Hlagolela Tswalano ya Kgaufsi-ufsi le Jehofa

MORUTIWA Jakobo o ngwadile gore: “Batamêlang Modimo, le Yêna a Le batamêlê.” (Jakobo 4:8) Mopsalme Dafida le yena o opetše ka gore: “Morêna ó kwana le ba ba mmoifaxo.” (Psalme 25:14) Go molaleng gore Jehofa Modimo o nyaka gore re be le tswalano ya kgaufsi-ufsi le yena. Lega go le bjalo, ga se bohle bao ba rapelago Modimo le bao ba kwago melao ya gagwe bao e lego gore ba ikwa ba le kgaufsi le yena.

Go thwe’ng ka wena? Na o na le tswalano ya kgaufsi le ya motho ka noši le Modimo? Ga go na pelaelo gore o nyaka go mmatamela. Re ka hlagolela bjang tswalano ya kgaufsi-ufsi le Modimo? Se se tla bolela’ng go rena? Kgaolo ya boraro ya puku ya Beibele ya Diema e nea dikarabo.

Bontšha Botho bjo Lerato le Therešo

Kgoši Salomo wa Isiraele ya bogologolo o thoma kgaolo ya boraro ya Diema ka mantšu a rego: “Ngwan’a-ka! Se lebalê thutô ya-ka. Pelo ya xaxo a e lôtê ditaêlô tša-ka. Xobane di tlo Xo tlišetša bontši bya matšatši, le nywaxa ya bophelô, le têtlêxô.” (Diema 3:1, 2) Ka ge Salomo a ngwadile a le ka tlase ga pudulelo ya Modimo, keletšo ye e kego ke ya tate e tloga e e-tšwa go Jehofa Modimo gomme e lebišitšwe go rena. Mo re eletšwa gore re phele ka dikgopotšo tša Modimo​—molao wa gagwe goba thuto le ditaelo tša gagwe—​tšeo di begilwego ka Beibeleng. Ge e ba re dira se, ‘re tlo tiišetšwa bontši bja matšatši [le khutšo, PK].’ Ee, le gona bjale re ka thabela bophelo bja khutšo e bile re ka phema go phegelela dilo tšeo di re dirago gore re be kotsing ya lehu la ka pela leo gantši le welago badira-bobe. Go feta moo, re ka naganišiša ka kholofelo ya bophelo bjo bo sa felego lefaseng le lefsa la khutšo.​—Diema 1:24-31; 2:21, 22.

Salomo ge a tšwela pele o re: “A leratô [botho bjo lerato, “NW”] le therešô di se Xo tloxêlê. Di aparê bo-ka-pheta molaléng; di tlôkê pelong bo-ka ’tlapeng. Ké mo O tl’o xo hwetša mahlô a Modimo le a batho à Xo lebeletše ka leratô le ka botho.”​—Diema 3:3, 4.

Lentšu la leleme la mathomong bakeng sa polelwana “botho bjo lerato” le fetolelwa ka tsela e nngwe e le “lerato le le botegago ka mo go sa kwanantšhego” gomme se se akaretša go botegelana, botee le potego e sa kwanantšhego. Na re ikemišeditše go dula re kgomaretše Jehofa go sa šetšwe seo se diregago? Na re bontšha botho bjo lerato ditswalanong tša rena le badumedi-gotee? Na re šomela gore re dule re le kgaufsi le bona? Ditirišanong tša rena tša letšatši le letšatši le bona, na re boloka ‘molao wa botho bjo lerato lelemeng la rena’ gaešita le ka tlase ga maemo a lekago?​—Diema 31:26, bapiša le NW.

Ka ge a tlaletšwe ke botho bjo lerato, Jehofa o “ikemišeditše go lebalela.” (Psalme 86:5) Ge e ba re sokologile dibeng tša rena tša nakong e fetilego gomme gona bjale re letliša ditsela tša dinao tša rena, re kgonthišetšwa gore “mabaka a tapoloxô” a tla tla a e-tšwa go Jehofa. (Ditiro 3:19, 20) Na ga se ra swanela go ekiša Modimo wa rena ka go lebalela ba bangwe diphošo tša bona?​—Mateo 6:14, 15.

Jehofa ke “Modimo-mmotexi,” gomme o nyaka “therešô” go bao ba nyakago go ba le tswalano ya kgaufsi-ufsi le yena. (Psalme 31:5) Na ruri  re ka letela gore Jehofa e be Mogwera wa rena ge e ba re phela maphelo a mabedi​—re itshwara ka tsela e itšego ge re na le bagwera ba Bakriste gomme re itshwara ka e nngwe e fapanego ge ba sa re bone​—bjalo ka “batho ba maaká” bao ba utago mohuta wa motho yo ba lego yena? (Psalme 26:4) E tla ba bošilo gakaakang go dira bjalo ka ge Jehofa “tšohle ó di bôna dì hlobotše dì khurumolotšwe”!​—Ba-Hebere 4:13.

