša botšhabelo ka phuthegong ya Bokriste. Go okeletšwa ka ba dikete tše makgolo ngwageng o mongwe le o mongwe, gomme tsela e sa bulegetše ba bangwe ba bantši. Jesaya o re: “Dikxôrô tša xaxo di tlo dula di ahlame; di ka se tswalêlwe mosexare le bošexo, xore xo wene xo tlišwê menônô ya dithšaba.” (Jesaya 60:11) Ngwagola go kolobeditšwe ba 323 439 e le go bontšha boineelo bja bona go Jehofa, gomme ga se a hlwa a tswalela dikgoro. “Matsaka a dithšaba ka moka,” e lego ditho tša lešaba le legolo, a sa dutše a kgobokana ka bona. (Hagai 2:7) Ga go na ba ba nyakago go tlogela lefsifsi bao ba gomišetšwago morago. (Johane 12:46) Anke bohle ba bjalo ba se ke ba lahlegelwa ke tebogo ya bona ya go leboga seetša!
Go se Boife ge go Lebanwe le Kganetšo
12. Bao ba ratago lefsifsi ba ile ba leka bjang go tima seetša?
12 Bao ba ratago lefsifsi ba hloile seetša sa Jehofa. (Johane 3:19) Ba bangwe ba bile ba leka go tima seetša seo. Se ga se selo se se sa letelwago. Gaešita le Jesu, “seetša-etša sa xo bônêxêla batho bohle,” o ile a kwerwa, a ganetšwa gomme mafelelong a bolawa ke batho ba gabo. (Johane 1:9) Go theoša le lekgolo la bo-20 la nywaga, Dihlatse tša Jehofa le tšona di ile tša kwerwa, tša golegwa, tša thibelwa, tša ba tša bolawa, ge di dutše di boneša seetša sa Jehofa ka potego. Nywageng ya morago bjale, baganetši ba ile ba retologela go phatlalatšeng maaka mekerong ya ditaba ka bao ba bonešago seetša sa Modimo. Ba bangwe ba nyaka go dira batho gore ba dumele gore Dihlatse tša Jehofa di kotsi gomme di swanetše go thibelwa. Na baganetši ba bjalo ba ile ba atlega?
13. Go ile gwa feleletša ka eng tabeng ya go ala ditherešo ka bohlale mekerong ya ditaba mabapi le modiro wa rena?
13 Aowa. Moo boemo bo bego bo dumela, Dihlatse tša Jehofa di ile tša ya mekerong ya ditaba go yo hlalosa ditherešo. Ka baka leo, leina la Jehofa le ile la phatlalatšwa ka bophara dikuranteng le dimakasineng gotee le radiong le thelebišeneng. Se se bile le mafelelo a mabotse modirong wa boboledi. Ka mohlala, kua Denmark lenaneo leo le gašwago thelebišeneng ya setšhaba le be le bolela ka taba e rego, “Lebaka leo ka lona tumelo ya ma-Denmark e fokotšegago.” Go ile gwa boledišanwa le Dihlatse tša Jehofa gotee le ba bangwe. Ka morago ga moo, mosadi yo a bonego lenaneo o ile a hlalosa ka gore: “Go be go le molaleng go bona bao ba bego ba e-na le moya wa Modimo.” Go ile gwa thongwa thuto le yena.
14. E le go lewa ke dihlong ga bona, ke eng seo kgaufsinyane baganetši ba tla gapeletšegago gore ba se lemoge?
14 Dihlatse tša Jehofa di a tseba gore ba bantši lefaseng le ba tla di ganetša. (Johane 17:14) Lega go le bjalo, di matlafatšwa ke boporofeta bja Jesaya bjo bo rego: “Le bana ba bála ba bexo ba Xo xata, ba tlo tla ba lothša; ’me ba ba bexo ba Xo nyatša ba tlo khunama felô mo O xatilexo ka dinaô; ba tlo re: O motse wa Morêna, Tsione xa-Mokxêthwa wa Isiraele.” (Jesaya 60:14) E le go lewa ke dihlong ga bona, kgaufsinyane baganetši ba tla swanelwa ke gore ba lemoge gore ge e le gabotse ba be ba dutše ba lwantšhana le Modimo ka boyena. Ke mang yo a ka fenyago ntweng e bjalo?