Botho bjo lerato le therešo di swanetše go tšeelwa godimo bjalo ka phetha e bohlokwa-hlokwa yeo e ‘aperwego molaleng,’ ka gobane di re thuša go ‘hwetša mahlo a Modimo le a batho a re lebeletše ka lerato le botho.’ Ga go nyakege gore re bontšhe dika tše ka ntle feela eupša gape go nyakega le gore re di gatiše “pelong bo-ka ’tlapeng,” re di dire gore e be karolo ya motheo ya semelo sa rena.

Hlagolela go Bota Jehofa ka mo go Feletšego

Kgoši e bohlale e tšwela pele ka gore: “Bô’ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.”​—Diema 3:5, 6.

Jehofa ka kgonthe o swanelwa ke gore re mmote ka mo go feletšego. Bjalo ka Mmopi, o na le “matla a maxolo” e bile ke Mothopo wa “matla a maxolo.” (Jesaya 40:26, 29) O kgona go phetha tšohle tšeo a di rerilego. Ka gona, leina la gagwe ka bolona ge e le gabotse le bolela “Yo a Bakago go ba Gona,” gomme le aga kgodišego ya rena bokgoning bja gagwe bja go phetha seo a se holofeditšego! Therešo ya gore ‘Modimo ga a aketše’ e mo dira gore e be yena go mothofatšwa ga therešo. (Ba-Hebere 6:18) Seka sa gagwe se segolo ke lerato. (1 Johane 4:8) “Tseleng tša xaxwe tšohle ó a loka, ké yo botho mo ’tirong tša xaxwe tšohle.” (Psalme 145:17) Ge e ba re sa kgone go bota Modimo, re ka bota mang? Ee, gore re hlagolele go mmota, re swanetše ‘go leka re bone gore Morena ke yo bolo’ ka go diriša seo re ithutago sona ka Beibeleng bophelong bja rena le ka go naganišiša ka dilo tše botse tšeo se se di tšweletšago.​—Psalme 34:8.

Re ka ‘tseba Jehofa bjang ditseleng tša rena ka moka’? Mopsalme yo a buduletšwego o re: “Ke êlêlwa ditirô tša xaxo ka moka; ke akanya tše Wêna O di dirilexo.” (Psalme 77:12) Ka ge Modimo a sa bonwe, go naganišiša ka ditiro tša gagwe tše dikgolo le ka ditirišano tša gagwe le batho ba gagwe ke gabohlokwa bakeng sa go hlagolela tswalano ya kgaufsi-ufsi le yena.

Thapelo le yona ke tsela e bohlokwa ya go tseba Jehofa. Kgoši Dafida o ile a “hlwa” a bitša Jehofa. (Psalme 86:3) Dafida o be a fela a rapela bošego ka moka, go etša nakong ya ge e be e le moleleri lešokeng. (Psalme 63:6, 7) Moapostola Paulo o kgothaditše ka gore: “Le bê barapedi ba xo tliša dithapêlô tšohle . . . ka Môya.” (Ba-Efeso 6:18) Re rapela gakae? Na re thabela go ba le poledišano e tšwago pelong le Modimo? Ge re lebeletšane le maemo a lekago, na re mo kgopela thušo? Na re tsoma tlhahlo ya gagwe ka thapelo pele re dira diphetho tše bohlokwa? Dithapelo tša rena tše di tšwago pelong go Jehofa di re dira gore a re rate. Gomme re na le kgonthišetšo ya gore o tla theetša dithapelo tša rena gomme a re ‘thulele tsela.’

Ke bošilo gakaakang go ‘ithekga ka tlhaologanyo ya rena’ goba ya batho ba tumilego lefaseng mola e le gore re ka bea kholofelo ya rena e feletšego go Jehofa! Salomo o re: “O se kê wa ithsema yo bohlale.” Ka mo go fapanego, o eletša gore: “Boifa Morêna; ila sebe. Ké mo O tl’o xo ba le mmele o thabaxo, wa iphsina mo dithong tša xaxo.” (Diema 3:7, 8) Poifo e lokilego ya go boifa go se kgahliše Modimo e swanetše go buša ditiro tša rena ka moka, dikgopolo gotee le maikwelo. Poifo e bjalo ya borapedi e re thibela go dira se sebe e bile ke yeo e fodišago moyeng le e lapološago.