15. Dihlatse tša Jehofa di “anywa ’tswêlê la dithšaba” bjang, gomme se se ile sa bonagatšwa bjang modirong wa tšona wa go ruta le go bolela ebangedi?
15 Jehofa o holofetša ka mo go tšwelago pele gore: “Ke [tlo] Xo dira wa letaxô le le sa felexo . . . O tlo anywa ’tswêlê la dithšaba, matswêlê a bahumaxadi, wa tlo tseba xe Mophološi w’axo . . . è le Nna Morêna.” (Jesaya 60:15, 16) Ee, Jehofa ke Mophološi wa batho ba gagwe. Ge e ba ba ithekga ka yena, ba tla dula ba le gona ‘ka mo go sa felego.’ Gape ba tla “anywa ’tswêlê la dithšaba,” ba diriša matlotlo a itšego a lego gona bakeng sa go tšwetša pele borapedi bja therešo. Ka mohlala, go dirišwa ka bohlale ga thekinolotši ya computer le ya tša poledišano go dira gore go gatišwa sammaletee ga kgatišo ya Morokami ka maleme a 121 le Phafoga! ka a 62 go be bonolo. Go hlamilwe lenaneo le itšego la computer ka go lebanya bakeng sa go thuša go fetoleleng New World Translation ka maleme a mafsa, gomme phetolelo ye e tliša lethabo le legolo. Nakong ya ge phetolelo ya se-Croatia ya Mangwalo a Bakriste a Segerika e be e lokollwa ka 1999, ba dikete ba ile ba tšholla megokgo ya lethabo. Ngwanabo rena yo mongwe yo a tšofetšego o itše: “Ke kgale kudu ke letile Beibele ye. Bjale nka nna ka ikhwela ka khutšo!” Go abja ga New World Translation, e feletše goba ka dikarolwana, go fetile dimilione tše 100 ka maleme a 34.
Ditekanyetšo tše Phagamego tša Boitshwaro
16, 17. (a) Le ge go le thata, ke ka baka la’ng go kgomarela ditekanyetšo tša Jehofa tše phagamego go le bohlokwa? (b) Ke phihlelo efe e bontšhago gore bafsa ba ka phema go šilafatšwa ke lefase?
16 Jesu o itše: “Mo-dira-tše-mpe mang le mang ó hloile seetša.” (Johane 3:20) Ka lehlakoreng le lengwe, bao ba dulago seetšeng ba rata ditekanyetšo tša Jehofa tše phagamego. Jehofa ka Jesaya o re: “Ké mo sethšaba s’axo e tl’o xo ba sa baloki fêla.” (Jesaya 60:21a) E ka ba tlhohlo go kgomarela ditekanyetšo tša go loka lefaseng leo go lona go atilego boitshwaro bjo bo gobogilego bja botona le botshadi, go bolela maaka, megabaru le boikgantšho. Ka mohlala, dinageng tše dingwe, maemo a tša boiphedišo a kaonefala kudu gomme go bonolo gore motho a arošetšwe tseleng ya go ikgafela go phegelela mahumo. Lega go le bjalo, Paulo o lemošitše ka gore: “Ba ba rataxo xo huma ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong.” (1 Timotheo 6:9) Ke masetla-pelo a magolo gakaakang ge motho a itahlela ka hlogo makgotleng a magolo a tša kgwebo mo e lego gore o gafa le dilo tšeo e tlogago e le tša bohlokwa, bjalo ka go kopanela le Bakriste, tirelo e kgethwa, melao ya motheo ya boitshwaro le boikarabelo bja lapa!
17 Go kgomarela ditekanyetšo tša go loka go ka ba thata kudu-kudu bakeng sa bafsa, ge ba bantši ba bagwera ba bona ba akaretšwa tirišong e mpe ya dihlare-tagi le boitshwarong bjo bo gobogilego. Kua Suriname, ngwanenyana wa nywaga e 14 o ile a batamelwa ke mošemane yo a bogegago sekolong gomme a mo kgopela gore a be le kopano ya botona le botshadi le yena. Ngwanenyana o ile a gana, a mo hlalosetša gore Beibele e iletša dilo tše bjalo ka ntle ga lenyalo. Banenyana ba bangwe kua sekolong ba ile ba mo kwera gomme ba leka go mo gatelela gore a fetoše monagano wa gagwe, ba bolela gore ngwanenyana yo mongwe le yo mongwe o be a nyaka go robala le mošemane yoo. Lega go le bjalo, ngwanenyana yo monyenyane o ile a ema a tiile. Ka morago ga dibeke tše mmalwa, mošemane o ile a hlahlobja gomme a hwetšwa a e-na le twatši ya HIV gomme a babja o šoro. Ngwanenyana yo o be a thabetše gore o ile a kwa taelo ya Jehofa ya go ‘ila bootswa.’ (Ditiro 15:28, 29) Dihlatse tša Jehofa di ikgantšha kudu ka bafsa bao ba lego gare ga tšona bao ba emelago ka go tia seo se lokilego. Tumelo ya bona le ya batswadi ba bona, e ‘reta’—e godiša—leina la Jehofa Modimo.—Jesaya 60:21b.
Jehofa o Neile Koketšego
18. (a) Ke selo sefe se segolo seo Jehofa a se diretšego batho ba gagwe? (b) Ke bohlatse bofe bjo bo lego gona bja gore kgolo e tla tšwela pele, gomme ke ditebelelo dife tša letago tšeo di letetšego bao ba dulago ba le seetšeng?
18 Ee, Jehofa o edišetša batho ba gagwe, o a ba šegofatša, o a ba hlahla le go ba matlafatša. Lekgolong la bo-20 la nywaga, ba ile ba bona phethagatšo ya mantšu a Jesaya: “E monyenyane ó tlo tšwa ba sekete; ’me mmôtlana ó tlo tšwa ’thšaba se matla. Ké Nna Morêna e ke tl’o xo dira tšeo ka pelá lebakeng la xôna.” (Jesaya 60:22) Go tšwa go ba sego kae morago kua ka 1919, “e monyenyane” o fetogile ba fetago “’thšaba se matla.” Gomme bofelo bja kgolo e bjalo ga se bja hlwa bo e-ba gona! Ngwagola ba 14 088 751 ba ile ba ba gona monyanyeng wa Segopotšo sa lehu la Jesu. Ba bantši ba ba e be e se Dihlatse tše mafolofolo. Re thabela gore ba bile gona monyanyeng wo o bohlokwa, gomme re ba kgothaletša gore ba tšwele pele ba e-ya seetšeng. Jehofa o sa dutše a edišetša batho ba gagwe ka kudu. Mojako o lebišago mokgatlong wa gagwe o sa bulegile. Ka gona, eka bohle ba ka ikemišetša go dula ba le seetšeng sa Jehofa. Seo se re tlišetša ditšhegofatšo tše dikgolo gakaakang gona bjale! Gomme seo se tla re tlišetša lethabo le legolo gakaakang nakong e tlago ge tlholo ka moka e tla be e reta Jehofa le go thabela seetša sa letago la gagwe!—Kutollo 5:13, 14.
Na o ka Hlalosa?
• Ke bomang bao ba edišitšego letago la Jehofa mehleng ye ya bofelo?
• Ke eng se se bontšhago gore phišego ya batho ba Jehofa ga se ya hwelela?
• Ke mediro efe e mengwe e mebotse yeo Dihlatse tša Jehofa di swaregilego ka yona?
• Ke eng seo re se holofetšego, go sa šetšwe kganetšo e šoro?
[Dipotšišo tša Thuto]
[Tšhate go letlakala 17-20]
PEGO YA NGWAGA WA TIRELO WA 1999 YA DIHLATSE TŠA JEHOFA LEFASENG KA BOPHARA
(Bona bolumo)
[Diswantšho go letlakala 15]
Batho ba sa dutše ba kgeregela mokgatlong wa Jehofa
[Seswantšho go letlakala 16]
Re thabela gore Jehofa o tlogetše mojako o ahlame bakeng sa bao ba ratago seetša