Nea Jehofa tše Kaone-kaone

Re ka batamela Modimo ka tsela efe e nngwe? Kgoši e laela gore: “Loba Morêna ka khumô ya xaxo, le ka di-thaka-ngwaxa tša punô ya xaxo ka moka.” (Diema 3:9) Go loba Jehofa go bolela go mo godiša le go mo reta phatlalatša ka go tšea karolo le go thekga modiro wa go bolela phatlalatša ka leina la gagwe. Dilo tša bohlokwa tšeo  re godišago Jehofa ka tšona mehleng ya rena ke nako ya rena, bokgoni bja rena, matla a rena le mahumo a dilo tše di bonagalago. Tše e swanetše go ba di-thaka-ngwaga tša puno​—tše kaone-kaone. Na tsela yeo re dirišago mahumo a rena ga se ya swanela go bonagatša boikemišetšo bja rena bja go ‘tšwela pele re tsoma mmušo pele le go loka ga Modimo’?​—Mateo 6:33, bapiša le NW.

Go loba Jehofa ka dilo tša bohlokwa tša rena ga go ke go dula go sa putswe. Salomo o kgonthišetša gore: “Ke moka dipolokelo tša gago tša didirišwa di tla tlala ka boati; gomme dinkgo tša gago tša go gamolela morara di tla tlala wa go falala ka beine e mpsha.” (Diema 3:10, NW) Le ge katlego ya moya ka boyona e sa lebiše katlegong ya dilo tše di bonagalago, go diriša mahumo a rena ka pelo e bulegilego bakeng sa go godiša Jehofa go tliša ditšhegofatšo tše di humilego. Go dira thato ya Modimo e be e le “sejô” se neago Jesu matla. (Johane 4:34) Ka mo go swanago, go ba le karolo modirong wa go bolela le wa go dira barutiwa wo o tumišago Jehofa go a re matlafatša. Ge e ba re phegelela modirong woo, dipolokelo tša rena tša moya di tla tlala ka boati. Lethabo la rena​—leo le swantšhetšwago ke beine e mpsha​—le tla falala.

Na ga re lebelele go Jehofa gape le go mo rapela gore a re nee dijo tše di lekanego tša nama tša letšatši le letšatši? (Mateo 6:11) Ge e le gabotse, selo se sengwe le se sengwe seo re nago le sona se tla go rena se e-tšwa go Tatago rena yo lerato wa legodimong. Jehofa o tla re tšhollela ditšhegofatšo tše oketšegilego go fihla tekanyong yeo re dirišago mahumo a rena bakeng sa go mo tumiša.​—1 Ba-Korinthe 4:7.

Amogela Tayo ya Jehofa

Ka go lemoga bohlokwa bja tayo tabeng ya go hwetša tswalano ya kgaufsi-ufsi le Jehofa, kgoši ya Isiraele e re eletša gore: “Ngwan’a-ka! Se nyatšê thsôlô ya Morêna; O se tsôtê kôtlô ya xaxwe. Xobane Morêna ó ôtla moratwa wa xaxwe, byalo ka tata-xo-motho xe a ôtla morwa’axwe moratwa.”​—Diema 3:11, 12.

Lega go le bjalo, go ka no se be bonolo gore rena re amogele tayo. Moapostola Paulo o ngwadile gore: “Xo laiwa xohle, xa xo thabiše xe motho à sa laiwa, xo byalo ka e ke ké xo hlokofatšwa; fêla, ka moraxo xo tšweletša seenywa sa tokô le leaxô xo bao ba tlwaetšwaxo xo laiwa.”  (Ba-Hebere 12:11) Tsholo le tayo ke karolo e nyakegago ya tlwaetšo yeo e re batametšago kgaufsi le Modimo. Phošollo e tšwago go Jehofa​—go sa šetšwe gore re e amogela e e-tšwa go batswadi, ka phuthego ya Bokriste goba ka go naganišiša ka Mangwalo nakong ya thuto ya motho ka noši​—ke pontšho ya lerato la gagwe go rena. Re dira ka bohlale ge re e amogela.

Kgomarela Bohlale le Temogo

Se se latelago, Salomo o gatelela bohlokwa bja bohlale le temogo tabeng ya go hlagolela tswalano ya kgaufsi le Modimo. O re: “Lehlôxônôlô le n’e khwetša-bohlale, mo-tlêlwa-ke-temoxô. Mošabô wa bohlale o phala wa lehumô; bo ruiša motho tše di fetišaxo thsipi e khwibidu. . . . Bohlale ké sehlare sa bophêlô sa ba bo swerexo; wà swara wa tiiša, O tlo ba wa mahlatse.”​—Diema 3:13-18.

Ge a re gopotša ka pontšho ya bohlale le temogo medirong ya Jehofa e makatšago ya tlholo, kgoši e re: “Bohlale, Morêna ó theile ’fase lohle ka byôna; ó thekxile maxodimo ka yôna thlaloxanyô [“temogo,” NW]. . . . Ngwan’a-ka! Bohlale a bo se Xo široxêlê; ipolokêlê thlaloxanyô le pelo-keledi. Ké tšôna di phedišaxo môya w’axo, di Xo apeša pheta molaléng.”​—Diema 3:19-22.

Bohlale le temogo ke dika tša go boifa Modimo. Ga go nyakege gore re di hlagolele feela eupša gape re swanetše go di kgomarela ka go dira gore le ka mohla re se ke ra nyefiša go ithuteng ga rena Mangwalo ka mafolofolo le go diriša seo re ithutago sona. Salomo o tšwela pele ka gore: “Wa tlo tseb’o swara tsela y’axo Ò iketlile; leoto la xaxo le ka se kê la kxopya.” O oketša ka gore: “Xe O robetše, O ka se tširuxe; O tlo rôbala wa natefêlwa ke borôkô.”​—Diema 3:23, 24.

Ee, re ka sepela re šireletšegile gomme ra robala re e-na le khutšo ya monagano ge re dutše re letile letšatši leo le tlago bo-ka lehodu la “thsenyêxô” godimo ga lefase le kgopo la Sathane. (1 Ba-Thesalonika 5:2, 3; 1 Johane 5:19) Gaešita le nakong ya masetla-pelo a magolo ao a batametšego, re ka kgonthišetšwa ka se: “O se šiê xo ka wêlwa ke tše di thšošaxo, le mohla xo tlaxo kotsi ya xo senya ba babe. Xobane O bô’ta Morêna; Yêna ó efoša ’oto l’axo morêô.”​—Diema 3:25, 26; Mateo 24:21.

Dira Seo se Lokilego

Salomo o eletša ka gore: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.” (Diema 3:27) Go direla ba bangwe botse go akaretša go diriša mahumo a rena ka pelo e bulegilego bakeng sa bona, gomme se se na le mahlakore a mantši. Eupša na go thuša ba bangwe go ba le tswalano ya kgaufsi le Modimo ga se selo se phalago tšohle seo re ka ba direlago sona ‘lebakeng le la bofelo’? (Daniele 12:4) Ka gona, ye ke mehla ya gore re bontšhe phišego modirong wa go bolela ka Mmušo le wa go dira barutiwa.​—Mateo 28:19, 20.

Kgoši e bohlale gape e lokeletša e mengwe ya mekgwa yeo re swanetšego go e phema ka mo go feletšego, e re: “Se bolêlê le wa xeno wa re: Tloxa byale; O boê ke Xo neê ka moswana! etšwe Ò na nasô’. Wa xeno O se mo loxêlê maanô, mola a axile naxô’ à thabile. O se fo thôma ntwa le motho à sa ka a Xo dira sebe. Wa mexabaru O se mo kxanyoxê; O se ithlaolêlê tsela xo tša xaxwe ’tsela.”​—Diema 3:28-31.

Ge a bolela ka boripana lebaka leo ka lona a neago keletšo ye, Salomo o re: “Xobane Morêna ó hlaswa sehlôla, ó kwana le baloki. Lapa la yo mobe, Morêna ó tlo le hlolêla kotsi; ó tlo šexofatša motse wa yo boló. Bakweri, a lebana nabô, ó a kwêra; ba bolêta ó a ekêlêla. Ba-bohlale, bohwa bya bôná ké tlôtlô; boxolo bya mašilo ké xo kwêrwa.”​—Diema 3:32-35.

Ge e ba re nyaka go thabela tswalano ya kgaufsi-ufsi le Jehofa, ga se ra swanela go loga maano-mabe a bohwirihwiri le ao a gobatšago. (Diema 6:16-19) Re tla hwetša kamogelo ya Modimo le tšhegofatšo ya gagwe ge feela re dira seo se lokilego mahlong a gagwe. Re ka amogela gape le kgodišo yeo re sa e tsomago ge ba bangwe ba lemoga gore re dira dilo ka go dumelelana le bohlale bja Modimo. Ka gona anke re ganeng ditsela tša bofora le tše šoro tša lefase le le kgopo. Ruri, a re phegeleleng tsela ya go loka gomme re hlagolele tswalano ya kgaufsi-ufsi le Jehofa!

[Diswantšho go letlakala 25]

“Loba Morêna ka khumô ya xaxo”